ക്യാപ്‌ററൻ ജെയിംസ്‌ കുക്ക്‌—പസിഫി​ക്കി​ലെ നിർഭ​യ​നായ പര്യ​വേ​ക്ഷ​കൻ

ഓസ്‌ട്രേലിയയിലെ ഉണരുക! ലേഖകൻ

ഇംഗ്ലണ്ട്‌, ഓസ്‌​ട്രേ​ലിയ, ന്യൂസി​ലൻഡ്‌, ഹവായി, പസിഫിക്‌ ദ്വീപു​കൾ എന്നിവി​ട​ങ്ങ​ളി​ലൊ​ഴി​കെ ക്യാപ്‌ററൻ ജെയിംസ്‌ കുക്ക്‌ എന്ന പേര്‌ മിക്കവർക്കും അജ്ഞാത​മാണ്‌. എന്നാൽ, മേൽപ്പറഞ്ഞ രാജ്യ​ങ്ങ​ളിൽ ഓരോ സ്‌കൂൾക്കു​ട്ടി​ക്കും ക്യാപ്‌ററൻ കുക്കി​നെ​ക്കു​റിച്ച്‌ അറിയാം—അമേരി​ക്ക​യി​ലെ കുട്ടികൾ ക്രിസ്‌റ​റഫർ കൊളം​ബ​സി​നെ​പ്പ​ററി പഠിക്കു​ന്ന​തു​പോ​ലെ​തന്നെ.

എന്നാൽ ഈ നാവിക പര്യ​വേ​ക്ഷ​ക​നെ​ക്കു​റിച്ച്‌ ഏററവും നന്നായി അറിയാ​വു​ന്നത്‌—തെക്കൻ പസിഫി​ക്കി​ന്റെ ദ്വീപ ഭൂഖണ്ഡ​മായ—ഓസ്‌​ട്രേ​ലി​യ​യി​ലും പിന്നെ ന്യൂസി​ലൻഡി​ലു​മാ​ണെ​ന്നു​ള്ള​തി​നു സംശയ​മില്ല. എന്തു​കൊ​ണ്ടെ​ന്നാൽ ക്യാപ്‌ററൻ കുക്ക്‌ എന്ന പേര്‌ അവിടെ എല്ലായി​ട​ത്തും കാണാം. ഇനിയും, 1974-ൽ രാജ്യ​ത്തി​ന്റെ ദേശീയ ഗാനമാ​യി​ത്തീർന്ന “ഉയരുക ഓസ്‌​ട്രേ​ലിയ സുന്ദരി” എന്ന ഗാനത്തി​ന്റെ മൂല പാഠം അക്ഷരാർഥ​ത്തിൽ ആ ധീരനായ കപ്പിത്താ​നുള്ള സ്‌തു​തി​യാ​ണു പാടു​ന്നത്‌.

ജെയിംസ്‌ കുക്ക്‌ എന്ന മനുഷ്യൻ

1728 ഒക്‌ടോ​ബ​റിൽ ഇംഗ്ലണ്ടി​ലെ യോർക്ക്‌​ഷൈ​റിൽ ജനിച്ച ഒരു ഗ്രാമീണ പയ്യനാ​യി​രു​ന്നു ജെയിംസ്‌ കുക്ക്‌. അദ്ദേഹ​ത്തി​ന്റെ പ്രാരംഭ ജീവി​ത​ത്തെ​ക്കു​റിച്ച്‌ ഒന്നും വ്യക്തമ​ല്ലെ​ങ്കി​ലും എയ്‌ററൻ ഗ്രാമ സ്‌കൂ​ളിൽനിന്ന്‌ അദ്ദേഹ​ത്തി​നു കുറച്ചു വിദ്യാ​ഭ്യാ​സം ലഭിച്ച​താ​യി കാണുന്നു. ആ സ്‌കൂൾ ഇപ്പോ​ഴു​മുണ്ട്‌. പിന്നീട്‌ അദ്ദേഹം സ്‌റെ​റ​യ്‌ത്സ്‌ മത്സ്യബന്ധന തുറമു​ഖത്ത്‌ ഒരു പലചര​ക്കു​വ്യാ​പാ​രി​യു​ടെ കീഴിൽ തൊഴിൽപ​രി​ശീ​ലനം നേടി. കടലമ്മ​യു​മാ​യി പരിച​യ​പ്പെട്ട അദ്ദേഹം തന്റെ ജീവി​ത​വൃ​ത്തി മാററി കൽക്കരി വ്യാപാ​രം തിര​ഞ്ഞെ​ടു​ത്തു. അങ്ങനെ കടൽക്കാ​ററു സ്‌പർശ​മേ​ററു കിടക്കുന്ന വടക്കൻ സമു​ദ്ര​ത്തി​ന്റെ തീരങ്ങൾക്കു സമീപേ ജോലി​നോ​ക്കിയ അദ്ദേഹം കപ്പലുകൾ കൈകാ​ര്യം ചെയ്യാ​നും പഠിച്ചു.

