“പുതി​യ​ലോക ക്രമം”—ഒരു ദുർബ​ല​മായ തുടക്ക​ത്തോ​ടെ

ജർമനിയിലെ ഉണരുക! ലേഖകൻ

ആയിര​ത്തി​ത്തൊ​ള്ളാ​യി​ര​ത്തി​ത്തൊ​ണ്ണൂ​റ്റൊന്ന്‌ ഉദയം ചെയ്‌ത​പ്പോൾ ആളുകൾ ശുഭാ​പ്‌തി​വി​ശ്വാ​സ​മു​ള്ള​വ​രാ​യി​രു​ന്നു. ശീതസ​മരം അവസാ​നി​ച്ചു. തലേ ആഗസ്റ്റിൽ ഇറാക്കി​നാൽ ആക്രമി​ക്ക​പ്പെട്ട കു​വൈ​റ്റി​ന്റെ പ്രശ്‌നം ഉണ്ടായി​രു​ന്നു​വെ​ന്നതു സത്യം​തന്നെ. പക്ഷേ ഐക്യ​രാ​ഷ്ട്രങ്ങൾ ശക്തി പ്രകടി​പ്പി​ക്കു​ക​യും ഇറാക്കി​നോട്‌ ജനുവരി 15-ാം തീയതി​യോ​ടെ പിൻമാ​റാൻ ആജ്ഞാപി​ക്കു​ക​യും ചെയ്‌തു. പെട്ടെന്നു സംഘടി​പ്പി​ക്ക​പ്പെ​ട്ട​തും ഇറാക്കി​നെ ബലം​പ്ര​യോ​ഗി​ച്ചു കീഴട​ക്കാൻ തയ്യാ​റെ​ടു​ത്തു നിന്നതു​മായ 28 രാഷ്ട്ര​ങ്ങ​ളു​ടെ ഒരു യുഎൻ സൈനിക സഖ്യത്തി​ന്റെ പിന്തുണ ഈ ആജ്ഞാപ​ന​ത്തി​ന്റെ പിന്നിൽ ഉണ്ടായി​രു​ന്നു. ലോക​സ​മു​ദാ​യ​ത്തി​ന്റെ ഉറച്ച നിലപാട്‌ ഒരു പുതിയ യുഗം ആരംഭി​ക്കു​ന്നു​വെ​ന്ന​തി​ന്റെ സൂചന​യാ​ണെ​ന്നുള്ള പ്രത്യാശ വർധി​ച്ചു​കൊ​ണ്ടി​രു​ന്നു.

“അന്തർദേ​ശീയ പെരു​മാ​റ്റത്തെ, മൃഗീയ മത്സരത്തി​നു​പ​കരം നിയമ​വാഴ്‌ച ഭരിക്കുന്ന ഒരു പുതി​യ​ലോക ക്രമം, നാമും വരും തലമു​റ​ക​ളും കരുപ്പി​ടി​പ്പി​ക്കു​ന്ന​തി​നുള്ള സാധ്യ​തയെ”ക്കുറിച്ച്‌ അന്നത്തെ യു.എസ്‌. പ്രസി​ഡ​ന്റാ​യി​രുന്ന ജോർജ്‌ ബുഷ്‌ സംസാ​രി​ക്കു​ക​യു​ണ്ടാ​യി.

അനന്തരം ഇറാക്ക്‌ ജനുവരി 15 എന്ന അന്തിമ​തീ​യതി അവഗണി​ച്ചു, അതിന്റെ ഫലമായി ഇറാക്കി​ന്റെ സൈനിക ലക്ഷ്യങ്ങൾക്കെ​തി​രെ ബൃഹത്തായ വ്യോമ, മിസൈൽ ആക്രമ​ണങ്ങൾ നടത്ത​പ്പെട്ടു. വ്യക്തമാ​യും ലോക സമുദാ​യം ഇതു ഗൗരവ​മാ​യി എടുത്തു. അതിനു​ശേഷം മൂന്നു മാസം തികയു​ന്ന​തി​നു​മുമ്പ്‌, ഏപ്രിൽ 11-ന്‌ ഗൾഫ്‌ യുദ്ധം അവസാ​നി​ച്ച​താ​യി യുഎൻ പ്രഖ്യാ​പി​ച്ചു. പ്രശാ​ന്ത​വും, സാമ്പത്തി​ക​വും രാഷ്ട്രീ​യ​വു​മാ​യി സുസ്ഥി​ര​വു​മായ പുതി​യ​ലോക ക്രമ​ത്തെ​ക്കു​റി​ച്ചുള്ള വാഗ്‌ദാ​നം യാഥാർഥ്യ​മാ​യി​ത്തീ​രു​ന്ന​താ​യി തോന്നി.

