യുവജ​നങ്ങൾ ചോദി​ക്കു​ന്നു . . .

എനിക്ക്‌ ഒരു ക്രെഡിറ്റ്‌ കാർഡ്‌ ഉണ്ടായി​രി​ക്കേ​ണ്ട​തു​ണ്ടോ?

“16 വയസ്സു​ള്ള​പ്പോൾ ആണ്‌ ക്രെഡിറ്റ്‌ കാർഡ്‌ വാങ്ങാ​നുള്ള ക്ഷണം എനിക്ക്‌ ആദ്യമാ​യി തപാലി​ലൂ​ടെ ലഭിച്ചത്‌. . . . 18 വയസ്സു കഴിഞ്ഞ​പ്പോൾ എനിക്ക്‌ 60,000-ത്തോളം ഡോള​റി​ന്റെ കടം ഉണ്ടായി​രു​ന്നു.”—ക്രിസ്റ്റീൻ.

അടിയ​ന്തിര സാഹച​ര്യ​ങ്ങൾ ഉണ്ടാകു​മ്പോ​ഴും ഒരുപക്ഷേ ഏതെങ്കി​ലും കാരണ​വ​ശാൽ പണം രൊക്കം കൊടു​ക്കാൻ ഇല്ലാതെ വരു​മ്പോ​ഴും ഉപയോ​ഗി​ക്കാ​മ​ല്ലോ എന്നു കരുതി​യാണ്‌ ക്രിസ്റ്റീൻ ക്രെഡിറ്റ്‌ കാർഡ്‌ വാങ്ങി​യത്‌. എന്നാൽ പിന്നീട്‌ സംഗതി​കൾ പിടി​വി​ട്ടു പോയി. “യാതൊ​രു നിയ​ന്ത്ര​ണ​വു​മി​ല്ലാ​തെ കണ്ണിൽ കണ്ടതെ​ല്ലാം ഞാൻ വാങ്ങിച്ചു കൂട്ടാൻ തുടങ്ങി,” ക്രിസ്റ്റീൻ പറയുന്നു. “ഇഷ്ടമി​ല്ലാത്ത സാധനങ്ങൾ പോലും ഞാൻ വാങ്ങി.” എന്നാൽ ഇപ്പോൾ, ക്രെഡിറ്റ്‌ കാർഡി​നെ കുറി​ച്ചുള്ള ക്രിസ്റ്റീ​ന്റെ വീക്ഷണ​ത്തി​നു മാറ്റം വന്നിരി​ക്കു​ന്നു. “ആ കൊച്ചു പ്ലാസ്റ്റിക്‌ കഷണം എന്റെ ജീവി​തത്തെ ഇത്രയ​ധി​കം താറു​മാ​റാ​ക്കു​മെന്നു ഞാൻ കരുതി​യ​തേ​യില്ല,” അവൾ പറയുന്നു.—ടീൻ മാസിക.

ക്രിസ്റ്റീ​ന്റേത്‌ ഒരു ഒറ്റപ്പെട്ട അനുഭ​വമല്ല. ആ കൊച്ചു പ്ലാസ്റ്റിക്‌ കഷണം, അതായത്‌ ക്രെഡിറ്റ്‌ കാർഡ്‌, ഉപയോ​ഗി​ക്കു​ന്ന​തി​ന്റെ ഫലമായി സാമ്പത്തിക പ്രതി​സ​ന്ധി​യു​ടെ നിലയി​ല്ലാ കയത്തി​ലേക്ക്‌ സ്വയമ​റി​യാ​തെ ഒഴുകി​നീ​ങ്ങുന്ന യുവജ​ന​ങ്ങ​ളു​ടെ എണ്ണം വർധി​ച്ചു​വ​രി​ക​യാണ്‌. കമ്പനികൾ പ്രത്യേ​കി​ച്ചു നോട്ട​മി​ടു​ന്ന​തും യുവജ​ന​ങ്ങ​ളെ​യാണ്‌. ധാരാ​ളി​ക​ളായ പലർക്കും ക്രെഡിറ്റ്‌ കാർഡു​കൾ, സാമ്പത്തിക ഉപദേ​ഷ്‌ട്രി​യായ ജെയ്‌ൻ ബ്രയന്റ്‌ ക്വിൻ വിശേ​ഷി​പ്പി​ക്കു​ന്ന​തു​പോ​ലെ “ഒരു സാമ്പത്തിക ലഹരി​പ​ദാർഥം,” ആയി തീർന്നേ​ക്കാം എന്ന കാര്യം ഈ കമ്പനി​കൾക്ക്‌ അറിയാ​മെന്നു തോന്നു​ന്നു. “എത്രയ​ധി​കം ഉപയോ​ഗി​ക്കു​ന്നു​വോ അത്രയ​ധി​കം ബുദ്ധി​മു​ട്ടാ​യി​രി​ക്കും അവയുടെ ഉപയോ​ഗം നിറു​ത്താ​നും” എന്ന്‌ ജെയ്‌ൻ പറയുന്നു.

