അന്തർദേ​ശീയ ബഹിരാ​കാ​ശ​നി​ലയം—ഭ്രമണം ചെയ്യു​ന്ന​ഒരു പരീക്ഷ​ണ​ശാ​ല

ഏതാനും വർഷങ്ങൾ കൂടി കഴിയു​മ്പോൾ, തെളിഞ്ഞ രാവു​ക​ളിൽ ചന്ദ്ര​ന്റെ​യും നക്ഷത്ര​ങ്ങ​ളു​ടെ​യും ഒപ്പം ആകാശത്ത്‌ മറ്റൊന്നു കൂടെ നിങ്ങൾ കണ്ടെത്തി​യേ​ക്കാം. ഗ്രഹങ്ങ​ളു​ടെ അത്ര ശോഭ​യോ​ടെ പ്രകാ​ശി​ക്കുന്ന ഒരു കൃത്രിമ “നക്ഷത്രത്തെ.” രണ്ടു ഫുട്‌ബോൾ മൈതാ​ന​ങ്ങ​ളു​ടെ വലിപ്പം വരുന്ന, ഈ ഭീമാ​കാര വസ്‌തു​വി​ന്റെ നിർമാ​ണം തുടങ്ങി കഴിഞ്ഞി​രി​ക്കു​ന്നു. ‘പിരമി​ഡു​കൾക്കു ശേഷമുള്ള ഏറ്റവും വലിയ എൻജി​നീ​യ​റിങ്‌ പദ്ധതി’ എന്നാണ്‌ ഇതിനെ വിശേ​ഷി​പ്പി​ച്ചി​രി​ക്കു​ന്നത്‌. എന്താണ്‌ ഇത്‌?

1,00,000-ത്തിലധി​കം ജോലി​ക്കാർ ഉൾപ്പെ​ടുന്ന ഒരു മഹാസം​രം​ഭ​ത്തി​ന്റെ പരിണ​തി​യാ​യി ബഹിരാ​കാ​ശത്തു ജന്മമെ​ടു​ക്കാൻ പോകുന്ന ഒരു സ്ഥിരമായ ഗവേഷണ ശാല—അന്തർദേ​ശീയ ബഹിരാ​കാ​ശ​നി​ലയം—ആണിത്‌. ഈ ജോലി​ക്കാ​രിൽ മിക്കവ​രും അമേരി​ക്കൻ ഐക്യ​നാ​ടു​കൾ, കാനഡ, റഷ്യ എന്നിവി​ട​ങ്ങ​ളിൽ ആണു പ്രവർത്തി​ച്ചു​കൊ​ണ്ടി​രി​ക്കു​ന്നത്‌. എന്നാൽ, ഇറ്റലി, ജപ്പാൻ, ജർമനി, ഡെന്മാർക്ക്‌, നെതർലൻഡ്‌സ്‌, നോർവേ, ഫ്രാൻസ്‌, ബെൽജി​യം, ബ്രസീൽ, ബ്രിട്ടൻ, സ്‌പെ​യിൻ, സ്വിറ്റ്‌സർലൻഡ്‌, സ്വീഡൻ എന്നിവി​ട​ങ്ങ​ളി​ലും അനേകർ ഇതിനു വേണ്ടി പ്രവർത്തി​ക്കു​ന്നുണ്ട്‌. പണി പൂർത്തി​യാ​കു​മ്പോൾ അന്തർദേ​ശീയ ബഹിരാ​കാ​ശ​നി​ല​യ​ത്തിന്‌ 88 മീറ്റർ നീളവും 109 മീറ്റർ വീതി​യും ഉണ്ടായി​രി​ക്കും. ജോലി​ചെ​യ്യാ​നും താമസി​ക്കാ​നും സൗകര്യ​മുള്ള ഈ നിലയ​ത്തിന്‌ രണ്ടു ബോയിംഗ്‌ 747 ജെറ്റു​വി​മാ​ന​ങ്ങ​ളിൽ ഉള്ളത്ര സ്ഥലസൗ​ക​ര്യം ഉണ്ടായി​രി​ക്കും. ബഹിരാ​കാ​ശ​നി​ല​യ​ത്തി​ന്റെ മൊത്തം ഭാരം 520 ടൺ ആയിരി​ക്കും. നിർമാ​ണ​ത്തി​നു ചെലവാ​കുന്ന തുകയോ, ചുരു​ങ്ങി​യത്‌ 2 ലക്ഷം കോടി രൂപയും!

