ഡിഡ്‌ജെ​റി​ഡൂ​വും അതിന്റെ മനോജ്ഞ താളല​യ​ങ്ങ​ളും

ഓസ്‌​ട്രേ​ലി​യ​യി​ലെ ഉണരുക! ലേഖകൻ

ഓസ്‌​ട്രേ​ലി​യ​യു​ടെ വടക്കൻ പ്രവി​ശ്യ​യിൽ അതിന്റെ തലസ്ഥാന നഗരി​യായ ഡാർവി​നിൽനി​ന്നും ഏതാനും മണിക്കൂർ യാത്ര ചെയ്‌ത്‌ ഞങ്ങളോ​ടൊ​പ്പം ഒരു ആദിവാ​സി നൃത്തം കാണാൻ വരൂ. ഒരു ഗോത്ര യുദ്ധത്തി​ന്റെ നാന്ദി​യാ​യി നടത്തു​ന്ന​തി​നു പകരം, ആധുനി​ക​നാ​ളി​ലെ മിക്ക ആദിവാ​സി നൃത്തങ്ങ​ളും വിനോ​ദ​സ​ഞ്ചാ​രി​കൾക്കു​വേണ്ടി പ്രത്യേ​കം നടത്ത​പ്പെ​ടു​ന്ന​വ​യാണ്‌. അത്തര​മൊ​ന്നിൽ സംബന്ധി​ക്കാ​നാ​ണു നാം പോകു​ന്നത്‌.

കടുത്ത ചായങ്ങ​ളാൽ ശരീരം വർണോ​ജ്വ​ല​മാ​ക്കിയ അവതാ​രകർ, തങ്ങളുടെ നൃത്തം തുടങ്ങാ​നുള്ള സൂചന​യ്‌ക്കാ​യി സംഗീതം ആരംഭി​ക്കാൻ കാത്തു​നിൽക്കു​ക​യാണ്‌. പെട്ടെന്ന്‌ സംഗീതം ആരംഭി​ക്കു​ന്നു. ഉച്ചത്തി​ലുള്ള, ഹൃദയ​മി​ടി​പ്പു വർധി​പ്പി​ക്കുന്ന താളലയം സായം​സ​ന്ധ്യ​യ്‌ക്ക്‌ ആ ഒറ്റപ്പെട്ട ഗ്രാമ​പ്ര​ദേ​ശത്തു മുഴങ്ങി​ക്കേൾക്കാം. കൊട്ടു​കോ​ലു​കൾ—ഡിഡ്‌ജെ​റി​ഡൂ പുറ​പ്പെ​ടു​വി​ക്കുന്ന സംഗീ​ത​ത്തോ​ടൊ​പ്പം ഒരേ താളത്തിൽ കൂട്ടി​യ​ടി​ക്കാ​നു​പ​യോ​ഗി​ക്കുന്ന രണ്ടു ചെറിയ കോലു​കൾ—താള​മേ​ള​ങ്ങ​ളു​ടെ കൊഴു​പ്പു കൂട്ടുന്നു.

ഓസ്‌​ട്രേ​ലി​യൻ ആദിവാ​സി​ക​ളു​ടെ തനതായ ഡിഡ്‌ജെ​റി​ഡൂ എന്ന വാദ്യോ​പ​ക​രണം വായി​ക്കു​ന്നത്‌ ഒരുപക്ഷേ ഓസ്‌​ട്രേ​ലി​യ​യ്‌ക്കു പുറത്തുള്ള അപൂർവം ചിലരേ കേട്ടി​ട്ടു​ണ്ടാ​കൂ. സാധാ​ര​ണ​ഗ​തി​യിൽ ഇത്‌ യൂക്കാ​ലി​പ്‌റ്റസ്‌ മരത്തിന്റെ ഉള്ളു തുരന്നു​കളഞ്ഞ ശിഖര​ങ്ങ​ളിൽ നിന്നാണ്‌ നിർമി​ച്ചെ​ടു​ക്കു​ന്നത്‌. 1 മുതൽ 1.5 വരെ മീറ്റർ നീളമു​ള്ള​വ​യാണ്‌ കൂടുതൽ അഭില​ഷ​ണീ​യം. നൃത്തം അവതരി​പ്പി​ക്കുന്ന സ്ഥലത്തിന്റെ ഒരു വശത്തായി നിലത്തി​രു​ന്നാണ്‌ സംഗീ​തജ്ഞൻ ഡിഡ്‌ജെ​റി​ഡൂ ഊതു​ന്നത്‌—കാഴ്‌ച​യ്‌ക്കു ലളിത​വും എന്നാൽ കൗതു​ക​മു​ണർത്തു​ന്ന​തു​മായ ഒരു വാദ്യം.