ക്രെഡിറ്റ്‌ കാർഡ്‌ ഉണ്ടായി​രി​ക്കു​ന്നതു പ്രയോ​ജ​ന​പ്ര​ദ​മാ​ണെ​ന്നതു ശരിതന്നെ. അടിയ​ന്തിര സാഹച​ര്യ​ങ്ങ​ളി​ലോ പണം കൊണ്ടു​ന​ട​ക്കു​ന്നതു ബുദ്ധി​യ​ല്ലാത്ത അവസര​ങ്ങ​ളി​ലോ ഒക്കെ അത്‌ ഒരു സഹായ​മാണ്‌. ക്രെഡിറ്റ്‌ കാർഡു​കൾക്ക്‌ ഐക്യ​നാ​ടു​ക​ളിൽ ഇത്രയ​ധി​കം പ്രചാരം സിദ്ധി​ക്കാ​നുള്ള ഒരു കാരണ​വും അതാണ്‌. ഇപ്പോൾ മറ്റു രാജ്യ​ങ്ങ​ളി​ലും ഇതിന്റെ ഉപയോ​ഗം വർധി​ച്ചി​ട്ടുണ്ട്‌. എന്നാൽ ഉത്തരവാ​ദി​ത്വ​ബോ​ധ​ത്തോ​ടെ ഉപയോ​ഗി​ക്കാ​ത്ത​പക്ഷം അത്‌ ഉപഭോ​ക്താ​വി​നെ കടത്തി​ലാ​ഴ്‌ത്തി​യേ​ക്കാം. ടൊറ​ന്റോ​യി​ലെ ഗ്ലോബ്‌ ആൻഡ്‌ മെയ്‌ലിൽ വന്ന ഒരു റിപ്പോർട്ടു​തന്നെ പരിചി​ന്തി​ക്കുക. “ടൊറ​ന്റോ​യി​ലെ ക്രെഡിറ്റ്‌ കൗൺസ​ലിങ്‌ സർവീ​സി​ന്റെ സഹായം തേടി​യി​രി​ക്കുന്ന, 20-നും 23-നും ഇടയ്‌ക്ക്‌ പ്രായ​മുള്ള കടബാ​ധി​ത​രു​ടെ എണ്ണ”ത്തിൽ മൂന്നി​രട്ടി വർധനവ്‌ ഉണ്ടായ​താ​യി അതു പ്രസ്‌താ​വി​ക്കു​ന്നു. പലർക്കും 25,000 ഡോളർ വരെ കടം ഉണ്ടായി​രു​ന്നെ​ന്നും കടത്തിന്റെ മുഖ്യ കാരണ​ങ്ങ​ളിൽ ഒന്ന്‌ ക്രെഡിറ്റ്‌ കാർഡ്‌ ബില്ലുകൾ ആയിരു​ന്നെ​ന്നും റിപ്പോർട്ട്‌ ചൂണ്ടി​ക്കാ​ട്ടി.

നിങ്ങൾക്ക്‌ ഒരു ക്രെഡിറ്റ്‌ കാർഡ്‌ ഉണ്ടായി​രി​ക്കേ​ണ്ട​തു​ണ്ടോ? അതു തീരു​മാ​നി​ക്കേ​ണ്ടതു നിങ്ങളു​ടെ മാതാ​പി​താ​ക്ക​ളാണ്‌. നിങ്ങൾ അൽപ്പം കൂടെ കാത്തി​രി​ക്കേ​ണ്ട​തുണ്ട്‌ എന്ന്‌ അവർ കരുതു​ന്നെ​ങ്കിൽ ക്ഷമ കാട്ടുക. പണം ചെലവ​ഴി​ക്കുന്ന കാര്യ​ത്തിൽ നിങ്ങൾ വിവേകം പ്രകട​മാ​ക്കു​ന്ന​താ​യി തെളി​യി​ക്കു​ന്നെ​ങ്കിൽ താമസി​യാ​തെ മാതാ​പി​താ​ക്കൾ നിങ്ങൾക്ക്‌ പണപര​മാ​യി കൂടുതൽ സ്വാത​ന്ത്ര്യം അനുവ​ദി​ച്ചു​ത​ന്നേ​ക്കാം. (ലൂക്കൊസ്‌ 16:10 താരത​മ്യം ചെയ്യുക.) ക്രെഡിറ്റ്‌ കാർഡ്‌ ഉപയോ​ഗി​ക്കു​ന്ന​തിൽ—വാഹന​മോ​ടി​ക്കുന്ന കാര്യ​ത്തി​ലെ​ന്ന​പോ​ലെ—പ്രയോ​ജ​ന​വും അപകട​വും ഉണ്ടെന്നു മനസ്സി​ലാ​ക്കുക.