ഗവേഷ​ണ​ത്തി​ന്റെ പേരിൽ ഇത്ര ഭീമമായ ഒരു തുക മുടക്കു​ന്ന​തി​നെ കുറിച്ച്‌ ഉത്‌ക​ണ്‌ഠ​പ്പെ​ടുന്ന ചിലർ ഈ ബഹിരാ​കാ​ശ​നി​ല​യത്തെ വിളി​ക്കുന്ന ഒരു പേരുണ്ട്‌—“നക്ഷത്ര​ങ്ങൾക്കി​ട​യി​ലെ വെള്ളാന.” അതിനെ അനുകൂ​ലി​ക്കു​ന്നവർ പക്ഷേ, ബഹിരാ​കാ​ശ​നി​ല​യം​കൊ​ണ്ടു സാധ്യ​മാ​യേ​ക്കാ​വുന്ന പ്രയോ​ജ​ന​ങ്ങളെ ഉയർത്തി​ക്കാ​ട്ടു​ന്നു. പുതി​യ​തും മികച്ച​തു​മായ വ്യാവ​സാ​യിക വസ്‌തു​ക്കൾ, വാർത്താ​വി​നി​മയ സാങ്കേ​തിക വിദ്യ, വൈദ്യ​ശാ​സ്‌ത്രം എന്നിവയെ കുറിച്ചു ഗവേഷണം നടത്താൻ പറ്റിയ സ്ഥാനം ആയി അതു വർത്തി​ക്കു​മെന്ന്‌ അവർ പ്രതീ​ക്ഷി​ക്കു​ന്നു. എന്നിരു​ന്നാ​ലും ബഹിരാ​കാശ സഞ്ചാരി​കൾ പരീക്ഷ​ണ​നി​രീ​ക്ഷ​ണ​ങ്ങൾക്കു വേണ്ടി​യുള്ള ഉപകര​ണങ്ങൾ അതിൽ ഘടിപ്പി​ക്കു​ന്ന​തി​നു മുമ്പ്‌, ബഹിരാ​കാ​ശ​നി​ലയം തന്നെ ഭാഗം ഭാഗമാ​യി കൂട്ടി​ച്ചേർക്ക​പ്പെ​ടേ​ണ്ട​തുണ്ട്‌, അതും ബഹിരാ​കാ​ശ​ത്തിൽ വെച്ച്‌!

ബഹിരാ​കാ​ശ​ത്തിൽ വെച്ചുള്ള നിർമാ​ണം

ഈ പടുകൂ​റ്റൻ ബഹിരാ​കാ​ശ​നി​ല​യ​ത്തി​ന്റെ ഭാഗങ്ങൾ ഭൂമി​യിൽ വെച്ചു സംയോ​ജി​പ്പി​ക്കാൻ കഴിയില്ല. അങ്ങനെ ചെയ്‌താൽ, ഭാരം താങ്ങാൻ കഴിയാ​തെ അത്‌ അപ്പോൾ തന്നെ തകർന്നു​വീ​ഴും. ഈ പ്രശ്‌നം തരണം ചെയ്യു​ന്ന​തിന്‌, ശാസ്‌ത്ര​ജ്ഞ​ന്മാർ അതിന്റെ വിവിധ മോഡ്യൂ​ളു​കൾ (ബഹിരാ​കാ​ശ​നി​ല​യ​ത്തി​ന്റെ സ്വയം​പ​ര്യാപ്‌ത ഭാഗങ്ങൾ) ഭൂമി​യിൽ വെച്ചു നിർമിച്ച ശേഷം ശൂന്യാ​കാ​ശ​ത്തിൽ വെച്ചു സംയോ​ജി​പ്പി​ക്കാ​നാ​ണു പദ്ധതി​യി​ട്ടി​രി​ക്കു​ന്നത്‌. ഇവ അവിടെ എത്തിക്കു​ന്ന​തിന്‌ യു.എസ്‌. ബഹിരാ​കാശ പേടക​ങ്ങ​ളും റഷ്യൻ ബൂസ്റ്ററു​ക​ളും ഭൂമി​യിൽനിന്ന്‌ 45 തവണ ഉയരേണ്ടി വരും.

ഈ ബഹിരാ​കാ​ശ​നി​ല​യ​ത്തി​ന്റെ നിർമാ​ണം അഭൂത​പൂർവ​മായ ഒരു സംരം​ഭ​മാണ്‌. ഇത്‌ ബഹിരാ​കാ​ശത്തെ, സദാ മുഖച്ഛായ മാറി​ക്കൊ​ണ്ടി​രി​ക്കുന്ന ഒരു നിർമാണ സ്ഥലമാക്കി മാറ്റുന്നു. ജോലി​ക്കാ​രും നിർമാ​ണ​വ​സ്‌തു​ക്ക​ളും ഭൂമിയെ വലം​വെ​ച്ചു​കൊ​ണ്ടി​രി​ക്കവെ, 100-ലധികം മോഡ്യൂ​ളു​കൾ സംയോ​ജി​പ്പി​ക്ക​പ്പെ​ടും. ബഹിരാ​കാശ സഞ്ചാരി​ക​ളു​ടെ അന്തർദേ​ശീയ സംഘത്തിന്‌ മിക്ക​ജോ​ലി​ക​ളും കൈ​കൊ​ണ്ടു തന്നെ ചെയ്യേണ്ടി വരും. ഇതിനു വേണ്ടി നൂറു​ക​ണ​ക്കിന്‌ മണിക്കൂ​റു​കൾ അവർക്കു ബഹിരാ​കാ​ശത്ത്‌ ഇറങ്ങി സഞ്ചരി​ക്കേണ്ടി വരും.