അതുല്യ​മായ ശബ്ദം

ഡിഡ്‌ജെ​റി​ഡൂ മിക്കവാ​റും വ്യതി​യാ​ന​മി​ല്ലാ​തെ ഒരേ സ്ഥായി​യി​ലുള്ള ശബ്ദമാണു പുറ​പ്പെ​ടു​വി​ക്കു​ന്ന​തെ​ങ്കിൽക്കൂ​ടി—അതിനു ചേർച്ച​യിൽ “ഏകനാദ കാഹളം” എന്നു വിളി​ച്ചി​രി​ക്കു​ന്നു—അതിനു സങ്കീർണ​മായ താളങ്ങ​ളും സ്വരക​മ്പ​ന​ങ്ങ​ളു​മു​ണ്ടാ​ക്കാൻ സാധി​ക്കും. ഒരു നിമിഷം അതൊരു ഏകവാ​ദ്യ​ത്തി​ന്റെ ശബ്ദവും അടുത്ത നിമിഷം ഒരു മുഴു വൃന്ദവാ​ദ്യ​ത്തി​ന്റെ പ്രതീ​തി​യും ജനിപ്പി​ക്കു​ന്നു.

ഏകദേശം 200 വർഷം മുമ്പ്‌—യൂറോ​പ്യ​ന്മാർ ഓസ്‌​ട്രേ​ലി​യ​യി​ലെ​ത്തു​ന്ന​തി​നു മുമ്പ്‌—ഈ ദ്വീപ​ഭൂ​ഖ​ണ്ഡ​ത്തി​ന്റെ വടക്കൻ പ്രദേ​ശ​ങ്ങ​ളി​ലുള്ള ആദിവാ​സി​കൾക്കു മാത്രമേ ഡിഡ്‌ജെ​റി​ഡൂ​വി​നെ​ക്കു​റിച്ച്‌ അറിവു​ണ്ടാ​യി​രു​ന്നു​ള്ളൂ. സൃഷ്ടിപ്പു സംബന്ധി​ച്ചുള്ള പുരാ​ണ​ക​ഥ​കളെ ഇതിവൃ​ത്ത​മാ​ക്കി അഭിന​യി​ക്കുന്ന ആദിവാ​സി നൃത്തങ്ങ​ളിൽ, അതൊരു സംഗീത പശ്ചാത്ത​ല​മൊ​രു​ക്കി. മുമ്പ്‌, ഡിഡ്‌ജെ​റി​ഡൂ നന്നായി വായി​ക്കാ​ന​റി​യാ​വു​ന്ന​വരെ വളരെ ബഹുമാ​ന്യ​രാ​യി കണക്കാ​ക്കി​യി​രു​ന്നു. ഇപ്പോ​ഴും, വിദഗ്‌ധ​നായ ഒരു വാദ്യ​ക്കാ​രനെ ഗോ​ത്ര​ത്തി​ലെ ആദരണീ​യ​നായ വ്യക്തി​യാ​യി​ട്ടാ​ണു കണക്കാ​ക്കു​ന്നത്‌.