പിന്നീ​ടു​ള്ള നാവി​ക​പ​ര്യ​ട​ന​ങ്ങൾക്കു കുക്കിനെ സജ്ജനാ​ക്കി​യത്‌ കൽക്കരി കപ്പലുകൾ മാത്ര​മാ​യി​രു​ന്നില്ല. കരയിൽ ആയിരു​ന്ന​പ്പോൾ അദ്ദേഹം ഗണിത പഠനം തുടരു​ക​യും ഒടുവിൽ 1755-ൽ ബ്രിട്ടീഷ്‌ നാവി​ക​സേ​ന​യിൽ പേർ ചാർത്തു​ക​യും ചെയ്‌തു. ക്രിയാ​ത്മ​ക​മായ കുറെ നാവിക സേവനം അദ്ദേഹം നടത്തി​യെ​ങ്കി​ലും ന്യൂഫൗ​ണ്ട്‌ലൻഡ്‌, നോവ സ്‌കോ​ട്ടിയ, ലാബ്ര​ഡോർ എന്നീ രാജ്യ​ങ്ങ​ളു​ടെ ഭൂപടങ്ങൾ, ചാർട്ടു​കൾ എന്നിവ​യ്‌ക്കാണ്‌ അദ്ദേഹ​ത്തി​നു ഖ്യാതി ലഭിച്ചത്‌.

1769-ലെ ലോക​രം​ഗം

കോള​നീ​പ​ര​വും വ്യാപാ​ര​പ​ര​വു​മായ ഏററവും വലിയ ലോക​ശ​ക്തി​യെന്ന നിലയിൽ ഗ്രേററ്‌ ബ്രിട്ടൻ 1763-ൽ ഉയർച്ച നേടി. 200 വർഷത്തെ ഒററ​യൊ​റ​റ​യായ യുദ്ധങ്ങൾക്കു​ശേഷം അവൾ സ്‌പെ​യി​നി​നെ​യും ഹോള​ണ്ടി​നെ​യും ഫ്രാൻസി​നെ​യും തോൽപ്പി​ച്ചു. അവസാ​നത്തെ എതിരാ​ളി​യായ ഫ്രാൻസ്‌ തോററു തുന്നം​പാ​ടി. ഇത്‌ നാടകീ​യ​മായ ഒരു കാലഘ​ട്ട​മാ​യി​രു​ന്നു. ശാസ്‌ത്രീയ നേട്ടം അന്ധവി​ശ്വാ​സത്തെ വേഗത്തിൽ കീഴട​ക്കു​ക​യും ലോക​വ്യാ​പ​ക​മാ​യി അറിവി​നു​വേണ്ടി ദാഹം ഉളവാ​ക്കു​ക​യും ആയിരു​ന്നു. നാവി​ക​യാ​ത്രാ രീതി​ക​ളും വൻതോ​തിൽ പുരോ​ഗ​മി​ച്ചി​രു​ന്നു. പസിഫി​ക്കി​ലേ​ക്കുള്ള ഒരു പര്യട​നത്തെ നയിക്കാൻ ഒരു സമു​ദ്ര​സ​ഞ്ചാര ശാസ്‌ത്ര​ജ്ഞന്റെ സേവന​ങ്ങൾക്കു​വേണ്ടി ബ്രിട്ടീഷ്‌ നാവി​ക​സേ​ന​യും ശാസ്‌ത്രീയ മേഖല​ക​ളും അടിയ​ന്തി​ര​മാ​യി അന്വേ​ഷണം നടത്തു​ക​യാ​യി​രു​ന്നു. വെല്ലു​വി​ളി​പ​ര​മായ ഈ സ്ഥാന​ത്തേക്കു ജെയിംസ്‌ കുക്ക്‌ തിര​ഞ്ഞെ​ടു​ക്ക​പ്പെട്ടു.