അന്തർദേ​ശീ​യ ബഹിരാ​കാ​ശ​നി​ല​യ​ത്തി​ന്റെ ആദ്യത്തെ മോഡ്യൂ​ളായ സാര്യാ (“സൂര്യോ​ദയം” എന്നർഥം) 1998 നവംബർ 20-ാം തീയതി കസാഖ്‌സ്ഥാ​നി​ലെ ബൈക്കാ​നൂർ കോസ്‌മോ​ഡ്രോ​മിൽ നിന്നു കുതി​ച്ചു​യർന്നു. റഷ്യയിൽ വെച്ചു നിർമിച്ച ഈ മോഡ്യൂ​ളിന്‌ 20 ടൺ ഭാരമുണ്ട്‌. ഈ മോഡ്യൂ​ളിൽ, അതിനെ തന്നെയും അതുമാ​യി കൂട്ടി​യി​ണ​ക്ക​പ്പെ​ടാ​നുള്ള മറ്റു മോഡ്യൂ​ളു​ക​ളെ​യും ഭ്രമണ​പ​ഥ​ത്തിൽ നിറു​ത്തു​ന്ന​തിന്‌ ആവശ്യ​മായ ഇന്ധനം സംഭരി​ച്ചി​രു​ന്നു. സാര്യാ കുതി​ച്ചു​യർന്ന്‌ ഇരുപതു ദിവസ​ങ്ങൾക്കു ശേഷം അതുമാ​യി ഘടിപ്പി​ക്കാ​നുള്ള യൂണിറ്റി എന്ന മോഡ്യൂ​ളും വഹിച്ചു​കൊണ്ട്‌ അമേരി​ക്കൻ നിർമി​ത​മായ ഇൻഡെവർ എന്ന ബഹിരാ​കാശ പേടകം ഭൂമി​യിൽ നിന്ന്‌ ഉയർന്നു.

1998 ഡിസം​ബ​റിൽ, ബഹിരാ​കാ​ശത്തു വെച്ച്‌ ബഹിരാ​കാ​ശ​നി​ല​യ​ത്തി​ന്റെ പണി തുടങ്ങിയ സമയത്തു തന്നെ ഇൻഡെ​വ​റി​ലെ ജോലി​ക്കാർക്ക്‌, മുമ്പിൽ സ്ഥിതി ചെയ്യുന്ന വെല്ലു​വി​ളി​ക​ളു​ടെ ഒരു ഏകദേശ രൂപം കിട്ടി. ബഹിരാ​കാശ യാത്രി​ക​യായ നാൻസി കൂരി, സാര്യാ​യെ—20 ടൺ ഭാരം ഉണ്ടായി​രുന്ന ആ മോഡ്യൂൾ ഭൂമി​യിൽ നിന്നു 400 കിലോ​മീ​റ്റർ ഉയരത്തിൽ ആയിരു​ന്നു—15 മീറ്റർ നീളം വരുന്ന കമ്പ്യൂട്ടർ നിയ​ന്ത്രിത യന്ത്രക്കൈ ഉപയോ​ഗിച്ച്‌ യൂണിറ്റി എന്ന മോഡ്യൂ​ളു​മാ​യി കൂട്ടി​യി​ണ​ക്കു​ക​യു​ണ്ടാ​യി. അതിനു ശേഷം, ബഹിരാ​കാശ സഞ്ചാരി​ക​ളായ ജെറി റോസും ജെയിംസ്‌ ന്യൂമാ​നും ചേർന്ന്‌ ഈ രണ്ടു മോഡ്യൂ​ളു​ക​ളു​ടെ​യും പുറത്തു വൈദ്യു​ത, കമ്പ്യൂട്ടർ വയറു​ക​ളും ജലവാഹക കുഴലു​ക​ളും ഘടിപ്പി​ക്കു​ക​യു​ണ്ടാ​യി. വൈദ്യു​ത വയറുകൾ മോഡ്യൂ​ളു​ക​ളു​ടെ ഇടയി​ലൂ​ടെ വൈദ്യു​തി കടത്തി​വി​ടു​ന്ന​തി​നു വേണ്ടി​യു​ള്ള​താണ്‌. എന്നാൽ ജലവാഹക കുഴലു​ക​ളാ​കട്ടെ, വെള്ളം പരി​ക്ര​മണം ചെയ്യിച്ച്‌ വായു ശീതീ​ക​രി​ക്കു​ന്ന​തി​നും കുടി​വെള്ളം എത്തിക്കു​ന്ന​തി​നും വേണ്ടി ഉള്ളതാണ്‌. ശ്രമക​ര​മായ ഈ ജോലി​കൾ പൂർത്തി​യാ​ക്കു​ന്ന​തിന്‌ അവർക്കു മൂന്നു തവണ ബഹിരാ​കാ​ശ​ത്തിൽ ഇറങ്ങി സഞ്ചരി​ക്കേണ്ടി വന്നു, മൊത്തം 21-ലധികം മണിക്കൂർ.