ക്ലേശി​പ്പി​ക്കും​വി​ധം തുടർന്നു​പോയ യുദ്ധങ്ങൾ

1991-ന്റെ മധ്യത്തിൽ സ്ലൊവീ​നിയ, ക്രൊ​യേഷ്യ എന്നീ രണ്ടു റിപ്പബ്ലി​ക്കു​കൾ അന്നത്തെ യൂഗോ​സ്ലാ​വി​യ​യിൽനി​ന്നുള്ള സ്വാത​ന്ത്ര്യം പ്രഖ്യാ​പി​ച്ചു. അത്‌, ഒടുവിൽ പല വ്യതി​രിക്ത രാഷ്ട്ര​ങ്ങ​ളു​ടെ രൂപീ​ക​ര​ണ​ത്തി​ലേക്കു നയിച്ച ഒരു ആഭ്യന്തര യുദ്ധത്തി​നു തുടക്ക​മി​ട്ടു. “1914-നു മുമ്പത്തെ യൂറോ​പ്പി​നെ​പ്പോ​ലെ, ജോർജ്‌ ബുഷിന്റെ പുതി​യ​ലോക ക്രമം സാര​ജെ​വോ​യിൽ ഒടുങ്ങി” എന്ന്‌ അതിനു​ശേഷം ഒരു വർഷം ആകുന്ന​തി​നു​മുമ്പ്‌ ഫ്രഞ്ച്‌ രാഷ്ട്രീയ വിശക​ല​ന​വി​ദ​ഗ്‌ധ​നായ പിയെർ ആസ്‌നെർ പ്രസ്‌താ​വി​ച്ചു. എന്നിരു​ന്നാ​ലും, 1995 നവംബ​റിൽ യു.എസ്‌.എ.,-യിലെ ഒഹാ​യോ​യി​ലുള്ള ഡെയ്‌റ്റ​ണിൽ പ്രഭാ​ഷ​ണങ്ങൾ തുടങ്ങു​ക​യും ഡിസംബർ 14-ന്‌ പാരീ​സിൽ ഒരു സമാധാന കരാർ ഒപ്പുവ​യ്‌ക്കു​ക​യും ചെയ്‌ത​തോ​ടെ സമാധാന പ്രതീക്ഷ പ്രശോ​ഭി​ത​മാ​യി. 1995 അവസാ​നി​ക്കാ​റാ​യ​തോ​ടെ, എങ്ങനെ​യൊ​ക്കെ​യാ​ണെ​ങ്കി​ലും പുതി​യ​ലോക ക്രമം നിർജീ​വ​മ​ല്ലാ​യി​രി​ക്കാം എന്ന പ്രത്യാശ പുതു​ക്ക​പ്പെട്ടു.

യൂണിയൻ ഓഫ്‌ സോവി​യറ്റ്‌ സോഷ്യ​ലിസ്റ്റ്‌ റിപ്പബ്ലി​ക്കു​ക​ളി​ലെ റിപ്പബ്ലി​ക്കു​കൾ കുറേശ്ശെ കുറേ​ശ്ശെ​യാ​യി പരസ്‌പരം അകന്നു​കൊ​ണ്ടി​രി​ക്കു​ക​യാ​യി​രു​ന്നു. 1991-ൽ ലിത്വാ​നി​യ​യും എസ്റ്റോ​ണി​യ​യും ലാത്വി​യ​യും ആദ്യം സ്വാത​ന്ത്ര്യം പ്രഖ്യാ​പി​ച്ചു. മറ്റുള്ള​വ​യും ഉടൻതന്നെ അവയെ പിന്തു​ടർന്നു. സോവി​യറ്റ്‌ യൂണി​യന്റെ മുൻ അംഗങ്ങ​ളിൽ ചിലത്‌ ചേരാൻ വിസമ്മ​തി​ച്ചെ​ങ്കി​ലും കോമൺവെൽത്ത്‌ ഓഫ്‌ ഇൻഡി​പ്പെൻഡൻറ്‌ സ്റ്റേറ്റ്‌സ്‌ എന്നറി​യ​പ്പെ​ടുന്ന ഒരു സ്വതന്ത്ര സമൂഹം ഡിസം​ബ​റിൽ സ്ഥാപി​ക്ക​പ്പെട്ടു. പിന്നീട്‌, ഡിസംബർ 25-ന്‌ സോവി​യറ്റ്‌ പ്രസി​ഡൻറായ ഗോർബ​ച്ചേവ്‌ രാജി​വച്ചു.

