ഒരതുല്യ പുനഃസമാഗമം
ബ്രിട്ടനിലെ ഉണരുക! ലേഖകൻ
വർഷം 1945. ബ്രൂസിനു വയസ്സ് രണ്ട്. അവന്റെ അമ്മ, മേരി, അവനെ അവസാനമായി കണ്ടത് ആ വർഷമായിരുന്നു. മേരിയുടെ വിവാഹമോചനത്തെത്തുടർന്ന് ബ്രൂസിന്റെ നിയമപരമായ സംരക്ഷണാവകാശം അവന്റെ പിതാവിനു നൽകപ്പെട്ടു. താനുമായി യാതൊരു വൈകാരിക അടുപ്പവും കൂടാതെ ബ്രൂസിനെ അവന്റെ പിതാവും അദ്ദേഹത്തിന്റെ പുതിയ ഭാര്യയും വളർത്തിക്കൊണ്ടു വരുന്നതായിരിക്കും ഏറ്റവും ഉത്തമം എന്ന് തന്റെ സ്വാഭാവിക വികാരങ്ങൾ കടിച്ചമർത്തിക്കൊണ്ട് മേരി തീരുമാനിച്ചു. ക്രമേണ ബ്രൂസുമായി അവർക്ക് യാതൊരു സമ്പർക്കവുമില്ലാതായി.
ഏതാനും വർഷങ്ങൾക്കു ശേഷം മേരി പുനർവിവാഹം കഴിക്കുകയും ഒരു മകനു ജൻമമേകുകയും ചെയ്തു. എന്നാൽ അപ്പോഴും അവർ ബ്രൂസിനെക്കുറിച്ചുള്ള ഓർമ താലോലിച്ചിരുന്നു. അവൻ എവിടെയായിരുന്നു? അവന് ഇപ്പോൾ എന്തു സംഭവിച്ചിരുന്നു?
1976-ൽ ബ്രൂസിന്റെ പിതാവു നിര്യാതനായപ്പോൾ, ശവസംസ്കാര ചടങ്ങിൽ മേരിയും പങ്കെടുത്തിരുന്നു. അപ്പോൾ, തന്റെ 30-കളിലായ ഒരു മിടുക്കൻ ചെറുപ്പക്കാരനായിരുന്നു ബ്രൂസ്. രണ്ടാനമ്മയോടൊപ്പം അവൻ അവിടെ ഉണ്ടായിരുന്നു. രണ്ടാനമ്മ തന്റെ സ്വാഭാവിക മാതാവാണെന്നാണ് ബ്രൂസ് കരുതുന്നതെന്ന് മേരി അപ്പോഴും വിശ്വസിച്ചതിനാൽ, വിശേഷിച്ചും അത്തരമൊരു സാഹചര്യത്തിൽ, അവനോട് താനാരാണെന്നു പറയുന്നത് വലിയ ക്രൂരതയായിരിക്കുമെന്ന് അവർക്കു തോന്നി. അവന്റെ പിതാവ് പുനർവിവാഹം ചെയ്തയുടനെതന്നെ അവനെ ഉപേക്ഷിച്ചെന്നും തുടർന്ന് ബ്രൂസിനെ അവന്റെ വല്യമ്മയാണ് വളർത്തിയതെന്നും അറിഞ്ഞിരുന്നെങ്കിൽ മേരി അങ്ങനെ പെരുമാറുമായിരുന്നില്ല.
ഏതാണ്ട് ഈ സമയത്ത് മേരി യഹോവയുടെ സാക്ഷികളിലൊരുവളായ സൂവിനെ കണ്ടുമുട്ടുകയും ഉടനടി ഒരു ഭവന ബൈബിളധ്യയനത്തിനു സമ്മതിക്കുകയും ചെയ്തു. യാദൃച്ഛികമെന്നു പറയട്ടെ, അതേസമയം ബ്രൂസും ഭാര്യയും സൂവിന്റെ ഭർത്താവായ അലെനുമൊത്തു ബൈബിൾ പഠിക്കാൻ ആരംഭിച്ചിരുന്നു. എന്നാൽ പെട്ടെന്നുതന്നെ, തന്റെ ആരോഗ്യ പ്രശ്നങ്ങൾ നിമിത്തം മേരി ബൈബിൾ പഠനം അവസാനിപ്പിക്കുകയും അവിടെനിന്നു സ്ഥലംമാറിപ്പോകുകയും ചെയ്തു.
1995-ൽ യഹോവയുടെ സാക്ഷികൾ മേരിയെ വീണ്ടും കണ്ടുമുട്ടി. അവർ തന്റെ ബൈബിൾ പഠനം പുനരാരംഭിക്കുകയും സത്വര പുരോഗതി വരുത്തുകയും ചെയ്തു. സ്നാപനത്തോട് അടുത്തപ്പോൾ, ബ്രൂസിനെക്കുറിച്ചുള്ള വിവരങ്ങൾ അവർ ഒരു ക്രിസ്തീയ മൂപ്പനോടു രഹസ്യമായി പറഞ്ഞു. അദ്ദേഹം അന്വേഷിക്കുകയും ബ്രൂസും കുടുംബവും യഹോവയുടെ സാക്ഷികളാണെന്നു മാത്രമല്ല അദ്ദേഹം മേരിയുടെ സ്വന്ത പട്ടണത്തിലുള്ള സഭയിൽ ഒരു മൂപ്പനാണെന്നും കണ്ടെത്തി!
ബ്രൂസിന്റെ സഭയിലെ മറ്റു മൂപ്പൻമാർ ആശങ്കാകുലരായി. കാരണം, ബ്രൂസിനോട് അദ്ദേഹത്തിന്റെ അമ്മ അടുത്ത പ്രത്യേക സമ്മേളനദിനത്തിൽ സ്നാപനമേൽക്കാൻ പോകുന്നുവെന്ന് പറയുന്നപക്ഷം, അദ്ദേഹത്തിന്റെ പ്രതികരണം എങ്ങനെയായിരിക്കും? തന്റെ അമ്മ ജീവിച്ചിരിപ്പുണ്ടെന്നുപോലും അദ്ദേഹത്തിനറിയാമോ? എന്നാൽ കാര്യങ്ങളുടെ നിജസ്ഥിതി അറിഞ്ഞയുടനെതന്നെ ബ്രൂസ്, മേരിയെക്കാണാനായി കുടുംബസമേതം പുറപ്പെട്ടു. “കഴിഞ്ഞതൊക്കെ കഴിഞ്ഞു, സത്യത്തിലായിരിക്കുമ്പോൾ ഭാവിക്കാണ് വിലയുള്ളത്!” തന്റെ അമ്മയെ ആശ്ലേഷിക്കവേ, അദ്ദേഹം പറഞ്ഞ സാന്ത്വനദായകമായ വാക്കുകളായിരുന്നു ഇവ.
1996 മാർച്ചിൽ, മേരി തന്റെ 78-ാമത്തെ വയസ്സിൽ ഇംഗ്ലണ്ടിലുള്ള, യഹോവയുടെ സാക്ഷികളുടെ പൂർവ പെനിൻ സമ്മേളന ഹാളിൽവെച്ച് സ്നാപനമേറ്റു. ബ്രൂസാണ് അവരെ സ്നാപനപ്പെടുത്തിയത്. ഒരു ആത്മീയ സഹോദരിയായി തന്റെ അമ്മയെ തിരികെക്കിട്ടിയതിൽ ബ്രൂസ് എത്ര പുളകിതനായെന്നോ!
[24-ാം പേജിലെ ചിത്രം]
ബ്രൂസ് തന്റെ അമ്മയോടൊപ്പം