ചെലവു കണക്കാക്കൽ

ക്രെഡിറ്റ്‌ കാർഡ്‌ ഉപയോ​ഗി​ച്ചു സാധനങ്ങൾ വാങ്ങു​ന്നത്‌ അടിസ്ഥാ​ന​പ​ര​മാ​യി പണം കടം വാങ്ങു​ന്ന​തു​പോ​ലെ തന്നെയാണ്‌. കടം വാങ്ങുന്ന സാഹച​ര്യ​ങ്ങ​ളി​ലെ പോ​ലെ​തന്നെ നിങ്ങൾ കടപ്പെ​ട്ടി​രി​ക്കുന്ന തുക തിരി​ച്ച​ട​യ്‌ക്കണം. (സദൃശ​വാ​ക്യ​ങ്ങൾ 22:7) എന്നാൽ ക്രെഡിറ്റ്‌ കാർഡ്‌ ഉപയോ​ഗി​ച്ചു വാങ്ങുന്ന സാധന​ങ്ങ​ളു​ടെ വില നിങ്ങൾ എങ്ങനെ​യാണ്‌ അടയ്‌ക്കേ​ണ്ടത്‌?

സാധാ​ര​ണ​ഗ​തി​യിൽ, കാർഡ്‌ ഉപയോ​ഗിച്ച്‌ നിങ്ങൾ വാങ്ങിയ സാധനങ്ങൾ എന്തൊ​ക്കെ​യാ​ണെ​ന്നും നിങ്ങൾ കടപ്പെ​ട്ടി​രി​ക്കുന്ന മൊത്തം തുക എത്രയാ​ണെ​ന്നും കാണി​ക്കുന്ന അച്ചടിച്ച ഒരു സ്റ്റേറ്റ്‌മെന്റ്‌ മാസാ​വ​സാ​നം നിങ്ങൾക്കു ലഭിക്കും. അടിയ​ന്തി​ര​മാ​യി നിങ്ങൾ അടയ്‌ക്കേണ്ട തുകയും അതിൽ കാണി​ച്ചി​രി​ക്കും. പൊതു​വെ ഈ തുക വളരെ കുറവാ​യി​രി​ക്കും. അതു​കൊണ്ട്‌, നിങ്ങൾ ഇങ്ങനെ ന്യായ​വാ​ദം ചെയ്‌തേ​ക്കാം: ‘ഇത്‌ വലിയ കുഴപ്പ​മി​ല്ലാത്ത ഒരു ഏർപ്പാ​ടാണ്‌. ഓരോ മാസവും അടച്ചി​രി​ക്കേണ്ട ഏറ്റവും കുറഞ്ഞ തുക മാത്രം കൊടു​ത്താൽ കാല​ക്ര​മേണ എന്റെ കടം വീടി​ക്കൊ​ള്ളും.’ എന്നാൽ ഒരു നിശ്ചിത കാലാ​വ​ധി​ക്കു ശേഷം, നിങ്ങൾ അടച്ചു തീർക്കാ​നുള്ള ബാക്കി തുകയി​ന്മേൽ പലിശ ഈടാ​ക്ക​പ്പെ​ടു​മെ​ന്ന​താ​ണു പ്രശ്‌നം. ക്രെഡിറ്റ്‌ കാർഡി​ന്മേ​ലുള്ള പലിശ​യു​ടെ നിരക്കു വളരെ ഉയർന്ന​താ​യി​രി​ക്കും.a