എന്നാൽ, ഒറ്റയൊ​റ്റ​യായ റിപ്പബ്ലി​ക്കു​കൾപോ​ലും വേർപെ​ട്ടു​തു​ടങ്ങി. ഉദാഹ​ര​ണ​ത്തിന്‌, റഷ്യയു​ടെ വടക്കൻ കോക്ക​സസ്‌ പ്രദേ​ശത്തെ അന്യരാ​ജ്യ​ങ്ങൾക്കി​ട​യി​ലെ ചെച്ച്‌ന്യാ എന്ന ചെറിയ മുസ്ലീം പ്രദേശം സ്വാത​ന്ത്ര്യ​ത്തി​നു​വേണ്ടി ശ്രമം നടത്തി​ക്കൊ​ണ്ടി​രി​ക്കു​ക​യാ​യി​രു​ന്നു. 1994-ന്റെ ഒടുവിൽ അത്‌ വിഘടി​ക്കാൻ ശ്രമം നടത്തി​യ​പ്പോൾ റഷ്യൻ സേനക​ളു​ടെ വിവാ​ദ​പ​ര​മായ ആക്രമ​ണ​മു​ണ്ടാ​യി. 1990-കളുടെ ആദ്യം പ്രതി​സന്ധി ആരംഭി​ച്ച​പ്പോൾമു​തൽ 30,000-ത്തോളം പേർക്ക്‌ ജീവൻ നഷ്ടപ്പെ​ട്ടി​രി​ക്കു​ന്നെ​ങ്കി​ലും യുദ്ധം ഈ വർഷം​വരെ തുടർന്നി​രി​ക്കു​ന്നു.

1995 ഒക്ടോ​ബ​റിൽ ലോക​മെ​മ്പാ​ടും—തരംതി​രി​ക്കുന്ന വിധമ​നു​സ​രിച്ച്‌—27 മുതൽ 46 വരെ സംഘട്ട​നങ്ങൾ നടന്നു.

പാപ്പര​ത്വ​ത്തി​ന്റെ വക്കിൽ

1990-കളുടെ ആരംഭ​ത്തിൽ പുതി​യ​ലോക ക്രമം രാഷ്ട്രീ​യ​മാ​യി മാത്രമല്ല, സാമ്പത്തി​ക​മാ​യും ദുർബ​ല​മാ​യി​ത്തീർന്നു.

1991-ൽ നിക്കരാ​ഗ്വ അതിന്റെ നാണ്യ​വില കുറച്ചു. എന്നാൽ അപ്പോ​ഴും 2 കോടി 50 ലക്ഷം കോർഡോ​ബാ​കൾക്ക്‌ ഒരു യു.എസ്‌. ഡോള​റി​ന്റെ വിലയേ ഉണ്ടായി​രു​ന്നു​ള്ളൂ. അതേസ​മയം, സയറിലെ പണപ്പെ​രുപ്പ നിരക്ക്‌ 850 ശതമാ​ന​മാ​യി​രു​ന്നു. ലോക​ത്തിൽ ഏറ്റവും താഴ്‌ന്ന ഒരു ജീവിത നിലവാ​ര​ത്തിൽ കഴിയാൻ അത്‌ അവിടത്തെ പൗരൻമാ​രെ നിർബ​ന്ധി​ത​രാ​ക്കി. റഷ്യൻ സമ്പദ്‌വ്യ​വ​സ്ഥ​യും ദുരി​ത​ത്തി​ലാ​യി​രു​ന്നു. പണത്തെ മിക്കവാ​റും മൂല്യ​മി​ല്ലാ​ത്ത​താ​ക്കി​ത്തീർത്തു​കൊണ്ട്‌ 1992 എന്ന വർഷത്തിൽ പണപ്പെ​രു​പ്പം 2,200 ശതമാ​ന​മാ​യി​ത്തീർന്നു. കാര്യങ്ങൾ പിന്നീടു മെച്ച​പ്പെ​ട്ടെ​ങ്കി​ലും, സാമ്പത്തിക പ്രശ്‌നങ്ങൾ 1995-ൽ തീർച്ച​യാ​യും അവസാ​നി​ച്ചില്ല.

1991-ൽ തട്ടിപ്പി​ന്റെ​യും കുറ്റകൃ​ത്യ നടപടി​ക​ളു​ടെ​യും ഫലമായി ബാങ്ക്‌ ഓഫ്‌ ക്രെഡിറ്റ്‌ & കൊ​മേ​ഴ്‌സ്‌ ഇന്റർനാ​ഷണൽ തകർന്ന​പ്പോൾ നൂറ്റാ​ണ്ടി​ലെ ഏറ്റവും വലിയ സാമ്പത്തിക അപവാദം ഉണ്ടായി. 62 രാജ്യ​ങ്ങ​ളി​ലെ നിക്ഷേ​പ​കർക്ക്‌ ശതകോ​ടി​ക്ക​ണ​ക്കി​നു യു.എസ്‌. ഡോള​റി​ന്റെ നഷ്ടം സംഭവി​ച്ചു.

