നിങ്ങളു​ടെ ശരീര​ത്തിന്‌ ഉറക്കം ആവശ്യ​മാ​യി​രി​ക്കു​ന്ന​തി​ന്റെ കാരണം

“ഞാനെന്തു ചെയ്‌താൽ രാത്രി​യിൽ എനിക്കു നല്ലൊരു ഉറക്കം ലഭിക്കും!” ഇന്ന്‌ ഈ പരാതി സാധാ​ര​ണ​മാണ്‌. പല ആളുക​ളും രാപക​ലി​ല്ലാ​തെ അധ്വാ​നി​ക്കു​ന്നു, ആധുനിക ജീവി​ത​ത്തി​ന്റെ ദൈനം​ദിന സമ്മർദ​വും പിരി​മു​റു​ക്ക​വും ആളുകൾക്കു ദ്രോ​ഹം​ചെ​യ്യു​ന്നു.

ഡോക്ടർമാർ, പൊലീസ്‌ ഓഫീ​സർമാർ, അഗ്നിശ​മ​ന​പ്ര​വർത്തകർ, ട്രക്ക്‌ ഡ്രൈ​വർമാർ, മാറി​ക്കൊ​ണ്ടി​രി​ക്കുന്ന ഷിഫ്‌റ്റിൽ പ്രവർത്തി​ക്കുന്ന ജോലി​ക്കാർ, കൊച്ചു​കു​ട്ടി​ക​ളുള്ള അമ്മമാർ എന്നിവ​രും മറ്റുപ​ല​രും തങ്ങളുടെ ശരീര​ത്തി​നു വേണ്ടത്ര ഉറക്കം ലഭിക്കാ​ത്ത​വ​രിൽപെ​ടു​ന്നു. ഉറക്കത്തി​ന്റെ അഭാവം നിമിത്തം ഭഗ്നാശ​രായ ലക്ഷക്കണ​ക്കി​നാ​ളു​കൾ നവോൻമേ​ഷ​പ്ര​ദ​മായ ഗാഢനി​ദ്ര ലഭിക്കുന്ന വിധം അറിയാൻ അതീവ താത്‌പ​ര്യ​മു​ള്ള​വ​രാണ്‌.

ഉറക്കത്തി​ന്റെ പങ്ക്‌

ഉറക്കം, അല്ലെങ്കിൽ കുറച്ചു സമയത്തെ വിശ്രമം ജീവനുള്ള സൃഷ്ടി​കൾക്കി​ട​യിൽ സാർവ​ത്രി​ക​മാ​ണെന്നു തോന്നു​ന്നു. പട്ടി, പൂച്ച, പക്ഷി തുടങ്ങിയ ഓമന മൃഗങ്ങളെ നിങ്ങൾ വളർത്തി​യി​ട്ടു​ണ്ടെ​ങ്കിൽ പട്ടിയും പൂച്ചയും ദിവസ​വും ചുരു​ണ്ടു​കൂ​ടി​ക്കി​ടന്ന്‌ ഉറങ്ങു​ന്ന​തും പക്ഷികൾ ശാന്തരാ​യി ഇരുട്ടു മൂടു​മ്പോൾ ഉറങ്ങു​ന്ന​തും നിങ്ങൾ തീർച്ച​യാ​യും നിരീ​ക്ഷി​ച്ചി​ട്ടു​ണ്ടാ​യി​രി​ക്കും. മിക്കവാ​റും എല്ലാ മൃഗങ്ങൾക്കും പക്ഷികൾക്കും പ്രാണി​കൾക്കും ഉറക്കത്തി​ന്റെ അല്ലെങ്കിൽ കുറഞ്ഞത്‌ ചില ഘട്ടങ്ങളിൽ പ്രവർത്തനം മന്ദീഭ​വി​പ്പി​ക്കേ​ണ്ട​തി​ന്റെ ആവശ്യ​മുണ്ട്‌. മനുഷ്യർക്കാ​ണെ​ങ്കിൽ, ഉറക്കം അനു​പേ​ക്ഷ​ണീ​യ​മാണ്‌.