ജോസ​ഫി​ന്റെ കാര്യ​മെ​ടു​ക്കാം. ഒരു മാസത്തെ സ്റ്റേറ്റ്‌മെ​ന്റിൽ കാണി​ച്ചി​രു​ന്നത്‌ അവൻ ഏതാണ്ട്‌ 1,000 ഡോളർ അടച്ചു​തീർക്കാ​നുണ്ട്‌ എന്നായി​രു​ന്നു. തത്‌കാ​ലം അവന്‌ 20 ഡോളർ—ആ മാസം അടച്ചി​രി​ക്കേണ്ട ഏറ്റവും കുറഞ്ഞ തുക—മാത്രം കൊടു​ത്താൽ മതിയാ​യി​രു​ന്നു എന്നതു ശരിതന്നെ. എന്നാൽ ജോസഫ്‌ ആ സ്റ്റേറ്റ്‌മെന്റ്‌ ഒന്നുകൂ​ടെ സൂക്ഷ്‌മ​മാ​യി പരി​ശോ​ധി​ച്ച​പ്പോൾ, പലിശ​യാ​യി ഏതാണ്ട്‌ 17 ഡോളർ കൊടു​ക്കാ​നുള്ള തുകയിൽ ചേർത്തി​രി​ക്കു​ന്ന​താ​യി അവൻ മനസ്സി​ലാ​ക്കി! അടച്ചി​രി​ക്കേണ്ട ഏറ്റവും കുറഞ്ഞ തുകയായ 20 ഡോളർ കൊടു​ത്താൽത്തന്നെ കടമാ​യി​ട്ടുള്ള 1,000 ഡോള​റിൽ 3 ഡോളർ മാത്രമേ അവൻ അടച്ചു തീർക്കു​ന്നു​ള്ളൂ എന്നർഥം!

അടച്ചി​രി​ക്കേണ്ട ഏറ്റവും കുറഞ്ഞ തുക മാത്രമേ നിങ്ങൾ കൊടു​ക്കു​ന്നു​ള്ളൂ എങ്കിൽ ക്രെഡിറ്റ്‌ കാർഡ്‌ ബിൽ അടച്ചു​തീർക്കാൻ എത്ര കാലം വേണ്ടി വരും? ഫെഡറൽ ട്രേഡ്‌ കമ്മീഷ​നും അമേരി​ക്കൻ എക്‌സ്‌പ്ര​സും ചേർന്ന്‌ പ്രസി​ദ്ധീ​ക​രിച്ച ഒരു ചെറു​പു​സ്‌തകം ഒരു ഉദാഹ​രണം നൽകുന്നു: “2,000 ഡോളർ നിങ്ങൾ അടച്ചു​തീർക്കേ​ണ്ട​തുണ്ട്‌ എന്നിരി​ക്കട്ടെ. 18.5 ശതമാനം പലിശ​യു​മുണ്ട്‌. പ്രതി​മാ​സം അടച്ചി​രി​ക്കേണ്ട ഏറ്റവും കുറഞ്ഞ തുക ഒരു ചെറിയ സംഖ്യ മാത്ര​മാ​ണെ​ന്നും കരുതുക. എങ്കിൽ കടം വീടാൻ 11 വർഷത്തി​ല​ധി​കം വേണ്ടി​വ​രും. തന്നെയു​മല്ല, വേറെ 1,934 ഡോളർ പലിശ​യാ​യി മാത്രം പോകും. അതായത്‌, നിങ്ങൾ വാങ്ങിയ സാധന​ങ്ങ​ളു​ടെ മൊത്തം വിലയു​ടെ ഇരട്ടി​യോ​ളം നിങ്ങൾ അടച്ചു​തീർക്കേണ്ടി വരും.”

നാം കണ്ടു കഴിഞ്ഞ​തു​പോ​ലെ, ശ്രദ്ധി​ച്ചി​ല്ലെ​ങ്കിൽ ക്രെഡിറ്റ്‌ കാർഡി​ന്റെ ഉപയോ​ഗം ഒരുപക്ഷേ പുറത്തു​ക​ട​ക്കാൻ സാധി​ക്കാത്ത വിധത്തിൽ നിങ്ങളെ കടക്കെ​ണി​യിൽ അകപ്പെ​ടു​ത്തി​യേ​ക്കാം. “വാസ്‌ത​വ​ത്തിൽ വാങ്ങിയ ഓരോ സാധന​ത്തി​നും വിലയു​ടെ ഇരട്ടി​യോ​ളം തുകയാ​യി​രു​ന്നു ഞാൻ അടച്ചു​കൊ​ണ്ടി​രു​ന്നത്‌,” ക്രിസ്റ്റീൻ പറയുന്നു. “സമയത്തി​നു പണമട​യ്‌ക്കാൻ സാധി​ക്കാ​തെ വന്നപ്പോൾ അതിനുള്ള പിഴയാ​യി വേറെ​യും തുക എനിക്ക്‌ അടയ്‌ക്കേണ്ടി വന്നു. എന്തു ചെയ്യണ​മെന്ന്‌ എനിക്ക്‌ യാതൊ​രു പിടി​യു​മി​ല്ലാ​യി​രു​ന്നു.”