കുക്കിന്റെ നാവി​ക​പ​ര്യ​ട​നങ്ങൾ ആരംഭി​ക്കു​ന്നു

1768-71-ലെ ആദ്യത്തെ നാവി​ക​പ​ര്യ​ട​ന​ത്തിൽ കുക്കിന്‌ “ഇതുവരെ അജ്ഞാത​മായ രാജ്യങ്ങൾ കണ്ടുപി​ടി​ക്കാ​നും, നേരത്തെ കണ്ടുപി​ടി​ച്ച​തെ​ങ്കി​ലും പര്യ​വേ​ക്ഷണം പൂർത്തി​യാ​യി​ട്ടി​ല്ലാത്ത വിദൂര ഭാഗങ്ങ​ളെ​ക്കു​റിച്ച്‌ അറിവു സമ്പാദി​ക്കാ​നും” നിർദേ​ശങ്ങൾ ലഭിച്ചു. “തെക്കെ​വി​ടെ​യോ വിസ്‌തൃ​ത​മായ ഒരു ഭൂഖണ്ഡ​മോ ദേശമോ ഉണ്ടെന്നു സങ്കൽപ്പി​ക്കുക ന്യായമാ”ണെന്നും അതു​കൊണ്ട്‌ “ആ ഭൂഖണ്ഡം കണ്ടുപി​ടി​ക്കാ​നാ​യി തെക്കോ​ട്ടു യാത്ര​ചെ​യ്യ​ണ​മെ​ന്നും” അദ്ദേഹ​ത്തോ​ടു കൂടു​ത​ലാ​യി നിർദേ​ശി​ച്ചു. എന്നിരു​ന്നാ​ലും, ഭൂമി​ക്കും സൂര്യ​നും ഇടയി​ലുള്ള ദൂരം കൃത്യ​മാ​യി നിർണ​യി​ക്കാ​മെന്ന പ്രതീ​ക്ഷ​യിൽ സൂര്യന്റെ മുഖത്തി​നു കുറു​കെ​യുള്ള ശുക്രന്റെ കടന്നു​പോ​ക്കു നിരീ​ക്ഷി​ക്കുക എന്നതാ​യി​രു​ന്നു ആദ്യത്തെ ജോലി. ഇതു തഹീതി​യിൽവെച്ചു ചെയ്യണ​മാ​യി​രു​ന്നു.

ആദ്യത്തെ നാവി​ക​പ​ര്യ​ട​ന​ത്തി​നു മൂന്നു വർഷം തികയാൻ 43 ദിവസ​ത്തി​ന്റെ കുറവു​ണ്ടാ​യി​രു​ന്നു. ലഭിച്ച നിർദേ​ശ​ങ്ങ​ളും അതില​ധി​ക​വും കുക്ക്‌ അനുസ​രി​ച്ചു. ആദ്യത്തെ ഈ നാവി​ക​പ​ര്യ​ട​ന​ത്തി​ലാ​യി​രു​ന്നു ബോട്ടണി ഉൾക്കട​ലി​ലെ അദ്ദേഹ​ത്തി​ന്റെ വിഖ്യാ​ത​മായ പ്രവേ​ശനം. അന്നുവരെ അതു കണ്ടെത്തി​യി​രു​ന്നില്ല, മനോ​ഹ​ര​മായ സിഡ്‌നി തുറമു​ഖ​ത്തിന്‌ ഏതാനും കിലോ​മീ​ററർ മാത്രം തെക്കാ​യി​രു​ന്നു ബോട്ടണി ഉൾക്കടൽ. കൂടാതെ അദ്ദേഹം ന്യൂസി​ലൻഡി​ലെ ഇരുദ്വീ​പു​ക​ളും കപ്പൽമാർഗം ചുററി​സ​ഞ്ച​രി​ച്ചു പൂർത്തി​യാ​ക്കി. ഓസ്‌​ട്രേ​ലി​യ​യു​ടെ കിഴക്കേ തീരത്തി​ന്റെ ഭൂപടം നിർമിച്ച ആദ്യത്തെ യൂറോ​പ്യ​നും അദ്ദേഹ​മാ​യി​രു​ന്നു. എന്നാൽ സങ്കൽപ്പ​ത്തി​ലെ ആ വലിയ തെക്കൻ ഭൂഖണ്ഡം അദ്ദേഹം കണ്ടെത്തി​യില്ല.

വിജയ​ക​ര​മായ രണ്ടാമത്തെ നാവി​ക​പ​ര്യ​ട​നം

1772-75-ലെ രണ്ടാമത്തെ പര്യ​വേ​ക്ഷ​ണ​ത്തിൽ റെസലൂ​ഷൻ എന്നും അഡ്‌വെഞ്ചർ എന്നും പേരുള്ള രണ്ടു കപ്പലുകൾ ഉപയോ​ഗി​ക്കാൻ കുക്ക്‌ നിയു​ക്ത​നാ​ക്ക​പ്പെട്ടു. ഈ നാവി​ക​പ​ര്യ​ടനം തെക്കൻ പസിഫി​ക്കി​ന്റെ ശൂന്യ​തയെ ചുററി അൻറാർട്ടി​ക്കിൽ നടത്തിയ കപ്പൽമാർഗ​മുള്ള മറെറാ​രു വിജയ​ക​ര​മായ ചുററി​സ​ഞ്ചാ​ര​മാ​യി​ത്തീർന്നു. എന്നാൽ ഒരു തെക്കൻ ഭൂഖണ്ഡം പിടി​കി​ട്ടാ​തെ കിടപ്പില്ല എന്ന്‌ മാസങ്ങ​ളോ​ളം നീണ്ടു​നിന്ന കോച്ചുന്ന തണുപ്പും ശരീരം തുളച്ചു​ക​യ​റുന്ന കാററും അദ്ദേഹത്തെ ബോധ്യ​പ്പെ​ടു​ത്തി. ക്ഷീണി​ച്ച​വ​ശ​രായ അദ്ദേഹ​ത്തി​ന്റെ നാവി​ക​ജോ​ലി​ക്കാ​രാ​ണെ​ങ്കിൽ മഞ്ഞുറഞ്ഞ കടലു​ക​ളോ​ടു വിടപ​റഞ്ഞ്‌ തഹീതി​യി​ലേക്കു മടങ്ങാൻ സന്തോ​ഷ​മു​ള്ള​വ​രു​മാ​യി​രു​ന്നു.