ഉറക്കം കേവലം ഒരു വിശ്ര​മ​ഘ​ട്ട​മാ​ണെന്ന്‌ ചില ആളുകൾ വിചാ​രി​ക്കു​ന്നു. എന്നാൽ അതിൽ അതില​ധി​ക​മുൾപ്പെ​ട്ടി​രി​ക്കു​ന്നു. “ഉറക്കം എന്നു പറയു​ന്നത്‌ യഥാർഥ​ത്തിൽ പേശികൾ മുറു​കു​ക​യും അയയു​ക​യും ചെയ്യു​ന്ന​തും നാഡി​മി​ടി​പ്പും രക്തസമ്മർദ​വും കൂടു​ക​യും കുറയു​ക​യും ചെയ്യു​ന്ന​തും മനസ്സ്‌ സ്വന്തം ചലച്ചി​ത്രങ്ങൾ ഗംഭീ​ര​മാ​യി ഉത്‌പാ​ദി​പ്പി​ക്കു​ന്ന​തു​മായ ഒരു സങ്കീർണ പ്രക്രി​യ​യാണ്‌” എന്ന്‌ ദ ടൊ​റൊ​ന്റോ സ്റ്റാർ പറയുന്നു. “ഒരാൾ ഉറങ്ങു​മ്പോൾ പ്രവർത്ത​ന​ങ്ങ​ളെ​ല്ലാം മന്ദീഭ​വി​ക്കു​ക​യും പേശികൾ അയയു​ക​യും ചെയ്യുന്നു. ഹൃദയ​സ്‌പ​ന്ദ​ന​വും ശ്വാ​സോ​ച്ഛ്വാ​സ നിരക്കും കുറയു​ന്നു” എന്ന്‌ ദ വേൾഡ്‌ ബുക്ക്‌ എൻ​സൈ​ക്ലോ​പീ​ഡിയ പ്രസ്‌താ​വി​ക്കു​ന്നു.

ശാസ്‌ത്ര​ജ്ഞൻമാ​രും ഡോക്ടർമാ​രും ഗവേഷ​ക​രും ഉറക്ക​ത്തെ​ക്കു​റിച്ച്‌ അനേക ദശകങ്ങൾ പഠനം നടത്തി​യി​ട്ടു​ണ്ടെ​ങ്കി​ലും അതിന്റെ മർമ​പ്ര​ധാ​ന​മായ പങ്കി​നെ​ക്കു​റി​ച്ചുള്ള അടിസ്ഥാന രഹസ്യങ്ങൾ അങ്ങനെ​ത​ന്നെ​യി​രി​ക്കു​ന്നു. വാസ്‌ത​വ​ത്തിൽ ഉറക്കം എന്താ​ണെ​ന്നും നാം ഉറങ്ങു​ന്ന​തെ​ന്തു​കൊ​ണ്ടെ​ന്നും ഈ പര്യ​വേ​ക്ഷകർ കണ്ടുപി​ടി​ച്ചി​ട്ടു​പോ​ലു​മില്ല. ടൊ​റൊ​ന്റോ​യി​ലുള്ള ക്യൂൻ എലിസ​ബത്ത്‌ ആശുപ​ത്രി​യു​ടെ ഉറക്ക ഗവേഷണ ലബോ​റ​ട്ട​റി​യി​ലെ ഡോ. ഏലിയട്ട്‌ ഫിലി​പ്‌സൺ ഇപ്രകാ​രം പറയുന്നു: “നമ്മെ വീണ്ടും നവോൻമേ​ഷ​വാൻമാ​രാ​ക്കി​ത്തീർക്കുന്ന ഉറക്കത്തിൽ നടക്കുന്ന നിർണാ​യ​ക​മായ ജീവശാ​സ്‌ത്ര സംഭവങ്ങൾ നമുക്ക്‌ അറിയില്ല.”

