ഒരു കമ്മ്യു​ണിസ്റ്റ്‌ രാജ്യത്ത്‌ ദൈവ​ത്തി​ലുള്ള വിശ്വാ​സ​ത്താൽ ഭരിക്ക​പ്പെ​ട്ടു

ഓൺഡ്രെ കാഡ്‌ലെ​റ്റ്‌സ്‌ പറഞ്ഞ​പ്ര​കാ​രം

ആയിര​ത്തി​ത്തൊ​ള്ളാ​യി​ര​ത്ത​റു​പ​ത്താ​റി​ലെ വേനൽക്കാ​ലത്തു ഞാൻ ചെക്കോ​സ്ലോ​വാ​ക്യ​യി​ലുള്ള എന്റെ ജൻമപ​ട്ട​ണ​മായ പ്രാഗിൽ ഒരു കാഴ്‌ച കാണൽ പര്യട​നത്തെ നയിക്കു​ക​യാ​യി​രു​ന്നു. ഞങ്ങളുടെ നഗരത്തി​ലെ ഹൃദയ​ഹാ​രി​ക​ളായ പള്ളിക​ളും ക്ഷേത്ര​ങ്ങ​ളും ആ സംഘത്തി​നു കാണി​ച്ചു​കൊ​ടു​ക്കവേ, എന്റെ പുതു​താ​യി കണ്ടെത്തിയ വിശ്വാ​സ​ത്തോ​ടുള്ള തീക്ഷ്‌ണത നിമിത്തം ഞാൻ ദൈവ​ത്തെ​ക്കു​റി​ച്ചു സംസാ​രി​ച്ചു.

“നിങ്ങൾ യഹോ​വ​യു​ടെ സാക്ഷി​ക​ളിൽ ഒരാളാ​ണോ?” എന്ന്‌ അമേരി​ക്ക​ക്കാ​ര​നായ ഒരു ധനതത്ത്വ​ശാ​സ്‌ത്ര പ്രൊ​ഫസ്സർ ആരാഞ്ഞു.

“അല്ല, ഞാൻ യഹോ​വ​യു​ടെ സാക്ഷി​ക​ളെ​ക്കു​റിച്ച്‌ കേട്ടി​ട്ടേ​യില്ല. ഞാൻ ഒരു റോമൻ കത്തോ​ലി​ക്ക​നാണ്‌,” ഞാൻ മറുപടി പറഞ്ഞു.

ഒരു ദൈവ​വി​ശ്വാ​സി ആയിത്തീ​രു​ന്നു

വിദ്യാ​ഭ്യാ​സം, രാഷ്ട്രീ​യം, വൈദ്യ​ശാ​സ്‌ത്രം എന്നീ മേഖല​ക​ളിൽ പ്രമു​ഖ​രാ​യി​രുന്ന മാതാ​പി​താ​ക്ക​ളാ​ലാണ്‌ ഞാൻ വളർത്ത​പ്പെ​ട്ടത്‌. 1944-ൽ ഞാൻ ജനിക്കു​ക​യും പിറ്റേ വർഷം II-ാം ലോക മഹായു​ദ്ധം അവസാ​നി​ക്കു​ക​യും ചെയ്‌ത​ശേഷം അധികം താമസി​യാ​തെ എന്റെ പിതാവ്‌ ഒരു കമ്മ്യു​ണി​സ്റ്റു​കാ​ര​നാ​യി​ത്തീർന്നു. വാസ്‌ത​വ​ത്തിൽ, അദ്ദേഹം കമ്മ്യു​ണിസ്റ്റ്‌ നവീകരണ പ്രസ്ഥാ​ന​ത്തി​ന്റെ സഹസ്ഥാ​പകൻ ആയിരു​ന്നു. കൂടാതെ, 1966-ൽ അദ്ദേഹം പ്രാഗി​ലെ ധനതത്ത്വ​ശാ​സ്‌ത്ര സർവക​ലാ​ശാ​ല​യു​ടെ ചാൻസലർ ആയിത്തീർന്നു. ചുരുക്കം ചില വർഷങ്ങൾക്കു ശേഷം അദ്ദേഹ​ത്തിന്‌ ചെക്കോ​സ്ലോ​വാ​ക്യ​യി​ലെ വിദ്യാ​ഭ്യാ​സ മന്ത്രി​യാ​യി നിയമനം ലഭിച്ചു. അപ്പോ​ഴേ​ക്കും അതു കമ്മ്യു​ണി​സ​ത്തി​ലും നിരീ​ശ്വ​ര​വാ​ദ​ത്തി​ലും അധിഷ്‌ഠി​ത​മായ ഒരു രാജ്യ​മാ​യി​രു​ന്നു.

മാതാവ്‌ അതീവ സത്യസ​ന്ധ​യായ ഒരു കഴിവുറ്റ സ്‌ത്രീ​യാ​യി​രു​ന്നു. അവർ രാജ്യത്തെ ഏറ്റവും മികച്ച നേത്ര​ശ​സ്‌ത്ര​ക്രി​യാ​വി​ദഗ്‌ധ എന്ന പേരെ​ടു​ത്തി​രു​ന്നു. എങ്കിലും, നിർധ​നർക്ക്‌ അവർ പണം വാങ്ങാതെ വൈദ്യ​ചി​കി​ത്സകൾ ലഭ്യമാ​ക്കി​യി​രു​ന്നു. അവർ ഇങ്ങനെ പറയുക പതിവാ​യി​രു​ന്നു: “ഒരുവനെ ഏൽപ്പി​ച്ചി​രി​ക്കുന്ന കഴിവു​കൾ എന്തുത​ന്നെ​യാ​യി​രു​ന്നാ​ലും അവ സമുദാ​യ​ത്തി​ന്റെ​യും രാഷ്ട്ര​ത്തി​ന്റെ​യും പ്രയോ​ജ​ന​ത്തി​നാ​യി ഉപയോ​ഗി​ക്കണം.” ക്‌ളി​നി​ക്കിൽ പോകു​ന്ന​തി​നു​വേണ്ടി, ഞാൻ ഉണ്ടായ​പ്പോൾ അവർ പ്രസവാ​വ​ധി​പോ​ലും എടുത്തില്ല.

ഞാൻ പാണ്ഡി​ത്യ​പ​ര​മാ​യി മികച്ചു​നിൽക്കാൻ പ്രതീ​ക്ഷി​ച്ചി​രു​ന്നു. “നിന്നെ​ക്കാൾ മെച്ചമാ​യി ചെയ്യുന്ന ആരെങ്കി​ലു​മു​ണ്ടോ?“ എന്നു പിതാവു ചോദി​ക്കു​മാ​യി​രു​ന്നു. മികവി​നുള്ള പാണ്ഡിത്യ അവാർഡു​കൾ ഞാൻ മിക്ക​പ്പോ​ഴും നേടി​യി​രു​ന്ന​തി​നാൽ ഞാൻ മത്സരം ആസ്വദി​ക്കാൻ തുടങ്ങി. ഞാൻ റഷ്യൻ, ഇംഗ്ലീഷ്‌, ജർമൻ എന്നീ ഭാഷകൾ പഠിക്കു​ക​യും കമ്മ്യു​ണിസ്റ്റ്‌ ലോക​ത്തും പുറത്തും വിപു​ല​മാ​യി യാത്ര​ചെ​യ്യു​ക​യും ചെയ്‌തു. ന്യായ​ര​ഹി​ത​മായ അന്ധവി​ശ്വാ​സ​ങ്ങ​ളാ​യി മതാശ​യ​ങ്ങളെ നിരാ​ക​രി​ക്കു​ന്നതു ഞാൻ ആസ്വദി​ച്ചു. നിരീ​ശ്വ​ര​വാ​ദത്തെ ഞാൻ പൂർണ​മാ​യി അംഗീ​ക​രി​ച്ചി​രു​ന്നെ​ങ്കി​ലും അതിന്റെ രാഷ്ട്രീയ പ്രകട​നങ്ങൾ ഞാൻ വെറുത്തു തുടങ്ങി.

1965-ൽ അതായത്‌ എനിക്ക്‌ 21 വയസ്സു മാത്രം ഉള്ളപ്പോൾ ഇംഗ്ലണ്ടി​ലേക്കു നടത്തിയ ഒരു യാത്ര എന്നിൽ ആഴമായ സ്വാധീ​നം ചെലുത്തി. ബോധ്യ​വും യുക്തി​യും ഉപയോ​ഗിച്ച്‌ ഒരു പരമോ​ന്ന​ത​നി​ലുള്ള തങ്ങളുടെ വിശ്വാ​സ​ത്തി​നു​വേണ്ടി വാദിച്ച ആളുകളെ ഞാൻ കണ്ടുമു​ട്ടി. ഞാൻ പ്രാഗി​ലേക്കു മടങ്ങി​യെ​ത്തി​യ​പ്പോൾ റോമൻ കത്തോ​ലി​ക്ക​നായ ഒരു പരിച​യ​ക്കാ​രൻ ഇപ്രകാ​രം നിർദേ​ശി​ച്ചു: “ക്രിസ്‌ത്യാ​നി​ത്വ​ത്തെ​ക്കു​റി​ച്ചു വായി​ക്ക​രുത്‌. ബൈബിൾ വായി​ക്കുക.” അതാണു ഞാൻ ചെയ്‌തത്‌. വായന പൂർത്തി​യാ​ക്കു​ന്ന​തി​നു​വേണ്ടി ഞാൻ മൂന്നു മാസം എടുത്തു.