സാമ്പത്തി​ക​മാ​യി ദുർബ​ല​മായ രാഷ്ട്രങ്ങൾ മാത്രമല്ല ഉലയ്‌ക്ക​പ്പെ​ട്ടത്‌; ഏകീക​ര​ണ​ത്തി​ന്റെ ചെലവു​കൾ ശക്തിമ​ത്തായ ജർമനി​യെ ഞെരുക്കി. ദീർഘിച്ച ഒഴിവു​കാ​ല​വും മെച്ചമായ ആരോഗ്യ സംരക്ഷ​ണ​വും ജോലി​ക്കാർ ആവശ്യ​പ്പെ​ട്ട​പ്പോൾ തൊഴി​ലി​ല്ലായ്‌മ വർധിച്ചു. വർധിച്ച ഹാജരി​ല്ലാ​യ്‌മ​യും ക്ഷേമ പദ്ധതി​യു​ടെ വ്യാപ​ക​മായ ദുരു​പ​യോ​ഗ​ങ്ങ​ളും സമ്പദ്‌വ്യ​വ​സ്ഥ​യിൽ കൂടു​ത​ലായ സമ്മർദങ്ങൾ ചെലുത്തി.

വൻ വിപത്തു​ക​ളു​ടെ ഒരു പരമ്പര ഐക്യ​നാ​ടു​ക​ളി​ലെ ഇൻഷ്വ​റൻസ്‌ കമ്പനി​ക​ളു​ടെ ഇടയിൽ ഉഗ്രനാ​ശം വിതച്ചു. അവയ്‌ക്ക്‌ ഇൻഷ്വ​റൻസ്‌ തുകകൾ അടയ്‌ക്കാൻ പ്രയാസം നേരിട്ടു. പാപ്പര​ത്വം 1995: അമേരി​ക്ക​യ്‌ക്കു വരാൻപോ​കുന്ന തകർച്ച​യും അത്‌ അവസാ​നി​പ്പി​ക്കുന്ന വിധവും (ഇംഗ്ലീഷ്‌) എന്ന പുസ്‌തകം കുതി​ച്ചു​യ​രുന്ന ദേശീയ കടത്തി​ന്റെ​യും ബജറ്റ്‌ കമ്മിയു​ടെ​യും അപകട​ങ്ങ​ളെ​ക്കു​റിച്ച്‌ 1993-ൽ മുന്നറി​യി​പ്പു നൽകി. ജിബ്രാൾട്ടർ പാറ പോലെ സുസ്ഥി​ര​മാ​യി​രുന്ന ലോയ്‌ഡ്‌സ്‌ ഓഫ്‌ ലണ്ടൻ എന്ന ബ്രിട്ടീഷ്‌ ഇൻഷ്വ​റൻസ്‌ സൊ​സൈ​റ്റി​യും സംശയ​സ്ഥി​തി​യി​ലാ​യി. നഷ്ടത്തിൽ മുങ്ങിയ അത്‌ അചിന്ത​നീ​യ​മാ​യ​തി​നെ​ക്കു​റി​ച്ചു ചിന്തി​ക്കാൻ നിർബ​ന്ധി​ത​മാ​യി—സാധ്യ​ത​യുള്ള പാപ്പര​ത്വ​ത്തെ​ക്കു​റി​ച്ചു തന്നെ.

മതം, ഒരു സ്ഥിരീ​കരണ ശക്തിയോ?

ജർമൻ ദിനപ്പ​ത്ര​മായ ഫ്രാങ്ക്‌ഫുർട്ടർ ആൽജെ​മൈന ററ്‌​സൈ​റ​റുങ്‌ 1991-ൽ ഇപ്രകാ​രം അഭി​പ്രാ​യ​പ്പെട്ടു: “പുതി​യ​ലോക ക്രമത്തി​ന്റെ ഈ ദർശനം മതപര​മായ സാരാം​ശം ഉള്ളതും ക്രിസ്‌തീയ പദങ്ങളിൽ വിവരി​ക്ക​പ്പെ​ട്ടി​രി​ക്കു​ന്ന​തു​മായ അമേരി​ക്കൻ ലോക വീക്ഷണ​ങ്ങ​ളു​ടെ ഒരു നീണ്ട പാരമ്പ​ര്യ​ത്തിൽ വേരു​റ​ച്ച​താണ്‌.”

