ഷണ്ഡഗാ​യ​ക​ന്മാർ മതത്തിന്റെ പേരിൽ അംഗ​ച്ഛേ​ദ​നം

ഷണ്ഡഗായകന്മാർ—ഒരു പുരു​ഷന്റെ ശരീര​ത്തോ​ടും എന്നാൽ ഒരു ആൺകു​ട്ടി​യു​ടെ സ്വര​ത്തോ​ടും കൂടിയ പുരുഷ ഗായകർ ആയിരു​ന്നു അവർ. ഷണ്ഡഗാ​യ​ക​ന്മാ​രു​ടെ കാലഘട്ടം തീർച്ച​യാ​യും ശോച​നീ​യ​മാ​യി​രു​ന്നു. ആരായി​രു​ന്നു അവർ? ഉത്തരം ഒരു ഞെട്ടി​പ്പി​ക്കുന്ന ആചാര​വു​മാ​യി ബന്ധപ്പെ​ട്ടി​രി​ക്കു​ന്നു—മതത്തിന്റെ പേരി​ലുള്ള അംഗ​ച്ഛേ​ദനം.

ഷണ്ഡന്മാർ അങ്ങനെ തന്നെ ജനി​ച്ചേ​ക്കാ​മെ​ങ്കി​ലും മിക്കവ​രും മനുഷ്യ​രാൽ അങ്ങനെ ആക്കപ്പെ​ടു​ന്ന​വ​രാണ്‌. ശരീര​ത്തി​ന്റെ ആകാര​ത്തി​ലും ആകൃതി​യി​ലും അവർ പുരു​ഷ​ന്മാർ ആണ്‌, എന്നാൽ അവർക്കു സന്താ​നോ​ത്‌പാ​ദനം നടത്തു​വാൻ കഴിയു​ക​യില്ല. തിര​ഞ്ഞെ​ടു​പ്പി​നാ​ലോ അല്ലെങ്കിൽ ബലപ്ര​യോ​ഗ​ത്താ​ലോ ശാരീ​രി​ക​വി​കാ​സ​ത്തി​ന്റെ ഏതോ ഘട്ടത്തിൽ അല്ലെങ്കിൽ ജീവി​ത​ത്തിൽ പിന്നീ​ടു​പോ​ലു​മോ അവർ ഷണ്ഡന്മാർ ആക്കപ്പെ​ട്ടി​രി​ക്കു​ന്നു.

എന്തു​കൊ​ണ്ടാ​ണു പുരു​ഷ​ന്മാർ ഈ സമ്പ്രദാ​യ​ത്തിൽ തങ്ങളെ​ത്ത​ന്നെ​യോ അല്ലെങ്കിൽ മററു പുരു​ഷ​ന്മാ​രെ​യോ അംഗ​ച്ഛേ​ദ​നം​ചെ​യ്യാൻ തീരു​മാ​നി​ക്കു​ന്നത്‌? മിക്ക​പ്പോ​ഴും മതത്തിന്റെ പേരി​ലാണ്‌ അവർ അങ്ങനെ ചെയ്‌തി​ട്ടു​ള്ളത്‌.

ഷണ്ഡന്മാർ പുരാതന ചരി​ത്ര​ത്തിൽ

ആയിര​ക്ക​ണ​ക്കി​നു വർഷങ്ങൾക്കു മുമ്പ്‌ അസീറി​യ​ക്കാർ അംഗ​ച്ഛേ​ദ​നത്തെ ഒരു ശിക്ഷാ​രീ​തി​യാ​യി ഉപയോ​ഗി​ച്ചി​രു​ന്നു. ഈജി​പ്‌തിൽ വ്യഭി​ചാ​ര​ത്തി​നുള്ള ശിക്ഷ ഇതായി​രു​ന്നു. ഇപ്പോൾ നെതർലൻസി​ന്റെ ഭാഗമായ പുരാതന ഫ്രിസ്‌ലാ​ഡിൽ ഒരു ക്ഷേത്ര​ത്തിൽനി​ന്നു മോഷ്ടി​ക്കുന്ന തസ്‌ക്ക​രനു വധശിക്ഷ നൽകു​ന്ന​തി​നു മുമ്പ്‌ അയാളെ ഷണ്ഡനാ​ക്കി​യി​രു​ന്നു.

പൊതു​യു​ഗം ഒന്നാം നൂറ്റാ​ണ്ടിൽ ചക്രവർത്തി​മാ​രാ​യി​രുന്ന ഡൊമീ​ഷ്യ​ന്റെ​യും നെർവാ​യു​ടെ​യും ഭരണകാ​ലത്തു ഷണ്ഡനാക്കൽ റോമിൽ നിരോ​ധി​ച്ചി​രു​ന്നു. എന്നാൽ സാമ്രാ​ജ്യ​ത്തി​ന്റെ അവസാന വർഷങ്ങ​ളിൽ അതു വീണ്ടും പുനഃ​സ്ഥാ​പി​ക്ക​പ്പെട്ടു. ഇംഗ്ലണ്ടി​ലെ മഹാനായ ആൽഫ്രട്ട്‌ രാജാവ്‌ ഒമ്പതാം നൂറ്റാ​ണ്ടിൽ നടപ്പി​ലാ​ക്കിയ നിയമം ഒരു പരിചാ​രി​കയെ ബലാൽസം​ഗം ചെയ്യുന്ന പരിചാ​ര​കനെ ഇപ്രകാ​രം ശിക്ഷി​ക്കാൻ അനുശാ​സി​ച്ചി​രു​ന്നു.

മത കർമങ്ങ​ളി​ലും ഷണ്ഡന്മാർക്കു സവി​ശേ​ഷ​സ്ഥാ​നം ലഭിച്ചി​രു​ന്നു. എഫേസൂസ്‌ നഗരത്തി​ലെ അർത്തേ​മീസ്‌ ദേവിയെ ഷണ്ഡന്മാ​രും കന്യക​മാ​രും സേവി​ച്ചി​രു​ന്നു. ഹിരാ​പൊ​ലി​സി​ലെ സിറിയൻ അസ്റ്റററ്റ്‌ ദേവിയെ ആദരി​ക്കുന്ന ഉന്മത്ത ആഘോ​ഷ​ങ്ങ​ളിൽ പുരു​ഷ​ന്മാർ തങ്ങളെ​ത്തന്നെ ഷണ്ഡന്മാ​രാ​ക്കി. പിന്നീ​ടുള്ള ജീവി​ത​കാ​ലം മുഴുവൻ അവർ സ്‌ത്രീ​ക​ളു​ടെ വസ്‌ത്രം ധരിച്ചി​രു​ന്നു.