വിദഗ്‌ധ​രാ​യ വാദ്യ​ക്കാർ മിക്ക​പ്പോ​ഴും ഡിഡ്‌ജെ​റി​ഡൂ​വി​ന്റെ നാദങ്ങ​ളോ​ടൊ​പ്പം മൃഗങ്ങ​ളു​ടെ​യും പക്ഷിക​ളു​ടെ​യും ശബ്ദാനു​ക​ര​ണങ്ങൾ കേൾപ്പി​ക്കു​ന്നു. ഓസ്‌​ട്രേ​ലി​യൻ പൊന്മാ​ന്റെ ചിലപ്പും കാട്ടു നായയു​ടെ​യോ ഡിങ്കോ​യു​ടെ​യോ ഓലി​യും പ്രാവി​ന്റെ നനുത്ത കുറു​ക​ലും മറ്റനേകം ശബ്ദങ്ങളും അവരുടെ വിദഗ്‌ധ​മായ മിമി​ക്രി​യിൽപ്പെ​ടു​ന്നു.

ദ ന്യൂ ഗ്രോവ്‌ ഡിക്‌ഷ്‌നറി ഓഫ്‌ മ്യൂസിക്ക്‌ ആൻഡ്‌ മ്യുസി​ഷ്യൻസ്‌ ഡിഡ്‌ജെ​റി​ഡൂ വാദ്യ​ക്കാ​ര​നെ​പ്പറ്റി ഇങ്ങനെ പറയുന്നു: “അയാളു​ടെ സവി​ശേ​ഷ​ത​ക​ളിൽ, കൃത്യ​വും മികവാർന്ന​തു​മായ ശബ്ദനി​യ​ന്ത്ര​ണ​വും ശ്വാസ​നി​യ​ന്ത്ര​ണ​വും കുഴലി​ന്റെ അറ്റത്തു ചുണ്ടു ചേർക്കു​ന്ന​തി​ന്റെ കൃത്യ​ത​യും സംഗീതം ഓർമി​ക്കാ​നുള്ള സാമർഥ്യ​വും പെടുന്നു. . . . അയാൾക്കു പരിമി​ത​മായ സാങ്കേ​തി​ക​വി​ദ്യ​യും സാമ​ഗ്രി​ക​ളു​മാ​ണു​ള്ളത്‌. കുഴലി​ന്റെ ഊതുന്ന ഭാഗം, ഊത്തു​കു​ഴൽ, ദ്വാരങ്ങൾ അല്ലെങ്കിൽ വിരലു​ക​ളാൽ ശബ്ദനി​യ​ന്ത്രണം നടത്തുന്ന സുഷി​രങ്ങൾ എന്നിങ്ങ​നെ​യുള്ള ആശയങ്ങ​ളു​മാ​യി യാതൊ​രു പരിച​യ​വു​മി​ല്ല​താ​നും. എങ്കിൽപ്പോ​ലും, ആദിവാ​സി ലളിത​മായ ആ ഉപകര​ണത്തെ സംഗീത ഭാവന​ക​ളാ​ലും സവി​ശേ​ഷ​ത​യാർന്ന ശാരീ​രിക കഴിവു​കൾകൊ​ണ്ടും ഒരു വിശേ​ഷ​പ്പെട്ട സംഗീ​തോ​പ​ക​ര​ണ​മാ​ക്കി​ത്തീർത്തി​രി​ക്കു​ന്നു.”

സംശയ​ലേ​ശ​മെ​ന്യേ, ഡിഡ്‌ജെ​റി​ഡൂ സംഗീ​ത​ത്തി​ന്റെ ഏറ്റവും മികച്ച സവി​ശേഷത അതിന്റെ തുടർച്ച​യായ സ്വരം അല്ലങ്കിൽ ഏകനാ​ദ​മാണ്‌. ഒരു പ്രാവ​ശ്യം പത്തു മിനി​റ്റു​വരെ ഇടമു​റി​യാത്ത നാദധാര പുറ​പ്പെ​ടു​വി​ച്ചേ​ക്കാ​മെ​ന്ന​തി​നാൽ വായി​ക്കു​ന്ന​യാൾ തനിക്കു ശ്വാസം പിടി​ക്കാ​നുള്ള നിലയ്‌ക്കാത്ത കഴിവു​ണ്ടെന്ന പ്രതീതി ജനിപ്പി​ക്കു​ന്നു.