ക്രെഡിറ്റ്‌ കാർഡ്‌ ഉത്തരവാ​ദി​ത്വ​ബോ​ധ​ത്തോ​ടെ ഉപയോ​ഗി​ക്കൽ

സാധനങ്ങൾ വാങ്ങി​ക്കു​ന്നതു സംബന്ധിച്ച്‌, “ഇപ്പോൾ വാങ്ങൂ, അടയ്‌ക്കു​ന്നതു പിന്നെ​യാ​കാം” എന്ന സമീപനം അപകട​മാ​ണെന്ന്‌ ക്രിസ്റ്റീൻ മനസ്സി​ലാ​ക്കി​യത്‌ കയ്‌പേ​റിയ അനുഭ​വ​ത്തി​ലൂ​ടെ ആയിരു​ന്നു. കണ്ണു ചിമ്മി​ത്തു​റ​ക്കുന്ന സമയം​കൊണ്ട്‌ കടം കുന്നു​കൂ​ടി​യേ​ക്കാം. പ്രതി​മാ​സം അടച്ചി​രി​ക്കേണ്ട ഏറ്റവും കുറഞ്ഞ തുക കൊടു​ക്കുക വഴി പലിശ മാത്രമേ അടയ്‌ക്കു​ന്നു​ള്ളൂ എന്നു നിങ്ങൾ മനസ്സി​ലാ​ക്കും. ഉത്തരവാ​ദി​ത്വ​ബോ​ധ​ത്തോ​ടെ ക്രെഡിറ്റ്‌ കാർഡ്‌ ഉപയോ​ഗി​ക്കു​ന്നവർ അത്തരം ഒരു കടക്കെ​ണി​യിൽ അകപ്പെ​ടാ​തെ സൂക്ഷി​ക്കു​ന്നത്‌ എങ്ങനെ​യാണ്‌?

• വാങ്ങിച്ച സാധനങ്ങൾ എന്തൊ​ക്കെ​യാ​ണെ​ന്നതു സംബന്ധിച്ച്‌ അവർ ഒരു രേഖ സൂക്ഷി​ക്കു​ന്നു. കൂടാതെ പ്രതി​മാസ സ്റ്റേറ്റ്‌മെ​ന്റു​കൾ അവർ ശ്രദ്ധാ​പൂർവം പരി​ശോ​ധിച്ച്‌ തങ്ങൾ വാങ്ങിച്ച സാധന​ങ്ങൾക്കുള്ള വില മാത്രമേ ഈടാ​ക്കു​ന്നു​ള്ളൂ എന്ന്‌ ഉറപ്പു​വ​രു​ത്തു​ന്നു.

• അവർ തങ്ങളുടെ ബില്ലുകൾ കൃത്യ​മാ​യി അടച്ചു​തീർക്കു​ന്നു. കാരണം ക്രെഡിറ്റ്‌ കാർഡ്‌ നല്ല രീതി​യിൽ ഉപയോ​ഗി​ക്കു​ന്ന​താ​യുള്ള രേഖ പിന്നീട്‌—ഒരുപക്ഷേ ഒരു ജോലി​ക്കോ ഇൻഷ്വ​റൻസി​നോ വേണ്ടി അപേക്ഷി​ക്കു​മ്പോൾ അല്ലെങ്കിൽ ഒരു കാറോ വീടോ വാങ്ങാൻ ലോൺ എടുക്കു​മ്പോൾ—സഹായ​ക​മാ​യേ​ക്കു​മെന്ന്‌ അവർക്ക്‌ അറിയാം.

• സാധ്യ​മെ​ങ്കിൽ അവർ കടപ്പെ​ട്ടി​രി​ക്കുന്ന മുഴു തുകയും മൊത്ത​മാ​യി അടച്ചു​തീർക്കു​ന്നു, അങ്ങനെ ഉയർന്ന പലിശ നൽകു​ന്നത്‌ ഒഴിവാ​ക്കു​ന്നു.

• ഇടപാടു നടത്തുന്ന വ്യക്തി​യെ​യോ കമ്പനി​യെ​യോ അടുത്തു പരിച​യ​മി​ല്ലെ​ങ്കിൽ ടെല​ഫോ​ണി​ലൂ​ടെ അവർ തങ്ങളുടെ ക്രെഡിറ്റ്‌ കാർഡ്‌ നമ്പരും അതിന്റെ കാലാ​വധി തീരുന്ന തീയതി​യും പറഞ്ഞു കൊടു​ക്കു​ക​യില്ല.