നമ്മുടെ പ്രതി​രോ​ധ​വ്യ​വ​സ്ഥയെ ബാധി​ക്കുന്ന മാറ്റങ്ങൾ ഉറക്കസ​മ​യത്ത്‌ ശരീര​ത്തിൽ സംഭവി​ക്കു​ന്നു. ദിവസത്തെ പ്രവർത്ത​ന​ത്തി​ന്റെ തേയ്‌മാ​നത്തെ നീക്കം​ചെ​യ്‌തു​കൊണ്ട്‌ ശരീര​ഭാ​ഗങ്ങൾ അയയു​ക​യും വിശ്ര​മ​മെ​ടു​ക്കു​ക​യും ചെയ്യുന്നു. രക്തപ്ര​വാ​ഹ​ത്തി​ലൂ​ടെ സാധാരണ നടക്കാ​റുള്ള വൃത്തി​യാ​ക്കൽ പരിപാ​ടി ഫലപ്ര​ദ​മാ​യി നടക്കു​ക​യും രാസസ​ന്തു​ലി​താ​വസ്ഥ പുനഃ​സ്ഥാ​പി​ക്ക​പ്പെ​ടു​ക​യും ചെയ്യുന്നു. അങ്ങനെ ഉറക്കത്തെ, പിറ്റേ ദിവസ​ത്തേ​ക്കു​വേണ്ടി കാര്യങ്ങൾ കേടു​പോ​ക്കി വൃത്തി​യാ​ക്കി​വെ​ക്കാൻ വരുന്ന രാത്രി​യി​ലെ ജോലി​സം​ഘ​ത്തോട്‌ ഉപമി​ക്കാ​വു​ന്ന​താണ്‌.

ഉറക്കത്തി​ന്റെ ഏറ്റവും പ്രധാ​ന​പ്പെട്ട പ്രവർത്ത​ന​ങ്ങ​ളി​ലൊന്ന്‌ നാഡീ​വ്യ​വ​സ്ഥയെ ആ ദിവസത്തെ അതിന്റെ പ്രവർത്ത​ന​ത്തിൽനി​ന്നു പൂർവ​സ്ഥി​തി​യി​ലാ​കാൻ അനുവ​ദി​ക്കു​ക​യെ​ന്ന​താണ്‌. ദ വേൾഡ്‌ ബുക്ക്‌ എൻ​സൈ​ക്ലോ​പീ​ഡിയ പറയു​ന്ന​തു​പോ​ലെ, “ഉറക്കം ഊർജത്തെ ശരീര​ത്തിൽ പുനഃ​സ്ഥാ​പി​ക്കു​ന്നു, പ്രത്യേ​കി​ച്ചു തലച്ചോ​റി​ലും നാഡീ​വ്യ​വ​സ്ഥ​യി​ലും.”

എത്രമാ​ത്രം ഉറക്കം?

മിക്ക മുതിർന്ന​വർക്കും എന്നും രാത്രി ഏഴോ എട്ടോ മണിക്കൂർ ഉറക്കം ആവശ്യ​മാണ്‌. ചിലർക്ക്‌ ഇതിൽ കുറച്ചും മറ്റുചി​ലർക്ക്‌ ഇതിൽ കൂടു​ത​ലും. തങ്ങൾക്ക്‌ നാലോ അഞ്ചോ മണിക്കൂർ മാത്രം ഉറങ്ങി​യാൽ മതി​യെന്നു ചിലർ പറയുന്നു. എന്നാൽ അവരിൽ ചിലർ പകൽ സമയത്ത്‌ അൽപ്പം മയങ്ങു​ന്ന​വ​രാ​യി​രി​ക്കാം. ശിശു​ക്കൾക്കു മുതിർന്ന​വരെ അപേക്ഷിച്ച്‌ വളരെ​യ​ധി​കം ഉറക്കം ആവശ്യ​മാണ്‌.

പ്രത്യേ​കിച്ച്‌ ആളുകൾക്കു പ്രായ​മാ​കു​മ്പോൾ തങ്ങൾ രാത്രി​യിൽ പല തവണ ഉണരു​ന്ന​താ​യി അവർ കണ്ടെത്തി​യേ​ക്കാം. ഇത്‌ ഗുരു​ത​ര​മായ ഉറക്ക പ്രശ്‌നങ്ങൾ ആരംഭി​ക്കു​ന്ന​തി​ന്റെ സൂചന​യാ​ണെന്നു ചിലർ വിചാ​രി​ച്ചേ​ക്കാം. പ്രായ​മാ​യ​വർക്കു തങ്ങൾ ചെറു​പ്പ​മാ​യി​രു​ന്ന​പ്പോൾ ഉണ്ടായി​രുന്ന ഉറക്കത്തി​ന്റെ അതേ ഗുണനി​ല​വാ​രം ലഭിക്കു​ക​യി​ല്ലാ​യി​രി​ക്കാ​മെ​ങ്കി​ലും രാത്രി​യിൽ ഏതാനും തവണ ഉണരു​ന്നത്‌ ഉത്‌ക​ണ്‌ഠ​യ്‌ക്കുള്ള കാരണ​മ​ല്ലെന്ന്‌ പരീക്ഷ​ണങ്ങൾ പ്രകട​മാ​ക്കി​യി​രി​ക്കു​ന്നു. സാധാ​ര​ണ​മാ​യി, ഇത്തരക്കാർ മിക്കവ​രും ഇടയ്‌ക്കി​ടെ ഉറക്കം തെളി​യുന്ന സമയം കുറവാണ്‌, ഒരുപക്ഷേ ഏതാനും മിനി​റ്റു​കൾ മാത്രം.

