യുവജ​നങ്ങൾ ചോദി​ക്കു​ന്നു . . .

മുട്ടാ​ളത്തം—എന്താണ്‌ അതിന്റെ ദോഷം?

‘ഹേ! ഞാൻ വെറു​തെ​യൊ​രു തമാശ കാണി​ക്കു​ക​യാ​യി​രു​ന്നു. അതാണോ ഇത്ര വലിയ കാര്യം? കൂടാതെ, റോണിന്‌ അതുതന്നെ വേണമാ​യി​രു​ന്നു.’

നിങ്ങൾ മിക്ക സമപ്രാ​യ​ക്കാ​രെ​ക്കാ​ളും വലുപ്പ​വും ശക്തിയും ഉള്ളവനാ​യി​രി​ക്കാം. അല്ലെങ്കിൽ ഒരുപക്ഷേ കുശാ​ഗ്ര​ബു​ദ്ധി​യും കുത്തു​വാ​ക്കു​കൾ പറയു​ന്ന​വ​നും ആക്രമ​ണോ​ത്സു​ക​നും ആയിരി​ക്കാം. എന്തുതന്നെ സംഭവി​ച്ചാ​ലും, ഭയപ്പെ​ടു​ത്തു​ന്ന​തോ പരിഹ​സി​ക്കു​ന്ന​തോ ആർക്കെ​ങ്കി​ലും ബുദ്ധി​മു​ട്ടു വരുത്തി​ക്കൊണ്ട്‌ മറ്റുള്ള​വരെ ചിരി​പ്പി​ക്കു​ന്ന​തോ നിങ്ങൾക്ക്‌ അനായാ​സ​മാ​യി തോന്നി​യേ​ക്കാം.

മറ്റുള്ള​വ​രെ ദ്രോ​ഹി​ക്കു​ന്നതു നിങ്ങളു​ടെ സുഹൃ​ത്തു​ക്കളെ ചിരി​പ്പി​ച്ചേ​ക്കാ​മെ​ങ്കി​ലും അതു നിസ്സാര കാര്യമല്ല. മുട്ടാ​ള​ത്ത​ത്തിന്‌ ഇരയാ​കു​ന്ന​വർക്ക്‌ അത്‌, തങ്ങൾ വിചാ​രി​ച്ചി​രു​ന്ന​തി​നെ​ക്കാൾ കൂടുതൽ ദോഷം ചെയ്യു​ന്നു​വെന്നു ചില ഗവേഷകർ മനസ്സി​ലാ​ക്കു​ന്നു. “മാർക്കു കുറയൽ, ഉത്‌കണ്‌ഠ വർധിക്കൽ, സുഹൃ​ത്തു​ക്ക​ളു​ടെ കാര്യ​ത്തി​ലോ സാമൂ​ഹിക ജീവി​ത​ത്തി​ലോ നഷ്ടം ഭവിക്കൽ തുടങ്ങിയ പാർശ്വ​ഫ​ലങ്ങൾ തങ്ങൾക്ക​നു​ഭ​വ​പ്പെ​ട്ടെന്നു മുട്ടാ​ള​ത്ത​ത്തി​നു വിധേ​യ​രായ 90 ശതമാനം പേർ പറഞ്ഞതാ​യി” യു.എസ്‌.-ലെ സ്‌കൂൾ പ്രായ​ത്തി​ലുള്ള കുട്ടി​ക​ളു​ടെ ഇടയിൽ നടത്തിയ ഒരു സർവേ കണ്ടെത്തി. “മൂന്നു​വർഷ​ക്കാ​ലം താൻ മുട്ടാ​ള​ത്ത​ത്തിന്‌ ഇരയാ​യ​തി​നെ​പ്പറ്റി വിവരി​ച്ചു​കൊ​ണ്ടു ദീർഘ​മാ​യൊ​രു കുറിപ്പ്‌ എഴുതി​വെ​ച്ചിട്ട്‌” ജപ്പാനിൽ ഒരു 13 വയസ്സു​കാ​രൻ “തൂങ്ങി​മ​രി​ച്ചു.”a

ഒരുവനെ മുട്ടാ​ള​നാ​ക്കു​ന്നത്‌ എന്താണ്‌? നിങ്ങൾതന്നെ അങ്ങനെ പെരു​മാ​റു​ന്നെ​ങ്കിൽ നിങ്ങൾക്ക്‌ എങ്ങനെ മാറ്റം വരുത്താ​നാ​കും?

എന്താണ്‌ മുട്ടാ​ളത്തം?