• അവർ തങ്ങളുടെ ക്രെഡിറ്റ്‌ കാർഡ്‌ ആർക്കും, സുഹൃ​ത്തി​നു പോലും കടമായി കൊടു​ക്കു​ക​യില്ല. കാരണം കാർഡ്‌ ദുരു​പ​യോ​ഗം ചെയ്യ​പ്പെ​ടു​ന്ന​പക്ഷം കാർഡ്‌ ഉടമയു​ടെ ക്രെഡിറ്റ്‌ രേഖയെ ആയിരി​ക്കും അതു ബാധി​ക്കുക.

• പണം പെട്ടെ​ന്നെ​ടു​ക്കാ​നാ​യി ഒരു ബാങ്ക്‌ കാർഡ്‌ എന്ന പോലെ അവർ തങ്ങളുടെ ക്രെഡിറ്റ്‌ കാർഡ്‌ ഒരിക്ക​ലും ഉപയോ​ഗി​ക്കു​ക​യില്ല. കാരണം, ക്രെഡിറ്റ്‌ കാർഡ്‌ ഉപയോ​ഗി​ച്ചു പണമെ​ടു​ക്കു​മ്പോ​ഴത്തെ പലിശ നിരക്ക്‌ സാധനങ്ങൾ വാങ്ങു​മ്പോ​ഴ​ത്തെ​തി​നെ​ക്കാൾ ഉയർന്ന​താണ്‌.

• ലഭിക്കുന്ന എല്ലാ ക്രെഡിറ്റ്‌ കാർഡ്‌ അപേക്ഷാ​ഫാ​റ​ങ്ങ​ളും അവർ പൂരി​പ്പിച്ച്‌ അയയ്‌ക്കു​ക​യില്ല. ഒട്ടുമിക്ക യുവജ​ന​ങ്ങ​ളെ​യും സംബന്ധി​ച്ചി​ട​ത്തോ​ളം ഒരു കാർഡു​തന്നെ ധാരാ​ള​മാണ്‌.

• അവർ തങ്ങളുടെ ക്രെഡിറ്റ്‌ കാർഡ്‌ ശ്രദ്ധാ​പൂർവം ഉപയോ​ഗി​ക്കു​ന്നു. അത്‌ ഉപയോ​ഗിച്ച്‌ എന്തെങ്കി​ലും സാധനങ്ങൾ വാങ്ങു​മ്പോൾ കറൻസി നോട്ടു​ക​ളു​ടെ​യോ നാണയ​ത്തി​ന്റെ​യോ രൂപത്തിൽ അല്ലെങ്കി​ലും തങ്ങൾ ശരിക്കുള്ള പണം തന്നെയാ​ണു ചെലവ​ഴി​ക്കു​ന്നത്‌ എന്ന്‌ അവർക്കു നന്നായി അറിയാം.

പ്രയോ​ജ​നങ്ങൾ ആസ്വദി​ക്കൽ

നിങ്ങൾക്ക്‌ ഇപ്പോൾത്തന്നെ ഒരു ക്രെഡിറ്റ്‌ കാർഡ്‌ ഉണ്ടെങ്കി​ലും സമീപ ഭാവി​യിൽ ഒരെണ്ണം വാങ്ങാൻ പരിപാ​ടി​യു​ണ്ടെ​ങ്കി​ലും അതിന്റെ ഗുണങ്ങ​ളും ദോഷ​ങ്ങ​ളും എന്താ​ണെന്നു നന്നായി അറിഞ്ഞി​രി​ക്കേ​ണ്ട​തുണ്ട്‌. പിൻവ​രുന്ന ചോദ്യ​ങ്ങൾ സ്വയം ചോദി​ക്കുക: ഒരു ക്രെഡിറ്റ്‌ കാർഡ്‌ വേണ​മെന്ന്‌ എനിക്കു തോന്നു​ന്നത്‌ എന്തു​കൊ​ണ്ടാണ്‌? അത്‌ ഭൗതിക വസ്‌തു​ക്കൾ സമ്പാദി​ക്കാ​നും ഏറ്റവും പുതിയ ഫാഷനി​ലുള്ള സാധനങ്ങൾ ഉണ്ടായി​രി​ക്കാ​നും സുഹൃ​ത്തു​ക്ക​ളിൽ മതിപ്പു​ള​വാ​ക്കാ​നും വേണ്ടി മാത്ര​മാ​ണോ? അടിസ്ഥാന ആവശ്യങ്ങൾ നിറ​വേ​റ്റ​പ്പെ​ടു​ന്നു​ണ്ടെ​ങ്കിൽ—ക്രിസ്‌തീയ അപ്പൊ​സ്‌ത​ല​നായ പൗലൊ​സി​ന്റെ വാക്കു​ക​ളിൽ പറഞ്ഞാൽ, “ഉണ്മാനും ഉടുപ്പാ​നും” ഉണ്ടെങ്കിൽ—അതു​കൊ​ണ്ടു തൃപ്‌തി​പ്പെ​ടാൻ ഞാൻ കൂടു​ത​ലാ​യി പഠി​ക്കേ​ണ്ട​തു​ണ്ടോ? (1 തിമൊ​ഥെ​യൊസ്‌ 6:8) ക്രെഡിറ്റ്‌ കാർഡി​ന്റെ ഉപയോ​ഗം മൂലം ഉണ്ടാകുന്ന കടബാ​ധ്യ​തകൾ, ജീവി​ത​ത്തിൽ കൂടുതൽ പ്രാധാ​ന്യ​മുള്ള സംഗതി​കൾ വിട്ടു​ക​ള​യേണ്ടി വരത്തക്ക​വി​ധ​മുള്ള താങ്ങാ​നാ​കാത്ത സാമ്പത്തിക ബുദ്ധി​മു​ട്ടു​കൾ എനിക്കു വരുത്തി വെക്കു​മോ?—മത്തായി 6:33; ഫിലി​പ്പി​യർ 1:8-11, NW.