“തന്നേത്ത​ന്നെ​യോ മറ്റൊ​രു​വ​നെ​യോ ഷണ്ഡനാ​ക്കു​ന്നവൻ എന്റെ അനുഗാ​മി​ക​ളിൽ ഉൾപ്പെ​ടു​ക​യില്ല” എന്നു മുഹമ്മദ്‌ പ്രഖ്യാ​പി​ച്ചു. എന്നിരു​ന്നാ​ലും ഈ വിലക്കു കൂട്ടാ​ക്കാ​തെ മുസ്ലീം രാജ്യ​ങ്ങ​ളിൽ അന്തഃപു​ര​ങ്ങ​ളു​ടെ​യും പുണ്യ​സ്ഥ​ല​ങ്ങ​ളു​ടെ​യും പരിര​ക്ഷ​ക​രായ അടിമകൾ എന്നനി​ല​യിൽ ഷണ്ഡന്മാർക്കു വില നിശ്ചയി​ക്ക​പ്പെ​ട്ടി​രു​ന്നു. തത്‌ഫ​ല​മാ​യി ഈ അടിമ വ്യാപാ​രം നിലനി​ന്നു​പോ​ന്നു. സുഡാ​നിൽനി​ന്നും സമീപസ്ഥ ഉത്തര ആഫ്രിക്കൻ രാജ്യ​ങ്ങ​ളിൽനി​ന്നും കൊണ്ടു​വന്ന ചെറു​പ്പ​ക്കാർ അടിമ വ്യാപാ​രി​കൾക്കു ഭീമമായ ലാഭം നേടി​ക്കൊ​ടു​ത്തു.

19-ാം നൂറ്റാ​ണ്ടി​ന്റെ ആരംഭ​ത്തിൽ ദക്ഷിണ ഈജി​പ്‌ത്‌ സന്ദർശിച്ച യോഹാൻ  എൽ. ബുർകൊർട്ട്‌ ഷണ്ഡന്മാ​രാ​ക്ക​പ്പെട്ട ആൺകു​ട്ടി​കളെ അടിമകൾ എന്നനി​ല​യിൽ വിൽക്കാൻവേണ്ടി ഒരുക്കി​നിർത്തി​യി​രി​ക്കു​ന്നതു കണ്ടു. 8 വയസ്സി​നും 12 വയസ്സി​നും ഇടയി​ലുള്ള ആൺകു​ട്ടി​ക​ളി​ലാ​ണു ശസ്‌ത്ര​ക്രി​യ​ന​ട​ത്ത​പ്പെ​ട്ടത്‌. കോപ്‌റ്റിക്ക്‌ സഭയിലെ രണ്ടു പുരോ​ഹി​ത​ന്മാ​രാ​യി​രു​ന്നു ശസ്‌ത്ര​ക്രി​യ​ന​ട​ത്തി​യത്‌. “അവരുടെ തൊഴിൽ നിന്ദി​ത​മാ​യി​രു​ന്നു” എന്നു ബുർകൊർട്ട്‌ അഭി​പ്രാ​യ​പ്പെട്ടു.

ഈ സംഭവം ഒരു ചോദ്യം ഉന്നയി​ക്കു​ന്നു, ഏതു കാരണ​ങ്ങ​ളാൽ, എത്ര​ത്തോ​ളം ക്രൈ​സ്‌ത​വ​മ​ണ്ഡലം ഈ നടപടി​യിൽ ഉൾപ്പെ​ട്ടി​രി​ക്കു​ന്നു?

ഷണ്ഡന്മാർ ക്രൈ​സ്‌ത​വ​മ​ണ്ഡ​ല​ത്തിൽ

എബ്രായ തിരു​വെ​ഴു​ത്തു​കളെ ആറു പംക്തി​ക​ളി​ലാ​യി ക്രമീ​ക​രി​ച്ചു​കൊ​ണ്ടുള്ള ഹെക്‌സാ​പ്ലാ ഭാഷാ​ന്ത​ര​ത്തി​നു പ്രശസ്‌തി​യാർജിച്ച ഒറിജിൻ ജനിച്ചതു പൊ.യു. (പൊതു​യു​ഗം) ഏതാണ്ട്‌ 185-ൽ ആയിരു​ന്നു. 18-ാം വയസ്സിൽതന്നെ ക്രിസ്‌ത്യാ​നി​ത്വ​ത്തെ സംബന്ധി​ച്ചുള്ള തന്റെ പ്രഭാ​ഷ​ണ​ങ്ങൾക്ക്‌ അദ്ദേഹം പ്രശസ്‌ത​നാ​യി​രു​ന്നു. എന്നാൽ സ്‌ത്രീ​കൾക്കി​ട​യി​ലുള്ള തന്റെ ബഹുജ​ന​സ​മ്മതി തെറ്റി​ദ്ധ​രി​ക്ക​പ്പെ​ടാ​തി​രി​ക്കു​ന്നതു സംബന്ധിച്ച്‌ അദ്ദേഹം താത്‌പ​ര്യം ഉള്ളവനാ​യി​രു​ന്നു. അതു​കൊണ്ട്‌, “സ്വർഗ്ഗ​രാ​ജ്യം നിമിത്തം തങ്ങളെ​ത്തന്നേ ഷണ്ഡന്മാ​രാ​ക്കിയ ഷണ്ഡന്മാ​രും ഉണ്ട്‌” എന്ന യേശു​വി​ന്റെ വാക്കു​കളെ അക്ഷരീ​യ​മാ​യി എടുത്ത്‌ അദ്ദേഹം തന്നെത്തന്നെ ഷണ്ഡനാക്കി. (മത്തായി 19:12)a അത്‌ അപക്വ​മായ, നൈമ​ഷീ​ക​ചി​ന്ത​യി​ലൂ​ന്നിയ ഒരു നടപടി ആയിരു​ന്നു. പിൽക്കാല വർഷങ്ങ​ളിൽ അതി​നെ​പ്രതി അദ്ദേഹം ആഴമായി മനസ്‌ത​പി​ച്ചു,