നോഹ​യു​ടെ നാളിലെ ജലപ്ര​ള​യ​ത്തി​നു മുമ്പ്‌ ജീവി​ച്ചി​രുന്ന മുട്ടാ​ളൻമാ​രെ​ക്കു​റി​ച്ചു ബൈബിൾ പറയുന്നു. നെഫി​ലിം എന്ന്‌ അവരെ വിളി​ച്ചി​രു​ന്നു. “മറ്റുള്ള​വരെ വീഴി​ക്കു​ന്നവർ” എന്നാണ്‌ ആ പേരിന്റെ അർഥം. അവരുടെ ഭീകര​വാ​ഴ്‌ച​ക്കാ​ലത്ത്‌ “ഭൂമി അതി​ക്ര​മം​കൊ​ണ്ടു നിറഞ്ഞി​രു​ന്നു.”—ഉല്‌പത്തി 6:4, 11.

എന്നാൽ, ഒരു മുട്ടാ​ള​നാ​യി​രി​ക്കു​ന്ന​തി​നു നിങ്ങൾ ആളുകളെ പ്രഹരി​ക്കു​ക​യോ അവരോ​ടു പുച്ഛ​ത്തോ​ടെ ഇടപെ​ടു​ക​യോ ചെയ്യണ​മെ​ന്നില്ല. മറ്റാളു​ക​ളോട്‌—പ്രത്യേ​കി​ച്ചും ദുർബ​ല​രോ അരക്ഷി​താ​വ​സ്ഥ​യി​ലു​ള്ള​വ​രോ ആയവ​രോട്‌—ക്രൂര​വും നിന്ദാ​പ​ര​വു​മാ​യി ഇടപെ​ടുന്ന ഏതൊ​രു​വ​നും ഒരു മുട്ടാ​ള​നാണ്‌. (സഭാ​പ്ര​സം​ഗി 4:1 താരത​മ്യം ചെയ്യുക.) മുട്ടാ​ളൻമാർ ഭീഷണി​പ്പെ​ടു​ത്താ​നും ഭയപ്പെ​ടു​ത്താ​നും നിയ​ന്ത്രി​ക്കാ​നും ശ്രമി​ക്കു​ന്നു. എന്നാൽ മിക്കവ​രും തങ്ങളുടെ വായാണ്‌ ഉപയോ​ഗി​ക്കു​ന്നത്‌, മുഷ്ടി​കളല്ല. വൈകാ​രി​ക​മായ ദ്രോ​ഹി​ക്ക​ലാണ്‌ ഈ ദുഷിച്ച പ്രവർത്ത​ന​ത്തി​ന്റെ ഏറ്റവും സർവസാ​ധാ​ര​ണ​മായ രൂപം. അവമതി​ക്കൽ, കുത്തു​വാക്ക്‌, പരിഹാ​സം, ചീത്തവി​ളി എന്നിവ​യൊ​ക്കെ ഇതിൽ ഉൾപ്പെ​ടാം.

എങ്കിലും മുട്ടാ​ളത്തം ചില​പ്പോൾ കുടി​ല​മാ​യി​രി​ക്കാ​വു​ന്ന​താണ്‌. ദൃഷ്ടാ​ന്ത​ത്തിന്‌, ലിസാ​യ്‌ക്ക്‌ എന്തു സംഭവി​ച്ചെന്നു പരിഗ​ണി​ക്കുക.b പെൺകു​ട്ടി​ക​ളായ ഒരുപറ്റം സുഹൃ​ത്തു​ക്ക​ളു​ടെ കൂടെ​യാണ്‌ അവൾ വളർന്നു​വ​ന്നത്‌. പക്ഷേ അവൾക്കു 15 വയസ്സാ​യ​പ്പോ​ഴേ​ക്കും കാര്യ​ങ്ങൾക്കു മാറ്റം ഭവിക്കാൻ തുടങ്ങി. സുന്ദരി​യായ ലിസാ മറ്റുള്ള​വ​രു​ടെ ശ്രദ്ധയ്‌ക്കു പാത്ര​മാ​യി. അവൾ വിശദീ​ക​രി​ക്കു​ന്നു: “എന്റെ സുഹൃ​ത്തു​ക്കൾ എന്നെ ഒഴിവാ​ക്കാ​നും എന്നെക്കു​റി​ച്ചു ദ്രോ​ഹ​ക​ര​മായ കാര്യങ്ങൾ ഒളിഞ്ഞും തെളി​ഞ്ഞും പറയാ​നും തുടങ്ങി.” അവളുടെ സത്‌പേര്‌ നശിപ്പി​ക്കാ​നുള്ള ഉദ്യമ​ത്തിൽ അവർ അവളെ​ക്കു​റി​ച്ചു നുണക​ളും പരത്തി. അതേ, അസൂയ​കൊ​ണ്ടു പ്രകോ​പി​ത​രായ അവർ മനംത​ഴ​മ്പി​ച്ച​തും ക്രൂര​വു​മായ ഒരു വിധത്തിൽ അവളോ​ടു മുട്ടാ​ള​ത്തം​കാ​ട്ടി.