പ്രായ​മെ​ത്ര​യാ​യാ​ലും ശരി, എല്ലാ രാത്രി​യി​ലും ഒരേ​പോ​ലെ ഗാഢനി​ദ്ര ഉണ്ടായി​രി​ക്കാൻ ആരും പ്രതീ​ക്ഷി​ക്ക​രുത്‌. ഗാഢനി​ദ്ര​യും ലഘുനി​ദ്ര​യും മാറി​മാ​റി നടക്കുന്ന ഒരു പ്രവർത്ത​ന​മാണ്‌ ഉറക്കം. ഒരു രാത്രി​യിൽത്തന്നെ ഒരാളിൽ ഇവ അനേക​തവണ മാറി​മാ​റി സംഭവി​ക്കു​ന്നു.

ഉറക്കത്തി​ന്റെ അഭാവം കൊണ്ടു​ണ്ടാ​കുന്ന അപകടങ്ങൾ

“തീരെ കുറച്ചു​മാ​ത്രം ഉറക്കം ലഭിക്കുന്ന ആളുക​ളു​ടെ എണ്ണത്തെ​പ്പറ്റി ഗവേഷകർ കൂടുതൽ ഉത്‌കണ്‌ഠാകുലരായിത്തീർന്നുകൊണ്ടിരിക്കുകയാണ്‌. സ്ഥിരമായ ഉറക്കക്കു​റ​വിന്‌ നമുക്കു​ത​ന്നെ​യും നമ്മുടെ ചുറ്റു​മു​ള്ള​വർക്കും ഉപദ്ര​വ​ക​ര​മായ ഫലങ്ങൾ ഉളവാ​ക്കാൻ കഴിയും എന്ന്‌ അവർ മുന്നറി​യി​പ്പു നൽകുന്നു,” ദ ടൊ​റൊ​ന്റോ സ്റ്റാർ റിപ്പോർട്ടു ചെയ്യുന്നു.

ദി വേൾഡ്‌ ബുക്ക്‌ എൻ​സൈ​ക്ലോ​പീ​ഡിയ ഇപ്രകാ​രം വിവരി​ക്കു​ന്നു: “ഉറക്കം കിട്ടാത്ത ആളുകൾക്ക്‌ ഊർജം നഷ്ടമാ​കു​ക​യും അവർ വേഗം കുപി​ത​രാ​യി​ത്തീ​രു​ക​യും ചെയ്യുന്നു. രണ്ടു ദിവസം ഉറക്കം കിട്ടാ​തെ​വ​രു​മ്പോൾ ദീർഘ​നേ​രത്തെ ശ്രദ്ധാ​കേ​ന്ദ്രീ​ക​രണം ബുദ്ധി​മു​ട്ടു​ള്ള​താ​യി​ത്തീ​രു​ന്ന​താ​യി കണ്ടെത്തു​ന്നു. . . . അനേകം തെറ്റുകൾ വരുത്തി​ക്കൂ​ട്ടു​ന്നു, പ്രത്യേ​കി​ച്ചു പതിവു ജോലി​ക​ളിൽ. ഇടയ്‌ക്കി​ടെ ശ്രദ്ധ പതറു​ക​യും ചെയ്യുന്നു. . . . മൂന്നു ദിവസ​ത്തിൽ കൂടുതൽ ഉറങ്ങാ​തി​രി​ക്കു​ന്ന​വർക്ക്‌ വ്യക്തമാ​യി ചിന്തി​ക്കാ​നും കാണാ​നും കേൾക്കാ​നും വലിയ ബുദ്ധി​മു​ട്ടാണ്‌. ചിലർക്ക്‌ ഇടവി​ട്ടി​ട​വിട്ട്‌ മതി​ഭ്രമം ഉണ്ടാകു​ക​യും അപ്പോൾ അവർ യഥാർഥ​ത്തിൽ ഇല്ലാത്ത കാര്യങ്ങൾ കാണു​ക​യും ചെയ്യുന്നു.”