റോക്ക​റ്റു​ക​ളും ബഹിരാ​കാശ പേടക​ങ്ങ​ളും ഏതാനും ആഴ്‌ചകൾ കൂടു​മ്പോൾ പുതിയ പുതിയ മോഡ്യൂ​ളു​കൾ എത്തിച്ചു​കൊ​ണ്ടി​രി​ക്കു​ന്ന​തിന്‌ അനുസ​രിച്ച്‌ ബഹിരാ​കാ​ശ​നി​ലയം വളർച്ച​യു​ടെ പടവുകൾ താണ്ടും. റഷ്യൻ നിർമി​ത​മായ സാര്യാ എന്ന ഒറ്റ മോഡ്യൂ​ളിൽ നിന്ന്‌ ക്രമേണ 520 ടൺ ഭാരമുള്ള ഒരു ബഹിരാ​കാ​ശ​നി​ല​യ​മാ​യി അതു വികാസം പ്രാപി​ക്കും. ഭൂമി​യു​ടെ ശക്തമായ ഗുരു​ത്വാ​കർഷ​ണത്തെ ചെറു​ത്തു​നിൽക്കേ​ണ്ട​തു​ള്ള​തി​നാൽ, വളർന്നു​കൊ​ണ്ടി​രി​ക്കുന്ന ആ നിലയത്തെ അതിന്റെ ഭ്രമണ​പ​ഥ​ത്തിൽ നിലനിർത്തുക എന്നത്‌ ഒരു വെല്ലു​വി​ളി തന്നെയാ​യി​രി​ക്കും. അതു​കൊണ്ട്‌ ഏതു സമയത്തു വേണ​മെ​ങ്കി​ലും അതു ഭൂമി​യി​ലേക്കു പതി​ച്ചേ​ക്കാ​മെന്ന അപകട​വും നിലനിൽക്കു​ക​യാണ്‌. ബഹിരാ​കാ​ശ​നി​ലയം ഭൗമോ​പ​രി​ത​ല​ത്തി​നു മുകളിൽ ശരിയായ ഉയരത്തിൽത്തന്നെ നിലനിൽക്കു​ന്ന​തിന്‌ ആവശ്യ​മായ പ്രണോ​ദം (boost) പ്രദാനം ചെയ്യാൻ ബഹിരാ​കാ​ശ​പേ​ട​കങ്ങൾ ഇടയ്‌ക്കി​ടെ നിലയം സന്ദർശി​ക്കു​ന്ന​താ​യി​രി​ക്കും.

ഗുരു​ത്വം പൂജ്യ​ത്തോട്‌ അടുത്താ​യി​രി​ക്കുന്ന അവസ്ഥ ഈ ബഹിരാ​കാ​ശ​നി​ല​യ​ത്തിൽ വെച്ചു നടത്ത​പ്പെ​ടുന്ന ഗവേഷ​ണ​ങ്ങ​ളു​ടെ മേൽ ഒരു നിർണാ​യക സ്വാധീ​നം ചെലു​ത്തും. ഭൂമി​യിൽ അനുഭ​വ​പ്പെ​ടുന്ന ഗുരു​ത്വാ​കർഷണ ശക്തിയു​ടെ 10 ലക്ഷത്തിൽ ഒരംശം മാത്രമേ അതിനു​ള്ളിൽ അനുഭ​വ​പ്പെ​ടു​ന്നു​ള്ളൂ. ഭൂമി​യിൽ ആണെങ്കിൽ, ഒരു പെൻസിൽ താഴെ​പ്പോ​യാൽ അതു രണ്ടുമീ​റ്റർ താഴേക്കു പതിക്കാൻ അര സെക്കൻഡ്‌ മതി. ബഹിരാ​കാ​ശ​നി​ല​യ​ത്തിൽ പക്ഷേ അതിനു പത്തു മിനിട്ട്‌ വേണം! അങ്ങനെ​യെ​ങ്കിൽ, അന്തർദേ​ശീയ ബഹിരാ​കാ​ശ​നി​ലയം ഒരു പരീക്ഷ​ണ​ശാ​ല​യാ​യി വർത്തി​ക്കു​ന്നത്‌ എങ്ങനെ​യാ​യി​രി​ക്കും? അതിനു നിങ്ങളു​ടെ ദൈനം​ദിന ജീവി​തത്തെ എങ്ങനെ ബാധി​ക്കാൻ കഴിയും?

ഭ്രമണം ചെയ്യുന്ന പരീക്ഷ​ണ​ശാ​ല

അന്തർദേ​ശീയ ബഹിരാ​കാ​ശ​നി​ല​യ​ത്തി​ന്റെ പണി 2004-ൽ പൂർത്തി​യാ​കും എന്നാണു പ്രതീ​ക്ഷി​ക്ക​പ്പെ​ടു​ന്നത്‌. അതിനു​ശേഷം, ഒരേസ​മയം ഏഴു ബഹിരാ​കാശ സഞ്ചാരി​കൾക്കു വരെ സങ്കീർണ​മായ ഈ പടുകൂ​റ്റൻ ഭവനം സന്ദർശി​ക്കാ​നാ​കും. ചിലർ അവിടെ പല മാസങ്ങൾ തന്നെ താമസി​ക്കും. പ്രപഞ്ച​ത്തി​ലേക്കു തുറക്കുന്ന ജാലകം എന്നു വിശേ​ഷി​പ്പി​ക്ക​പ്പെ​ട്ടി​രി​ക്കുന്ന ഈ നിലയ​ത്തിൽ വെച്ച്‌ ബഹിരാ​കാശ സഞ്ചാരി​കൾക്ക്‌ ലോക​മെ​മ്പാ​ടു​മുള്ള ശാസ്‌ത്ര​ജ്ഞ​രു​ടെ പദ്ധതി​പ്ര​കാ​ര​മുള്ള വൈവി​ധ്യ​മാർന്ന പരീക്ഷ​ണങ്ങൾ നടത്തി​നോ​ക്കു​ന്ന​തിന്‌ അവസര​മു​ണ്ടാ​യി​രി​ക്കും.