ഈ മത പശ്ചാത്തലം പുതി​യ​ലോക ക്രമത്തി​നു സ്ഥിരത പ്രദാനം ചെയ്യേ​ണ്ട​താ​യി​രു​ന്നു എന്ന്‌ ഒരാൾ ചിന്തി​ച്ചേ​ക്കാം. എന്നാൽ മത അസഹി​ഷ്‌ണു​ത​യും പോരാ​ട്ട​വും വാസ്‌ത​വ​ത്തിൽ വ്യാപ​ക​മായ അസ്ഥിര​ത​യി​ലേക്കു നയിക്കു​ക​യാ​ണു ചെയ്‌തത്‌. അൾജീ​രി​യ​യും ഈജി​പ്‌തും ഇസ്ലാമിക മൗലി​ക​വാ​ദി​ക​ളോ​ടു വിയോ​ജി​പ്പു​ണ്ടാ​യി​രുന്ന പല ഗവൺമെൻറു​ക​ളിൽ രണ്ടെണ്ണം മാത്ര​മാ​യി​രു​ന്നു. മത​പ്രേ​രി​ത​മായ ഭീകര​പ്ര​വർത്ത​ന​ത്തി​ന്റെ ഒരു തിര രണ്ടു രാജ്യ​ങ്ങ​ളി​ലും ആഞ്ഞടിച്ചു. ഇന്ത്യയി​ലെ മത ലഹളക​ളിൽ, 1993-ൽ ബോം​ബെ​യിൽ വച്ചു നടന്നതും 550-തിലധി​കം ആളുക​ളു​ടെ മരണത്തി​നി​ട​യാ​ക്കി​യ​തു​മായ ഒൻപതു ദിവസം നീണ്ടു​നിന്ന മത​പ്രേ​രി​ത​മായ അക്രമം ഉൾപ്പെട്ടു.

1994-ൽ ആംഗ്ലിക്കൻ സഭ 32 സ്‌ത്രീ​കൾക്ക്‌ പുരോ​ഹിത പട്ടം കൊടു​ത്ത​പ്പോൾ, മതപര​മായ അനൈ​ക്യം ക്രിസ്‌തീയ ഐക്യ പ്രസ്ഥാ​ന​ത്തി​ന്റെ പുരോ​ഗ​തി​ക്കു മാന്ദ്യം വരുത്തി. “കത്തോ​ലി​ക്കാ സഭയും ആംഗ്ലിക്കൻ കമ്മ്യൂ​ണി​യ​നും തമ്മിലുള്ള ഏകീക​ര​ണ​ത്തി​നുള്ള എല്ലാ പ്രത്യാ​ശ​ക​ളെ​യും തടസ്സ​പ്പെ​ടു​ത്തുന്ന ഭയങ്കര പ്രതി​ബന്ധം” എന്ന്‌ ജോൺ പോൾ II-ാമൻ പാപ്പാ ഇതിനെ വിളിച്ചു.

ടെക്‌സാ​സി​ലെ വാക്കോ​യി​ലുള്ള ഒരു വ്യക്തി​പൂ​ജാ​പ്ര​സ്ഥാ​ന​ത്തി​ന്റെ കോമ്പൗ​ണ്ടിൽ അതി​നോ​ടകം തന്നെ അനിശ്ചി​താ​വ​സ്ഥ​യ്‌ക്കും നാലു ഗവൺമെൻറ്‌ അധികാ​രി​ക​ളു​ടെ കൊല​യ്‌ക്കും ഇടയാ​ക്കി​യി​രുന്ന, യു.എസ്‌. ഗവൺമെൻറും ബ്രാഞ്ച്‌ ഡേവി​ഡി​യൻസ്‌ എന്നു പറയുന്ന ഒരു മതവ്യ​ക്തി​പൂ​ജാ​പ്ര​സ്ഥാ​ന​ത്തി​ലെ അംഗങ്ങ​ളും തമ്മിലുള്ള പിരി​മു​റു​ക്കം 1993 ഏപ്രിൽ 19-ന്‌ വ്യക്തി​പൂ​ജാ​പ്ര​സ്ഥാ​ന​ത്തി​ലെ കുറഞ്ഞത്‌ 75 പേരുടെ മരണത്തിന്‌ ഇടയാക്കി. രണ്ടു വർഷം കഴിഞ്ഞ​പ്പോൾ, ഒക്ക്‌ല​ഹോമ നഗരത്തി​ലെ ഫെഡറൽ കെട്ടി​ട​ത്തിൽ 168 പേരുടെ മരണത്തി​നി​ട​യാ​ക്കി​ക്കൊണ്ട്‌ ഭീകര​പ്ര​വർത്തകർ ബോം​ബി​ട്ടത്‌ വാക്കോ ആക്രമ​ണ​ത്തി​നുള്ള പകരം​വീ​ട്ട​ലാ​യി​രു​ന്നോ എന്നതു സംബന്ധിച്ച്‌ അന്വേ​ഷ​ണങ്ങൾ നടത്തി​യി​രു​ന്നു.