ഒരു മുട്ടാ​ള​നാ​യി​ത്തീ​രൽ

ആക്രമ​ണോ​ത്സു​ക​മായ സ്വഭാവം മിക്ക​പ്പോ​ഴും ഒരുവന്റെ വീട്ടിലെ സാഹച​ര്യ​ങ്ങ​ളു​മാ​യി ബന്ധപ്പെ​ട്ടി​രി​ക്കു​ന്നു. “എന്റെ പിതാവ്‌ ആക്രമ​ണോ​ത്സു​ക​നാ​യി​രു​ന്നു, അതു​കൊണ്ട്‌ ഞാനും ആക്രമ​ണോ​ത്സു​ക​നാ​യി​രു​ന്നു” എന്ന്‌ സ്‌കോട്ട്‌ എന്നു​പേ​രുള്ള ഒരു ചെറു​പ്പ​ക്കാ​രൻ പറയുന്നു. ആരനും ക്ലേശക​ര​മായ ഒരു കുടും​ബ​ജീ​വി​ത​മാ​യി​രു​ന്നു ഉണ്ടായി​രു​ന്നത്‌. അവൻ അനുസ്‌മ​രി​ക്കു​ന്നു: “എന്റെ കുടുംബ സാഹച​ര്യ​ത്തെ​ക്കു​റിച്ച്‌—അതു സാധാ​ര​ണ​പോ​ലെ​യ​ല്ലെന്ന്‌—ആളുകൾക്ക്‌ അറിയാ​മാ​യി​രു​ന്നു​വെന്നു ഞാൻ തിരി​ച്ച​റി​ഞ്ഞു. എന്നോട്‌ ആളുകൾക്കു സഹതാപം തോന്നു​ന്നത്‌ എനിക്കി​ഷ്ട​മാ​യി​രു​ന്നില്ല.” അതു​കൊണ്ട്‌ കായി​ക​വി​നോ​ദ​ങ്ങ​ളിൽ ഏർപ്പെ​ട്ട​പ്പോൾ ആരനു ജയി​ക്കേ​ണ്ട​തു​ണ്ടാ​യി​രു​ന്നു. എന്നാൽ ജയിക്കു​ന്ന​തു​മാ​ത്രം മതിയാ​യി​രു​ന്നില്ല. തന്റെ എതിരാ​ളി​ക​ളു​ടെ പരാജ​യത്തെ വീണ്ടും വീണ്ടും അവരുടെ ശ്രദ്ധയിൽപ്പെ​ടു​ത്തി​ക്കൊണ്ട്‌ അവനവരെ അവമതി​ക്ക​ണ​മാ​യി​രു​ന്നു.

അതേസ​മ​യം, ദൈവ​ഭ​യ​മുള്ള മാതാ​പി​താ​ക്ക​ളാ​ണു ബ്രെൻറി​നെ വളർത്തി​ക്കൊ​ണ്ടു​വ​ന്നത്‌. പക്ഷേ അവൻ ഇങ്ങനെ സമ്മതി​ച്ചു​പ​റ​യു​ന്നു: “ഞാൻ ആളുകളെ ചിരി​പ്പി​ക്കു​മാ​യി​രു​ന്നു, എന്നാൽ എപ്പോൾ നിർത്ത​ണ​മെന്ന്‌ എനിക്ക​റി​യി​ല്ലാ​യി​രു​ന്നു, ഞാൻ ചിലരു​ടെ വികാ​ര​ങ്ങളെ വ്രണ​പ്പെ​ടു​ത്തു​മാ​യി​രു​ന്നു.” രസിക്കാ​നും തന്നി​ലേക്കു ശ്രദ്ധയാ​കർഷി​ക്കാ​നു​മുള്ള ബ്രെൻറി​ന്റെ ആഗ്രഹം മറ്റാളു​ക​ളു​ടെ വികാ​ര​ങ്ങ​ളോട്‌ അനാദ​രവു കാട്ടാൻ അവനെ പ്രേരി​പ്പി​ച്ചു.—സദൃശ​വാ​ക്യ​ങ്ങൾ 12:18.