രസാവ​ഹ​മാ​യി, പൊതു​യു​ഗം 325-ലെ നിഖ്യാ കൗൺസി​ലി​ന്റെ ഏറ്റവും ആദ്യത്തെ പ്രമാണം തന്നെ തങ്ങളെ​ത്തന്നെ ഷണ്ഡന്മാ​രാ​ക്കു​ന്ന​വരെ സ്‌പഷ്ട​മാ​യും പൗരോ​ഹി​ത്യ​ത്തിൽനി​ന്നും ഒഴിവാ​ക്കി. ഈ പ്രമേ​യത്തെ കുറിച്ച്‌ ഡോക്ടർ ജെ. ഡബ്ലിയൂ. സി. വോൺഡ്‌ ഇപ്രകാ​രം പറയുന്നു: “ഈ സംഗതി​യിൽ ചിലർ ഒറിജി​ന്റെ ദൃഷ്ടാന്തം പിൻപ​റ്റാ​നും തങ്ങളെ​ത്തന്നെ ഷണ്ഡന്മാ​രാ​ക്കാ​നും താത്‌പ​ര്യം കാണി​ച്ചി​രി​ക്കു​ന്നതു സംഭവ്യ​മാണ്‌ . . . ചില പുറജാ​തീയ മതഭക്ത​രു​ടേ​തു​മാ​യി വളരെ​യേറെ സ്വഭാ​വ​സാ​മ്യം ഉള്ള ഈ ആചാരം പിന്തു​ട​രാൻ ക്രിസ്‌ത്യാ​നി​കൾ പ്രോ​ത്സാ​ഹി​പ്പി​ക്ക​പ്പെ​ടാ​തി​രി​ക്കേ​ണ്ടത്‌ അത്യാ​വ​ശ്യം ആണ്‌.”

അത്തരത്തി​ലു​ള്ള ഒരു പ്രധാന തീരു​മാ​നം എടുത്ത​തി​ലൂ​ടെ ക്രൈ​സ്‌ത​വ​മ​ണ്ഡ​ല​ത്തി​ലെ മതനേ​താ​ക്ക​ന്മാർ ഷണ്ഡനാക്കൽ എന്ന വെറു​ക്ക​പ്പെട്ട വിവാ​ദ​വി​ഷയം എല്ലാക്കാ​ല​ത്തേ​ക്കു​മാ​യി ഇല്ലാതാ​ക്കാൻ ശ്രമിച്ചു. നാം കാണാൻ പോകു​ന്ന​തു​പോ​ലെ അതു മറ്റൊരു വിധത്തിൽ തിരിഞ്ഞു. ആദ്യമാ​യി പിൻവ​രുന്ന പ്രസി​ദ്ധ​മായ വൃത്താന്തം പരിഗ​ണി​ക്കുക.

1118-ാം ആണ്ടിൽ തത്ത്വചി​ന്ത​ക​നും ദൈവ​ശാ​സ്‌ത്ര വിദ്യാർഥി​യു​മായ പീറ്റർ അബ്‌ലാഡ്‌ താൻ രഹസ്യ​മാ​യി പഠിപ്പി​ച്ചു​കൊ​ണ്ടി​രുന്ന ഹിലോ​യിസ്‌ എന്ന യുവതി​യിൽ അനുര​ക്ത​നാ​യി. അബ്‌ലാഡ്‌ പട്ടം സ്വീക​രി​ച്ചി​ട്ടി​ല്ലാ​തി​രു​ന്ന​തി​നാൽ ബ്രഹ്മച​ര്യ​ത്തി​ന്റെ പ്രതി​ജ്ഞ​യിൻ കീഴി​ലാ​യി​രു​ന്നില്ല. അതു​കൊണ്ട്‌ അവർ രഹസ്യ​മാ​യി വിവാ​ഹി​ത​രാ​കു​ക​യും അവർക്ക്‌ ഒരു ആൺകുട്ടി ജനിക്കു​ക​യും ചെയ്‌തു. പാരീ​സി​ലെ റോമൻ കത്തോ​ലി​ക്കാ ദേവാ​ല​യ​ത്തി​ലെ ഒരു കാനോ​നാ​യി​രുന്ന, ഹിലോ​യി​സി​ന്റെ അങ്കിൾ അവൾ വഞ്ചിക്ക​പ്പെട്ടു എന്നു ചിന്തി​ക്കു​ക​യും അബ്‌ലാ​ഡി​നെ ബലമായി ഷണ്ഡനാ​ക്കു​ക​യും ചെയ്‌തു. സഭയുടെ ഉന്നത സ്ഥാനത്തുള്ള ഒരു ഉദ്യോ​ഗ​സ്ഥ​നിൽനിന്ന്‌ ഉത്ഭൂത​മായ ഈ കിരാത നടപടി അതിൽ ഉൾപ്പെട്ട രണ്ടു കുറ്റവാ​ളി​കൾക്ക്‌ അതേ ശിക്ഷ നൽകി​കൊ​ണ്ടു പ്രതി​കാ​രം ചെയ്യു​ന്ന​തി​ലേക്കു നയിച്ചു.

അങ്ങനെ ഷണ്ഡനാക്കൽ അപ്പോ​ഴും ചില പ്രത്യേക സാഹച​ര്യ​ങ്ങ​ളിൽ അംഗീ​കാ​ര​യോ​ഗ്യ​മായ ഒരു ശിക്ഷാ​മാർഗം ആയിരു​ന്നു. എന്നാൽ ഈ ഭക്തികെട്ട ആചാരം പെട്ടെ​ന്നു​തന്നെ റോമൻ കത്തോ​ലി​ക്കാ സഭയിൽ ദേവാലയ ഗാനങ്ങ​ളെ​പ്രതി പ്രോ​ത്സാ​ഹി​പ്പി​ക്ക​പ്പെ​ടാൻ പോവു​ക​യാ​യി​രു​ന്നു.

ദേവാലയ ഗായക​സം​ഘ​ങ്ങൾ

പൗരസ്‌ത്യ ഓർത്ത​ഡോ​ക്‌സ്‌ സഭയു​ടെ​യും റോമൻ കത്തോ​ലി​ക്കാ സഭയു​ടെ​യും പ്രാർഥനാ ക്രമത്തിൽ ഗാനാ​ലാ​പനം ഒരു പ്രധാ​ന​പങ്കു വഹിച്ചി​രു​ന്നു. ഒരു ദേവാലയ ഗായക​സം​ഘ​ത്തി​ലെ മുഖ്യ​ക​ഥാ​പാ​ത്ര​ങ്ങ​ളാണ്‌ ഉച്ചസ്വരം ആലപി​ക്കുന്ന ആൺകു​ട്ടി​കൾ. എന്നാൽ ഒരു ആൺകു​ട്ടി​യു​ടെ സ്വരത്തി​നു കൗമാ​ര​ത്തി​ന്റെ ആരംഭ​ത്തിൽ വ്യതി​യാ​നം സംഭവി​ക്കു​ന്നു. ഗായക​ന്മാ​രി​ലെ ഈ തുടർച്ച​യായ മാറ്റ​ത്തെ​യും ആവശ്യ​മാ​യി​വന്ന പരിശീ​ല​ന​ത്തെ​യും സഭയ്‌ക്ക്‌ എങ്ങനെ തരണം ചെയ്യാൻക​ഴി​ഞ്ഞു? ഫാൾസെ​റ്റോ എന്നറി​യ​പ്പെ​ടുന്ന ഏതാണ്ട്‌ വിരസ​മായ ഉച്ചസ്ഥാ​യി​യി​ലുള്ള സ്വരം മിക്ക​പ്പോ​ഴും ഉപയോ​ഗ​പ്പെ​ടു​ത്തി​യി​രു​ന്നു​വെ​ന്നതു ശരിതന്നെ. എന്നാൽ അത്‌ ഒരാൺകു​ട്ടി​യു​ടെ ഉച്ചസ്വ​രാ​ലാ​പ​ന​ത്തി​നു പകരമാ​യി കരുതി​യില്ല.b