ഉദാഹ​ര​ണ​ത്തിന്‌, ഗുരു​ത്വാ​കർഷണ ശക്തി തീരെ കുറവാ​യി​രി​ക്കു​മ്പോൾ, ചെടി​ക​ളു​ടെ വേരുകൾ താഴേക്കു വളർന്നി​റ​ങ്ങു​ക​യോ ഇലകൾ മുകളി​ലേക്കു വളർന്നു പൊങ്ങു​ക​യോ ചെയ്യു​ന്നില്ല. അതു​കൊണ്ട്‌, ഗുരു​ത്വാ​കർഷണ ശക്തി ഇല്ലാത്ത അവസ്ഥ​യോ​ടു സസ്യങ്ങൾ എപ്രകാ​രം പ്രതി​ക​രി​ക്കും എന്നു കണ്ടുപി​ടി​ക്കു​ന്ന​തി​നു വേണ്ട പരീക്ഷ​ണങ്ങൾ നടത്തി​നോ​ക്കാൻ ശാസ്‌ത്രജ്ഞർ പദ്ധതി​യി​ട്ടി​രി​ക്കു​ന്നു. മറ്റൊന്ന്‌ മാംസ്യ​പ​ര​ലു​ക​ളു​മാ​യി ബന്ധപ്പെ​ട്ട​താണ്‌. അവ ശൂന്യാ​കാ​ശത്തു വെച്ച്‌ കൂടുതൽ വലുതും രൂപസ​മാ​ന​ത​യു​ള്ള​വ​യും ആയിത്തീ​രു​ന്നു. അതു​കൊണ്ട്‌, അത്തരം അവസ്ഥക​ളിൻ കീഴിൽ കൂടുതൽ ശുദ്ധമായ പരലുകൾ ഉത്‌പാ​ദി​പ്പി​ക്കാൻ കഴിയും. രോഗ​കാ​രി​ക​ളായ പ്രത്യേക മാംസ്യ​ങ്ങൾക്ക്‌ എതിരെ പ്രയോ​ഗി​ക്കാൻ കഴിയുന്ന തരത്തി​ലുള്ള മരുന്നു​കൾ വികസി​പ്പി​ച്ചെ​ടു​ക്കു​ന്ന​തിന്‌ ഈ വിവരങ്ങൾ ഗവേഷ​കർക്കു സഹായ​ക​മാ​യി​രു​ന്നേ​ക്കാം. ഭൂമി​യിൽ വെച്ചു നിർമി​ക്കാൻ പറ്റി​ല്ലെന്നു തന്നെ പറയാ​വുന്ന സാധനങ്ങൾ ഒരുപക്ഷേ, ഗുരു​ത്വാ​കർഷണം തീരെ കുറവാ​യി​രി​ക്കുന്ന ഒരു പരിസ്ഥി​തി​യിൽ ഉണ്ടാക്കി​യെ​ടു​ക്കാൻ കഴി​ഞ്ഞേ​ക്കും.

ഗുരു​ത്വം പൂജ്യ​ത്തോട്‌ അടുത്താ​യി​രി​ക്കു​മ്പോൾ മനുഷ്യ​ന്റെ അസ്ഥിക​ളും പേശി​ക​ളും ക്ഷയിക്കും. ബഹിരാ​കാശ സഞ്ചാരി​യാ​യി​രുന്ന മൈക്കൽ ക്ലിഫോർഡ്‌ ഇപ്രകാ​രം പറയു​ക​യു​ണ്ടാ​യി: “ദീർഘ​കാ​ലം ബഹിരാ​കാ​ശത്തു കഴിയു​ന്ന​തി​ന്റെ ശരീര​ശാ​സ്‌ത്ര​പ​ര​മായ പരിണ​ത​ഫ​ലങ്ങൾ മനസ്സി​ലാ​ക്കാ​നുള്ള ശാസ്‌ത്രീയ ഗവേഷ​ണ​ങ്ങ​ളും നടത്ത​പ്പെ​ടു​ന്ന​താ​യി​രി​ക്കും.” അസ്ഥി​ദ്ര​വീ​ക​രണം ഫലപ്ര​ദ​മാ​യി ചെറു​ക്കാൻ കഴിയുന്ന വിധം നിർണ​യി​ക്കു​ന്ന​തിന്‌ ചുരു​ങ്ങി​യത്‌ ഒരു പരീക്ഷണം എങ്കിലും നടത്തു​ന്ന​താ​യി​രി​ക്കും.