ബൈബിൾ എഴുത്തു​കാർ അവരുടെ സന്ദേശങ്ങൾ അവതരി​പ്പി​ച്ചി​രി​ക്കുന്ന വിധമാണ്‌ എന്നിൽ മതിപ്പു​ള​വാ​ക്കി​യത്‌. അവർ തുറന്നു പറയു​ന്ന​വ​രും ആത്മവി​മർശ​ക​രു​മാ​യി​രു​ന്നു. അവർ സംസാ​രിച്ച ആ മഹത്തായ ഭാവി വ്യക്തി​ത്വ​മുള്ള ഒരു ദൈവ​ത്തി​നു​മാ​ത്രം വിഭാവന ചെയ്യാ​നും നൽകാ​നും കഴിയുന്ന ഒന്നാ​ണെന്നു ഞാൻ വിശ്വ​സി​ക്കാൻ ഇടയായി.

മാസങ്ങ​ളി​ലെ സ്വകാര്യ ബൈബിൾ വായന​യ്‌ക്കും ധ്യാന​ത്തി​നും ശേഷം പിതാ​വി​നെ​യും സുഹൃ​ത്തു​ക്ക​ളെ​യും നേരി​ടാൻ തയ്യാറാ​യി​രി​ക്കു​ന്ന​തു​പോ​ലെ എനിക്കു തോന്നി. എന്റെ പുതി​യ​താ​യി കണ്ടെത്തിയ വിശ്വാ​സത്തെ അവർ വെല്ലു​വി​ളി​ക്കു​മെന്ന്‌ എനിക്ക​റി​യാ​മാ​യി​രു​ന്നു. പിന്നെ ഞാൻ ഉത്സുക​നായ ഒരു മതപരി​വർത്ത​ക​നാ​യി​ത്തീർന്നു. തുടക്ക​ത്തിൽ പ്രതി​പാ​ദിച്ച ആ അമേരി​ക്കൻ പ്രൊ​ഫ​സ്സ​റി​നെ​പ്പോ​ലെ എന്റെ അടുത്തു​ണ്ടാ​യി​രുന്ന എല്ലാവർക്കും എന്റെ മതപരി​വർത്ത​നത്തെ നേരി​ടേ​ണ്ടി​വന്നു. എന്റെ വിശ്വാ​സ​ത്തെ​ക്കു​റിച്ച്‌ എല്ലാവ​രെ​യും അറിയി​ക്കു​ന്ന​തി​നു​വേണ്ടി ഞാൻ എന്റെ കിടക്ക​യ്‌ക്കു മുകളി​ലുള്ള ഭിത്തി​യിൽ യേശു​വി​ന്റെ ഒരു ക്രൂശിത രൂപം തൂക്കി​യി​ടു​ക​പോ​ലും ചെയ്‌തു.

എന്നാൽ ഞാൻ അധിക​വും, ഊർജ​സ്വ​ല​നായ ഒരു കമ്മ്യു​ണി​സ്റ്റു​കാ​ര​നാ​യി​രുന്ന എന്റെ പിതാ​വി​നെ​പ്പോ​ലെ​യാ​യി​രു​ന്നതി​നാൽ എനിക്ക്‌ ഒരു ക്രിസ്‌ത്യാ​നി​യാ​യി​രി​ക്കാൻ കഴിയി​ല്ലെന്നു പറഞ്ഞ്‌ മാതാവ്‌ എതിർത്തു. എങ്കിലും ഞാൻ പിടി​ച്ചു​നി​ന്നു. ബൈബിൾ ഞാൻ രണ്ടാമ​ത്തെ​യും മൂന്നാ​മ​ത്തെ​യും തവണ വായിച്ചു. ഇനിയും പുരോ​ഗ​മി​ക്ക​ണ​മെ​ങ്കിൽ എനിക്കു മാർഗ​നിർദേശം ആവശ്യ​മാ​ണെന്ന്‌ അത്രയു​മാ​യ​പ്പോ​ഴേ​ക്കും എനിക്കു മനസ്സി​ലാ​യി.

എന്റെ അന്വേ​ഷ​ണ​ത്തി​നു പ്രതി​ഫലം ലഭിച്ചു

ഞാൻ റോമൻ കത്തോ​ലി​ക്കാ സഭയു​മാ​യി ബന്ധപ്പെട്ടു. എന്നെ സഭയുടെ ഉപദേ​ശങ്ങൾ പഠിപ്പി​ക്കു​ന്ന​തി​ലാ​യി​രു​ന്നു ഒരു യുവ പുരോ​ഹി​തന്റെ മുഖ്യ താത്‌പ​ര്യം. അവ ഞാൻ മുഴു​വ​നാ​യും അംഗീ​ക​രി​ച്ചു. പിന്നെ, 1966-ൽ—എന്റെ പിതാ​വിന്‌ അപമാനം വരുത്തി​വെ​ച്ചു​കൊണ്ട്‌—ഞാൻ സ്‌നാ​പ​ന​മേറ്റു. എന്റെമേൽ വെള്ളം തളിച്ച​ശേഷം, ഞാൻ ബൈബിൾ വായി​ക്ക​ണ​മെന്നു പുരോ​ഹി​തൻ നിർദേ​ശി​ച്ചു. എന്നാൽ അദ്ദേഹം ഇപ്രകാ​രം കൂട്ടി​ച്ചേർത്തു: “പാപ്പാ പരിണാമ സിദ്ധാന്തം ഇപ്പോൾത്തന്നെ സ്വീക​രി​ച്ചു കഴിഞ്ഞു, അതു​കൊ​ണ്ടു വിഷമി​ക്കേണ്ടാ; നാം ഗോത​മ്പും കളകളും വേർതി​രി​ച്ചു മനസ്സി​ലാ​ക്കണം.” എനിക്കു വിശ്വാ​സം പ്രദാനം ചെയ്‌ത പുസ്‌ത​കത്തെ സംശയി​ക്കേ​ണ്ടി​യി​രി​ക്കു​ന്നു​വെ​ന്നത്‌ എന്നെ ഞെട്ടിച്ചു.

അതിനി​ട​യിൽ, അതായത്‌ 1966-ലെ ശരത്‌കാ​ലത്ത്‌ ഞാൻ ഒരു കത്തോ​ലി​ക്കാ കുടും​ബ​ത്തിൽനി​ന്നുള്ള സുഹൃ​ത്തി​നോ​ടു സംസാ​രി​ക്കു​ക​യും അദ്ദേഹ​വു​മാ​യി എന്റെ വിശ്വാ​സങ്ങൾ പങ്കുവ​യ്‌ക്കു​ക​യും ചെയ്‌തു. അദ്ദേഹ​ത്തി​നും ബൈബിൾ പരിചി​ത​മാ​യി​രു​ന്നു. അദ്ദേഹം എന്നോട്‌ അർമ​ഗെ​ദോ​നെ​ക്കു​റി​ച്ചു സംസാ​രി​ച്ചു. (വെളി​പ്പാ​ടു 16:16) ഏകദേശം രണ്ടു മാസം മുമ്പ്‌, നേരത്തെ പ്രതി​പാ​ദിച്ച ആ കാഴ്‌ച കാണൽ പര്യട​നത്തെ നയിച്ചു​കൊ​ണ്ടി​രു​ന്ന​പ്പോൾ ഞാൻ ആദ്യമാ​യി കേട്ടറിഞ്ഞ യഹോ​വ​യു​ടെ സാക്ഷി​ക​ളു​മാ​യി അദ്ദേഹം സമ്പർക്ക​ത്തി​ലാ​ണെന്നു പറഞ്ഞു. എന്നിരു​ന്നാ​ലും, ശക്തവും ധനിക​വും അംഗബാ​ഹു​ല്യ​വു​മുള്ള എന്റെ റോമൻ കത്തോ​ലി​ക്കാ സഭയോ​ടുള്ള താരത​മ്യ​ത്തിൽ ഞാൻ അദ്ദേഹ​ത്തി​ന്റെ കൂട്ടത്തെ അപ്രധാ​ന​മാ​യി കണക്കാക്കി.