ഉച്ചസ്വരം ആലപി​ക്കുന്ന സ്‌ത്രീ​ക​ളാ​യി​രു​ന്നു സ്‌പഷ്ട​മായ ഇതരമാർഗം. എന്നാൽ സ്‌ത്രീ​കൾ പള്ളിയിൽ പാടു​ന്നത്‌ ആദിമ​കാ​ലം​മു​തൽതന്നെ പാപ്പാ വിലക്കി​യി​രു​ന്നു. ദേവാലയ ഗായകർ പുരോ​ഹി​തനെ സഹായി​ക്കു​വാൻ ക്ഷണിക്ക​പ്പെ​ടാ​മാ​യി​രു​ന്നു. ഈ കർത്തവ്യം പുരു​ഷ​ന്മാർക്കാ​യി മാത്രം വേർതി​രി​ച്ചി​രു​ന്നു എന്നതാ​യി​രു​ന്നു മറ്റൊരു പ്രശ്‌നം. അതു​കൊ​ണ്ടു ദേവാലയ ഗായക​സം​ഘ​ങ്ങളെ വികസി​പ്പി​ക്കു​ന്ന​തി​നു സ്‌ത്രീ​കളെ ഉപയോ​ഗി​ക്കു​വാൻ കഴിയു​മാ​യി​രു​ന്നില്ല.

സിക്‌സ്റ്റസ്‌ അഞ്ചാമൻ പാപ്പാ 1588-ൽ ഏതൊരു പൊതു തീയേ​റ്റ​റി​ലോ സംഗീത നാടക​ശാ​ല​യി​ലോ സ്‌ത്രീ​കൾ ഗാനം ആലപി​ക്കു​ന്നതു നിരോ​ധി​ച്ചു. 100 വർഷങ്ങൾക്കു ശേഷം ഇന്നസെൻറ്‌ പതി​നൊ​ന്നാ​മൻ പാപ്പാ ഈ നിരോ​ധനം ആവർത്തി​ച്ചു പ്രഖ്യാ​പി​ച്ചു. “നാടക​ശാ​ലാ പ്രകട​ന​ങ്ങ​ളിൽ പങ്കെടു​ക്കുന്ന സ്‌ത്രീ​കളെ അംഗീ​ക​രി​ക്കാ​തി​രി​ക്കു​ന്ന​തും അവരുടെ പേരിനെ വേശ്യാ​വൃ​ത്തി​യും കാമാ​സ​ക്തി​യും ആയി ബന്ധപ്പെ​ടു​ത്തു​ന്ന​തും അഗസ്‌ത്യാ​നോ​സിസ്‌ പുണ്യ​വാ​ളന്റെ കാല​ത്തോ​ള​വു​മോ അതിലും കൂടു​ത​ലോ പോലും പിന്നോ​ട്ടു പോകുന്ന ഒരു പാരമ്പ​ര്യ​മാ​ണെ”ന്നു അംഗസ്‌ ഹെറി​യോട്ട്‌ പ്രസ്‌താ​വി​ക്കു​ന്നു. എന്നാൽ ഈ അയവി​ല്ലാത്ത നിലപാ​ടു സ്വീക​രി​ക്കു​ക​വഴി സഭ ഷണ്ഡഗാ​യ​ക​ന്മാർ എന്ന കൂടുതൽ ഗുരു​ത​ര​മായ പ്രശ്‌ന​ത്തി​ലേ​ക്കുള്ള വഴി തുറന്നു!

ആരായി​രു​ന്നു ഷണ്ഡഗാ​യ​ക​ന്മാർ? ക്രൈ​സ്‌ത​വ​ലോ​കം അവരു​മാ​യി ബന്ധപ്പെ​ട്ടത്‌ എങ്ങനെ​യാണ്‌?

സംഗീ​ത​ത്തി​നു​വേണ്ടി അംഗ​ച്ഛേ​ദ​നം

സംഗീ​ത​നാ​ട​ക​ത്തി​നും പൊതു തീയേ​റ്റ​റു​കൾക്കും ഉച്ചസ്വ​രാ​ലാ​പ​കരെ ആവശ്യ​മാ​യി​രു​ന്നു, പാപ്പാ​യു​ടെ ഗായക​സം​ഘ​ത്തി​നും അത്‌ ആവശ്യ​മാ​യി​രു​ന്നു. എന്നാൽ അതിനാ​യി എന്തു​ചെ​യ്യു​വാൻ കഴിയു​മാ​യി​രു​ന്നു? ഒരു ആൺകുട്ടി ഷണ്ഡനാ​ക്ക​പ്പെ​ടു​ന്നു​വെ​ങ്കിൽ അവന്റെ സ്വരത്തി​നു വ്യതി​യാ​നം സംഭവി​ക്കു​ക​യി​ല്ലെന്നു ദീർഘ​നാ​ളാ​യി അറിയ​പ്പെ​ട്ടി​രു​ന്നു. സ്വനത​ന്തു​ക്കൾ അല്‌പം മാത്രമെ വളരു​ക​യു​ള്ളു, അതേസ​മയം മാറി​ട​വും ഡയഫ്ര​വും ക്രമാ​നു​സ​രണം വളരും. തത്‌ഫ​ല​മാ​യി ഒരു ഷണ്ഡഗാ​യ​കനു പുരുഷ ശരീര​ത്തി​ന്റെ ശക്തിയും ആൺകു​ട്ടി​യു​ടെ സ്വരവും ഉണ്ടായി​രി​ക്കും. അതു “മാലാ​ഖാ​മാർക്ക്‌ ഉള്ളതായി സങ്കല്‌പി​ക്ക​പ്പെ​ട്ടി​രുന്ന സ്വരം” ആയിരു​ന്നു​വെന്നു വത്തിക്കാ​ന്റെ രഹസ്യ ചരിത്ര രേഖകൾ (ഇംഗ്ലീഷ്‌) എന്ന പുസ്‌ത​ക​ത്തിൽ മരിയാ ലുസിയാ അം​ബ്രോ​സി​നി അഭി​പ്രാ​യ​പ്പെ​ടു​ന്നു. ഒരു കുട്ടി ഷണ്ഡനാ​ക്ക​പ്പെ​ടുന്ന പ്രായം വ്യത്യാ​സ​പ്പെ​ടു​ത്തു​ന്ന​തി​ലൂ​ടെ സ്വരത്തി​ന്റെ തരം ഒരു പരിധി​വരെ നിയ​ന്ത്രി​ക്കു​വാ​നും സാധി​ക്കും.