ഭീകര​പ്ര​വർത്ത​കർ 1995-ന്റെ ആരംഭ​ത്തിൽ ടോക്കി​യോ​യു​ടെ ഭൂഗർഭ റയിൽവേ​യിൽ നടത്തിയ വിഷവാ​തക ആക്രമ​ണ​ത്തെ​ക്കു​റി​ച്ചു കേട്ട​പ്പോൾ ലോകം ഞെട്ടി​വി​റച്ചു. പത്തു പേർ മരിക്കു​ക​യും അവരെ​ക്കൂ​ടാ​തെ ആയിര​ക്ക​ണ​ക്കി​നാ​ളു​കൾ രോഗ​ബാ​ധി​ത​രാ​കു​ക​യും ചെയ്‌തു. ഇതിന്റെ ഉത്തരവാ​ദി​ത്വം അപ്പോ​കാ​ലി​പ്‌റ്റിക്‌ മതവി​ഭാ​ഗ​മായ ഒം ഷിൻരി​ക്യോ അഥവാ ഒം സുപ്രീം ട്രുത്തിന്‌ ആരോ​പി​ക്ക​പ്പെ​ട്ട​പ്പോൾ ലോക​ത്തിന്‌ അതി​ലേറെ ഞെട്ടലു​ള​വാ​യി.

ആഘോ​ഷി​ക്കാൻ കാര്യ​മാ​യൊ​ന്നു​മി​ല്ലാത്ത ശ്രദ്ധേയ വാർഷി​ക​ങ്ങൾ

1492-ൽ കൊളം​ബസ്‌ പശ്ചിമാർധ​ഗോ​ള​ത്തിൽ അപ്രതീ​ക്ഷി​ത​മാ​യി ചെന്നു​പെട്ടു. ഈ സംഭവ​ത്തി​ന്റെ 1992-ലെ 500-ാം വാർഷി​കാ​ഘോ​ഷം വിവാ​ദ​പൂർണ​മാ​യി​രു​ന്നു. ആ യൂറോ​പ്പു​കാ​രന്റെ ജനനത്തിന്‌ ദീർഘ​നാൾ മുമ്പ്‌ തങ്ങളുടെ പൂർവി​കർ പാർക്കു​ക​യും പെരു​കു​ക​യും ചെയ്‌തി​രുന്ന രാജ്യങ്ങൾ അയാൾ “കണ്ടുപി​ടി​ച്ചു” എന്ന സൂചന ലഭിച്ച​പ്പോൾ അമേരി​ക്കൻ ഇന്ത്യാ​ക്കാ​രു​ടെ 40 ദശലക്ഷ​ത്തോ​ളം പിൻമു​റ​ക്കാ​രു​ടെ രക്തം തിളച്ചു. “ചൂഷണ​ത്തി​ന്റെ​യും കീഴട​ക്ക​ലി​ന്റെ​യും മുന്നോ​ടി” എന്ന്‌ ചിലർ ആ പര്യ​വേ​ക്ഷ​കനെ വിളിച്ചു. വാസ്‌ത​വ​ത്തിൽ, പശ്ചിമാർധ​ഗോ​ള​ത്തിൽ കൊളം​ബസ്‌ എത്തി​ച്ചേർന്നത്‌ തദ്ദേശ​വാ​സി​കൾക്ക്‌ അനു​ഗ്ര​ഹ​ത്തെ​ക്കാ​ള​ധി​കം വിപത്തി​നെ അർഥമാ​ക്കി. ക്രിസ്‌തീയ ജേതാക്കൾ എന്നു വിളി​ക്ക​പ്പെ​ടു​ന്നവർ അവരുടെ രാജ്യം, പരമാ​ധി​കാ​രം, അന്തസ്സ്‌, ജീവൻ ഇവയെ​ല്ലാം കവർന്നെ​ടു​ത്തു.

ദാവീദ്‌ രാജാവ്‌ യെരു​ശ​ലേം കീഴട​ക്കി​യ​തി​ന്റെ 3,000-ാം വാർഷി​കോ​ത്സവം ഇസ്രാ​യേൽ 1995 സെപ്‌റ്റം​ബ​റിൽ ആരംഭി​ച്ചു. അത്‌ 16 മാസക്കാ​ലത്തെ ഒരു ആഘോ​ഷ​മാ​യി​രു​ന്നു. എന്നാൽ ആ വാർഷി​കോ​ത്സ​വ​ത്തിന്‌ ദാരു​ണ​മായ ഒരു തുടക്ക​മാ​യി​രു​ന്നു ഉണ്ടായി​രു​ന്നത്‌. എന്തു​കൊ​ണ്ടെ​ന്നാൽ നവംബർ 4-ന്‌ പ്രധാ​ന​മ​ന്ത്രി​യായ യിഷാക്ക്‌ റബിൻ ഒരു സമാധാന യോഗ​ത്തിൽ പ്രസംഗം നടത്തി​ക്ക​ഴിഞ്ഞ്‌ ഏതാനും മിനി​റ്റു​കൾ കഴിഞ്ഞ​പ്പോൾ ഒരു ഘാതകന്റെ വെടി​യു​ണ്ട​ക​ളേറ്റു മരിച്ചു​വീ​ണു. യഹൂദൻമാ​രും പാലസ്‌തീൻകാ​രും തമ്മിൽ മാത്രമല്ല, യഹൂദൻമാ​രു​ടെ ഇടയിൽത്തന്നെ ഗുരു​ത​ര​മായ മത ഭിന്നതകൾ നിലവി​ലു​ണ്ടെന്നു പ്രകടി​പ്പിച്ച ആ സംഭവം മധ്യപൂർവ​ദേ​ശത്തെ സമാധാന പദ്ധതി​യിൽ കരിനി​ഴൽ വീഴ്‌ത്തി.