പഠനവി​ധേ​യ​നാ​ക്ക​പ്പെട്ട ഒരു വ്യക്തിക്ക്‌ നാലു ദിവസം നിദ്രാ​വി​ഹീ​ന​ത്വം അനുഭ​വ​പ്പെ​ട്ട​പ്പോൾ പതിവു ജോലി​ക​ളിൽ കുറച്ചു മാത്രമേ ചെയ്യാൻ കഴിഞ്ഞു​ള്ളൂ​വെന്നു പരി​ശോ​ധ​നകൾ കണ്ടെത്തി​യി​രി​ക്കു​ന്നു. ശ്രദ്ധയോ തീരെ കുറഞ്ഞ അളവി​ലുള്ള മാനസിക ജാഗ്ര​ത​പോ​ലു​മോ ആവശ്യ​മുള്ള ജോലി​കൾ അസഹ്യ​മാ​യി തോന്നു​ന്നു. എന്നാൽ ഏറ്റവും മോശ​മായ ഘടകങ്ങൾ ശ്രദ്ധാ​ന​ഷ്ട​വും മാനസിക ജാഗ്ര​ത​യു​മല്ല. നാലര ദിവസം കഴിയു​മ്പോൾ ചിത്തവി​ഭ്രാ​ന്തി​യു​ടെ ലക്ഷണങ്ങൾ പ്രകട​മാ​കു​ക​യും വ്യക്തി​യു​ടെ ദൃശ്യ​ലോ​കം തികച്ചും വിചി​ത്ര​മാ​യി​ത്തീ​രു​ക​യും ചെയ്യുന്നു.

ഉറക്കക്കു​റ​വിന്‌ ഗുരു​ത​ര​മായ പ്രശ്‌ന​ങ്ങ​ളി​ലേക്കു നയിക്കാൻ കഴിയും. ഉറക്കം​തൂ​ങ്ങി കാറോ​ടി​ച്ചിട്ട്‌ അത്യാ​പ​ത്തിൽ ചെന്നു​പെ​ട്ടി​രി​ക്കു​ന്നവർ ഒന്നും രണ്ടു​മൊ​ന്നു​മല്ല. ഉറക്കത്തി​ന്റെ തുടർച്ച​യായ അഭാവം ഒരാളെ കൂടുതൽ ശുണ്‌ഠി​ക്കാ​ര​നും ഇണങ്ങി​പ്പോ​കാൻ വിഷമ​മു​ള്ളവ​നു​മാ​ക്കി​ത്തീർക്കു​ന്ന​തു​കൊണ്ട്‌ ഉറക്കമി​ല്ലാ​യ്‌മക്കു കുടും​ബ​പ​ര​വും ദാമ്പത്യ​പ​ര​വു​മായ പ്രശ്‌ന​ങ്ങ​ളി​ലേ​ക്കും നയിക്കാൻ കഴിയും. രാത്രി​യിൽ നല്ലൊരു ഉറക്കം ലഭിക്കു​ന്നതു ചിലർ വിചാ​രി​ക്കു​ന്ന​തി​നെ​ക്കാൾ പ്രധാ​ന​മാണ്‌.