12-ാം നൂറ്റാണ്ടു മുതൽ ഗ്രീക്കു സഭ ഷണ്ഡന്മാരെ ഗായക​രാ​യി നിയമി​ച്ചി​രു​ന്നു. എന്നാൽ റോമൻ കത്തോ​ലി​ക്കാ സഭ എന്തു​ചെ​യ്യും? ഇപ്പോൾ അവരും അതിനു സമ്മതം നൽകു​ക​യും ഷണ്ഡഗാ​യ​ക​ന്മാ​രെ നിയമി​ക്കു​ക​യും ചെയ്യു​മോ?

വത്തിക്കാ​ന്റെ രേഖക​ളിൽ 1562-ൽ പാപ്പാ​യു​ടെ ഗായക​സം​ഘ​ത്തി​ലെ ഒരു പാട്ടു​കാ​ര​നാ​യി​രുന്ന പോഡ്‌റേ സോ​റ്റോ​യെ ഒരു ഫാൾസെ​റ്റോ​യാ​യി പട്ടിക​പ്പെ​ടു​ത്തി​യി​രി​ക്കു​ന്നു. എന്നാൽ സോറ്റോ ഒരു ഷണ്ഡഗാ​യ​ക​നാ​യി​രു​ന്നു. അങ്ങനെ നാലു ഷണ്ഡഗാ​യ​ക​ന്മാ​രെ ഉൾപ്പെ​ടു​ത്താൻ വേണ്ടി സെൻറ്‌ പീറ്റേ​ഴ്‌സ്‌ ബസ്ലിക്കാ​യി​ലെ ഗായകരെ സിക്‌സ്റ്റസ്‌ അഞ്ചാമൻ പാപ്പാ​യു​ടെ ആജ്ഞാപ​ത്രം പുനഃ​സം​ഘ​ടി​പ്പിച്ച 1589-നു കുറഞ്ഞതു 27 വർഷം മുമ്പു​തന്നെ നിഖ്യാ​കൗൺസി​ലി​ന്റെ ആധികാ​രി​ക​തയെ വത്തിക്കാൻ നിശബ്ദ​മാ​യി റദ്ദാക്കി​യി​രു​ന്നു.

വത്തിക്കാ​നി​ലെ ഷണ്ഡഗാ​യ​ക​ന്മാ​രു​ടെ അസ്‌തി​ത്വം 1599-മുതൽ അംഗീ​ക​രി​ക്ക​പ്പെട്ടു. ഒരിക്കൽ സഭയിലെ അത്യുന്നത അധികാ​രി പ്രസ്‌തുത ആചാരത്തെ പരസ്യ​മാ​യി അംഗീ​ക​രി​ച്ച​പ്പോൾ ഷണ്ഡഗാ​യ​ക​ന്മാർ സ്വീകാ​ര്യ​യോ​ഗ്യ​രാ​യി. ഗ്ലുക്ക്‌, ഹാൻഡൽ, മെയിർബീർ, റോസി​നി എന്നിവർ ഷണ്ഡഗാ​യ​ക​ന്മാ​ക്കു വേണ്ടി വിശു​ദ്ധ​വും മതേത​ര​വു​മായ സംഗീതം രചിച്ച​വ​രിൽ പെടുന്നു.

ജനസമ്മ​തി​യും മാതാ​പി​താ​ക്ക​ളും പൊതു​ജ​നാ​ഭി​പ്രാ​യ​വും

ഷണ്ഡഗാ​യ​ക​ന്മാർ വേഗത്തിൽ ജനസമ്മതി ആർജിച്ചു. ഉദാഹ​ര​ണ​മാ​യി, അവരുടെ സ്വരത്തി​ന്റെ വഴക്കവും മാധു​ര്യ​വും ക്‌ളമൻറ്‌ എട്ടാമൻ പാപ്പാ​യിൽ (1592-1605) അതിയായ മതിപ്പു​ള​വാ​ക്കി. ഷണ്ഡനാക്കൽ നടപടി​യോ​ടു ബന്ധമു​ള്ള​താ​യി അറിയ​പ്പെ​ട്ടി​രുന്ന ഏതൊ​രു​വ​നും സഭയിൽനിന്ന്‌ പുറത്താ​ക്ക​പ്പെ​ടാൻ പ്രതീ​ക്ഷി​ക്ക​പ്പെ​ട്ടി​രു​ന്നു​വെ​ങ്കി​ലും സഭയുടെ നിലവി​ലി​രുന്ന സംഗീത ആവശ്യ​ങ്ങൾക്ക​നു​സ​രിച്ച്‌ ആൺകു​ട്ടി​ക​ളു​ടെ ഒരു സ്ഥിരമായ ഒഴുക്കു​ത​ന്നെ​യു​ണ്ടാ​യി​രു​ന്നു.

“ക്വി സി കാസ്‌​ട്രോ​നോ റാഗസി (ആൺകു​ട്ടി​കളെ ഇവിടെ ഷണ്ഡന്മാ​രാ​ക്കു​ന്ന​താണ്‌) എന്നു കടകൾ പരസ്യ​പ്പെ​ടു​ത്തി​യി​രു​ന്ന​താ​യി പറയ​പ്പെ​ട്ടി​രി​ക്കു​ന്നു. “പാപ്പാ​യു​ടെ ദേവാലയ ഗായക​സം​ഘ​ത്തി​നു​വേണ്ടി ഗായകർ ഇവിടെ ഷണ്ഡന്മാ​രാ​ക്ക​പ്പെ​ടു​ന്നു”വെന്ന്‌ റോമി​ലെ ഒരു ബാർബർ ഷോപ്പ്‌ അഭിമാ​ന​പൂർവം ഉദ്‌ഘോ​ഷി​ച്ചു. 18-ാം നൂററാ​ണ്ടിൽ ഇറ്റലി​ക്കാ​രായ ഏകദേശം 4,000 ആൺകു​ട്ടി​കൾ ഈ ഉദ്ദേശ്യ​ത്തിൽ ഷണ്ഡന്മാർ ആക്കപ്പെ​ട്ടി​രി​ക്കാ​മെന്നു പറയ​പ്പെ​ടു​ന്നു. ഈ പ്രക്രി​യ​യിൽ എത്രപേർ മരണമ​ട​ഞ്ഞു​വെന്ന്‌ അറിയില്ല.