കുക്കിന്റെ രണ്ടാമത്തെ നാവി​ക​പ​ര്യ​ടനം ഒരു പൂർണ വിജയ​മാ​യി​രു​ന്നു, ചരി​ത്രാ​ഖ്യാ​ന​ങ്ങ​ളിൽ സ്ഥാനം പിടി​ക്കു​ക​യും ചെയ്‌തു. മാരക​മായ ഫലം (ഇംഗ്ലീഷ്‌) എന്ന തന്റെ പുസ്‌ത​ക​ത്തിൽ അലൻ മോർഹഡ്‌ ഇപ്രകാ​രം പ്രസ്‌താ​വി​ക്കു​ക​യു​ണ്ടാ​യി: “1775 ജൂലൈ അവസാനം അവർ പ്ലൈമ​ത്തിൽ നങ്കൂര​മി​ട്ടു. അവർ യാത്ര​യാ​രം​ഭി​ച്ചിട്ട്‌ മൂന്നു വർഷവും പതി​നെട്ടു ദിവസ​വും പിന്നി​ട്ടി​രു​ന്നു. 20,000 ലീഗു​ക​ളി​ല​ധി​കം [60,000 നാവിക മൈലു​കൾ] അവർ കപ്പലോ​ടി​ച്ചി​രു​ന്നു. അതായത്‌, ഭൂമി​യു​ടെ ചുററ​ള​വി​ന്റെ മൂന്നി​രട്ടി. എന്നാൽ കുക്കിന്‌ നാലാ​ളു​കളെ മാത്രമേ നഷ്ടമാ​യു​ള്ളൂ . . . ഈ നാവി​ക​പ​ര്യ​ടനം അദ്ദേഹത്തെ എല്ലാക്കാ​ല​ത്തെ​യും അതിമ​ഹാൻമാ​രായ നാവി​ക​രിൽ ഒരാളാ​ക്കി.”

മൂന്നാ​മത്തെ നാവി​ക​പ​ര്യ​ടനം അനർഥം കൈവ​രു​ത്തു​ന്നു

കാനഡ​യു​ടെ പസിഫിക്‌ തീര​മൊ​ന്നു നിരീ​ക്ഷി​ക്കാ​നും പസിഫി​ക്കി​നെ​യും ആർട്ടിക്‌ സമുദ്രം വഴി അററ്‌ലാൻറി​ക്കി​നെ​യും ബന്ധിപ്പി​ക്കു​ന്ന​താ​യി കരുതുന്ന വടക്കു​പ​ടി​ഞ്ഞാ​റൻ പാതയ്‌ക്കു​വേണ്ടി തിരച്ചിൽ നടത്താ​നും വേണ്ടി​യു​ള്ള​താ​യി​രു​ന്നു മൂന്നാ​മത്തെ നാവി​ക​പ​ര്യ​ടനം. അത്‌ ക്യാപ്‌ററൻ കുക്കിന്റെ അവസാ​നത്തെ നാവി​ക​പ​ര്യ​ട​ന​മാ​യി​ത്തീർന്നു. 1776 ജൂലൈ 12-ന്‌ ഇംഗ്ലണ്ടിൽനിന്ന്‌ അററകു​ററം തീർത്ത റെസലൂ​ഷ​നിൽ യാത്ര​തി​രിച്ച അദ്ദേഹം 1778 ജനുവരി 18-ന്‌ ഹവായി ദ്വീപു​കൾ എന്ന്‌ ഇപ്പോൾ അറിയു​ന്നി​ടത്ത്‌ എത്തി. ഡിസ്‌ക​വറി എന്നു പേരുള്ള കപ്പലും അദ്ദേഹം കൊണ്ടു​പോ​യി​രു​ന്നു. അവിടെ അദ്ദേഹ​ത്തി​നും ആൾക്കാർക്കും ആതിഥ്യ​പൂർവ​ക​മായ സ്വീക​രണം ലഭിച്ചു. മനോ​ഹ​ര​മായ ആ ദ്വീപു​ക​ളിൽനിന്ന്‌ അവർ ഭക്ഷണസാ​മ​ഗ്രി​കൾ വീണ്ടും നിറെച്ചു. എന്നിട്ട്‌ ആ വർഷത്തെ വടക്കൻ വേനൽക്കാ​ലം അവർ അററ്‌ലാൻറി​ക്കി​ലേ​ക്കുള്ള പാത കണ്ടുപി​ടി​ക്കാ​നാ​യി ചെലവ​ഴി​ച്ചു, പക്ഷേ ഒരു പ്രയോ​ജ​ന​വു​മു​ണ്ടാ​യില്ല. പിന്നെ അവർ ഹവായി​യിൽ ശൈത്യ​കാ​ലം ചെലവ​ഴി​ക്കാൻ മടങ്ങി.