മറ്റു ചെറു​പ്പ​ക്കാ​രെ ടെലി​വി​ഷൻ സ്വാധീ​നി​ക്കു​ന്ന​താ​യി കാണ​പ്പെ​ടു​ന്നു. കുറ്റകൃ​ത്യ​നാ​ട​കങ്ങൾ ‘നിർദ​യ​രായ ആളുകളെ’ മഹത്ത്വീ​ക​രി​ക്കു​ക​യും ദയാലു​വാ​യി​രി​ക്കു​ന്നതു പുരു​ഷ​ത്വ​മ​ല്ലെന്നു തോന്നാൻ ഇടയാ​ക്കു​ക​യും ചെയ്യുന്നു. ജനരഞ്‌ജ​ക​ങ്ങ​ളായ ഹാസ്യ​പ​രി​പാ​ടി​കൾ പരിഹാ​സ​പൂ​രി​ത​മാണ്‌. വാർത്താ റിപ്പോർട്ടു​കൾ മിക്ക​പ്പോ​ഴും കായി​ക​വി​നോദ പരിപാ​ടി​ക​ളു​ടെ സമയത്തുള്ള പോരാ​ട്ട​ജ്വ​രം​ബാ​ധിച്ച, പരുക്കൻ സംസാ​ര​ത്തി​നു മുൻതൂ​ക്കം കൊടു​ക്കു​ന്നു. നാം മറ്റുള്ള​വ​രോട്‌ ഇടപെ​ടുന്ന വിധത്തെ നമ്മുടെ സുഹൃ​ത്തു​ക്കൾക്കും സ്വാധീ​നി​ക്കാൻ കഴിയും. നമ്മുടെ സമപ്രാ​യ​ക്കാർ മുട്ടാ​ളൻമാ​രാ​യി​രി​ക്കു​മ്പോൾ, മുട്ടാ​ള​ത്ത​ത്തി​നു വിധേ​യ​രാ​കാ​തി​രി​ക്കാൻ വേണ്ടി അവരുടെ നടപടി​ക​ളിൽ പങ്കു​ചേ​രാ​നുള്ള പ്രവണത നമുക്കുണ്ട്‌.

സാഹച​ര്യം എന്തായി​രു​ന്നാ​ലും, നിങ്ങൾ മുട്ടാ​ള​ത്ത​പ​ര​മായ തന്ത്രങ്ങൾ ഉപയോ​ഗി​ക്കു​ന്നെ​ങ്കിൽ, അതു നിങ്ങളു​ടെ ഇരകൾക്കു മാത്രമല്ല ദോഷം വരുത്തി​വെ​ക്കു​ന്നത്‌.

ആയുഷ്‌കാല പ്രത്യാ​ഘാ​ത​ങ്ങൾ

സൈ​ക്കോ​ളജി ടുഡേ എന്ന മാഗസിൻ റിപ്പോർട്ടു ചെയ്യുന്നു: “മുട്ടാ​ളത്തം കുട്ടി​ക്കാ​ല​ത്താ​യി​രി​ക്കാം ആരംഭി​ക്കു​ന്നത്‌, എന്നാൽ അതു പ്രായ​പൂർത്തി​യാ​കു​മ്പോ​ഴും തുടരു​ന്നു.” ദ ഡള്ളസ്‌ മോർണിങ്‌ ന്യൂസിൽ വന്ന ഒരു ഗവേഷണ പഠന റിപ്പോർട്ടു​പ്ര​കാ​രം, “രണ്ടാം ക്ലാസ്സിൽവെച്ചു, മുട്ടാ​ള​ന്മാ​രാ​യി തിരി​ച്ച​റി​യി​ക്ക​പ്പെ​ട്ടി​രുന്ന ആൺകു​ട്ടി​ക​ളിൽ 65 ശതമാനം 24 വയസ്സാ​യ​പ്പോ​ഴേ​ക്കും കടുത്ത കുറ്റവാ​ളി​ക​ളാ​യി വിധി​ക്ക​പ്പെട്ടു.”