തങ്ങളുടെ പുത്ര​ന്മാ​രെ ഇപ്രകാ​രം അംഗ​ച്ഛേ​ദനം ചെയ്യാൻ മാതാ​പി​താ​ക്കൾ അനുവ​ദി​ച്ചത്‌ എന്തു​കൊ​ണ്ടാണ്‌? പൊതു​വേ, ഷണ്ഡഗാ​യ​ക​ന്മാർ ദരിദ്ര മാതാ​പി​താ​ക്കൾക്കു ജനിച്ച​വ​രാണ്‌. ഒരു ആൺകുട്ടി അല്‌പ​മെ​ങ്കി​ലും സംഗീ​ത​വാ​സന കാണി​ച്ചാൽ, ഒരുപക്ഷേ അവനെ നേരെ ഒരു സംഗീത സ്ഥാപന​ത്തി​നു വിൽക്കു​മാ​യി​രു​ന്നു. മറ്റുള്ളവർ റോമി​ലുള്ള സെൻറ്‌ പീറ്റേ​ഴ്‌സ്‌ ബസ്ലിക്കാ​യി​ലെ ഗായക​സം​ഘ​ങ്ങ​ളിൽനി​ന്നും സമാന​മായ ദേവാലയ അക്കാഡ​മി​ക​ളിൽനി​ന്നും കൊണ്ടു​വ​ര​പ്പെ​ട്ടവർ ആയിരു​ന്നു. തങ്ങളുടെ ഷണ്ഡഗാ​യകൻ പ്രസി​ദ്ധ​നാ​യി​ത്തീ​രു​മെ​ന്നും തങ്ങൾക്ക്‌ വാർധ​ക്യ​കാ​ലത്തു ജീവി​ത​മാർഗം പ്രദാനം ചെയ്യു​മെ​ന്നും മാതാ​പി​താ​ക്കൾ സ്വാഭാ​വി​ക​മാ​യും പ്രതീ​ക്ഷി​ച്ചി​രു​ന്നു.

എന്നിരു​ന്നാ​ലും, മിക്ക​പ്പോ​ഴും പരിശീ​ല​നം​നൽകു​ന്ന​തിന്‌ അനു​യോ​ജ്യ​മായ സ്വരം ഒരു കുട്ടിക്ക്‌ ഇല്ലെന്നു വ്യക്തമാ​കു​മ്പോൾ അതൊരു ദുരന്ത​മാ​യി​രു​ന്നു. അത്തരം സമുദാ​യ​ഭ്രഷ്ടർ അധികം​വ​രുന്ന ഷണ്ഡഗാ​യ​ക​ന്മാ​രോ​ടൊ​പ്പം “പുരോ​ഹി​ത​ന്മാ​രാ​കുന്ന”തിനും കുറു​ബാന ചൊല്ലു​ന്ന​തി​നും അനുവ​ദി​ക്ക​പ്പെ​ട്ടി​രു​ന്നു എന്നു 18-ാം നൂറ്റാ​ണ്ടി​ന്റെ ഒടുവിൽ, ഇറ്റലി​യു​ടെ ഒരു ചിത്രം (ഇംഗ്ലീഷ്‌) എന്ന പുസ്‌ത​ക​ത്തിൽ ജൊഹാൻ വിൽഹെം വോൺ ആർക്ക​നോൾറ്റ്‌സ്‌ വിശദീ​ക​രി​ക്കു​ന്നു. അതേതു​ടർന്നു സഭാ നിയമത്തെ ലംഘി​ച്ചു​കൊണ്ട്‌ 1599-ൽ രണ്ടു ഷണ്ഡഗാ​യ​ക​ന്മാർ റോമൻ കത്തോ​ലി​ക്കാ പുരോ​ഹി​ത​ന്മാ​രാ​യി സ്വീക​രി​ക്ക​പ്പെ​ട്ട​പ്പോൾ, അതു സെൻറ്‌ പീറ്റേ​ഴ്‌സിൽ തന്നെ അസാധാ​ര​ണ​മായ ഒരു കീഴ്‌വ​ഴക്കം സൃഷ്ടിച്ചു. പിന്നീടു കൂടുതൽ പേർ അപ്രകാ​രം നിയമി​ക്ക​പ്പെട്ടു.

ബെനഡി​ക്‌റ്റ്‌ പതിനാ​ലാ​മൻ പാപ്പാ നിഖ്യാ കൗൺസി​ലി​ന്റെ തീരു​മാ​നം സ്വയം പരി​ശോ​ധി​ക്കു​ക​യും ഷണ്ഡനാക്കൽ നിയമ​വി​രു​ദ്ധം ആയിരു​ന്നു​വെന്നു സമ്മതി​ക്കു​ക​യും ചെയ്‌തു. എന്നാൽ ഷണ്ഡഗാ​യ​ക​ന്മാ​രെ നിരോ​ധി​ക്കു​വാ​നുള്ള സ്വന്തം ബിഷപ്പു​മാ​രു​ടെ നിർദേ​ശത്തെ 1748-ൽ അദ്ദേഹം ദൃഢമാ​യി നിരസി​ച്ചു. എന്തെന്നാൽ അപ്രകാ​രം ചെയ്‌താൽ പള്ളികൾ ശൂന്യ​മാ​കു​മെന്ന്‌ അദ്ദേഹം ഭയപ്പെട്ടു. ദേവാലയ സംഗീ​ത​ത്തിന്‌ അത്രമാ​ത്രം ആകർഷ​ണി​യ​ത​യും പ്രാധാ​ന്യ​വും ഉണ്ടായി​രു​ന്നു. അതു​കൊ​ണ്ടു ഷണ്ഡന്മാ​രായ സംഘഗാ​യ​കൻമാർ ഇറ്റാലി​യൻ പള്ളി ഗായക​സം​ഘ​ത്തി​ലും സെൻറ്‌ പീറ്റേ​ഴ്‌സി​ലും പാപ്പാ​യു​ടെ സ്വന്തം സിസ്റ്റയിൻ ചാപ്പലി​ലും ആലാപനം തുടർന്നു.