പിന്നെ​യു​ള്ള ചർച്ചക​ളിൽ, ഞങ്ങൾ മൂന്ന്‌ അടിയ​ന്തിര വിവാ​ദ​പ്ര​ശ്‌നങ്ങൾ പരി​ശോ​ധി​ച്ചു. ഒന്ന്‌, റോമൻ കത്തോ​ലി​ക്കാ സഭ ഒന്നാം നൂറ്റാ​ണ്ടി​ലെ ക്രിസ്‌ത്യാ​നി​ത്വ​ത്തി​ന്റെ അനന്തരാ​വ​കാ​ശി​യാ​ണോ? രണ്ട്‌, ആത്യന്തിക പ്രമാ​ണ​മാ​യി എന്തി​നെ​യാണ്‌ കണക്കാ​ക്കേ​ണ്ടത്‌—എന്റെ സഭയെ​യോ അതോ ബൈബി​ളി​നെ​യോ? മൂന്ന്‌, ഏതാണ്‌ ശരി, ബൈബി​ളി​ലെ സൃഷ്ടി വിവര​ണ​മോ പരിണാമ സിദ്ധാ​ന്ത​മോ?

ഞങ്ങളുടെ രണ്ടു​പേ​രു​ടെ​യും വിശ്വാ​സ​ത്തി​ന്റെ ഉറവിടം ബൈബി​ളാ​യി​രു​ന്ന​തി​നാൽ കത്തോ​ലി​ക്കാ സഭയുടെ പഠിപ്പി​ക്ക​ലു​കൾ ആദിമ ക്രിസ്‌ത്യാ​നി​ത്വ​ത്തി​ന്റെ പഠിപ്പി​ക്ക​ലു​ക​ളിൽനി​ന്നു വളരെ വ്യത്യ​സ്‌ത​മാ​ണെന്ന്‌ എന്നെ ബോധ്യ​പ്പെ​ടു​ത്താൻ സുഹൃ​ത്തിന്‌ ഒരു പ്രയാ​സ​വു​മി​ല്ലാ​യി​രു​ന്നു. ഉദാഹ​ര​ണ​ത്തിന്‌, ത്രിത്വം സംബന്ധിച്ച പ്രമുഖ സഭാ പഠിപ്പി​ക്കൽ യേശു​ക്രി​സ്‌തു​വി​ന്റെ​യും അവന്റെ അപ്പോ​സ്‌ത​ലൻമാ​രു​ടെ​യും പഠിപ്പി​ക്ക​ലു​ക​ളിൽ അടിസ്ഥാ​ന​പ്പെ​ട്ട​ത​ല്ലെന്നു കത്തോ​ലി​ക്കാ സ്രോ​ത​സ്സു​കൾപ്പോ​ലും സമ്മതി​ച്ചു​പ​റ​യു​ന്ന​താ​യി ഞാൻ മനസ്സി​ലാ​ക്കി.

നമ്മുടെ ആത്യന്തിക പ്രമാണം എന്തായി​രി​ക്കണം എന്ന ബന്ധപ്പെട്ട ചോദ്യ​ത്തി​ലേക്ക്‌ അതു ഞങ്ങളെ എത്തിച്ചു. ഞാൻ വിശുദ്ധ ആഗസ്‌തി​നോ​സി​ന്റെ ഉദ്ധരണി പരാമർശി​ച്ചു: “റോമാ ലോക്കൂ​ട്ടാ എസ്റ്റ്‌; കോയൂ​സാ ഫിനിറ്റാ എസ്റ്റ്‌,” അതായത്‌, “റോം സംസാ​രി​ച്ചി​രി​ക്കു​ന്നു; സംഗതി നിഗമ​ന​ത്തി​ലെത്തി.” എന്നാൽ ദൈവ​വ​ച​ന​മായ ബൈബിൾ ആയിരി​ക്കണം നമ്മുടെ പരമോ​ന്നത പ്രമാ​ണ​മെന്ന്‌ എന്റെ സുഹൃത്ത്‌ അഭി​പ്രാ​യ​പ്പെട്ടു. അപ്പോ​സ്‌ത​ല​നായ പൗലോ​സി​ന്റെ വാക്കു​ക​ളോട്‌ എനിക്കു യോജി​ക്കേണ്ടി വന്നു: “ദൈവം സത്യവാൻ, സകല മനുഷ്യ​രും ഭോഷ്‌കു പറയു​ന്നവർ എന്നേ വരൂ.” (ചെരി​ച്ചെ​ഴു​ത്തു ഞങ്ങളു​ടേത്‌.)—റോമർ 3:4.

ഒടുവിൽ, എന്റെ സുഹൃത്ത്‌ പരിണാ​മ​ത്തി​നെ​തി​രെ പുതിയ ലോകം (ഇംഗ്ലീഷ്‌) എന്ന തലക്കെ​ട്ടോ​ടു​കൂ​ടിയ മങ്ങിയ, ടൈപ്പു​ചെയ്‌ത ഒരു പ്രതി എനിക്കു നൽകി. 1940-കളുടെ അവസാനം ചെക്കോ​സ്ലോ​വാ​ക്യ​യിൽ യഹോ​വ​യു​ടെ സാക്ഷി​കൾക്കു നിരോ​ധനം ഏർപ്പെ​ടു​ത്തി​യി​രു​ന്ന​തി​നാൽ അവർ തങ്ങളുടെ പ്രസി​ദ്ധീ​ക​ര​ണ​ങ്ങ​ളു​ടെ പ്രതികൾ ഉണ്ടാക്കു​ക​യും ആർക്കു കൊടു​ക്കു​ന്നു എന്നതു സംബന്ധി​ച്ചു ജാഗ്രത പാലി​ക്കു​ക​യും ചെയ്‌തി​രു​ന്നു. ആ ചെറു​പു​സ്‌തകം വായി​ച്ച​പ്പോൾ സത്യം അതിലു​ണ്ടെന്ന്‌ എനിക്കു മനസ്സി​ലാ​യി. എന്റെ സുഹൃത്ത്‌ എന്നോ​ടൊ​പ്പം ഒരു ബൈബി​ള​ധ്യ​യനം ആരംഭി​ച്ചു. അദ്ദേഹം “ദൈവം സത്യവാൻ” എന്ന ബൈബിൾ പഠന സഹായി​യിൽനിന്ന്‌ ഒരു തവണ അനേകം പേജുകൾ കടം തരുമാ​യി​രു​ന്നു. ഞങ്ങൾ ആ പേജുകൾ ഒരുമി​ച്ചി​രു​ന്നു ചർച്ച​ചെ​യ്യും.

ഞങ്ങൾ ഈ ചർച്ചകൾ തുടങ്ങി അധികം താമസി​യാ​തെ—1966-ലെ ക്രിസ്‌മസ്‌ കാലയ​ള​വിൽ—പശ്ചിമ ജർമനി​യി​ലുള്ള സുഹൃ​ത്തു​ക്കൾ എന്നെ കാണാ​നാ​യി പ്രാഗി​ലേക്കു വന്നു. ഞങ്ങളുടെ ചർച്ചക​ളി​ലൊ​ന്നിൽവച്ച്‌ അവർ ക്രിസ്‌ത്യാ​നി​കളെ കപടഭ​ക്ത​രായ യുദ്ധ​ക്കൊ​തി​യൻമാ​രാ​യി അവഹേ​ളി​ച്ചു. “നാറ്റോ (NATO) രാജ്യ​ങ്ങ​ളി​ലെ സൈനി​കർ എന്ന നിലയിൽ, ഞങ്ങൾക്കു കമ്മ്യു​ണിസ്റ്റ്‌ വാർസോ പാക്‌റ്റ്‌ രാജ്യത്തെ ഒരു നാമമാ​ത്ര ക്രിസ്‌ത്യാ​നി​യെന്ന നിലയിൽ നിങ്ങൾക്കെ​തി​രെ പോരാ​ടാൻ കഴിയും,” അവർ പറഞ്ഞു. അവരുടെ നിഗമനം ഇതായി​രു​ന്നു: “കപടഭ​ക്ത​രാ​യി​രി​ക്കു​ന്ന​തി​ലും നല്ലത്‌ ദോ​ഷൈ​ക​ദൃ​ക്കാ​യി​രി​ക്കു​ന്ന​താണ്‌.” അവർ പറയു​ന്നത്‌ ഒരുപക്ഷേ ശരിയാ​യി​രി​ക്കു​മെന്ന്‌ എനിക്കു തോന്നി. അതു​കൊ​ണ്ടു യുദ്ധവും അതിനുള്ള പരിശീ​ല​ന​വും സംബന്ധി​ച്ചു സത്യ​ക്രി​സ്‌ത്യാ​നി​ക​ളു​ടെ നിലപാട്‌ എന്താ​ണെന്ന്‌ എന്റെ അടുത്ത ബൈബിൾ അധ്യയ​ന​ത്തിൽ ഞാൻ എന്റെ സുഹൃ​ത്തി​നോട്‌ ആരാഞ്ഞു.