ഈ സമയത്ത്‌ കുക്കിന്റെ സ്വഭാ​വ​ത്തിൽ കാണപ്പെട്ട മാററ​ത്തി​ന്റെ കാരണ​ത്തെ​ക്കു​റി​ച്ചു ചരി​ത്ര​കാ​രൻമാർക്കു നിശ്ചയ​മില്ല. മടങ്ങി​വ​ന്ന​പ്പോൾ ഹവായി​ക്കാ​രോ​ടുള്ള അദ്ദേഹ​ത്തി​ന്റെ ഇടപെടൽ സംബന്ധിച്ച്‌ അജ്ഞാത​മായ ചില കാര്യ​ങ്ങ​ളുണ്ട്‌. ഈ സമയത്ത്‌ അദ്ദേഹം അവരെ ക്രൂര​മാ​യി ചൂഷണം ചെയ്‌തു തുടങ്ങി​യെന്നു ചിലർ അഭി​പ്രാ​യ​പ്പെ​ടു​ന്നു. അദ്ദേഹം അവരുടെ ആരാധ​നാ​വൃ​ത്തി​കളെ അതിലം​ഘി​ച്ചി​രി​ക്കു​മോ എന്ന്‌ മററു​ചി​ലർ സംശയി​ക്കു​ന്നു. കാര്യ​ത്തി​ന്റെ യഥാർഥ സത്യാവസ്ഥ എന്തായി​രു​ന്നാ​ലും 1779 ഫെബ്രു​വരി 14-ന്‌ ഇവി​ടെ​വെ​ച്ചാണ്‌ അദ്ദേഹം മരണമ​ട​ഞ്ഞത്‌.

അദ്ദേഹ​ത്തി​ന്റെ മരണം എപ്രകാ​ര​മാ​യി​രു​ന്നു? പര്യ​വേ​ക്ഷകർ ജനുവരി 17-ാം തീയതി കെയാ​ല​കെ​ക്കൂവ ഉൾക്കട​ലി​ലേക്കു മടങ്ങി​യെ​ത്തി​യ​പ്പോൾ 10,000 ഹവായി​ക്കാർ അവരെ അഭിവാ​ദ്യം ചെയ്‌തു. അന്ന്‌ ദ്വീപു​വാ​സി​കൾ അവരുടെ ദേശീ​യ​ദേ​വ​നായ ലോ​ണോക്ക്‌ മാകാ​ഹി​ക്കി ഉത്സവം ആഘോ​ഷി​ക്കു​ക​യാ​യി​രു​ന്നു. ലോണോ ദേവനാ​യി സങ്കൽപ്പിച്ച്‌ കുക്കി​നു​വേണ്ടി ആഘോഷം നടത്തി​യെ​ന്നാ​ണു തോന്നു​ന്നത്‌. അങ്ങനെ അദ്ദേഹ​ത്തി​നും ആളുകൾക്കും ഒരിക്കൽക്കൂ​ടി അസാധാ​ര​ണ​മായ ദയയും ആതിഥ്യ​വും ലഭിച്ചു. മൂന്നാ​ഴ്‌ച​യ്‌ക്കു​ശേഷം ഫെബ്രു​വരി 4-ന്‌ അവർ നങ്കൂരം വലിച്ച്‌ യാത്ര​പു​റ​പ്പെട്ടു. എന്നാൽ വെറും നാലു ദിവസം കഴിഞ്ഞ​പ്പോൾ അവർ ഒരു വൻ കൊടു​ങ്കാ​റ​റി​ല​ക​പ്പെട്ടു. റെസലൂ​ഷന്‌ ഒരു പാമരം നഷ്ടമായി. കുക്ക്‌ ഹവായി​യി​ലേക്കു മടങ്ങി.

കുക്കിനെ അത്ഭുത​പ്പെ​ടു​ത്തു​മാറ്‌, ഇത്തവണ സ്വീക​രണം ശത്രു​താ​ഭാ​വ​ത്തോ​ടെ ആയിരു​ന്നു. ഇപ്പോൾ ഹവായി​ക്കാർ കാര്യ​ങ്ങ​ളെ​ക്കു​റി​ച്ചു കൂടുതൽ യുക്തി​യാ​നു​സൃ​തം ചിന്തി​ച്ചി​രി​ക്കു​മെ​ന്നും കുക്കും ആളുക​ളും തങ്ങളെ ചൂഷണം ചെയ്യു​ക​യാ​യി​രു​ന്നെന്ന്‌ നിഗമനം ചെയ്‌തി​രി​ക്കു​മെ​ന്നും ചിലർ വിശ്വ​സി​ക്കു​ന്നു. കുക്കിന്റെ മടങ്ങി​വ​രവ്‌ ഒരു “ദേവൻ” എന്ന അദ്ദേഹ​ത്തി​ന്റെ സ്ഥാനത്തി​നു ചേരു​ന്ന​ത​ല്ലാ​യി​രു​ന്നെന്നു മററു​ചി​ലർ അഭി​പ്രാ​യ​പ്പെ​ടു​ന്നു. കാരണ​മെ​ന്താ​യാ​ലും, കുക്കിന്റെ കുഴഞ്ഞു​പോയ ആളുകൾ ദൗർഭാ​ഗ്യ​വ​ശാൽ അക്രമാ​സ​ക്ത​രാ​യി പ്രതി​ക​രി​ച്ചു. ഇത്‌ ഡിസ്‌ക​വ​റി​യിൽനിന്ന്‌ ഒരു ബോട്ട്‌ മോഷണം പോകാൻ ഇടയാക്കി. പ്രമാ​ണി​യായ കാലാ​നി​യോ​പൂ​വി​നെ ജാമ്യ​ത്ത​ട​വു​കാ​ര​നാ​യി വെച്ചു​കൊണ്ട്‌ കുക്ക്‌ കപ്പൽ വീണ്ടെ​ടു​ക്കാൻ ശ്രമിച്ചു. അതിനെ തുടർന്ന്‌ ഏററു​മു​ട്ടൽ നടന്നു. കുക്കിനെ കുത്തി മുറി​വേൽപ്പി​ക്കു​ക​യും തീരത്തു​വെച്ച്‌ തല്ലി കൊല്ലു​ക​യും ചെയ്‌തു.