ഷണ്ഡനാ​ക്ക​ലി​നെ​തി​രെ പൊതു​ജ​നാ​ഭി​പ്രാ​യം ഉയർന്നു വന്നതോ​ടെ 1898-ൽ ലിയോ പതിമൂ​ന്നാ​മൻ പാപ്പാ വിവേ​ക​പൂർവം വത്തിക്കാ​നി​ലെ ഷണ്ഡഗാ​യ​ക​ന്മാ​രെ പെൻഷൻ നൽകി പിരി​ച്ചു​വി​ട്ടു. അദ്ദേഹ​ത്തി​ന്റെ പിൻഗാ​മി​യായ പയസ്‌ പത്താമൻ പാപ്പാ 1903-ൽ ഷണ്ഡഗാ​യ​ക​ന്മാ​രെ പാപ്പാ​യു​ടെ ചാപ്പലിൽ ഔദ്യോ​ഗി​ക​മാ​യി നിരോ​ധി​ച്ചു. എന്നാൽ അവരെ രംഗ​ത്തേക്കു കൊണ്ടു​വന്ന സിക്‌സ്റ്റസ്‌ അഞ്ചാമൻ പാപ്പാ​യു​ടെ ആജ്ഞാപ​ത്രം ഒരിക്ക​ലും ഔദ്യോ​ഗി​ക​മാ​യി റദ്ദാക്ക​പ്പെ​ട്ടില്ല.

അവസാ​ന​ത്തെ പ്രൊ​ഫ​ഷണൽ ഷണ്ഡഗാ​യ​ക​നായ അലസാൻഡ്രോ മോ​റെ​സ്‌ക്കീ 1922-ൽ മരിച്ചു. അദ്ദേഹം പാടിയ പാട്ടുകൾ 1902-ലും 1903-ലുമായി റെക്കോർഡു ചെയ്യ​പ്പെട്ടു. ഇപ്പോ​ഴും അതു കേൾക്കു​വാൻ കഴിയും. ഈ റെക്കോർഡി​ങ്ങു​ക​ളു​ടെ ലേബലിൽ അദ്ദേഹത്തെ “സോ​പ്രാ​നോ ഡെലാ കാപ്പെലാ സിസ്റ്റിനാ” (സിസ്റ്റയിൻ ചാപ്പലി​ലെ ഉച്ചസ്വ​ര​ഗാ​യകൻ) എന്നാണു വിവരി​ച്ചി​രി​ക്കു​ന്നത്‌. “ആൺകു​ട്ടി​യു​ടെ​യോ സ്‌ത്രീ​യു​ടെ​യോ സ്വര​ത്തോ​ടു സാമ്യ​മി​ല്ലാത്ത പ്രസ്‌തുത സ്വരം സംശയ​ലേ​ശ​മെ​ന്യേ ഒരു ഉച്ചസ്വ​ര​ഗാ​യ​ക​ന്റേ​താണ്‌” എന്ന്‌ സംഗീത നിരൂ​പ​ക​നായ ഡെസ്‌മോൺഡ്‌ ഷോ ടെയിലർ എഴുതു​ന്നു.

അങ്ങനെ കലയ്‌ക്കു​വേ​ണ്ടി​യുള്ള ആൺകു​ട്ടി​ക​ളു​ടെ നിഷ്‌ഠൂ​ര​മായ അംഗ​ച്ഛേ​ദനം പര്യവ​സാ​നി​ച്ചു. ദ എൻ​സൈ​ക്‌ളോ​പീ​ഡിയ ബ്രിട്ടാ​നിക്ക ഇതിനെ “മ്ലേച്ഛമായ ആചാരം” എന്നു വിളി​ക്കു​ന്നു. എന്നാൽ ഇതു റോമൻ കത്തോ​ലി​ക്കാ സഭയാൽ നൂറ്റാ​ണ്ടു​ക​ളോ​ളം അനുവ​ദി​ക്ക​പ്പെ​ട്ടി​രു​ന്നു.

ഷണ്ഡനാക്കൽ—1990-കളിൽ?

അതു​കൊ​ണ്ടു ഷണ്ഡഗാ​യ​ക​ന്മാർ മേലാൽ ഇല്ല. എന്നാൽ മതത്തിന്റെ പേരി​ലുള്ള ഷണ്ഡനാക്കൽ അവസാ​നി​ച്ചു​വെന്ന്‌ അത്‌ അർഥമാ​ക്കു​ന്നു​ണ്ടോ? സങ്കടക​ര​മെന്നു പറയട്ടെ, ഇല്ല! മതപര​മായ സമുദാ​യ​ങ്ങ​ളിൽ ജീവി​ക്കുന്ന പത്തുലക്ഷം ഷണ്ഡന്മാർ ഇന്ത്യയിൽ ഉണ്ടെന്നു ദി ഇൻഡി​പെൻറൻറ്‌ മാഗസിൻ പറയുന്നു. ആരാണ്‌ അവർ? ഹിജ്‌റകൾ.

അവരിൽ അനേകം ഹിന്ദുക്കൾ ഉണ്ടെങ്കിൽത​ന്നെ​യും ഹിജ്‌റകൾ ഭൂരി​ഭാ​ഗ​വും ജന്മം​കൊ​ണ്ടു മുസ്ലീങ്ങൾ ആണ്‌. അവർ എല്ലാവ​രും ഗുജറാ​ത്തിൽനി​ന്നും ഉള്ള ഹൈന്ദവ ദേവത​യായ ബറുച്ചറാ മാതായെ ആരാധി​ക്കു​ന്നു. ഇവരിൽ ഭൂരി​ഭാ​ഗ​വും സ്വന്തം തീരു​മാ​ന​പ്ര​കാ​ര​മാ​ണു ഷണ്ഡന്മാ​രാ​ക്ക​പ്പെ​ടു​ന്ന​തെ​ങ്കി​ലും ഓരോ വർഷവും ആയിര​ത്തോ​ളം ഇന്ത്യൻ പുരു​ഷ​ന്മാ​രെ ഹിജ്‌റ​ക​ളിൽ ചേർക്കു​ന്ന​തി​നു​വേണ്ടി ബലം പ്രയോ​ഗി​ച്ചു ഷണ്ഡന്മാ​രാ​ക്കു​ന്നു​വെന്നു ചിലർ അവകാ​ശ​പ്പെ​ടു​ന്നു. പിന്നീട്‌ അവരെ ഏറ്റവു​മ​ധി​കം പണം നൽകുന്ന ഗുരു​വി​നു ലേലത്തിൽ വിൽക്കു​ന്നു.