ഞാൻ നേരിട്ട തീരു​മാ​ന​ങ്ങൾ

എന്റെ സുഹൃത്തു നൽകിയ വ്യക്തമായ വിശദീ​ക​രണം എന്നെ അത്ഭുത​പ്പെ​ടു​ത്തി. എന്നാൽ, ‘വാളു​കളെ കൊഴു​ക്ക​ളാ​യി അടിച്ചു​തീർക്കാ’നുള്ള ബൈബിൾ പഠിപ്പി​ക്ക​ലിന്‌ അനുസൃ​ത​മാ​യി ജീവി​ക്കു​ന്നത്‌ എന്റെ ജീവി​ത​ത്തെ​യും ഉദ്ദിഷ്ട ജീവി​ത​വൃ​ത്തി​യെ​യും കാര്യ​മാ​യി മാറ്റി​മ​റി​ക്കു​മാ​യി​രു​ന്നു. (യെശയ്യാ​വു 2:4) അഞ്ചു മാസങ്ങൾക്കു​ള്ളിൽ ഞാൻ മെഡിക്കൽ സർവക​ലാ​ശാ​ല​യിൽനി​ന്നും ബിരുദം നേടാ​നി​രി​ക്ക​യാ​യി​രു​ന്നു. അതിനു​ശേഷം ഒരു നിശ്ചിത കാലയ​ളവ്‌ നിർബ​ന്ധിത സൈനിക സേവനം ചെയ്യാൻ എന്നോട്‌ ആവശ്യ​പ്പെ​ടു​മാ​യി​രു​ന്നു. ഞാൻ എന്താണു ചെയ്യേ​ണ്ടത്‌? എനിക്ക്‌ ആകെ അങ്കലാ​പ്പാ​യി. അതു​കൊ​ണ്ടു ഞാൻ ദൈവ​ത്തോ​ടു പ്രാർഥി​ച്ചു.

ദിവസ​ങ്ങ​ളോ​ളം ഗഹനവും ധ്യാന​നി​ര​ത​വു​മാ​യി ചിന്തി​ച്ച​പ്പോൾ, സമാധാ​ന​കാം​ക്ഷി​ക​ളാ​യി​രി​ക്കാ​നുള്ള സത്യ​ക്രി​സ്‌ത്യാ​നി​ക​ളോ​ടുള്ള ആവശ്യ​പ്പെ​ട​ലിന്‌ അനുസൃ​ത​മാ​യി ജീവി​ക്കാ​തി​രി​ക്കാ​നുള്ള യാതൊ​രു ഒഴിക​ഴി​വും ഞാൻ കണ്ടില്ല. സർവക​ലാ​ശാ​ല​യിൽനി​ന്നും ബിരുദം നേടി​യ​ശേഷം, മനസ്സാ​ക്ഷി​പ​ര​മായ വിസമ്മ​ത​മു​ള്ളവൻ എന്ന നിലയിൽ ശിക്ഷവി​ധി​ക്ക​പ്പെ​ടു​ന്ന​തു​വരെ ആശുപ​ത്രി​യിൽ ഒരു ജോലി സ്വീക​രി​ക്കാൻ ഞാൻ തീരു​മാ​നി​ച്ചു. എന്നാൽ രക്തം വർജി​ക്കു​ന്നതു സംബന്ധി​ച്ചു ബൈബിൾ പറയുന്ന സംഗതി ഞാൻ അപ്പോ​ഴാ​ണു മനസ്സി​ലാ​ക്കി​യത്‌. എന്റെ ജോലി, രക്തപ്പകർച്ചകൾ നൽകു​ന്ന​തിൽ എന്നെ ഉൾപ്പെ​ടു​ത്തി​യേ​ക്കാ​മെന്നു മനസ്സി​ലാ​ക്കി​യ​തു​കൊണ്ട്‌ ആശുപ​ത്രി​യി​ലെ ജോലി ഉപേക്ഷി​ക്കാൻ ഞാൻ തീരു​മാ​നി​ച്ചു. (പ്രവൃ​ത്തി​കൾ 15:19, 20, 28, 29) ആ തീരു​മാ​നം ആളുകൾ വ്യാപ​ക​മാ​യി എന്നെ നിന്ദി​ക്കാൻ ഇടയാക്കി.

പിതാ​വി​ന്റെ രാഷ്ട്രീയ വൃത്തി നശിപ്പി​ക്കാൻ ശ്രമി​ച്ചു​കൊ​ണ്ടു ഞാൻ മനഃപൂർവ​മുള്ള കുഴപ്പ​ക്കാ​രൻ ആയിത്തീർന്നി​ട്ടി​ല്ലെന്ന്‌ ഉറപ്പു​വ​രു​ത്തി​യ​തി​നു​ശേഷം പിതാവ്‌ ഇടപെ​ടു​ക​യും എന്റെ നിർബ​ന്ധിത സൈനിക സേവനം ഒരു വർഷ​ത്തേക്കു മാറ്റി​വ​യ്‌ക്കു​ക​യും ചെയ്‌തു. 1967-ലെ ആ വേനൽക്കാ​ലം എന്നെ സംബന്ധി​ച്ചി​ട​ത്തോ​ളം പ്രയാ​സ​ക​ര​മാ​യി​രു​ന്നു. എന്റെ അവസ്ഥ പരിചി​ന്തി​ക്കുക: ഞാനൊ​രു പുതിയ ബൈബിൾ വിദ്യാർഥി. ഞാൻ അതുവരെ ബന്ധപ്പെ​ട്ടി​ട്ടുള്ള ഏക സാക്ഷി​യാ​യി​രുന്ന എന്റെ അധ്യയന ഉപദേ​ഷ്ടാവ്‌ ആ വേനൽക്കാ​ലത്ത്‌ സ്ഥലത്തി​ല്ലാ​യി​രു​ന്നു താനും. എന്റെ വ്യക്തി​പ​ര​മായ പഠനത്തി​നു​വേണ്ടി അദ്ദേഹം “ദൈവം സത്യവാൻ” പുസ്‌ത​ക​ത്തിൽനി​ന്നുള്ള ഏതാനും അധ്യാ​യങ്ങൾ മാത്രമേ തന്നിട്ടു​ണ്ടാ​യി​രു​ന്നു​ള്ളൂ. ആത്മീയ മാർഗ​നിർദേ​ശ​ത്തി​നുള്ള എന്റെ ഏക ഉറവി​ടങ്ങൾ ഇവയും എന്റെ ബൈബി​ളും മാത്ര​മാ​യി​രു​ന്നു.

പിന്നീട്‌ ഞാൻ മറ്റു സാക്ഷി​ക​ളു​മാ​യി പരിച​യ​ത്തി​ലാ​യി. 1968 മാർച്ച്‌ 8-ന്‌ ഞാൻ യഹോ​വ​യാം ദൈവ​ത്തി​നുള്ള എന്റെ സമർപ്പണം ജലസ്‌നാ​പ​ന​ത്താൽ പ്രതീ​ക​പ്പെ​ടു​ത്തി. ഇംഗ്ലണ്ടി​ലെ ഓക്‌സ്‌ഫോർഡ്‌ സർവക​ലാ​ശാ​ല​യി​ലെ ബിരു​ദാ​നന്തര പഠനങ്ങ​ളു​ടെ രണ്ടു വർഷത്തെ ഒരു കോഴ്‌സ്‌ എനിക്കു പിറ്റേ വർഷം വാഗ്‌ദാ​നം ചെയ്യ​പ്പെട്ടു. ഞാൻ ആ വാഗ്‌ദാ​നം സ്വീക​രിച്ച്‌ ഇംഗ്ലണ്ടി​ലേക്കു പോക​ണ​മെ​ന്നും സാക്ഷികൾ നിരോ​ധ​ന​ത്തിൻകീ​ഴിൽ അല്ലാത്ത ഒരു രാജ്യത്ത്‌ എനിക്ക്‌ ആത്മീയ​മാ​യി പുരോ​ഗ​മി​ക്കാൻ കഴിയു​മെ​ന്നും ചിലർ നിർദേ​ശി​ച്ചു. അതേസ​മ​യം​തന്നെ ഒരു നല്ല ഔദ്യോ​ഗിക വൃത്തി​ക്കു​വേണ്ടി എനിക്കു തയ്യാ​റെ​ടു​ക്കാൻ കഴിയു​മാ​യി​രു​ന്നു. എന്നാൽ, എന്റെ സേവനങ്ങൾ ചെക്കോ​സ്ലോ​വാ​ക്യ​യിൽ ആവശ്യ​മാ​യി​രി​ക്കു​ന്നി​ട​ത്തോ​ളം ഇംഗ്ലണ്ടിൽ ആവശ്യ​മി​ല്ലെന്ന്‌ ഒരു ക്രിസ്‌തീയ മൂപ്പൻ പറഞ്ഞു. അതു​കൊണ്ട്‌ കൂടു​ത​ലായ ലൗകിക വിദ്യാ​ഭ്യാ​സ​ത്തി​നുള്ള ആ വാഗ്‌ദാ​നം നിരസി​ക്കാൻ ഞാൻ തീരു​മാ​നി​ച്ചു. നമ്മുടെ ഒളിവി​ലുള്ള പ്രസംഗ പ്രവർത്ത​നത്തെ സഹായി​ക്കാ​നാ​യി ഞാൻ ചെക്കോ​സ്ലോ​വാ​ക്യ​യിൽ താമസി​ച്ചു.