രാത്രി​യിൽ നല്ലൊരു ഉറക്കം ലഭിക്കൽ

ടൊ​റൊ​ന്റോ തലസ്ഥാന നഗരി​യി​ലെ ഉറക്ക ക്രമ​ക്കേ​ടു​ക​ളു​ടെ കേന്ദ്ര​ത്തി​ലെ ഉറക്കം സംബന്ധിച്ച വിദഗ്‌ധൻ ഡോ. ജെഫ്‌റി ജെ. ലിപ്‌സി​റ്റ്‌സ്‌ രാത്രി​യിൽ നല്ലൊരു ഉറക്കം ലഭിക്കു​ന്ന​തി​നു പിൻവ​രുന്ന കാര്യങ്ങൾ നിർദേ​ശി​ക്കു​ന്നു. സുരക്ഷി​ത​വും ശാന്തവും ഇരുട്ടു​ള്ള​തു​മായ ചുറ്റു​പാ​ടു​ക​ളിൽ സുഖ​പ്ര​ദ​മായ കിടക്ക​യിൽ ഉറങ്ങുക. തലേ രാത്രി ശരിയാ​യി ഉറങ്ങി​യി​ല്ലെ​ങ്കിൽപ്പോ​ലും പിറ്റേന്നു പകൽ അധിക​നേരം മയങ്ങരുത്‌; ഉണർന്നി​രുന്ന്‌ നിങ്ങൾ സാധാരണ കിടക്കാ​റുള്ള സമയത്തു​മാ​ത്രം കിടക്കാൻ ശ്രമി​ക്കുക. ഉറങ്ങു​ന്ന​തി​നു​മുമ്പ്‌ കഫീൻ ഒഴിവാ​ക്കുക. വായി​ക്കു​ന്ന​തി​നോ ടിവി കാണു​ന്ന​തി​നോ കിടക്ക ഉപയോ​ഗി​ക്കാ​തി​രി​ക്കുക. ഉറങ്ങു​ന്ന​തി​നു തൊട്ടു​മുമ്പ്‌ ശക്തമായ വ്യായാ​മ​വും വിസ്‌ത​രി​ച്ചുള്ള ഊണും ഒഴിവാ​ക്കുക. എന്നും ഒരു നിശ്ചിത സമയം ഉറങ്ങുക. എന്തു​കൊ​ണ്ടെ​ന്നാൽ ഉറങ്ങി​യെ​ഴു​ന്നേൽക്ക​ലി​ന്റെ ഒരു സ്ഥിരമായ ക്രമം ആർജി​ക്കാൻ ഇത്‌ ശരീരത്തെ സഹായി​ക്കു​ന്നു.

ശാന്തമായ മനസ്സോ​ടെ കിടക്കു​ന്നത്‌ ഒരു പതിവാ​ക്കുക. നിങ്ങളെ ആവേശ​ഭ​രി​ത​രാ​ക്കാ​നോ നിങ്ങൾ കൂടുതൽ നേരം ഉണർന്നി​രി​ക്കാ​നോ ഇടയാ​ക്കി​യേ​ക്കാ​വുന്ന കാര്യങ്ങൾ ചെയ്യു​ന്നത്‌ ഒഴിവാ​ക്കുക. ഉദാഹ​ര​ണ​ത്തിന്‌, ആവേശ​ക​ര​മായ ചലച്ചി​ത്ര​ങ്ങ​ളും ടിവി പരിപാ​ടി​ക​ളും വായനാ സാമ​ഗ്രി​ക​ളും ഒഴിവാ​ക്കുക. കിടക്കാൻപോ​കു​ന്ന​തി​നു തൊട്ടു​മുമ്പ്‌ പ്രവർത്ത​ന​വ്യ​ഗ്ര​മാ​ക്കുന്ന ചർച്ചകൾ ഉണ്ടായി​രി​ക്കു​ന്ന​തും ഉറക്കം വരാതി​രി​ക്കാൻ ഇടയാ​ക്കി​യേ​ക്കാം.

ചിലരെ സംബന്ധി​ച്ചി​ട​ത്തോ​ളം മിതമായ ചൂടു​വെ​ള്ള​ത്തിൽ (നല്ല ചൂടല്ല) കുളി​ക്കു​ന്ന​തോ പ്രവർത്ത​ന​വ്യ​ഗ്ര​മാ​ക്കാത്ത ലളിത​മായ വിവരങ്ങൾ വായി​ക്കു​ന്ന​തോ സഹായ​ക​മാണ്‌. അതു​കൊണ്ട്‌ ചൂടു​പാൽ, മോര്‌, അൽപ്പം വീഞ്ഞ്‌ എന്നിവ​യോ ഹാപ്‌ കായ്‌കൾ, പൊതിന, ശീമജ​മന്തി എന്നിവ​യിൽനി​ന്നു​ണ്ടാ​ക്കുന്ന ഔഷധ തേയി​ല​യോ പോലുള്ള ഉറക്കദാ​യക വസ്‌തു​ക്കൾ സഹായ​ക​മാ​യേ​ക്കാം—എന്നാൽ കഫീൻ അടങ്ങിയ ചായ സഹായ​കമല്ല.