രണ്ടാം ലോക​മ​ഹാ​യു​ദ്ധ​ത്തോ​ടുള്ള ബന്ധത്തിൽ 1991-നും 1995-നും ഇടയ്‌ക്ക്‌ അനേകം 50-ാം വാർഷി​കങ്ങൾ ആഘോ​ഷി​ച്ചു. ഐക്യ​നാ​ടു​കളെ യുദ്ധത്തി​ലേക്ക്‌ ആനയിച്ച പേൾ ഹാർബർ ആക്രമണം; യൂറോ​പ്പിൻമേ​ലുള്ള സഖ്യക​ക്ഷി​ക​ളു​ടെ ആക്രമണം; നാസി തടങ്കൽ പാളയ​ങ്ങ​ളു​ടെ വിടുതൽ; യൂറോ​പ്പി​ലെ സഖ്യകക്ഷി വിജയം; ജപ്പാനി​ലെ ആദ്യത്തെ ആറ്റം​ബോം​ബി​ടീൽ എന്നിവ അവയിൽ പെടും. ഈ സംഭവങ്ങൾ ഒഴുക്കിയ ചോര​യും കണ്ണീരും കണക്കി​ലെ​ടു​ക്കു​മ്പോൾ വാസ്‌ത​വ​ത്തിൽ ഇവ ആഘോ​ഷി​ക്കാൻ തക്ക മൂല്യ​മു​ള്ള​വ​യാ​ണോ​യെന്ന്‌ ചിലയാ​ളു​കൾ ചോദി​ക്കു​ക​യു​ണ്ടാ​യി.

ഇത്‌ ശ്രദ്ധേ​യ​മായ മറ്റൊരു സംഭവ​ത്തി​ന്റെ വാർഷി​ക​ത്തി​ലേക്കു നയിച്ചു, 1945 ഒക്ടോ​ബ​റി​ലെ ഐക്യ​രാ​ഷ്ട്ര​സം​ഘ​ട​ന​യു​ടെ സ്ഥാപിക്കൽ. ലോക സമാധാ​നം നേടു​ന്ന​തി​നുള്ള താക്കോൽ ഒടുവിൽ കണ്ടുപി​ടി​ച്ചി​രി​ക്കു​ന്നു എന്ന വലിയ പ്രത്യാ​ശകൾ ഉണർത്ത​പ്പെട്ടു.

ഐക്യ​രാ​ഷ്ട്ര​ങ്ങ​ളു​ടെ സെക്ര​ട്ടറി ജനറലായ ബൂ​ട്രോസ്‌ ബൂ​ട്രോസ്‌-ഖാലി അടുത്ത​കാ​ലത്ത്‌ അതിനെ അനുകൂ​ലി​ച്ചു സംസാ​രി​ച്ച​പ്ര​കാ​രം അത്‌ അനേകം വിജയങ്ങൾ കൊയ്‌തി​ട്ടുണ്ട്‌. എന്നാൽ “അന്തർദേ​ശീയ സമാധാ​ന​വും സുരക്ഷി​ത​ത്വ​വും നിലനിർത്തുക” എന്ന ചാർട്ടർ ഉദ്ദേശ്യം നിവർത്തി​ക്കു​ന്ന​തിൽ അതു വിജയം​വ​രി​ച്ചി​ട്ടില്ല. സമാധാ​നം ഇല്ലാതി​രുന്ന സ്ഥലങ്ങളിൽ സമാധാ​നം നിലനിർത്താൻ അതിന്റെ സൈന്യ​ങ്ങൾ പലപ്പോ​ഴും ശ്രമി​ച്ചി​ട്ടുണ്ട്‌. 1995 വരെ അത്‌ ദുർബ​ല​മായ ഒരു പുതി​യ​ലോക ക്രമത്തിന്‌ ജീവൻ നൽകാൻ പരാജ​യ​പ്പെ​ട്ടി​രി​ക്കു​ന്നു.

പുതി​യ​ലോക ക്രമം ആടിയു​ല​ഞ്ഞ​പ്പോൾ യഥാർഥ ദിവ്യാ​ധി​പ​ത്യം പൂത്തു​ലഞ്ഞു!