എല്ലാ മുട്ടാ​ളൻമാ​രും കുറ്റവാ​ളി​ക​ളാ​യി​ത്തീ​രു​ന്നി​ല്ലെന്നു​ള്ളതു സത്യം​തന്നെ. എന്നാൽ മറ്റുള്ള​വ​രു​ടെ വികാ​ര​ങ്ങളെ അവഗണി​ക്കു​ന്നത്‌ ഒരു ശീലമാ​ക്കി​യാൽ പിൽക്കാല ജീവി​ത​ത്തിൽ അതു യഥാർഥ പ്രശ്‌നങ്ങൾ സൃഷ്ടി​ച്ചേ​ക്കാം. അതു നിങ്ങളു​ടെ വിവാ​ഹ​ശേ​ഷ​വും തുടരു​ന്നെ​ങ്കിൽ, ഇണയ്‌ക്കും കുട്ടി​കൾക്കും കടുത്ത വൈഷ​മ്യ​ങ്ങൾ ഉണ്ടാകാം. തൊഴി​ലു​ട​മകൾ, മറ്റുള്ള​വ​രു​മാ​യി നന്നായി ഒത്തു​പോ​കാൻ അറിയാ​വു​ന്ന​വരെ തിര​ഞ്ഞെ​ടു​ക്കു​ന്ന​തി​നാൽ, നിങ്ങൾക്കു തൊഴി​ല​വ​സ​രങ്ങൾ നിഷേ​ധി​ച്ചേ​ക്കാം. അതു​പോ​ലെ​തന്നെ, ക്രിസ്‌തീയ സഭയിലെ ഭാവി​പ​ദ​വി​കളെ അതു തടഞ്ഞേ​ക്കാ​വു​ന്ന​താണ്‌. “ഒരിക്കൽ ഒരു മൂപ്പനാ​യി സേവി​ക്കു​ന്ന​തി​നു യോഗ്യ​ത​പ്രാ​പി​ക്കാൻ ഞാൻ ആഗ്രഹി​ക്കു​ന്നു”വെന്നു ബ്രെൻറ്‌ പറയുന്നു, “എന്നാൽ ഞാൻ പരിഹ​സി​ക്കുന്ന തരത്തി​ലുള്ള എന്തെങ്കി​ലും പറയു​മെന്ന്‌ ആളുകൾ ചിന്തി​ക്കു​ന്നെ​ങ്കിൽ അവർ തങ്ങളുടെ പ്രശ്‌ന​ങ്ങ​ളു​മാ​യി എന്റെ അടുക്കൽ വരുക​യി​ല്ലെന്നു മനസ്സി​ലാ​ക്കാൻ ഡാഡി എന്നെ സഹായി​ച്ചു.”—തീത്തൊസ്‌ 1:7.

മാറ്റം വരുത്താ​വുന്ന വിധം

നാം സ്വന്തം പിഴവു​കൾ എല്ലായ്‌പോ​ഴും വ്യക്തമാ​യി മനസ്സി​ലാ​ക്കു​ന്നില്ല. ‘തന്റെ കുറ്റം തെളിഞ്ഞു വെറു​പ്പാ​യി​ത്തീ​രു​ക​യില്ല എന്നിങ്ങനെ ഒരുവൻ തന്നോടു തന്നേ മധുര​വാ​ക്കു’ പറഞ്ഞേ​ക്കാ​വു​ന്ന​താ​ണെന്നു തിരു​വെ​ഴു​ത്തു​കൾ നമുക്കു മുന്നറി​യി​പ്പു നൽകുന്നു. (സങ്കീർത്തനം 36:2) അതു​കൊണ്ട്‌, മാതാ​പി​താ​ക്ക​ളിൽ ഒരാ​ളോ​ടോ ആശ്രയ​യോ​ഗ്യ​നായ ഒരു സുഹൃ​ത്തി​നോ​ടോ പക്വത​യുള്ള ഒരു ക്രിസ്‌ത്യാ​നി​യോ​ടോ അവരുടെ അഭി​പ്രാ​യ​മെ​ന്തെന്നു നിങ്ങൾക്കു ചോദി​ച്ചു​നോ​ക്കാ​വു​ന്ന​താണ്‌. സത്യം നിങ്ങളെ വ്രണ​പ്പെ​ടു​ത്തി​യേ​ക്കാം, എന്നാൽ നിങ്ങൾ എന്തു മാറ്റങ്ങൾ വരു​ത്തേ​ണ്ട​തു​ണ്ടെന്നു മനസ്സി​ലാ​ക്കാൻ അതു നിങ്ങളെ സഹായി​ക്കു​ക​തന്നെ ചെയ്‌തേ​ക്കാം. (സദൃശ​വാ​ക്യ​ങ്ങൾ 20:30) “എന്നെ സഹായിച്ച ഏറ്റവും വലിയ സംഗതി ശ്രദ്ധാ​പൂർവം കേൾക്കു​ന്ന​താ​യി​രു​ന്നു​വെന്നു ഞാൻ വിചാ​രി​ക്കു​ന്നു” എന്ന്‌ ആരൻ പറയുന്നു. “എവി​ടെ​യാണ്‌ എനിക്കു പിശകു സംഭവി​ക്കു​ന്ന​തെന്ന്‌ ആത്മാർഥ​ത​യു​ള്ളവർ എന്നോടു പറഞ്ഞു. എല്ലായ്‌പോ​ഴും ഞാൻ കേൾക്കാൻ ആഗ്രഹി​ച്ച​താ​യി​രു​ന്നി​ല്ലെ​ങ്കി​ലും, അത്‌ എനിക്കു വാസ്‌ത​വ​ത്തിൽ ആവശ്യ​മു​ള്ള​തു​ത​ന്നെ​യാ​യി​രു​ന്നു.”