റെസലൂ​ഷ​നി​ലെ നാവിക പരിശീ​ലനം തേടുന്ന ജോലി​ക്കാ​ര​നായ ജോർജ്‌ ഗിൽബെർട്ടി​ന്റെ ഡയറി കുക്കിന്റെ ജീവി​ത​ത്തി​ലെ അന്ത്യ നിമി​ഷ​ങ്ങ​ളു​ടെ ചിത്രം വിശദ​മാ​യി വർണി​ക്കു​ന്നു. “ക്യാപ്‌ററൻ കുക്ക്‌ വെള്ളത്തി​ന​രി​കി​ലേക്കു ചെന്ന്‌ വെടി​വെപ്പു നിർത്താൻ കൈവീ​ശി കാണിച്ചു. അപ്പോൾ പ്രമാ​ണി​ക​ളിൽ കൂടുതൽ ധൈര്യ​മുള്ള ഒരാൾ ചാടി പുറകിൽ വന്ന്‌ അദ്ദേഹ​ത്തി​ന്റെ തോളു​കൾക്കു നടുവി​ലാ​യി ഇരുമ്പു കഠാര​കൊ​ണ്ടു കുത്തി. അപ്പോൾത്തന്നെ മറെറാ​രാൾ വന്ന്‌ വടി​കൊണ്ട്‌ അദ്ദേഹ​ത്തി​ന്റെ തലയ്‌ക്ക​ടി​ച്ചു. അദ്ദേഹം അടി​യേ​ററു വെള്ളത്തിൽ വീണ​പ്പോൾ പെട്ടെന്ന്‌ അവർ വെള്ളത്തി​ലേക്കു ചാടി ഏതാനും മിനി​ററു നേരം അദ്ദേഹത്തെ വെള്ളത്തിൽ മുക്കി​പ്പി​ടി​ച്ചു. അതിനു​ശേഷം പെട്ടെന്നു മരിച്ചു​വെന്ന്‌ ഉറപ്പു​വ​രു​ത്താ​നാ​യി അദ്ദേഹത്തെ പാറയു​ടെ മുകളി​ലേക്കു വലിച്ചു​ക​യ​ററി അതിൽ പലപ്രാ​വ​ശ്യം തലയി​ടി​പ്പി​ച്ചു.”

മാററം​വന്ന ഒരു വ്യക്തി​ത്വം വെളി​പ്പെ​ടു​ന്നു

മൂന്നാ​മത്തെ നാവി​ക​പ​ര്യ​ട​ന​ത്തിൽവെച്ച്‌ കുക്കിന്റെ പെരു​മാ​ററ രീതിക്കു മാററം​വന്നു തുടങ്ങി​യ​താ​യി കാണുന്നു. തെക്കൻ സമു​ദ്ര​ങ്ങ​ളി​ലേ​ക്കുള്ള മുമ്പത്തെ രണ്ടു യാത്ര​ക​ളിൽ പ്രകടി​പ്പി​ച്ചി​രുന്ന ശാന്തത​യും നിയ​ന്ത്ര​ണ​വു​മൊ​ന്നും അദ്ദേഹം മേലാൽ പ്രകട​മാ​ക്കി​യില്ല. മൂന്നാ​മത്തെ നാവി​ക​പ​ര്യ​ട​ന​ത്തിൽ അദ്ദേഹം തന്റെ ആളുക​ളിൽ 37 ശതമാ​നത്തെ, അതായത്‌ ആദ്യത്തെ നാവി​ക​പ​ര്യ​ട​ന​ത്തിൽ ചെയ്‌ത​തി​ന്റെ ഇരട്ടി​യോ​ളം പേരെ, ചാട്ട​കൊ​ണ്ടു പ്രഹരി​ച്ചു. ഇത്തവണ പോളി​നേ​ഷ്യൻ ദ്വീപു​വാ​സി​ക​ളോ​ടുള്ള അദ്ദേഹ​ത്തി​ന്റെ പെരു​മാ​റ​റ​വും അത്ര മനുഷ്യ​ത്വ​പ​ര​മാ​യി​രു​ന്നില്ല. ഉദാഹ​ര​ണ​ത്തിന്‌, ചിനയു​ണ്ടാ​യി​രുന്ന ഒരു ആടിനെ മോഷ്ടി​ച്ച​തിന്‌ അദ്ദേഹം തഹീതി​യൻ ദ്വീപായ ഇമെ​യോ​യി​ലുള്ള വീടുകൾ തീവെ​ക്കാ​നും ചിറേ​റാ​ടങ്ങൾ നശിപ്പി​ക്കാ​നും മനഃപൂർവം ഉത്തരവി​ട്ടു. ചെറിയ കളവുകൾ നടത്തിയ ദ്വീപു​വാ​സി​ക​ളു​ടെ കാതു​വെ​ട്ടാൻപോ​ലും അദ്ദേഹം മുതിർന്നു. അദ്ദേഹം രോഗി​യോ ക്ഷീണി​ത​നോ ആയിരു​ന്നോ, അതോ വെറുതേ ക്രൂര​നാ​വു​ക​യാ​യി​രു​ന്നോ?