ഹിജ്‌റ​കൾ ഗുരു​ക്ക​ളു​ടെ ആധിപ​ത്യ​ത്താൽ നിയ​ന്ത്രി​ക്ക​പ്പെ​ടു​ന്നു. വ്യത്യസ്‌ത ഹിജ്‌റാ ഗണങ്ങൾ നഗരങ്ങളെ പ്രദേ​ശ​ങ്ങ​ളാ​യി വേർതി​രി​ക്കു​ന്നു. ക്ഷേത്ര​ങ്ങ​ളിൽ യാചന​ന​ട​ത്തി​യും വ്യഭി​ചാ​ര​വൃ​ത്തി​യിൽ ഏർപ്പെ​ട്ടു​മാ​ണു ഹിജ്‌റകൾ ജീവി​ക്കു​ന്നത്‌. അവർ പൊതു​വേ നിന്ദി​ത​രാണ്‌. എന്നാൽ അവർ ദുശകുന മാന്ത്രി​ക​വി​ദ്യ കൈവ​ശ​പ്പെ​ടു​ത്തി​യി​ട്ടു​ള്ള​താ​യി വിചാ​രി​ക്ക​പ്പെ​ടു​ന്ന​തു​കൊണ്ട്‌ ആളുകൾ അവരെ ഭയപ്പെ​ടു​ന്നു. ഈ കാരണ​ത്താൽ തങ്ങളുടെ കുട്ടി​ക​ളെ​യും നവദമ്പ​തി​ക​ളെ​യും അനു​ഗ്ര​ഹി​ക്കു​വാൻ വേണ്ടി ജനങ്ങൾ അവർക്കു പണം നൽകും.

ചില ഹിജ്‌റകൾ അവരുടെ കൂട്ടത്തിൽനി​ന്നും ഓടി​പ്പോ​കു​ന്ന​താ​യി പറയ​പ്പെ​ടു​ന്നു. എന്നാൽ “ഷണ്ഡനാ​ക്ക​ലി​നെ നിയ​ന്ത്രി​ക്കു​ന്ന​വ​രാ​യി പറയ​പ്പെ​ടുന്ന ഹിജ്‌റാ മാഫിയാ നിഗൂ​ഢ​ത​യു​ടെ​യും ഭീകര​ത​യു​ടെ​യും മൂടു​പ​ട​ത്തി​നു​ള്ളിൽ പ്രവർത്തി​ക്കു​ന്നു” എന്ന്‌ ഇന്ത്യാ ടുഡേ റിപ്പോർട്ടു ചെയ്യുന്നു.

സമാപനം!

ഇത്തരം തിന്മക​ളിൽനി​ന്നു ലോകം എന്നെങ്കി​ലും വിമു​ക്ത​മാ​കു​മോ? ഉവ്വ്‌. എന്തു​കൊ​ണ്ടെ​ന്നാൽ ബൈബി​ളിൽ ഒരു വേശ്യ​യാ​യി തിരി​ച്ച​റി​യി​ക്ക​പ്പെ​ടുന്ന “മഹതി​യാം ബാബി​ലോൻ” എന്ന വ്യാജമത ലോക​സാ​മ്രാ​ജ്യ​ത്തി​ന്റെ “പാപം ആകാശ​ത്തോ​ളം കുന്നി​ച്ചി​രി​ക്കു​ന്നു.” ഇത്തരത്തി​ലുള്ള സമസ്‌ത ദൈവ​നി​ന്ദിത ആചാര​ങ്ങ​ളും പെട്ടെ​ന്നു​തന്നെ നാടകീ​യ​മാ​യൊ​രു അന്ത്യത്തി​ലേക്കു വരു​മെ​ന്ന​റി​യു​ന്നതു വിശ്വാ​സത്തെ എത്ര ശക്തീക​രി​ക്കു​ന്നു! ബൈബി​ളി​ന്റെ അവസാന പുസ്‌ത​ക​മായ വെളി​പ്പാ​ടു 18-ാം അധ്യാ​യ​ത്തിൽനിന്ന്‌ ഇതു നിങ്ങൾക്കു നേരിട്ടു വായി​ക്ക​രു​തോ? പ്രത്യേ​കി​ച്ചു 2-ഉം 5-ഉം വാക്യങ്ങൾ പരി​ശോ​ധി​ക്കുക.

[അടിക്കു​റി​പ്പു​കൾ]

[13-ാം പേജിലെ ചതുരം]

അത്യുന്നത നിലവാ​രം

യഹോ​വ​യു​ടെ നിയമം വ്യക്തമാ​യി പ്രസ്‌താ​വി​ച്ചി​രി​ക്കു​ന്ന​തു​പോ​ലെ ഇസ്രാ​യേല്യ സഭയുടെ ഭാഗമാ​യി​രി​ക്കു​വാൻ ഒരു ഷണ്ഡനും അനുവ​ദി​ക്ക​പ്പെ​ട്ടി​രു​ന്നില്ല. (ആവർത്ത​ന​പു​സ്‌തകം 23:1) ഈ നിയമ​ത്തിൻ കീഴിൽ ഷണ്ഡനാക്കൽ അനുവ​ദ​നീ​യ​മ​ല്ലാ​യി​രു​ന്നു. “യഹൂദ​നി​യമം അത്തരം ശസ്‌ത്ര​ക്രി​യ​കളെ വെറു​ത്തി​രു​ന്നു” എന്ന്‌ എൻ​സൈ​ക്ലോ​പീ​ഡി​യാ ജുഡാ​യി​ക്കാ പറയുന്നു. തത്‌ഫ​ല​മാ​യി ഇസ്രാ​യേല്യ രാജാ​ക്ക​ന്മാ​രു​ടെ കൊട്ടാ​ര​ങ്ങ​ളി​ലെ സേവന​ത്തി​നു​വേണ്ടി യാതൊ​രു ഇസ്രാ​യേ​ല്യ​നോ പരദേ​ശി​യോ ഷണ്ഡനാ​ക്ക​പ്പെ​ട്ടി​രു​ന്നില്ല. എന്നാൽ പേർഷ്യൻ രാജാ​വായ അഹശ്വേ​രോ​ശി​ന്റെ​യും മറ്റും അരമന​ക​ളിൽ ഷണ്ഡന്മാർ സേവനം അനുഷ്‌ഠി​ച്ചി​രു​ന്നു.—എസ്ഥേർ 2:14,15; 4:4,5.

[12-ാം പേജിലെ ചിത്രം]

സിക്‌സ്റ്റസ്‌ അഞ്ചാമൻ പാപ്പാ​യാ​ലുള്ള ഒരു തീരു​മാ​നം ഷണ്ഡഗാ​യ​ക​ന്മാർക്കു വഴിതു​റ​ന്നു

[കടപ്പാട്‌]

The Bettmann Archive