നിങ്ങളു​ടെ മുഴു​വ്യ​ക്തി​ത്വ​ത്തി​ലെ​യും ഒരു വമ്പിച്ച മാറ്റത്തി​നു നിങ്ങൾ വിധേ​യ​നാ​കേ​ണ്ട​തു​ണ്ടെ​ന്നാ​ണോ അതിന്റെ അർഥം? അല്ല, സാധ്യ​ത​യ​നു​സ​രിച്ച്‌, നിങ്ങളു​ടെ ചിന്തയും പെരു​മാ​റ്റ​വും പുനഃ​ക്ര​മീ​ക​രി​ക്കേണ്ട കാര്യം മാത്രമേ ഉണ്ടായി​രി​ക്കു​ക​യു​ള്ളൂ. (2 കൊരി​ന്ത്യർ 13:11) ദൃഷ്ടാ​ന്ത​ത്തിന്‌, നിങ്ങളു​ടെ വലുപ്പ​മോ ശക്തിയോ കുശാ​ഗ്ര​ബു​ദ്ധി​യോ നിമിത്തം നിങ്ങൾ മറ്റുള്ള​വ​രെ​ക്കാൾ ശ്രേഷ്‌ഠാ​ന​ണെന്ന്‌ ഒരുപക്ഷേ ഇപ്പോൾവരെ ചിന്തി​ച്ചി​ട്ടു​ണ്ടാ​കാം. എന്നാൽ, “താഴ്‌മ​യോ​ടെ . . . മററു​ള്ള​വനെ തന്നെക്കാൾ ശ്രേഷ്‌ഠൻ എന്നു” പരിഗ​ണി​ക്കാൻ ബൈബിൾ നമ്മെ പ്രോ​ത്സാ​ഹി​പ്പി​ക്കു​ന്നു. (ഫിലി​പ്പി​യർ 2:3) വലുപ്പ​മോ ശക്തിയോ എന്തുത​ന്നെ​യാ​യി​രു​ന്നാ​ലും, മറ്റുള്ള​വർക്കു നിങ്ങൾക്കി​ല്ലാത്ത പ്രശം​സ​നീയ ഗുണങ്ങ​ളു​ണ്ടെ​ന്നു​ള്ളതു തിരി​ച്ച​റി​യുക.

ആക്രമ​ണോ​ത്സു​ക​മോ മേധാ​വി​ത്വ​പ​ര​മോ ആയ പ്രവണ​ത​ക​ളിൽനി​ന്നു നിങ്ങൾ മുക്തനാ​കേ​ണ്ട​യാ​വ​ശ്യ​വും ഉണ്ടായി​രി​ക്കാം. “സ്വന്തഗു​ണമല്ല മററു​ള്ള​വന്റെ ഗുണവും കൂടെ” നോക്കു​ന്ന​തിൽ പുരോ​ഗതി വരുത്തുക. (ഫിലി​പ്പി​യർ 2:4) നിങ്ങൾക്ക്‌ ഒരഭി​പ്രാ​യം സ്വത​ന്ത്ര​മാ​യി തുറന്നു പറയേ​ണ്ട​തു​ണ്ടെ​ങ്കിൽ, ദ്രോ​ഹി​ക്കാ​തെ, പരിഹ​സി​ക്കാ​തെ, അവമതി​ക്കാ​തെ അപ്രകാ​രം ചെയ്യുക.—എഫെസ്യർ 4:31.