ഈ ചോദ്യ​ങ്ങളെ കുറിച്ചു ഗഹനമാ​യി ചിന്തി​ക്കുക, മാതാ​പി​താ​ക്ക​ളു​മൊത്ത്‌ അവ ചർച്ച ചെയ്യുക. അങ്ങനെ ചെയ്യു​ന്ന​പക്ഷം ക്രെഡിറ്റ്‌ കാർഡ്‌ ഉണ്ടെങ്കി​ലും ഇല്ലെങ്കി​ലും നിങ്ങൾക്ക്‌, പലരും സ്വയം വരുത്തി​വെ​ച്ചി​രി​ക്കുന്ന സാമ്പത്തിക പരാധീ​ന​തകൾ ഒഴിവാ​ക്കാൻ സാധി​ക്കും.—സദൃശ​വാ​ക്യ​ങ്ങൾ 22:3.

[അടിക്കു​റി​പ്പു​കൾ]

[19-ാം പേജിലെ ചതുരം]

അച്ഛനമ്മമാരുമായി കൂടി​യാ​ലോ​ചി​ക്കു​ന്ന​തി​ന്റെ പ്രാധാ​ന്യം

പല യുവജ​ന​ങ്ങൾക്കും ക്രെഡിറ്റ്‌ കാർഡ്‌ വാങ്ങാ​നുള്ള ആദ്യ അവസരം ലഭിക്കു​ന്നത്‌ തപാൽവഴി അപേക്ഷാ​ഫാ​റം കിട്ടു​മ്പോ​ഴാണ്‌. ചിലർക്ക്‌ അത്തരത്തി​ലുള്ള നിരവധി അപേക്ഷാ​ഫാ​റങ്ങൾ ലഭിക്കാ​റുണ്ട്‌. ജെയ്‌ൻ ബ്രയന്റ്‌ ക്വിൻ ഇപ്രകാ​രം പറയുന്നു: “യുവജ​ന​ങ്ങ​ളെ​ക്കൊണ്ട്‌ ക്രെഡിറ്റ്‌ കാർഡ്‌ വാങ്ങി​പ്പി​ക്കാൻ ക്രെഡിറ്റ്‌ കാർഡ്‌ കമ്പനി​കൾക്കി​ട​യിൽ കടുത്ത മത്സരം​തന്നെ ഉണ്ട്‌. കാരണം, ഒരു വ്യക്തി ആദ്യം ഉപയോ​ഗി​ക്കാൻ തുടങ്ങിയ അതേ കമ്പനി​യു​ടെ കാർഡ്‌ തന്നെ വീണ്ടും വീണ്ടും ഉപയോ​ഗി​ക്കാൻ പ്രവണത കാട്ടു​ന്ന​താ​യി പഠനങ്ങൾ തെളി​യി​ക്കു​ന്നു.”