നാവി​ക​പ​ര്യ​ട​ന​ങ്ങ​ളു​ടെ സമ്മാനം

“വാക്കിന്റെ അടിസ്ഥാ​ന​പ​ര​മായ ഒരർഥ​ത്തി​ലും കുക്ക്‌ പുതിയ ദേശങ്ങ​ളു​ടെ കണ്ടുപി​ടി​ത്ത​ക്കാ​രൻ ആയിരു​ന്നില്ല” എന്ന്‌ ക്യാപ്‌ററൻ ജെയിംസ്‌ കുക്കും അദ്ദേഹ​ത്തി​ന്റെ കാലവും (ഇംഗ്ലീഷ്‌) എന്ന തന്റെ പുസ്‌ത​ക​ത്തിൽ പ്രൊ​ഫസ്സർ ബെർനാർഡ്‌ സ്‌മിത്ത്‌ അഭി​പ്രാ​യ​പ്പെ​ടു​ന്നു. കുക്ക്‌ കണ്ടെത്തിയ പ്രദേ​ശ​ങ്ങ​ളിൽ മിക്കതി​ലും ആളുകൾ അതി​നോ​ടകം അധിവ​സി​ച്ചി​രു​ന്ന​തി​നാൽ ഇത്‌ സത്യമാ​യി​രി​ക്കാം. എന്നിരു​ന്നാ​ലും, ഗ്രെൻഫെൽ പ്രൈസ്‌ ഇപ്രകാ​രം പ്രസ്‌താ​വി​ക്കു​ന്നു: “ഓസ്‌​ട്രേ​ലി​യ​യു​ടെ നീണ്ട കിഴക്കൻ തീരം കണ്ടുപി​ടി​ച്ചു​കൊ​ണ്ടും ന്യൂസി​ലൻഡി​ന്റെ രൂപരേഖ ഉണ്ടാക്കി​ക്കൊ​ണ്ടും വടക്കേ അമേരി​ക്ക​യു​ടെ നീണ്ട തീരഭാ​ഗങ്ങൾ പരി​ശോ​ധി​ച്ചു​കൊ​ണ്ടും പസിഫി​ക്കി​ന്റെ അതിർത്തി ഭൂപടം പൂർത്തി​യാ​ക്കി​യ​തും ഹവായി​യും ന്യൂ കലെ​ഡൊ​ണി​യ​യും പോ​ലെ​യുള്ള തികച്ചും പുതിയ ദ്വീപു​ക​ളു​ടെ കണ്ടുപി​ടി​ത്ത​വും മുമ്പു കണ്ടെത്തി​യ​തെ​ങ്കി​ലും മററു ദ്വീപ സമൂഹ​ങ്ങ​ളു​ടെ വീണ്ടു​മുള്ള കണ്ടുപി​ടി​ത്ത​വും സ്ഥാനനിർണ​യ​വും ഒക്കെ ഭൂമി​ശാ​സ്‌ത്ര​പ​ര​മായ അറിവി​ലേ​ക്കുള്ള അദ്ദേഹ​ത്തി​ന്റെ മുന്തിയ സംഭാ​വ​ന​ക​ളാ​യി​രു​ന്നു. ആർട്ടി​ക്കി​ലെ കടലി​ടു​ക്കു സംബന്ധിച്ച ബെറി​ങ്ങി​ന്റെ കണ്ടുപി​ടി​ത്തത്തെ സ്ഥിരീ​ക​രി​ച്ച​തു​കൂ​ടാ​തെ വാസ്‌ത​വ​ത്തിൽ അൻറാർട്ടിക്ക ഭൂഖണ്ഡം . . . കണ്ടുപി​ടിച്ച നാവി​ക​നാണ്‌ കുക്ക്‌.” പസിഫിക്‌ ചക്രവാ​ള​ത്തിൽനിന്ന്‌ അദ്ദേഹ​ത്തി​ന്റെ പാമര ശൃംഗം അപ്രത്യ​ക്ഷ​മാ​യി വളരെ​നാൾ കഴിഞ്ഞി​ട്ടും കുക്കിന്റെ ചാർട്ടു​ക​ളും ഭൂപട​ങ്ങ​ളും ഉപയോ​ഗ​പ്ര​ദ​മാ​യി​രു​ന്നു.