മറ്റുള്ള​വ​രോ​ടു മുട്ടാ​ളത്തം കാട്ടാ​നുള്ള പ്രവണത നിങ്ങൾക്കു​ണ്ടെ​ങ്കിൽ, മുട്ടാ​ളൻമാ​രാ​യി​രുന്ന നെഫി​ലി​മു​കളെ ദൈവം നശിപ്പി​ച്ചു​വെ​ന്നത്‌ ഓർമി​ക്കുക. (ഉല്‌പത്തി 6:4-7, NW; 7:11, 12, 22) നൂറ്റാ​ണ്ടു​കൾക്കു ശേഷം പ്രവാ​ച​ക​നായ യെഹെ​സ്‌കേ​ലി​ന്റെ നാളു​ക​ളിൽ, നിസ്സഹാ​യരെ “ചിതറി​ക്കു”കയും ‘ഉന്തു’കയും ചെയ്യുക നിമിത്തം കുറ്റക്കാ​രാ​യ​വർക്കെ​തി​രെ ദൈവം ശക്തമായ അപ്രീതി പ്രകടി​പ്പി​ച്ചു. (യെഹെ​സ്‌കേൽ 34:21) മുട്ടാ​ള​ത്തത്തെ യഹോവ വെറു​ക്കു​ന്നു​വെ​ന്ന​റി​യു​ന്നത്‌ ആവശ്യ​മായ മാറ്റങ്ങൾ വരുത്തു​ന്ന​തിന്‌ ഒരുവനു ശക്തമായ പ്രചോ​ദ​ന​മാ​യി​രി​ക്കാൻ കഴിയും!

ബൈബിൾ തത്ത്വങ്ങൾ പ്രാർഥ​നാ​പൂർവം ധ്യാനി​ക്കു​ന്ന​തും സഹായ​ക​മാണ്‌. “മനുഷ്യർ നിങ്ങൾക്കു ചെയ്യേണം എന്നു നിങ്ങൾ ഇച്ഛിക്കു​ന്നതു ഒക്കെയും നിങ്ങൾ അവർക്കും ചെയ്‌വിൻ” എന്നു സുവർണ നിയമം പറയുന്നു. (മത്തായി 7:12) ആരെ​യെ​ങ്കി​ലും ഭീഷണി​പ്പെ​ടു​ത്താൻ പ്രലോ​ഭി​ത​നാ​കു​മ്പോൾ നിങ്ങ​ളോ​ടു​തന്നെ ചോദി​ക്കുക: ‘ദ്രോ​ഹ​ത്തി​നോ ഭീഷണി​ക്കോ തരംതാ​ഴ്‌ത്ത​ലി​നോ ഇരയാ​കാൻ ഞാൻ ആഗ്രഹി​ക്കു​ന്നു​വോ? പിന്നെ​യെ​ന്തു​കൊ​ണ്ടാ​ണു മറ്റുള്ള​വ​രോ​ടു ഞാൻ അങ്ങനെ പെരു​മാ​റു​ന്നത്‌?’ ‘പരസ്‌പരം ദയയും മനസ്സലി​വു​മു​ള്ള​വ​രാ​യി’രിക്കാൻ ബൈബിൾ നമ്മോടു കൽപ്പി​ക്കു​ന്നു. (എഫെസ്യർ 4:32) യേശു ഇത്തരു​ണ​ത്തിൽ ഒരു പൂർണ​മായ ദൃഷ്ടാന്തം വെച്ചു. മറ്റെല്ലാ മനുഷ്യ​രെ​ക്കാ​ളും ശ്രേഷ്‌ഠ​മാ​യി​രു​ന്നെ​ങ്കി​ലും, അവൻ എല്ലാവ​രോ​ടും ദയയോ​ടെ​യും സമാനു​ഭാ​വ​ത്തോ​ടെ​യും ആദര​വോ​ടെ​യും ഇടപെട്ടു. (മത്തായി 11:28-30) നിങ്ങ​ളെ​ക്കാൾ ദുർബ​ല​നായ ഒരുവനെ നിങ്ങൾ അഭിമു​ഖീ​ക​രി​ക്കു​ന്നെ​ങ്കിൽ, നിങ്ങൾക്ക്‌ അങ്ങേയറ്റം അസ്വസ്ഥത തോന്നു​ന്നെ​ങ്കിൽ യേശു ചെയ്‌ത​തു​പോ​ലെ​തന്നെ ചെയ്യാൻ ശ്രമി​ക്കുക.