എന്നാൽ, ശാന്തമായ മനസ്സോ​ടെ കിടക്കു​ന്ന​തു​മാ​ത്രം മതിയാ​കു​ക​യില്ല എന്നതി​നോട്‌ പൊതു​വേ എല്ലാവ​രും യോജി​ക്കു​ന്നു. അത്യാ​ഗ്രഹം, അസൂയ, ശത്രുത, അതി​മോ​ഹം എന്നിവ​മൂ​ല​മു​ണ്ടാ​കുന്ന ഉത്‌ക​ണ്‌ഠ​ക​ളിൽനി​ന്നും നിരാ​ശ​ക​ളിൽനി​ന്നും സ്വത​ന്ത്ര​മായ, ക്രമമായ വ്യായാ​മം സഹിത​മുള്ള ആരോ​ഗ്യ​ക​ര​വും സന്തുലി​ത​വു​മായ ജീവിതം രാത്രി​യിൽ നല്ലൊരു ഉറക്കം ലഭിക്കാ​നുള്ള പ്രാപ്‌തി​ക്കു സംഭാവന ചെയ്യുന്നു. അമിത​മായ തീറ്റി, കുടി എന്നിവ​യിൽനി​ന്നും അധാർമി​കത നിമി​ത്ത​മുള്ള അസന്തു​ഷ്ടി​യിൽനി​ന്നും സ്വത​ന്ത്ര​മായ ഒരു ജീവി​ത​വും അതുതന്നെ ചെയ്യുന്നു.

നമ്മുടെ ആത്മീയ ആവശ്യത്തെ തൃപ്‌തി​പ്പെ​ടു​ത്തു​ന്നത്‌ വിശ്ര​മ​ക​ര​മായ, ഗാഢനി​ദ്ര ലഭിക്കു​ന്ന​തിൽ ഒരു സുപ്ര​ധാന പങ്കു വഹിക്കു​ന്നു. നാം ജീവി​ക്കുന്ന സങ്കീർണ ലോക​ത്തെ​ക്കു​റി​ച്ചു മനസ്സി​ലാ​ക്കു​ന്ന​തി​നും സന്തുലി​ത​മായ, സന്തുഷ്ട​മായ ഒരു ജീവി​ത​രീ​തി പിന്തു​ട​രു​ന്ന​തി​നും അതു നമ്മെ സഹായി​ക്കും. ഉൾക്കാഴ്‌ച വർധി​പ്പി​ക്കാ​നും യഹോ​വാ​ജ്ഞാ​നം മുറു​കെ​പ്പി​ടി​ക്കാ​നും ദൈവ​ത്തി​ന്റെ ജ്ഞാനി​യായ ഒരു ദാസൻ നമ്മെ പ്രോ​ത്സാ​ഹി​പ്പി​ക്കു​ന്നു. എന്തു​കൊ​ണ്ടെ​ന്നാൽ അത്‌ “ആനന്ദക​ര​വും സന്തുഷ്ട​ക​ര​വു​മായ ഒരു ജീവിത”ത്തിലേക്കു നയിക്കു​ന്നു. എന്നിട്ട്‌ അദ്ദേഹം ഇപ്രകാ​രം കൂട്ടി​ച്ചേർക്കു​ന്നു: “ഉറങ്ങു​മ്പോൾ നീ പേടി​ച്ചി​രി​ക്ക​യില്ല, രാത്രി​യി​ലെ​ല്ലാം നീ നന്നായി ഉറങ്ങും.”—സദൃശ​വാ​ക്യ​ങ്ങൾ 3:21-24, റ്റുഡേ​യ്‌സ്‌ ഇംഗ്ലീഷ്‌ വേർഷൻ.

[18-ാം പേജിലെ ആകർഷ​ക​വാ​ക്യം]

തുടർച്ചയായ ഉറക്കക്കു​റ​വിന്‌ ദാരു​ണ​മായ പരിണ​ത​ഫ​ലങ്ങൾ ഉളവാ​ക്കാൻ കഴിയും

[18-ാം പേജിലെ ചിത്രം]

മിക്ക മുതിർന്ന​വർക്കും എന്നും രാത്രി ഏഴോ എട്ടോ മണിക്കൂർ ഉറക്കം ആവശ്യ​മാണ്‌

[18-ാം പേജിലെ ചിത്രം]

മിക്ക ആളുകൾക്കും ഉറക്കം പിടി​ക്കാൻ വലിയ ബുദ്ധി​മുട്ട്‌ അനുഭ​വ​പ്പെ​ടു​ന്നു