ബഹിരാ​കാ​ശ​ത്തു ജീവി​ക്കു​ന്ന​തി​ന്റെ ദീർഘ​കാല ഫലങ്ങളെ കുറിച്ചു പഠിക്കു​ന്നത്‌ എന്നെങ്കി​ലും ഒരിക്കൽ ചൊവ്വ​യി​ലേക്ക്‌ സുദീർഘ​മായ ഒരു യാത്ര സാധ്യ​മാ​ക്കി തീർത്തേ​ക്കാം. ക്ലിഫോർഡ്‌ ഇപ്രകാ​രം സമ്മതി​ക്കു​ന്നു: “അതൊരു നീണ്ട യാത്ര​യാണ്‌. [ബഹിരാ​കാശ പര്യ​വേ​ക്ഷ​കരെ] കുഴപ്പ​മൊ​ന്നും കൂടാതെ തിരി​ച്ചു​കൊ​ണ്ടു​വ​രാ​നുള്ള കഴിവു നാം ആർജി​ച്ചെ​ടു​ക്കേ​ണ്ട​തുണ്ട്‌.”

ജീവന്റെ അടിസ്ഥാന നിർമാണ ഘടകങ്ങളെ സംബന്ധി​ച്ചു മെച്ചമായ ഗ്രാഹ്യം നേടി​യെ​ടു​ക്കു​ന്ന​തി​നും ബഹിരാ​കാ​ശ​നി​ല​യ​ത്തി​ലെ ഗവേഷ​ണങ്ങൾ സഹായ​ക​മാ​വും എന്നാണ്‌ അതിന്റെ അനുകൂ​ലി​കൾ പ്രവചി​ക്കു​ന്നത്‌. കാൻസർ, പ്രമേഹം, എംഫി​സിമ, പ്രതി​രോധ വ്യവസ്ഥ​യി​ലെ തകരാ​റു​കൾ എന്നിവ ചികി​ത്സി​ച്ചു ഭേദമാ​ക്കു​ന്ന​തി​നു പുത്തൻ മാർഗങ്ങൾ കണ്ടുപി​ടി​ക്കു​ന്ന​തിന്‌ അത്തരം അറിവു​കൾ ഗുണക​ര​മാ​യേ​ക്കാം. ബഹിരാ​കാ​ശ​നി​ല​യ​ത്തി​ലെ പരീക്ഷ​ണ​ശാ​ല​ക​ളിൽ ശരീര​ക​ല​ക​ളോ​ടു സമാന​മായ കോശങ്ങൾ കൃത്രി​മ​മാ​യി വളർത്തി​യെ​ടു​ക്കു​ന്ന​തിന്‌ ഉള്ള ഒരു ബയോ​റി​യാ​ക്ടർ ഉണ്ടായി​രി​ക്കും. മനുഷ്യ​നെ വേട്ടയാ​ടുന്ന രോഗ​ങ്ങ​ളെ​യും അവ ചികി​ത്സി​ച്ചു ഭേദമാ​ക്കാ​വുന്ന വിധങ്ങ​ളെ​യും സംബന്ധി​ച്ചു കൂടുതൽ പഠിക്കാ​നും ശാസ്‌ത്ര​ജ്ഞ​ന്മാർ ആസൂ​ത്രണം ചെയ്‌തി​രി​ക്കു​ന്നു. അന്തരീക്ഷ വാതകങ്ങൾ, പവിഴ​പ്പു​റ്റു​ക​ളു​ടെ നിറം​മങ്ങൽ, ചുഴലി​ക്കൊ​ടു​ങ്കാറ്റ്‌, ഭൂമി​യി​ലെ മറ്റു പ്രാകൃ​തിക പ്രതി​ഭാ​സങ്ങൾ എന്നിവയെ കുറിച്ചു പഠിക്കു​ന്ന​തിന്‌ 50 സെന്റി​മീ​റ്റർ നീളമുള്ള ഒരു നിരീ​ക്ഷ​ണ​ജാ​ല​ക​വും നിലയ​ത്തിൽ ഉണ്ടായി​രി​ക്കു​ന്ന​താണ്‌.

“സമാധാ​ന​ത്തി​നു വേണ്ടി​യുള്ള” ഒരു “പരീക്ഷ​ണ​ശാ​ല​യോ”?