ഡിഡ്‌ജെ​റി​ഡൂ നിർമി​ക്കൽ

ഒരു സ്വദേ​ശി​യായ കരകൗ​ശ​ല​വി​ദ​ഗ്‌ധൻ തന്റെ തഴക്കം വന്ന കണ്ണുക​ളാൽ അനു​യോ​ജ്യ​മായ, കട്ടികൂ​ടിയ തടിക്കു വേണ്ടി കുറ്റി​ക്കാ​ടു​കൾക്കി​ട​യിൽ തിരയു​ന്നു. യൂക്കാ​ലി​പ്‌റ്റ​സി​ന്റേ​താ​ണു കൂടുതൽ നന്ന്‌. കട്ടി കുറഞ്ഞ​യി​നം തടിയും ഉപയോ​ഗി​ക്കാ​മെ​ങ്കി​ലും, കട്ടിയു​ള്ളത്‌ ഒരു അതുല്യ സ്വരം നൽകുന്നു. ചിതൽപ്പു​റ്റു​ക​ളോ​ടു കുറെ​യൊ​ക്കെ അടുത്തുള്ള മരമാ​യി​രി​ക്കണം കണ്ടുപി​ടി​ക്കു​ന്നത്‌. കാരണം ചിതലു​കൾ ഡിഡ്‌ജെ​റി​ഡൂ​വി​ന്റെ എൻജി​നീ​യർമാ​രാണ്‌. അവ ഈ വാദ്യോ​പക​ര​ണ​മു​ണ്ടാ​ക്കാ​നു​പ​യോ​ഗി​ക്കുന്ന ശിഖരങ്ങൾ പൊള്ള​യാ​ക്കി​ത്തീർക്കു​ന്നു.

ശിഖരം തിര​ഞ്ഞെ​ടു​ത്തു​ക​ഴി​ഞ്ഞാൽ, അതു വേണ്ടത്ര നീളത്തിൽ മുറി​ച്ചെ​ടു​ക്കു​ന്നു. മുറി​ച്ചെ​ടു​ക്കുന്ന നീളമാണ്‌ പണിതീർത്ത വാദ്യ​ത്തി​ന്റെ സ്വരസ്ഥാ​യി നിശ്ചയി​ക്കു​ന്നത്‌. അതിനു​ശേഷം തൊലി​ചെത്തി, പൊട്ടാ​തി​രി​ക്കാൻ തടിവെള്ള ചീകി​മി​നു​ക്കി ഉൾവശം വൃത്തി​യാ​ക്കി​യെ​ടു​ക്കു​ന്നു. ചിതലു​കൾ കാമ്പു വേണ്ടത്ര തിന്നു​തീർത്തി​ട്ടു​ണ്ടെ​ങ്കിൽ സാമാ​ന്യം വലുപ്പ​മുള്ള ഒരു നാണയം മധ്യത്തി​ലൂ​ടെ ഉരുട്ടി​വി​ടാൻ സാധി​ക്കും. അടുത്ത പടി അലങ്കാ​ര​പ്പ​ണി​യാണ്‌. അതു തികച്ചും ആകർഷ​ക​മാ​യി​രു​ന്നേ​ക്കാം. പക്ഷേ ഡിഡ്‌ജെ​റി​ഡൂ ഇതുവരെ വായി​ക്കാൻ പാകത്തിന്‌ ആയിട്ടില്ല.