ക്രിസ്‌തീ​യ മേൽവി​ചാ​ര​കൻമാർക്കു​വേ​ണ്ടി​യുള്ള പ്രത്യേക പ്രബോ​ധനം സവി​ശേ​ഷ​ത​യാ​യുള്ള രാജ്യ ശുശ്രൂ​ഷാ സ്‌കൂൾ കോഴ്‌സിൽ പങ്കെടു​ക്കാൻ 1969-ൽ എനിക്കു ക്ഷണം ലഭിച്ചു. ആ വർഷം തന്നെ ചെക്കോ​സ്ലോ​വാ​ക്യ​യി​ലെ ഏറ്റവും മികച്ച യുവ ഔഷധ​ശാ​സ്‌ത്ര​ജ്ഞ​നാ​യുള്ള പാണ്ഡി​ത്യം ഞാൻ നേടി. അതിന്റെ ഫലമായി, സ്വിറ്റ്‌സർലൻഡി​ലെ ഔഷധ​ശാ​സ്‌ത്ര​ത്തി​ന്റെ അന്തർദേ​ശീയ യൂണി​യന്റെ കൺ​വെൻ​ഷ​നിൽ ഞാൻ പങ്കെടു​ത്തു.

ഒരു ശാസ്‌ത്രജ്ഞൻ തന്റെ വീക്ഷണ​ഗ​തി​കൾക്കു മാറ്റം വരുത്തു​ന്നു

1970-ൽ ഞാൻ പങ്കെടുത്ത ഒരു പ്രഭാ​ഷ​ണ​ത്തിൽ ഫ്രാൻറി​ഷെക്ക്‌ വിസ്‌കോ​ച്ചിൽ എന്നു പേരുള്ള ഒരു ശാസ്‌ത്രജ്ഞൻ നാഡീ-സംവേഗ പ്രേഷണം എന്ന സങ്കീർണ​മായ വിഷയ​ത്തെ​ക്കു​റി​ച്ചു വിശദീ​ക​രി​ച്ചു. ഒരു ജീവി​യിൽ ആവശ്യം നേരി​ടു​മ്പോ​ഴെ​ല്ലാം ഒരു പ്രമുഖ പരിഹാ​രം പ്രദാനം ചെയ്യ​പ്പെ​ടു​ന്നു​വെന്ന്‌ അദ്ദേഹം പറഞ്ഞു. “പ്രകൃ​തിക്ക്‌, ആ മായാ​മോ​ഹി​നിക്ക്‌ ഇത്‌ എങ്ങനെ ചെയ്യണ​മെന്ന്‌ അറിയാം,” അദ്ദേഹം നിഗമനം ചെയ്‌തു.

പ്രഭാ​ഷ​ണം കഴിഞ്ഞ​പ്പോൾ ഞാൻ അദ്ദേഹത്തെ സമീപി​ച്ചു. “സചേതന വസ്‌തു​ക്ക​ളി​ലെ ഉൽകൃഷ്ട രൂപമാ​തൃ​ക​യ്‌ക്കുള്ള ബഹുമതി ദൈവ​ത്തി​നു പോ​കേ​ണ്ട​താ​ണെന്ന്‌ താങ്കൾ വിചാ​രി​ക്കു​ന്നി​ല്ലേ?,” ഞാൻ ചോദി​ച്ചു. അദ്ദേഹം ഒരു നിരീ​ശ്വ​ര​വാ​ദി​യാ​യി​രു​ന്ന​തി​നാൽ എന്റെ ചോദ്യം അദ്ദേഹത്തെ അത്ഭുത​പ്പെ​ടു​ത്തി. അദ്ദേഹം വ്യത്യസ്‌ത തരത്തി​ലുള്ള ചോദ്യ​ങ്ങൾക്കൊ​ണ്ടു പ്രതി​ക​രി​ച്ചു. അദ്ദേഹം ഇപ്രകാ​രം ചോദി​ച്ചു: “തിൻമ എവി​ടെ​നി​ന്നു വന്നു? വളരെ​യ​ധി​കം കുട്ടികൾ അനാഥ​രാ​യി​രി​ക്കു​ന്ന​തിന്‌ ആരെയാ​ണു കുറ്റ​പ്പെ​ടു​ത്തേ​ണ്ടത്‌?”

ഞാൻ സയുക്തി​ക​മായ, ബൈബി​ള​ധി​ഷ്‌ഠിത ഉത്തരങ്ങൾ നൽകി​യ​പ്പോൾ അദ്ദേഹ​ത്തി​ന്റെ താത്‌പ​ര്യം ഉണർത്ത​പ്പെട്ടു. എന്നാൽ, സ്രഷ്ടാ​വാ​ണു ബൈബി​ളി​ന്റെ ഗ്രന്ഥകാ​രൻ എന്ന്‌ ആളുകൾക്ക്‌ എളുപ്പം മനസ്സി​ലാ​ക​ത്ത​ക്ക​വണ്ണം കോശ​ഘ​ട​ന​യു​ടെ വിവരണം പോ​ലെ​യുള്ള പ്രത്യേക ശാസ്‌ത്രീയ വിവരങ്ങൾ ബൈബിൾ എന്തു​കൊ​ണ്ടാ​ണു നൽകാ​ത്തത്‌ എന്ന്‌ അദ്ദേഹം ചോദി​ച്ചു. “ഏതാണ്‌ കൂടുതൽ പ്രയാസം, വർണി​ക്കു​ന്ന​തോ സൃഷ്ടി​ക്കു​ന്ന​തോ?,” ഞാൻ പ്രതി​ക​രി​ച്ചു. മനുഷ്യൻ ഇവിടെ വന്നത്‌ പരിണാ​മ​ത്താ​ലോ സൃഷ്ടി​യാ​ലോ? (ഇംഗ്ലീഷ്‌) എന്ന പുസ്‌തകം ഞാൻ അദ്ദേഹ​ത്തി​നു കടം കൊടു​ത്തു.

അതിന്റെ ഉപരി​പ്ല​വ​മായ ഒരു വായന​യ്‌ക്കു ശേഷം അതു വിദഗ്‌ധ​വി​ജ്ഞാ​നം ഇല്ലാത്ത​തും തെറ്റു​മാ​ണെന്നു ഫ്രാൻറി​ഷെക്ക്‌ മുദ്ര​കു​ത്തി. ബഹുഭാ​ര്യ​ത്വം, ദാവീ​ദി​ന്റെ വ്യഭി​ചാ​രം, നിഷ്‌ക​ള​ങ്ക​നായ ഒരു മനുഷ്യ​നെ ദാവീദ്‌ കൊല​ചെ​യ്‌തത്‌ എന്നിവ​യെ​ക്കു​റി​ച്ചു ബൈബിൾ പറയു​ന്ന​തി​നെ​യും അദ്ദേഹം വിമർശി​ച്ചു. (ഉല്‌പത്തി 29:23-29; 2 ശമൂവേൽ 11:1-25) ബൈബിൾ, ദൈവ​ദാ​സൻമാ​രു​ടെ​പോ​ലും തെറ്റു​ക​ളും വ്യക്തമായ ലംഘന​ങ്ങ​ളും സത്യസ​ന്ധ​മാ​യി റിപ്പോർട്ടു ചെയ്യു​ന്നു​വെന്നു ചൂണ്ടി​ക്കാ​ണി​ച്ചു​കൊ​ണ്ടു ഞാൻ അദ്ദേഹ​ത്തി​ന്റെ എതിർപ്പു​കളെ ഖണ്ഡിച്ചു.

ഒരുവന്‌ നല്ല ആന്തരമി​ല്ലെ​ങ്കിൽ, സത്യ​ത്തോട്‌ അയാൾക്കു സ്‌നേ​ഹ​മി​ല്ലെ​ങ്കിൽ യാതൊ​രു പ്രകാ​ര​ത്തി​ലു​മുള്ള വാദഗ​തി​യോ ന്യായ​വാ​ദ​മോ ദൈവ​ത്തി​ന്റെ അസ്‌തി​ത്വ​ത്തെ​ക്കു​റിച്ച്‌ അയാളെ ബോധ്യ​പ്പെ​ടു​ത്തു​ക​യി​ല്ലെന്ന്‌ ഒടുവിൽ ഞങ്ങളുടെ ചർച്ചക​ളി​ലൊ​ന്നിൽവെച്ചു ഞാൻ ഫ്രാൻറി​ഷെ​ക്കി​നോ​ടു പറഞ്ഞു. ഞാൻ പോരാൻ തുടങ്ങു​മ്പോൾ അദ്ദേഹം എന്നെ പിടിച്ചു നിർത്തി​യിട്ട്‌ ഒരു ബൈബിൾ അധ്യയനം ആവശ്യ​പ്പെട്ടു. മനുഷ്യൻ ഇവിടെ വന്നത്‌ പരിണാ​മ​ത്താ​ലോ സൃഷ്ടി​യാ​ലോ? എന്ന പുസ്‌തകം താൻ വീണ്ടും വായി​ക്കു​മെ​ന്നും എന്നാൽ ഇത്തവണ നിഷ്‌പ​ക്ഷ​മാ​യി​ട്ടാ​ണു വായി​ക്കു​ക​യെ​ന്നും അദ്ദേഹം പറഞ്ഞു. അതിനു​ശേഷം അദ്ദേഹ​ത്തി​ന്റെ മനോ​ഭാ​വ​ത്തി​നു പൂർണ​മായ മാറ്റം വന്നു. അദ്ദേഹ​ത്തി​ന്റെ ഒരു എഴുത്തിൽ ഉൾപ്പെ​ടു​ത്തി​യി​രുന്ന പിൻവ​രുന്ന ഉദ്ധരണി അതിനു തെളി​വാണ്‌: “മമനു​ഷ്യ​ന്റെ ഗർവ്വം കുനി​യും; പുരു​ഷ​ന്മാ​രു​ടെ ഉന്നതഭാ​വം താഴും; യഹോവ മാത്രം അന്നാളിൽ ഉന്നതനാ​യി​രി​ക്കും.”—യെശയ്യാ​വു 2:17.