അന്തർദേ​ശീയ ബഹിരാ​കാ​ശ​നി​ല​യത്തെ ശക്തമായി അനുകൂ​ലി​ക്കു​ന്ന​വ​രിൽ ചിലരെ സംബന്ധി​ച്ചി​ട​ത്തോ​ളം അതു കേവലം ഒഴുകി നടക്കുന്ന ഒരു പരീക്ഷ​ണ​ശാ​ലയല്ല. അപ്പോ​ളോ പദ്ധതി നടപ്പി​ലാ​ക്കിയ ബഹിരാ​കാശ ശാസ്‌ത്ര​ജ്ഞ​ന്മാ​രു​ടെ ഒരു വാഗ്‌ദാ​നം നിവർത്തി​ക്കു​ന്ന​തിന്‌ ഉള്ള മാർഗ​മാ​യാണ്‌ അവർ ഇതിനെ കാണു​ന്നത്‌. അവർ ചന്ദ്രനിൽ ഇട്ടിട്ടു പോന്ന ഒരു ഫലകത്തിൽ ഇപ്രകാ​രം എഴുതി​യി​രു​ന്നു: “മുഴു​മ​നു​ഷ്യ​വർഗ​ത്തി​ന്റെ​യും സമാധാ​ന​ത്തി​നു വേണ്ടി ഞങ്ങൾ വന്നു.” ഇപ്പോൾ എഴുപ​തു​ക​ളിൽ ആയിരി​ക്കുന്ന ബഹിരാ​കാശ സഞ്ചാരി ജോൺ ഗ്ലെൻ, അന്തർദേ​ശീയ ബഹിരാ​കാ​ശ​നി​ല​യത്തെ “സമാധാ​ന​ത്തി​നു വേണ്ടി​യുള്ള” ഒരു “പരീക്ഷ​ണ​ശാല” ആയി വർണി​ച്ച​ശേഷം ഇങ്ങനെ കൂട്ടി​ച്ചേർത്തു: “ഭൂമി​യിൽ വെച്ചു പരസ്‌പരം ഉപദ്ര​വി​ക്കു​ന്ന​തി​നുള്ള മാർഗങ്ങൾ കണ്ടുപി​ടി​ക്കു​ന്ന​തി​നു പകരം 16 രാഷ്‌ട്ര​ങ്ങൾക്കു ബഹിരാ​കാ​ശത്തു യോജി​പ്പോ​ടെ പ്രവർത്തി​ക്കാൻ [ഈ നിലയം] വഴി​യൊ​രു​ക്കും.” ഒരു രാഷ്‌ട്ര​ത്തി​നും തനിയെ ചെയ്യാൻ സാധി​ക്കാ​ത്ത​തും എന്നാൽ എല്ലാ രാഷ്‌ട്ര​ങ്ങൾക്കും പ്രയോ​ജനം ചെയ്യു​ന്ന​തു​മായ ശാസ്‌ത്രീ​യ​വും സാങ്കേ​തി​ക​വു​മായ പദ്ധതി​ക​ളിൽ അവർക്കു സഹകരണ മനോ​ഭാ​വ​ത്തോ​ടെ പ്രവർത്തി​ക്കാൻ കഴിയുന്ന ഒരു സ്ഥലമാ​യാണ്‌ അദ്ദേഹ​വും മറ്റുള്ള​വ​രും ഈ നിലയത്തെ കാണു​ന്നത്‌.

എന്നിരു​ന്നാ​ലും, ഭൂമി​യിൽ വെച്ചു സമാധാ​ന​പൂർണ​മാ​യി പരസ്‌പരം സഹകരി​ക്കാൻ കഴിയാത്ത രാഷ്‌ട്ര​ങ്ങൾക്കു ബഹിരാ​കാ​ശത്തു വെച്ച്‌ അപ്രകാ​രം ചെയ്യാൻ കഴിയു​മോ എന്ന്‌ അതിശയം കൊള്ളു​ന്ന​വ​രും കുറവല്ല. സംഗതി എന്തായാ​ലും ശരി, അജ്ഞാത​മാ​യവ കണ്ടുപി​ടി​ക്കാ​നും ബഹിരാ​കാ​ശത്തെ അവസ്ഥക​ളിൻ കീഴിൽ എന്തെല്ലാം സംഭവി​ക്കു​മെന്ന്‌ അറിയാ​നും ഉള്ള മനുഷ്യ​ന്റെ സ്വാഭാ​വിക ത്വരയു​ടെ പരിണ​തി​യാണ്‌ അന്തർദേ​ശീയ ബഹിരാ​കാ​ശ​നി​ലയം. തീർച്ച​യാ​യും, ഈ ബൃഹത്‌ പദ്ധതി മനുഷ്യ​ന്റെ സാഹസി​ക​ത​യു​ടെ​യും പുതിയ പുതിയ കാര്യങ്ങൾ കണ്ടുപി​ടി​ക്കാ​നുള്ള അവന്റെ അടങ്ങാത്ത ആഗ്രഹ​ത്തി​ന്റെ​യും ഫലമാണ്‌.

[15-17 പേജു​ക​ളി​ലെ ചതുരം/ചിത്രങ്ങൾ]

ബഹിരാ​കാ​ശ​നി​ല​യ​ങ്ങ​ളു​മാ​യി ബന്ധപ്പെട്ട തീയതി​കൾ

1869: അമേരി​ക്ക​ക്കാ​ര​നായ എഡ്‌വാർഡ്‌ എവററ്റ്‌ ഹെയ്‌ൽ ദ ബ്രിക്ക്‌ മൂൺ എന്ന പേരിൽ ഒരു ചെറുകഥ പ്രസി​ദ്ധീ​ക​രി​ക്കു​ന്നു. ഭൂമിക്കു മുകളിൽ സ്ഥിതി​ചെ​യ്യുന്ന ഇഷ്ടിക കൊണ്ട്‌ ഉണ്ടാക്കിയ, മനുഷ്യ​നെ വഹിക്കുന്ന ഒരു ഉപഗ്ര​ഹ​മാണ്‌ അതിന്റെ പ്രതി​പാ​ദ്യ വിഷയം.

1923: റൊ​മേ​നി​യ​യിൽ ജനിച്ച ഹെർമാൻ ഓബർട്ട്‌ “ബഹിരാ​കാ​ശ​നി​ലയം” എന്ന വാക്കു കണ്ടുപി​ടി​ക്കു​ന്നു. ചന്ദ്രനി​ലേ​ക്കും ചൊവ്വ​യി​ലേ​ക്കും പറക്കു​ന്ന​തിന്‌ ഉള്ള ഒരു ആരംഭ​സ്ഥാ​നം എന്ന അർഥമാണ്‌ അദ്ദേഹം അതിനു കൽപ്പി​ച്ചത്‌.