മരവു​മാ​യി തുടർച്ച​യാ​യി ഉരസു​ന്ന​തു​മൂ​ലം വായി​ക്കുന്ന ആളുടെ വായുടെ ചുറ്റു​മുള്ള തൊലി​ക്കു കുറച്ചു സമയത്തി​ന​കം​തന്നെ ചൊറി​ച്ചി​ലു​ണ്ടാ​യേ​ക്കാം. അതു​കൊണ്ട്‌ ഡിഡ്‌ജെ​റി​ഡൂ​വി​ന്റെ ഊതുന്ന വശത്തിനു ചുറ്റു​മാ​യി തേനീ​ച്ച​യു​ടെ മെഴു​കു​കൊ​ണ്ടുള്ള ഒരു വിളു​മ്പു​ണ്ടാ​ക്കു​ന്നു. ഇത്‌ വാദ്യ​ക്കാ​രന്റെ തൊലിക്ക്‌ അലോ​സ​ര​മു​ണ്ടാ​ക്കാ​ത്ത​വി​ധം ഒരു മിനു​സ​മേ​റിയ പ്രതലം കൈവ​രു​ത്തു​ന്നു. എന്നിരു​ന്നാ​ലും, ഇന്നു മിക്കവാ​റു​മെല്ലാ ഡിഡ്‌ജെ​റി​ഡൂ​ക​ളും ഫാക്ടറി ഉത്‌പാ​ദി​ത​മാണ്‌. മിക്കവ​യും കട്ടികു​റഞ്ഞ തടി​കൊ​ണ്ടു നിർമി​ക്ക​പ്പെ​ടു​ന്നവ. പക്ഷേ ഫാക്ടറി​യിൽ നിർമി​ക്ക​പ്പെ​ടുന്ന ഡിഡ്‌ജെ​റി​ഡൂ​കൾക്ക്‌ പ്രകൃ​തി​ദ​ത്ത​മായ കട്ടിയുള്ള തടി​കൊ​ണ്ടു നിർമി​ക്കു​ന്ന​വ​യ്‌ക്കുള്ള അതുല്യ​മായ ഗുണവും ഇമ്പവും കുറവാ​യി​രി​ക്കും.

അങ്ങനെ, ഉഷ്‌ണ​മേ​ഖലാ പ്രദേ​ശത്തെ നക്ഷത്ര​ങ്ങൾക്കു കീഴിലെ ആ മനോഹര സായാ​ഹ്ന​ത്തി​ന്റെ അവസാ​ന​ത്തിൽ ആദിവാ​സി നൃത്തം തീരു​മ്പോ​ഴേ​ക്കും നാം മേലാൽ ഡിഡ്‌ജെ​റി​ഡൂ​വി​നെ വെറും ഒരു കൗതു​ക​വ​സ്‌തു​വാ​യി കണക്കാ​ക്കു​ക​യില്ല. തീർച്ച​യാ​യും, ഡിഡ്‌ജെ​റി​ഡൂ​വി​ന്റെ സുദീർഘ​മായ താളല​യങ്ങൾ ഓസ്‌​ട്രേ​ലി​യ​യി​ലെ സംഗീ​ത​സ്‌നേ​ഹി​ക​ളായ സ്വദേ​ശീ​യർക്ക്‌ അഭിമാ​ന​ഭാ​ജ​ന​മാണ്‌.

[24-ാം പേജിലെ ചിത്രം]

ഡിഡ്‌ജെറിഡൂ നിറപ്പ​കി​ട്ടാർന്ന ചായങ്ങൾ തേച്ചു മോടി​പി​ടി​പ്പി​ച്ച​താ​കാം

[25-ാം പേജിലെ ചിത്രം]

ഒരു ആദിവാ​സി നൃത്തം

[25-ാം പേജിലെ ചിത്ര​ത്തിന്‌ കടപ്പാട്‌]

Pages 24-5 Aborigines: By Courtesy of Australian Northern Territory Tourist Commission