സമ്മർദം അനുഭ​വി​ക്കുന്ന കുട്ടികൾ, ഒരു മഹാമാ​രി

“റാൻഡീ!” വീടി​നോ​ടു സമീപി​ക്കവേ താൻ അകലെ​നി​ന്നു കണ്ടതിൽ വിഹ്വ​ല​യാ​യി റീററാ അലറി​വി​ളി​ച്ചു. അവരുടെ പുത്രൻ റാൻഡി കോൺക്രീ​ററ്‌ അങ്കണത്തിന്‌ 8 മീററർ ഉയരത്തിൽ, മുകളി​ലത്തെ കിടക്ക​മു​റി​യു​ടെ ജനാല​യി​ലൂ​ടെ പുറ​ത്തേക്കു പകുതി തൂങ്ങി​ക്കി​ട​ക്കു​ന്നു. വീടി​നു​ള്ളിൽ, ലാറീ തന്റെ ഭാര്യ​യു​ടെ വെപ്രാ​ള​ത്തി​ലുള്ള കരച്ചിൽ കേട്ട്‌ അതി​വേഗം പ്രവർത്തി​ച്ചു. അദ്ദേഹം പടികൾ ഓടി​ക്ക​യറി, കിടക്ക​മു​റി​യി​ലേക്കു പാഞ്ഞു​ചെന്നു റാൻഡി​യെ കടന്നു​പി​ടി​ച്ചു സുരക്ഷി​ത​മാ​യി ഉള്ളി​ലേക്കു വലി​ച്ചെ​ടു​ത്തു.റാൻഡി​യു​ടെ മാതാ​പി​താ​ക്കൾക്ക്‌ പെട്ടെ​ന്നുള്ള ഉത്തരം ആവശ്യ​മാ​യി​രു​ന്നു. “എന്തു​കൊ​ണ്ടാണ്‌ നീ അതു ചെയ്‌തത്‌? എന്തു​കൊ​ണ്ടാണ്‌?” വിശ്വ​സി​ക്കാൻ പററാതെ അവർ ചോദി​ച്ചു. “നിനക്കു പരി​ക്കേൽക്കു​മാ​യി​രു​ന്നു; നീ കൊല്ല​പ്പെ​ടു​മാ​യി​രു​ന്നു!”“ഞാൻ മരിക്കാൻ ആഗ്രഹി​ച്ചു,” റാൻഡി അലക്ഷ്യ​മാ​യി ഉത്തരം പറഞ്ഞു.റാൻഡിക്ക്‌ വെറും അഞ്ചു വയസ്സേ ഉണ്ടായി​രു​ന്നു​ള്ളു.

എല്ലാ ബാഹ്യ പ്രകട​ന​ങ്ങ​ളി​ലും റാൻഡി ഒരു സാധാരണ, ആരോ​ഗ്യ​മുള്ള ആൺകു​ട്ടി​യാ​യി​രു​ന്നു. അവൻ ഉള്ളിൽ, മരിക്കാൻ ആഗ്രഹി​ച്ചു​വെന്ന്‌ ആർക്കും സംശയം തോന്നി​യില്ല. എങ്കിലും, റാൻഡി കടുത്ത സമ്മർദം അനുഭ​വി​ക്കുന്ന കുട്ടി​യാ​യി​രു​ന്നു എന്ന്‌ തുടർന്നു നടത്തിയ അന്വേ​ഷണം വെളി​പ്പെ​ടു​ത്തി.