സാധാരണഗതിയിൽ, നല്ല ഒരു ക്രെഡിറ്റ്‌ കാർഡ്‌ രേഖയുള്ള അച്ഛനോ അമ്മയോ അല്ലെങ്കിൽ മുതിർന്ന ഏതെങ്കി​ലും ഒരു വ്യക്തി​യോ ക്രെഡിറ്റ്‌ കാർഡ്‌ അപേക്ഷാ​ഫാ​റ​ത്തിൽ ഒപ്പി​ടേ​ണ്ട​തുണ്ട്‌. അങ്ങനെ​യാ​കു​മ്പോൾ, ചുമത്ത​പ്പെ​ടുന്ന തുക ഉപഭോ​ക്താവ്‌ അടച്ചു​തീർക്കു​മെന്ന്‌ കാർഡ്‌ നൽകുന്ന കമ്പനിക്ക്‌ ഒരു പരിധി​വരെ ഉറപ്പു​ണ്ടാ​യി​രി​ക്കാൻ കഴിയും. എന്നാൽ സങ്കടക​ര​മെന്നു പറയട്ടെ, പല യുവജ​ന​ങ്ങ​ളും ഇക്കാര്യ​ത്തിൽ കള്ളത്തരം കാട്ടാ​റുണ്ട്‌. ഒരു യുവ​പ്രാ​യ​ക്കാ​രി, മുത്തശ്ശി​യു​ടെ അറിവു കൂടാതെ മുഖ്യ അപേക്ഷ​ക​യാ​യി അവരുടെ പേരും കൂട്ട്‌ അപേക്ഷ​ക​യാ​യി സ്വന്തം പേരും നൽകി. തനിക്ക്‌ പതിനാ​യി​ര​ക്ക​ണ​ക്കി​നു ഡോള​റി​ന്റെ കടബാ​ധ്യ​ത​യു​ള്ള​താ​യി അറിഞ്ഞ​പ്പോ​ഴത്തെ ആ മുത്തശ്ശി​യു​ടെ അവസ്ഥ ഒന്നു ചിന്തിച്ചു നോക്കൂ!

ക്രെഡിറ്റ്‌ കാർഡി​നുള്ള അപേക്ഷാ​ഫാ​റ​ത്തിൽ അച്ഛന്റെ​യോ അമ്മയു​ടെ​യോ വേറെ ആരു​ടെ​യെ​ങ്കി​ലു​മോ കള്ളയൊപ്പ്‌ ഇടുന്നത്‌ സത്യസ​ന്ധ​ത​യി​ല്ലാ​യ്‌മ​യാണ്‌. ദൈവം അതിനെ വെറു​ക്കു​ന്നു. (സദൃശ​വാ​ക്യ​ങ്ങൾ 11:1; എബ്രായർ 13:18, NW) അതു​കൊണ്ട്‌ ഒരു ക്രെഡിറ്റ്‌ കാർഡ്‌ വേണ​മെന്നു തോന്നു​ന്നു​ണ്ടെ​ങ്കിൽ അച്ഛനമ്മ​മാ​രു​മാ​യി അതേക്കു​റി​ച്ചു സംസാ​രി​ക്കുക. അവരുടെ സമ്മത​ത്തോ​ടെ കാര്യങ്ങൾ ചെയ്യു​ന്നത്‌ ഭാവി​യി​ലേക്ക്‌ വളരെ പ്രയോ​ജനം ചെയ്യും. കടങ്ങൾ എങ്ങനെ​യാണ്‌ അടച്ചു​തീർക്കേ​ണ്ടത്‌ എന്നതു സംബന്ധിച്ച്‌ നിങ്ങളു​ടെ അച്ഛനമ്മ​മാർക്ക്‌ പരിച​യ​മു​ണ്ടാ​യി​രി​ക്കാം എന്ന്‌ ഓർക്കുക. നിങ്ങൾക്കു നല്ല ബുദ്ധി​യു​പ​ദേശം തരാൻ അവർക്കു കഴി​ഞ്ഞേ​ക്കും. അതു​കൊണ്ട്‌ അവരു​മാ​യി സംസാ​രി​ക്കുക. ക്രെഡിറ്റ്‌ കാർഡ്‌ ലഭിക്കാ​നാ​യി സത്യസ​ന്ധ​മ​ല്ലാത്ത മാർഗങ്ങൾ ഒരിക്ക​ലും അവലം​ബി​ക്ക​രുത്‌.

[18-ാം പേജിലെ ചിത്രം]

ലാഘവബുദ്ധിയോടെ ക്രെഡിറ്റ്‌ കാർഡ്‌ ഉപയോ​ഗി​ക്കു​ന്നത്‌ വലിയ സാമ്പത്തിക പ്രതി​സ​ന്ധിക്ക്‌ ഇടയാ​ക്കി​യേ​ക്കാം