എന്നിരു​ന്നാ​ലും, ദുഃഖ​ക​ര​മെന്നു പറയട്ടെ, ഗുഹ്യ​രോ​ഗ​വും വെടി​വ​യ്‌പ്‌ അക്രമ​ങ്ങ​ളും അൻറാർട്ടിക്ക്‌ വന്യജീ​വി​ക​ളു​ടെ വൻസം​ഹാ​ര​വും പസിഫിക്‌ ദ്വീപു​വാ​സി​ക​ളിൽ നടത്തിയ ചൂഷണ​വു​മാ​കുന്ന മാലി​ന്യ​കാ​രി​കൾ കുക്കിന്റെ യാത്ര​ക​ളു​ടെ അനന്തര​ഫ​ല​ങ്ങ​ളാ​യി​രു​ന്നു. കുക്കിന്റെ അൻറാർട്ടിക്ക്‌ കണ്ടുപി​ടി​ത്ത​ങ്ങളെ സംബന്ധിച്ച്‌ അലൻ മൂർഹെഡ്‌ ഇപ്രകാ​രം എഴുതി: “മാർഗ​മ​ധ്യേ വിപത്തു കൈവ​രു​ത്തുക എന്നുള്ളത്‌ ഒരിക്കൽക്കൂ​ടി കുക്കിന്റെ വിധി​യാ​യി​രു​ന്നു. ലോക​ത്തിൽ നിലനിൽക്കു​ന്ന​തിൽവെച്ച്‌ സാധ്യ​ത​യ​നു​സ​രിച്ച്‌ ഏററവും വലിയ വന്യജീ​വി സമൂഹത്തെ അദ്ദേഹം അപ്രതീ​ക്ഷി​ത​മാ​യി കണ്ടുമു​ട്ടി. അവയുടെ അസ്‌തി​ത്വ​ത്തെ​ക്കു​റിച്ച്‌ ലോകത്തെ അറിയിച്ച ആദ്യത്തെ വ്യക്തി അദ്ദേഹ​മാ​യി​രു​ന്നു. . . . തഹീതി​യി​ലേ​ക്കും ഓസ്‌​ട്രേ​ലി​യ​യി​ലേ​ക്കു​മുള്ള കുക്കിന്റെ നുഴഞ്ഞു​ക​യ​ററം ആ നാട്ടു​കാർക്കു വളരെ ഹാനി​ക​ര​മാ​യി​രു​ന്നു: അൻറാർട്ടി​ക്ക​യി​ലെ മൃഗങ്ങളെ സംബന്ധി​ച്ചി​ട​ത്തോ​ളം അതൊരു കൂട്ട​ക്കൊ​ല​യും.”

കുക്കിന്റെ സമഗ്ര​മായ റിപ്പോർട്ടും ചാർട്ടു​ക​ളും നോക്കി​ക്കണ്ട്‌ വേട്ടക്കാ​രും തിമിം​ഗ​ല​നാ​യാ​ട്ടു​കാ​രും വേട്ടയ്‌ക്കാ​യി ആ പ്രദേ​ശ​ത്തേക്കു വന്നുതു​ടങ്ങി. മൂർഹെഡ്‌ ഇപ്രകാ​രം തുടരു​ന്നു: “അവിടെ വേട്ടയാ​ടാൻ സത്യത്തിൽ മേലാൽ ഒന്നും ഉണ്ടായി​രി​ക്കാ​ത്ത​വി​ധം, അതായത്‌ എളുപ്പ​ത്തി​ലും ലാഭക​ര​മാ​യും കൊല്ലാൻ യാതൊ​ന്നും ഉണ്ടായി​രി​ക്കാ​ത്ത​വി​ധം, നായാട്ട്‌ തുടർന്നു​പോ​ന്നു.”

[15-ാം പേജിലെ ചിത്രങ്ങൾ]

ഹവായിയിൽ കുക്കിന്റെ ക്രൂര​മ​ര​ണം

അദ്ദേഹം കണ്ടെത്തിയ ഓസ്‌​ട്രേ​ലി​യ​യി​ലെ ബോട്ടണി ഉൾക്കടൽ

[കടപ്പാട്‌]

Paintings: By courtesy of Australian International Public Affairs

[12-ാം പേജിലെ ചിത്ര​ത്തിന്‌ കടപ്പാട്‌]

Painting by John Weber/Dictionary of American Portraits/Dover. Background: The Complete Encyclopedia of Illustration/J. G. Heck