എന്നാൽ, നിങ്ങളു​ടെ ആക്രമ​ണോ​ത്സു​ക​മായ സ്വഭാവം, വീട്ടിൽ നിങ്ങൾ അനുഭ​വി​ക്കുന്ന പെരു​മാ​റ്റ​ത്തോ​ടുള്ള ദേഷ്യ​ത്തിൽനി​ന്നാണ്‌ ഉത്ഭൂത​മാ​കു​ന്ന​തെ​ങ്കി​ലോ? ചില സാഹച​ര്യ​ങ്ങ​ളിൽ അത്തരം ദേഷ്യം ന്യായീ​ക​രി​ക്ക​പ്പെ​ട്ടേ​ക്കാം. (സഭാ​പ്ര​സം​ഗി 7:7 താരത​മ്യം ചെയ്യുക.) എങ്കിലും, നീതി​മാ​നായ ഇയ്യോ​ബിന്‌ ഇപ്രകാ​രം മുന്നറി​യി​പ്പു നൽകി​യെന്നു ബൈബിൾ നമ്മോടു പറയുന്നു: “കോപം നിന്നെ പരിഹാ​സ​ത്തി​ന്നാ​യി വശീക​രി​ക്ക​രു​തു; . . . സൂക്ഷി​ച്ചു​കൊൾക; നീതി​കേ​ടി​ലേക്കു തിരി​യ​രു​തു.”(ഇയ്യോബ്‌ 36:18, 21) മറ്റുള്ളവർ നിങ്ങ​ളോ​ടു മോശ​മാ​യി പെരു​മാ​റി​യാൽപോ​ലും മറ്റുള്ള​വ​രോ​ടു മോശ​മാ​യി പെരു​മാ​റാൻ നിങ്ങൾക്ക്‌ അവകാ​ശ​മില്ല. നിങ്ങളു​ടെ മാതാ​പി​താ​ക്ക​ളു​മാ​യി കാര്യങ്ങൾ സംസാ​രി​ക്കാൻ ശ്രമി​ക്കു​ന്ന​താ​യി​രി​ക്കും കൂടുതൽ മെച്ചപ്പെട്ട സമീപനം. നിങ്ങൾ കടുത്ത ദുഷ്‌പെ​രു​മാ​റ്റ​ത്തി​ന്റെ ഇരയാ​ണെ​ങ്കിൽ, കൂടുതൽ ദോഷം ഭവിക്കാ​തി​രി​ക്കാൻ പുറത്തു​നി​ന്നുള്ള സഹായം ആവശ്യ​മാ​യി​രു​ന്നേ​ക്കാം.

മാറ്റം വരുത്തു​ന്നത്‌ എളുപ്പ​മ​ല്ലാ​യി​രി​ക്കാം, എന്നാൽ അതു സാധ്യ​മാണ്‌. ബ്രെൻറ്‌ പറയുന്നു: “മിക്കവാ​റും എല്ലാ ദിവസ​വും ഞാൻ ഇതി​നെ​ക്കു​റി​ച്ചു പ്രാർഥി​ക്കാ​റുണ്ട്‌, ചില നല്ല മാറ്റങ്ങൾ വരുത്താൻ യഹോവ എന്നെ സഹായി​ച്ചി​രി​ക്കു​ന്നു.” സമാന​മാ​യി, ആളുക​ളോട്‌ ഇടപെ​ടുന്ന രീതി​യിൽ നിങ്ങൾ ചില മാറ്റങ്ങൾ വരുത്തു​മ്പോൾ ആളുകൾ നിങ്ങളെ കൂടുതൽ ഇഷ്ടപ്പെ​ടു​മെന്നു നിസ്സം​ശ​യ​മാ​യും നിങ്ങൾ കണ്ടെത്തും. ഓർമി​ക്കുക, ആളുകൾ മുട്ടാ​ളൻമാ​രെ ഭയപ്പെ​ട്ടേ​ക്കാം, എന്നാൽ ആരും അവരെ ഇഷ്ടപ്പെ​ടാ​റില്ല.

[അടിക്കു​റി​പ്പു​കൾ]

[19-ാം പേജിലെ ആകർഷ​ക​വാ​ക്യം]

“മുട്ടാ​ളത്തം കുട്ടി​ക്കാ​ല​ത്താ​യി​രി​ക്കാം ആരംഭി​ക്കു​ന്നത്‌, എന്നാൽ അതു പ്രായ​പൂർത്തി​യാ​കു​മ്പോ​ഴും തുടരു​ന്നു.”

[18-ാം പേജിലെ ചിത്രം]

വാക്കുകൾകൊണ്ട്‌ അധി​ക്ഷേ​പി​ക്കു​ന്നതു മുട്ടാ​ള​ത്ത​ത്തി​ന്റെ ഒരു രൂപമാണ്‌