പുതി​യ​ലോക ക്രമ​ത്തെ​ക്കു​റി​ച്ചുള്ള പ്രത്യാശ തങ്ങളുടെ കൺമു​മ്പിൽത്തന്നെ താറു​മാ​റാ​കാൻ ഇടയാ​ക്കിയ രാഷ്ട്രീ​യ​വും സാമ്പത്തി​ക​വും മതപര​വു​മായ അസ്ഥിര​ത​യു​ടെ വീക്ഷണ​ത്തിൽ ചിലയാ​ളു​കൾ ഒരു പുതി​യ​ലോക ക്രമരാ​ഹി​ത്യ​ത്തെ​ക്കു​റി​ച്ചു സംസാ​രി​ക്കാൻ തുടങ്ങി​യി​ട്ടുണ്ട്‌. ദൈവം വരുത്തുന്ന പുതിയ ലോക​ത്തിൽമാ​ത്രമേ മനുഷ്യ സമൂഹ​ത്തി​നു സുസ്ഥിരത ആസ്വദി​ക്കാൻ കഴിയൂ എന്നതി​നുള്ള കൂടു​ത​ലായ തെളി​വാ​യി യഹോ​വ​യു​ടെ സാക്ഷികൾ ഈ വികാ​സത്തെ കണ്ടു.

ചില രാജ്യ​ങ്ങ​ളിൽ ശീതസ​മരം അവസാ​നി​ച്ച​പ്പോൾ അത്‌ യഹോ​വ​യു​ടെ സാക്ഷി​കൾക്ക്‌ വലിയ സ്വാത​ന്ത്ര്യ​ത്തെ അർഥമാ​ക്കി. ബുഡാ​പെസ്റ്റ്‌, കീവ്‌, മോസ്‌കോ, പ്രാഗ്‌, സെൻറ്‌ പീറ്റേ​ഴ്‌സ്‌ബർഗ്‌, വാർസോ എന്നിവി​ട​ങ്ങ​ളി​ലും മറ്റു സ്ഥലങ്ങളി​ലും പ്രമു​ഖ​മായ അന്തർദേ​ശീയ കൺ​വെൻ​ഷ​നു​കൾ നടത്താൻ ഇത്‌ അവരെ അനുവ​ദി​ച്ചു. ഇവ യഹോ​വ​യു​ടെ സാക്ഷി​ക​ളു​ടെ ലോക​വ്യാ​പക സഭാ ക്രമീ​ക​ര​ണത്തെ ബലിഷ്‌ഠ​മാ​ക്കു​ക​യും പ്രസംഗ പ്രവർത്തനം ത്വരി​ത​ഗ​തി​യി​ലാ​ക്കാൻ സഹായി​ക്കു​ക​യും ചെയ്‌തു. അങ്ങനെ, ഈ പ്രദേ​ശ​ങ്ങ​ളി​ലൊ​ന്നി​ലെ സജീവ സാക്ഷി​ക​ളു​ടെ എണ്ണം 1991-ൽ 49,171 ആയിരു​ന്ന​തിൽനിന്ന്‌ 1995-ൽ 1,53,361-ആയി വർധി​ച്ച​തിൽ അതിശ​യ​മില്ല. അതേ നാലു വർഷം​കൊ​ണ്ടു​തന്നെ മുഴു ലോക​ത്തി​ലു​മുള്ള സാക്ഷി​ക​ളു​ടെ എണ്ണം 42,78,820-ൽനിന്ന്‌ 51,99,895 ആയി വർധിച്ചു. യഥാർഥ ദിവ്യാ​ധി​പ​ത്യം മുമ്പെ​ന്ന​ത്തെ​ക്കാ​ളു​മ​ധി​കം പൂത്തു​ല​യു​ക​യാണ്‌!

അതേ, ലക്ഷക്കണ​ക്കിന്‌ ആളുകൾ ഇപ്പോൾ ഭാവി​ക്കു​വേ​ണ്ടി​യുള്ള തങ്ങളുടെ പ്രത്യാ​ശകൾ ‘നീതി വസിക്കുന്ന പുതിയ ആകാശ​ത്തെ​ക്കു​റി​ച്ചും പുതിയ ഭൂമി​യെ​ക്കു​റി​ച്ചു​മുള്ള’ യഹോ​വ​യാം ദൈവ​ത്തി​ന്റെ വാഗ്‌ദാ​ന​ത്തി​ലാണ്‌ അടിസ്ഥാ​ന​പ്പെ​ടു​ത്തു​ന്നത്‌. (2 പത്രൊസ്‌ 3:10, 13) ദുർബ​ല​മായ തുടക്ക​മു​ള്ള​തും പെട്ടെ​ന്നു​തന്നെ അസ്‌തി​ത്വ​ത്തിൽനി​ന്നു നീങ്ങി​പ്പോ​കു​ന്ന​തു​മായ ഒരു മാനു​ഷിക പുതി​യ​ലോക ക്രമത്തി​ലേക്കു നോക്കു​ന്ന​തി​നെ​ക്കാൾ എത്രയോ ബുദ്ധി​യാ​ണിത്‌!—ദാനീ​യേൽ 2:44.