1973-ലെ വേനൽക്കാ​ലത്ത്‌ ഫ്രാൻറി​ഷെ​ക്കും അദ്ദേഹ​ത്തി​ന്റെ ഭാര്യ​യും യഹോ​വ​യു​ടെ സാക്ഷി​ക​ളാ​യി സ്‌നാ​പ​ന​മേറ്റു. ഇപ്പോൾ അദ്ദേഹം പ്രാഗി​ലെ ഒരു സഭയിൽ മൂപ്പനാ​യി സേവി​ക്കു​ക​യാണ്‌.

നിരോ​ധ​ന​ത്തിൻകീ​ഴിൽ പ്രസം​ഗി​ക്കൽ

നിരോ​ധന സമയത്ത്‌, നമ്മുടെ വയൽ ശുശ്രൂഷ വളരെ​യ​ധി​കം ജാഗ്ര​ത​യോ​ടെ നിർവ​ഹി​ക്കാൻ ഞങ്ങൾക്കു മാർഗ​നിർദേശം നൽകി​യി​രു​ന്നു. ഒരിക്കൽ, ഒരു യുവ സാക്ഷി അവനോ​ടൊ​പ്പം പ്രസംഗ വേലയിൽ പങ്കെടു​ക്കാ​മോ​യെന്ന്‌ എന്നോട്‌ ചോദി​ച്ചു​കൊ​ണ്ടേ​യി​രു​ന്നു. യഹോ​വ​യു​ടെ സാക്ഷി​ക​ളു​ടെ സ്ഥാപന​ത്തിൽ നേതൃ​ത്വം വഹിക്കു​ന്നവർ വാസ്‌ത​വ​ത്തിൽ ശുശ്രൂ​ഷ​യിൽ പങ്കെടു​ക്കു​ന്നു​ണ്ടോ​യെന്ന്‌ അവൻ സംശയി​ച്ചു. ഞങ്ങൾ ഞങ്ങളുടെ അനൗപ​ചാ​രിക ശുശ്രൂ​ഷ​യിൽ അനേകം നല്ല സംഭാ​ഷ​ണങ്ങൾ ആസ്വദി​ച്ചു. ഒടുവിൽ ഞങ്ങൾ ഒരാളെ കണ്ടുമു​ട്ടി. ആ സമയത്തു ഞാനത്‌ അറിഞ്ഞി​ല്ലെ​ങ്കി​ലും അയാൾ ഗവൺമെന്റ്‌ രഹസ്യ പൊലീ​സി​ന്റെ ആൽബത്തി​ലെ ഒരു ഫോ​ട്ടോ​യിൽനി​ന്നും എന്റെ മുഖം തിരി​ച്ച​റി​ഞ്ഞു. എന്നെ അറസ്റ്റു ചെയ്‌തി​ല്ലെ​ങ്കി​ലും അപ്പോൾമു​തൽ ഞാൻ കർശന​മായ സൂക്ഷ്‌മ​നി​രീ​ക്ഷ​ണ​ത്തിന്‌ വിധേ​യ​നാ​യി​രു​ന്നു. അത്‌ ഒളിവി​ലുള്ള ഞങ്ങളുടെ പ്രസംഗ പ്രവർത്ത​ന​ത്തി​ലെ എന്റെ ഫലപ്ര​ദ​ത്വ​ത്തെ തടസ്സ​പ്പെ​ടു​ത്തി.

മുൻ വർഷങ്ങ​ളിൽ ഞാൻ ചെയ്‌തു​കൊ​ണ്ടി​രു​ന്ന​തു​പോ​ലെ 1983-ലെ വേനൽക്കാ​ലത്ത്‌, രാജ്യത്തെ ഒരു വിദൂര ഭാഗത്ത്‌ ഏതാനും ദിവസം അനൗപ​ചാ​രിക സാക്ഷീ​ക​രണം നടത്തു​ന്ന​തി​നു​വേണ്ടി ഞാൻ യുവസാ​ക്ഷി​ക​ളു​ടെ ഒരു സംഘത്തെ സംഘടി​പ്പി​ച്ചു. ജ്ഞാനപൂർവ​ക​മായ ബുദ്ധ്യു​പ​ദേശം ചെവി​ക്കൊ​ള്ളാൻ പരാജ​യ​പ്പെട്ട ഞാൻ പൊതു ഗതാഗ​ത​മു​പ​യോ​ഗി​ക്കു​ന്ന​തി​നെ​ക്കാൾ സൗകര്യ​പ്ര​ദ​മാ​യ​തു​കൊണ്ട്‌ എന്റെ സ്വന്തം കാറിൽ യാത്ര​ചെ​യ്‌തു. ഒരു ഡിപ്പാർട്ടു​മെൻറ്‌ സ്റ്റോറിൽനി​ന്നും ഏതാനും സാധനങ്ങൾ വാങ്ങാ​നാ​യി ഞങ്ങൾ ഒരു ഹ്രസ്വ​മായ ഇടവേള എടുത്ത​പ്പോൾ ഞാൻ കാറ്‌ കെട്ടി​ട​ത്തി​ന്റെ മുമ്പി​ലാ​യി പുറത്തു പാർക്കു ചെയ്‌തു. സാധന​ങ്ങൾക്കു പണമട​യ്‌ക്കുന്ന സമയത്തു ഞാൻ കടയിലെ ചെറു​പ്പ​ക്കാ​രായ കുറെ സഹായി​കളെ ചൂണ്ടി​ക്കാ​ണി​ച്ചു​കൊ​ണ്ടു പ്രായ​ക്കൂ​ടു​ത​ലുള്ള ജോലി​ക്കാ​രി​യോട്‌ ഇപ്രകാ​രം പറഞ്ഞു: “ഭാവി​യിൽ നമു​ക്കെ​ല്ലാ​വർക്കും ചെറു​പ്പ​മാ​യി​രി​ക്കാൻ കഴിയും.” ആ മാന്യ​വ​നിത പുഞ്ചി​രി​ച്ചു. “എങ്കിലും അതു മനുഷ്യ​രായ നമ്മുടെ കൈപ്പി​ടി​യി​ലല്ല, മുകളിൽനി​ന്നുള്ള സഹായം അതിന്‌ ആവശ്യ​മാ​യി​വ​രും,” ഞാൻ തുടർന്നു.

കൂടു​ത​ലാ​യ പ്രതി​ക​ര​ണ​മൊ​ന്നു​മി​ല്ലാ​ഞ്ഞ​തി​നാൽ ഞാൻ പോന്നു. ഞാൻ മത വീക്ഷണങ്ങൾ പ്രോ​ത്സാ​ഹി​പ്പി​ക്കു​ക​യാ​ണെന്നു സംശയം തോന്നിയ ആ ജോലി​ക്കാ​രി ഞാൻ കാറി​ലേക്കു പൊതി​ക്കെട്ട്‌ വെക്കുന്ന സമയത്തു ഞാനറി​യാ​തെ ജനലി​ലൂ​ടെ എന്നെ നിരീ​ക്ഷി​ക്കു​ന്നു​ണ്ടാ​യി​രു​ന്നു. പിന്നെ അവർ പോലീ​സി​നെ വിവര​മ​റി​യി​ച്ചു. മണിക്കൂ​റു​കൾക്കു ശേഷം, പട്ടണത്തി​ന്റെ മറ്റു ഭാഗങ്ങ​ളിൽ അനൗപ​ചാ​രിക സാക്ഷീ​ക​ര​ണ​ത്തിൽ പങ്കെടു​ത്തു​ക​ഴി​ഞ്ഞു ഞാനും എന്റെ പങ്കാളി​യും കാറി​ന്റെ​യ​ടു​ത്തേക്കു മടങ്ങി. പെട്ടെന്നു രണ്ടു പോലീ​സു​കാർ പ്രത്യ​ക്ഷ​പ്പെ​ടു​ക​യും ഞങ്ങളെ കസ്റ്റഡി​യി​ലെ​ടു​ക്കു​ക​യും ചെയ്‌തു.