റാൻഡി​യെ​പ്പോ​ലെ അസംഖ്യം കുട്ടികൾ ഇന്ന്‌ അധിക​മായ പ്രക്ഷു​ബ്ധ​ത​യു​ടെ ഇരകളാണ്‌. തങ്ങളുടെ സങ്കടം കൈകാ​ര്യം ചെയ്യാ​നുള്ള ആരോ​ഗ്യ​ക​ര​മായ മാർഗങ്ങൾ കണ്ടെത്താൻ കഴിയാ​തെ, ചിലർ തങ്ങളുടെ ആകുലത അടിച്ച​മർത്താൻ വ്യർഥ​മാ​യി ശ്രമി​ക്കു​ന്നു. എന്നാൽ അടക്കി​നിർത്തിയ സമ്മർദം അവസാനം ഒരു പഴുതു കണ്ടെത്തു​ന്നു. ചില കുട്ടി​കളെ സംബന്ധി​ച്ച​ട​ത്തോ​ളം, പുറത്തു പറയാൻ കഴിയാത്ത ആകുലത ശാരീ​രിക രോഗ​ത്തി​ലോ ദുഷ്‌പെ​രു​മാ​റ​റ​ത്തി​ലോ കലാശി​ക്കും. മററു​ചില കുട്ടി​കളെ സംബന്ധി​ച്ച​ട​ത്തോ​ളം സമ്മർദം, സ്വയം മുറി​വു​കൾ ഏൽപ്പി​ക്കു​ന്ന​തും ഭക്ഷണ ക്രമ​ക്കേ​ടു​ക​ളും മദ്യത്തി​ന്റെ​യും മയക്കു​മ​രു​ന്നി​ന്റെ​യും ദുരു​പ​യോ​ഗ​വും ആത്മഹത്യ​പോ​ലും ഉൾപ്പെ​ടുന്ന സ്വവി​നാ​ശ​ക​ര​ങ്ങ​ളായ പ്രവർത്ത​ന​ങ്ങ​ളാൽ ആന്തരി​ക​മാ​യി തിരി​ച്ചു​വി​ട​പ്പെ​ടും. പ്രതി​സ​ന്ധി​യി​ല​ക​പ്പെട്ട കുട്ടി (The Child in Crisis) എന്ന പുസ്‌തകം ഇപ്രകാ​രം നിരീ​ക്ഷി​ക്കു​ന്നു: “ഈ പ്രശ്‌ന​ങ്ങ​ളി​ല​ധി​ക​വും—പ്രത്യേ​കിച്ച്‌ ആത്മഹത്യ—മുതിർന്ന​വ​രു​ടെ​യും പ്രായ​മേ​റിയ യുവജ​ന​ങ്ങ​ളു​ടെ​യും മാത്രം മേഖല​യാ​യി ഒരുകാ​ലത്ത്‌ മനസ്സി​ലാ​ക്ക​പ്പെ​ട്ടി​രു​ന്നു. ഇപ്പോൾ അവ ക്രമേണ വളരെ ചെറു​പ്പ​ക്കാ​രി​ലേക്കു വ്യാപി​ച്ചു​വ​രു​ന്ന​താ​യി തോന്നു​ന്നു.”

‘ഇത്‌ എങ്ങനെ സംഭവി​ക്കാൻ കഴിയും?’ എന്നു വ്യാകു​ല​രായ മുതിർന്നവർ ചോദി​ക്കു​ന്നു. ‘ബാല്യ​കാ​ലം കളിപ്പാ​ട്ട​ങ്ങ​ളു​ടെ​യും കളിയു​ടെ​യും ഒരു സമയം, ചിരി​യു​ടെ​യും തമാശ​യു​ടെ​യും ഒരു സമയം അല്ലേ?’ അനേക കുട്ടി​ക​ളു​ടെ​യും കാര്യ​ത്തിൽ ഉത്തരം അല്ല എന്നാണ്‌. “ബാല്യ​കാ​ലം കലർപ്പി​ല്ലാത്ത ഉല്ലാസ​ങ്ങ​ളു​ടെ ഒരു സമയം എന്നതു മുതിർന്നവർ കെട്ടി​ച്ചമച്ച ഒരു സങ്കല്‌പ​മാണ്‌” എന്ന്‌ ഡോ. ജൂലി​യസ്‌ സിഗൾ അവകാ​ശ​പ്പെ​ടു​ന്നു. ഈ ദുഃഖ സത്യം കുട്ടി​ക​ളു​ടെ ചികി​ത്സ​ക​നായ ജോസഫ്‌ ലുപ്പോ​യാൽ ഇപ്രകാ​രം സ്ഥിരീ​ക​രി​ക്ക​പ്പെ​ടു​ന്നു: “ഞാൻ ഇരുപ​ത്തഞ്ചു വർഷമാ​യി ചികിത്സ നടത്തി​ക്കൊ​ണ്ടി​രി​ക്കു​ന്നു. ഞാൻ നാലി​രട്ടി വിഷണ്ണ​രായ കുട്ടി​ക​ളെ​യും കൗമാ​ര​പ്രാ​യ​ത്തി​ലുള്ള രോഗി​ക​ളെ​യും ഇന്നു കാണുന്നു.”

കുട്ടി​ക​ളിൽ ഇത്തരത്തി​ലുള്ള അഭൂത​പൂർവ​മായ സമ്മർദ​ത്തിന്‌ ഇടയാ​ക്കു​ന്ന​തെന്ത്‌? മുന്നറി​യി​പ്പു നൽകുന്ന ലക്ഷണങ്ങൾ എന്തെല്ലാ​മാണ്‌? സമ്മർദം അനുഭ​വി​ക്കുന്ന കുട്ടി​കളെ എങ്ങനെ സഹായി​ക്കാൻ കഴിയും? പിൻവ​രുന്ന ലേഖന​ങ്ങ​ളിൽ ഈ പ്രശ്‌നങ്ങൾ കൈകാ​ര്യം ചെയ്യ​പ്പെ​ടു​ന്ന​താണ്‌.