1929: ബഹിരാ​കാശ സഞ്ചാര​ത്തിൽ ഉൾപ്പെ​ട്ടി​രി​ക്കുന്ന പ്രശ്‌നങ്ങൾ [ഇംഗ്ലീഷ്‌] എന്ന തന്റെ പുസ്‌ത​ക​ത്തിൽ ഹെർമാൻ പോ​ട്ടോ​ക്‌നിക്‌, ബഹിരാ​കാ​ശ​നി​ല​യ​ത്തി​ന്റെ ഒരു രൂപരേഖ നൽകുന്നു.

1950-കൾ: റോക്കറ്റ്‌ എൻജി​നീ​യ​റായ വെർനർ ഫോൺ ബ്രൗൺ, ഭൂമിക്ക്‌ 1,730 കിലോ​മീ​റ്റർ മുകളിൽ ഭ്രമണം ചെയ്യുന്ന ചക്ര ആകൃതി​യിൽ ഉള്ള ഒരു നിലയത്തെ കുറിച്ചു വിവരി​ക്കു​ന്നു.

1971: ചരി​ത്ര​ത്തി​ലെ ആദ്യത്തെ ബഹിരാ​കാ​ശ​നി​ല​യ​മായ സല്യൂട്ട്‌ 1 സോവി​യറ്റ്‌ യൂണിയൻ വിക്ഷേ​പി​ക്കു​ന്നു. മൂന്നു ബഹിരാ​കാശ സഞ്ചാരി​കൾ അതിൽ 23 ദിവസം തങ്ങുന്നു.

1973: ആദ്യത്തെ യു.എസ്‌. ബഹിരാ​കാ​ശ​നി​ല​യ​മായ സ്‌​കൈ​ലാബ്‌ ഭ്രമണ​പ​ഥ​ത്തിൽ എത്തിക്കു​ന്നു. ബഹിരാ​കാശ സഞ്ചാരി​ക​ളു​ടെ മൂന്നു​സം​ഘങ്ങൾ ഇതു സന്ദർശി​ക്കു​ക​യു​ണ്ടാ​യി. ഇപ്പോൾ ഇതു ബഹിരാ​കാ​ശ​ത്തിൽ ഇല്ല.

1986: സോവി​യറ്റ്‌ യൂണിയൻ മിർ എന്ന ബഹിരാ​കാ​ശ​നി​ലയം വിക്ഷേ​പി​ക്കു​ന്നു. ബഹിരാ​കാ​ശത്ത്‌ സ്ഥിരമായ മനുഷ്യ​സാ​ന്നി​ധ്യം ഉറപ്പു​വ​രു​ത്തു​ന്ന​തി​നു വേണ്ടി രൂപകൽപ്പന ചെയ്‌ത ആദ്യത്തെ ബഹിരാ​കാ​ശ​നി​ലയം ആണിത്‌.

1993: ഐക്യ​നാ​ടു​കൾ റഷ്യ​യെ​യും ജപ്പാ​നെ​യും മറ്റു രാഷ്‌ട്ര​ങ്ങ​ളെ​യും അന്തർദേ​ശീയ ബഹിരാ​കാ​ശ​നി​ലയം വികസി​പ്പി​ക്കു​ന്ന​തിൽ പങ്കു​ചേ​രാൻ ക്ഷണിക്കു​ന്നു.

1998/99: അന്തർദേ​ശീയ ബഹിരാ​കാ​ശ​നി​ല​യ​ത്തി​ന്റെ ആദ്യ മോഡ്യൂ​ളു​കൾ, തീരു​മാ​നി​ച്ചി​രു​ന്ന​തി​ലും ഒരു വർഷം വൈകി ഭ്രമണ​പ​ഥ​ത്തി​ലേക്കു വിക്ഷേ​പി​ക്കു​ന്നു.

[ചിത്രങ്ങൾ]

മുകളിൽ: 2004-ൽ പൂർത്തി​യാ​കുന്ന ബഹിരാ​കാ​ശ​നി​ലയം ചിത്ര​കാ​രന്റെ ഭാവന​യിൽ

ആദ്യത്തെ രണ്ടു മോഡ്യൂ​ളു​ക​ളായ സാര്യാ​യും യൂണി​റ്റി​യും സംയോ​ജി​പ്പി​ക്ക​പ്പെട്ട നിലയിൽ

റോസും ന്യൂമാ​നും മൂന്നാ​മത്തെ തവണ ബഹിരാ​കാ​ശത്ത്‌ ഇറങ്ങി സഞ്ചരി​ച്ച​പ്പോൾ

ഒരു ബഹിരാ​കാശ പേടകം വിക്ഷേ​പി​ക്കു​ന്നു, ആസൂ​ത്രണം ചെയ്‌തി​ട്ടുള്ള നിരവധി വിക്ഷേ​പ​ണ​ങ്ങ​ളിൽ ഒന്ന്‌

സ്‌​കൈ​ലാബ്‌

മിർ

[കടപ്പാട്‌]

15-17 പേജുകൾ: NASA photos