പോലീസ്‌ സ്റ്റേഷനിൽനി​ന്നു ഞങ്ങളെ വിടു​ന്ന​തി​നു മുമ്പ്‌ അനേകം മണിക്കൂ​റു​കൾ ഞങ്ങളെ വിസ്‌താ​രം നടത്തി. ആ ദിവസം ഞങ്ങൾക്കു ലഭിച്ച താത്‌പ​ര്യ​ക്കാ​രു​ടെ മേൽവി​ലാ​സങ്ങൾ എന്തു ചെയ്യണ​മെ​ന്ന​തി​നെ​ക്കു​റി​ച്ചാ​ണു ഞാൻ ആദ്യം​തന്നെ ചിന്തി​ച്ചത്‌. അതു​കൊണ്ട്‌ അവ ഫ്‌ളഷ്‌ ചെയ്‌തു കളയാ​നാ​യി ഞാൻ കക്കൂസിൽ കൊണ്ടു​പോ​യി ഇട്ടു. എന്നാൽ എനിക്കതു ചെയ്യാൻ കഴിയും​മുമ്പ്‌ പോലീ​സു​കാ​രന്റെ കരുത്തുറ്റ ഹസ്‌തം എന്നെ തടഞ്ഞു. അദ്ദേഹം അതു കക്കൂസിൽനിന്ന്‌ എടുത്തു വൃത്തി​യാ​ക്കി. എനിക്കു മേൽവി​ലാ​സങ്ങൾ തന്ന ആളുകൾ ഇപ്പോൾ അപകട​ത്തി​ലാ​യി​രു​ന്ന​തി​നാൽ ഇത്‌ എനിക്കു കൂടു​ത​ലായ സംഘർഷം ഉളവാക്കി.

അതിനു​ശേ​ഷം ഞങ്ങളെ​യെ​ല്ലാ​വ​രെ​യും ഞങ്ങളുടെ ഹോട്ട​ലി​ലേക്കു കൊണ്ടു​പോ​യി. പൊലീസ്‌ ഞങ്ങളുടെ മുറി​യിൽ അതി​നോ​ട​കം​തന്നെ മിന്നൽ പരി​ശോ​ധന നടത്തി​യി​രു​ന്നു. എന്നാൽ അവർ മറ്റു താത്‌പ​ര്യ​ക്കാ​രു​ടെ മേൽവി​ലാ​സ​ങ്ങ​ളൊ​ന്നും കണ്ടില്ല, അവ ശ്രദ്ധാ​പൂർവം ഒളിച്ചു​വ​ച്ചി​രു​ന്നി​ല്ലെ​ങ്കിൽപ്പോ​ലും. പിന്നീട്‌, നിയമ​വി​രുദ്ധ പ്രവർത്ത​ന​ത്തിൽ ഏർപ്പെ​ട്ട​തിന്‌, ഒരു നാഡീ​ഔ​ഷ​ധ​ശാ​സ്‌ത്ര​ജ്ഞ​നെന്ന നിലയിൽ എനിക്കു ജോലി സ്ഥലത്തു​വച്ച്‌ പൊതു​ജ​ന​സ​മക്ഷം ഔദ്യോ​ഗിക ശാസന ലഭിച്ചു. കൂടാതെ, ശുശ്രൂ​ഷ​യിൽ പങ്കെടു​ക്കാ​നാ​യി പോകു​മ്പോൾ എന്റെ കാറു​പ​യോ​ഗി​ക്ക​രു​തെന്ന്‌ എനിക്കു നേരത്തെ മുന്നറി​യി​പ്പു നൽകിയ, ചെക്കോ​സ്ലോ​വാ​ക്യ​യി​ലെ പ്രസം​ഗ​വേലാ മേൽവി​ചാ​ര​ക​നും എനിക്കു ശാസന നൽകി.

ശിക്ഷണ​ത്തി​നു കീഴ്‌പ്പെ​ടു​ന്നു

ചെക്കോ​സ്ലോ​വാ​ക്യ​യി​ലെ യഹോ​വ​യു​ടെ സാക്ഷി​ക​ളു​ടെ പ്രസം​ഗ​വേ​ല​യ്‌ക്കു മേൽനോ​ട്ടം വഹിക്കുന്ന കമ്മറ്റി​യിൽ സേവി​ക്കാൻ 1976-ൽ എനിക്കു നിയമനം ലഭിച്ചി​രു​ന്നു. എന്നാൽ നേരത്തെ പരാമർശി​ച്ച​തു​പോ​ലുള്ള കാര്യ​ങ്ങ​ളിൽ മോശ​മായ വിവേചന ഉപയോ​ഗി​ച്ചതു നിമിത്തം എന്റെ ജീവൻ രഹസ്യ പോലീ​സി​ന്റെ കർശന​മായ സൂക്ഷ്‌മ​നി​രീ​ക്ഷ​ണ​ത്തിൻകീ​ഴിൽ ആയിത്തീർന്ന​തി​നാൽ രാജ്യത്തെ കമ്മറ്റി​യി​ലും മറ്റു വ്യത്യസ്‌ത പദവി​ക​ളി​ലും സേവി​ക്കു​ന്ന​തിൽനി​ന്നു ഞാൻ ഒഴിവാ​ക്ക​പ്പെട്ടു. ഞാൻ വിശേ​ഷാൽ നിധി​പോ​ലെ കരുതിയ ഈ പദവി​ക​ളി​ലൊന്ന്‌ മുഴു​സമയ ശുശ്രൂ​ഷ​ക​രെന്നു വിളി​ക്ക​പ്പെ​ടുന്ന സഞ്ചാര മേൽവി​ചാ​ര​കൻമാർക്കും പയനി​യർമാർക്കും വേണ്ടി​യുള്ള സ്‌കൂ​ളിൽ പഠിപ്പി​ക്കു​ന്ന​താ​യി​രു​ന്നു.

ലഭിച്ച ശിക്ഷണം ഞാൻ കൈ​ക്കൊ​ണ്ടു. എന്നാൽ 1980-കളുടെ മധ്യം​മു​തൽ അവസാ​നം​വ​രെ​യുള്ള ഈ കാലഘട്ടം എന്നെ സംബന്ധി​ച്ചി​ട​ത്തോ​ളം ആത്മപരി​ശോ​ധ​ന​യു​ടെ വിഷമ​ക​ര​മായ ഒരു സമയമാ​യി​രു​ന്നു. ഞാൻ കൂടുതൽ വിവേ​ക​ത്തോ​ടെ പ്രവർത്തി​ക്കാൻ പഠിക്കു​ക​യും മേലാൽ അവി​വേ​കങ്ങൾ ഒഴിവാ​ക്കു​ക​യും ചെയ്യു​മോ? 30-ാം സങ്കീർത്തനം 5-ാം വാക്യം ഇപ്രകാ​രം പറയുന്നു: “സന്ധ്യയി​ങ്കൽ കരച്ചൽ വന്നു രാപാർക്കും; ഉഷസ്സി​ലോ ആനന്ദ​ഘോ​ഷം വരുന്നു.” എന്നെ സംബന്ധി​ച്ചി​ട​ത്തോ​ളം ആ ഉഷസ്സ്‌ വന്നത്‌ 1989 നവംബ​റിൽ ചെക്കോ​സ്ലോ​വാ​ക്യ​യി​ലെ കമ്മ്യു​ണിസ്റ്റ്‌ ഭരണകൂ​ട​ത്തി​ന്റെ പതന​ത്തോ​ടെ​യാ​യി​രു​ന്നു.

അത്ഭുതാ​വ​ഹ​മായ അനു​ഗ്ര​ഹ​ങ്ങൾ

നമ്മുടെ ശുശ്രൂ​ഷ​യിൽ സ്വത​ന്ത്ര​മാ​യി പങ്കെടു​ക്കു​ന്ന​തും ന്യൂ​യോർക്കി​ലെ ബ്രൂക്ക്‌ളി​നി​ലുള്ള യഹോ​വ​യു​ടെ സാക്ഷി​ക​ളു​ടെ ആസ്ഥാന​വു​മാ​യി തുറന്ന സംഭാ​ഷണം ആസ്വദി​ക്കു​ന്ന​തും എന്തോരു മാറ്റമാ​യി​രു​ന്നു! പെട്ടെ​ന്നു​തന്നെ എനിക്കു സഞ്ചാര മേൽവി​ചാ​ര​ക​നാ​യി നിയമനം ലഭിച്ചു. ഞാൻ ഈ വേല 1990 ജനുവ​രി​യിൽ ആരംഭി​ച്ചു.

അങ്ങനെ​യി​രി​ക്കു​മ്പോൾ എനിക്ക്‌ 1991-ൽ ഇംഗ്ലണ്ടി​ലെ മാൻചെ​സ്റ്റെ​റി​ലുള്ള ശുശ്രൂ​ഷാ പരിശീ​ലന സ്‌കൂ​ളിൽ പങ്കെടു​ക്കാ​നുള്ള പദവി ലഭിച്ചു. പക്വത​യുള്ള ക്രിസ്‌തീയ പുരു​ഷൻമാ​രു​മൊ​ത്തുള്ള സഹവാസം ആസ്വദി​ച്ചു​കൊ​ണ്ടും അവരിൽനി​ന്നുള്ള പ്രബോ​ധനം സ്വീക​രി​ച്ചു​കൊ​ണ്ടും രണ്ടു മാസം ചെലവ​ഴി​ച്ചത്‌ എന്തോരു അനു​ഗ്ര​ഹ​മാ​യി​രു​ന്നു! വിദ്യാർഥി​ക​ളായ ഞങ്ങൾക്ക്‌ ഓരോ ദിവസ​വും ഒരു നിശ്ചിത സമയം ജോലി ചെയ്യാ​നാ​യി നിയമനം ഉണ്ടായി​രു​ന്നു. ഇത്‌ വിദ്യാ​പീ​ഠ​ത്തി​ലെ ഊർജിത പഠനത്തിൽനി​ന്നും ആശ്വാസം പ്രദാനം ചെയ്‌തു. ജനാലകൾ വൃത്തി​യാ​ക്കാ​നു​ള്ള​താ​യി​രു​ന്നു എന്റെ നിയമനം.

ഞാൻ ഇംഗ്ലണ്ടിൽനി​ന്നു തിരി​ച്ചെ​ത്തിയ ഉടൻതന്നെ പ്രാഗി​ലെ വിശാ​ല​മായ സ്‌ട്രാ​ഹോഫ്‌ സ്റ്റേഡി​യ​ത്തിൽ ആഗസ്റ്റ്‌ 9 മുതൽ 11 വരെയുള്ള തീയതി​ക​ളിൽ നടന്ന യഹോ​വ​യു​ടെ സാക്ഷി​ക​ളു​ടെ അതി​പ്ര​ധാന കൂടി​വ​ര​വി​നു​വേണ്ടി കാര്യങ്ങൾ ക്രമ​പ്പെ​ടു​ത്തു​ന്ന​തിൽ സഹായി​ച്ചു തുടങ്ങി. പല രാജ്യ​ങ്ങ​ളിൽനി​ന്നുള്ള 74,587 ആളുകൾ നമ്മുടെ ദൈവ​മായ യഹോ​വയെ ആരാധി​ക്കു​ന്ന​തി​നു​വേണ്ടി ആ വേളയിൽ സ്വത​ന്ത്ര​മാ​യി കൂടി​വന്നു!

നാഡീ​ഔ​ഷ​ധ​ശാ​സ്‌ത്ര​ജ്ഞ​നാ​യുള്ള എന്റെ ലൗകിക ജോലി ഞാൻ പിറ്റേ വർഷം നിർത്തി​വച്ചു. ഏകദേശം നാലു വർഷമാ​യി ഞാൻ പ്രാഗി​ലെ ഓഫീ​സിൽ ജോലി ചെയ്യു​ക​യാണ്‌. അവിടെ ചെക്ക്‌ റിപ്പബ്ലി​ക്കി​ലെ യഹോ​വ​യു​ടെ സാക്ഷി​ക​ളു​ടെ പ്രവർത്ത​ന​ത്തി​ന്റെ മേൽനോ​ട്ടം വഹിക്കുന്ന കമ്മിറ്റി​യിൽ വീണ്ടും ഞാൻ സേവി​ക്കു​ന്നു. യഹോ​വ​യു​ടെ സാക്ഷി​കൾക്കു സംഭാവന ചെയ്യപ്പെട്ട ഒരു പുതിയ പത്തുനില കെട്ടിടം അടുത്ത​യി​ടെ പുതു​ക്കി​പ്പ​ണിത്‌ ബ്രാഞ്ച്‌ ഓഫീ​സാ​യി ഉപയോ​ഗി​ക്കു​ന്നു. 1994, മേയ്‌ 28-ന്‌ ഈ നല്ല സൗകര്യം യഹോ​വ​യു​ടെ സേവന​ത്തി​നാ​യി സമർപ്പി​ക്ക​പ്പെട്ടു.

എന്റെ അതിമ​ഹ​ത്തായ അനു​ഗ്ര​ഹ​ങ്ങ​ളിൽ എന്റെ ബന്ധുക്ക​ളുൾപ്പെടെ മറ്റുള്ള​വ​രു​മാ​യി ബൈബിൾ സത്യങ്ങൾ പങ്കുവ​യ്‌ക്കു​ന്ന​തി​ന്റെ പദവി ഉൾപ്പെ​ടു​ന്നു. എന്റെ മാതാ​വും പിതാ​വും ഇതുവരെ യഹോ​വ​യു​ടെ സാക്ഷി​ക​ളാ​യി​ത്തീർന്നി​ട്ടില്ല. എന്നാൽ അവർ ഇപ്പോൾ എന്റെ പ്രവർത്ത​ന​ത്തോട്‌ അനുഭാ​വ​മു​ള്ള​വ​രാണ്‌. കഴിഞ്ഞ ഏതാനും വർഷങ്ങ​ളിൽ അവർ ഞങ്ങളുടെ ചില യോഗ​ങ്ങ​ളിൽ പ ങ്കെടു​ത്തി​ട്ടുണ്ട്‌. ആത്മാർഥ​ഹൃ​ദ​യ​രായ മറ്റു ലക്ഷക്കണ​ക്കി​നു വ്യക്തി​ക​ളോ​ടൊ​പ്പം അവരും ദൈവ​രാ​ജ്യ ഭരണത്തി​നു താഴ്‌മ​യോ​ടെ കീഴ്‌പ്പെ​ടു​മെ​ന്നും ത ന്നെ സേവി​ക്കാൻ തീരു​മാ​നി​ക്കു​ന്ന​വർക്കു​വേണ്ടി ദൈവം കരുതി​വെ​ച്ചി​രി​ക്കുന്ന നിത്യാ​നു​ഗ്ര​ഹങ്ങൾ ആസ്വദി​ക്കു​മെ​ന്നു​മാണ്‌ എന്റെ ആത്മാർഥ​മായ പ്രത്യാശ.

(ഈ ലേഖന​ത്തിൽ പരാമർശി​ച്ചി​രി​ക്കുന്ന പ്രസി​ദ്ധീ​ക​ര​ണങ്ങൾ വാച്ച്‌ടവർ ബൈബിൾ ആൻഡ്‌ ട്രാക്‌റ്റ്‌ സൊ​സൈറ്റി പ്രസി​ദ്ധീ​ക​രി​ച്ച​താണ്‌.)

[12-ാം പേജിലെ ചിത്രം]

ഞാൻ ഒരു സർവക​ലാ​ശാ​ലാ വിദ്യാർഥി​യാ​യി​രു​ന്ന​പ്പോൾ

[13-ാം പേജിലെ ചിത്രങ്ങൾ]

ചെക്കോസ്ലോവാക്യയിലെ വിദ്യാ​ഭ്യാ​സ മന്ത്രി​യാ​യി​ത്തീർന്ന എന്റെ പിതാ​വും ഒരു പ്രമുഖ നേത്ര​ശ​സ്‌ത്ര​ക്രി​യാ​വി​ദ​ഗ്‌ധ​യാ​യി​രുന്ന എന്റെ മാതാ​വും

[15-ാം പേജിലെ ചിത്രം]

ഒരു സാക്ഷി​യാ​യി​ത്തീർന്ന, ശാസ്‌ത്ര​ജ്ഞ​നും നിരീ​ശ്വ​ര​വാ​ദി​യു​മാ​യി​രുന്ന, ഫ്രാൻറി​ഷെക്ക്‌ വിസ്‌കോ​ച്ചിൽ

[16, 17 പേജു​ക​ളി​ലെ ചിത്രം]

കമ്മ്യുണിസത്തിന്റെ പതന​ത്തെ​ത്തു​ടർന്ന്‌ യഹോ​വ​യു​ടെ സാക്ഷികൾ പൂർവ യൂറോ​പ്പിൽ പല വലിയ കൺ​വെൻ​ഷ​നു​കൾ നടത്തി​യി​ട്ടുണ്ട്‌. 1991-ൽ പ്രാഗിൽ നടന്ന ഈ കൺ​വെൻ​ഷ​നിൽ 74,000-ത്തിലധി​കം പേർ പങ്കെടു​ത്തു

[18-ാം പേജിലെ ചിത്രം]

ഇംഗ്ലണ്ടിലെ ശുശ്രൂ​ഷാ പരിശീ​ലന സ്‌കൂ​ളിൽ പങ്കെടു​ക്കവെ എന്റെ ജോലി നിയമ​ന​ത്തിൽ

[18-ാം പേജിലെ ചിത്രം]

1994 മേയ്‌ 28-ന്‌ സമർപ്പണം നടത്തിയ പ്രാഗി​ലെ ഞങ്ങളുടെ ബ്രാഞ്ച്‌ സൗകര്യ​ങ്ങൾ