അഞ്ച്‌ സാധാരണ മിഥ്യകൾ—അവയാൽ കബളി​പ്പി​ക്ക​പ്പെ​ട​രുത്‌!

“ആരും അർത്ഥശൂ​ന്യ​മായ വാക്കു​ക​ളാൽ നിങ്ങളെ വഞ്ചിക്കാ​തി​രി​ക്കട്ടെ.”a ഈ ഉപദേശം എതാണ്ട്‌ 2,000 വർഷങ്ങൾക്കു​മുമ്പ്‌ നൽക​പ്പെ​ട്ട​താ​യി​രു​ന്നു, എന്നത്തേ​യും പോലെ ഇപ്പോ​ഴും സത്യമാ​ണു​താ​നും. ഇന്ന്‌ നാം പ്രേര​ണാ​ത്മ​ക​ശ​ബ്ദ​ങ്ങൾകൊണ്ട്‌ ബുദ്ധി​മു​ട്ടി​ക്ക​പ്പെ​ടു​ക​യാണ്‌: സിനി​മാ​താ​രങ്ങൾ സൗന്ദര്യ​വർദ്ധ​ക​വ​സ്‌തു​ക്കൾ വില്‌പന നടത്തുന്നു, രാഷ്‌ട്രീ​യ​ക്കാർ നയങ്ങൾ പ്രചരി​പ്പി​ക്കു​ന്നു, വില്‌പ​ന​ക്കാർ ഉല്‌പ​ന്നങ്ങൾ വിററ​ഴി​ക്കു​ന്നു, പുരോ​ഹി​തൻമാർ ഉപദേശം വ്യാഖ്യാ​നി​ക്കു​ന്നു. പലപ്പോ​ഴും പ്രേര​ണാ​ത്മ​ക​ശ​ബ്ദങ്ങൾ വഞ്ചാനാ​ത്മ​ക​മെന്ന്‌—അർത്ഥശൂ​ന്യ​മായ വാക്കു​ക​ളേ​ക്കാൾ ഒട്ടും മെച്ചമ​ല്ലെന്ന്‌—തെളി​യു​ന്നു. എങ്കിലും ആളുകൾ പൊതു​വിൽ അവയാൽ എളുപ്പം വഴി​തെ​റ​റി​ക്ക​പ്പെ​ടു​ന്നു.

പലപ്പോ​ഴും ഇത്‌ ആളുകൾ സത്യവും മിഥ്യ​യും തമ്മിൽ വേർതി​രി​ച്ച​റി​യാൻ പരാജ​യ​പ്പെ​ടു​ന്ന​തു​കൊ​ണ്ടാണ്‌. തർക്കശാ​സ്‌ത്ര​വി​ദ്യാർത്ഥി​കൾ ഈടുററ ന്യായ​വാ​ദ​ത്തി​ന്റെ പാതയിൽനി​ന്നുള്ള ഏതു വ്യതി​ച​ല​ന​ത്തെ​യും വർണ്ണി​ക്കാൻ “മിഥ്യ” എന്ന പദം ഉപയോ​ഗി​ക്കു​ന്നു. ലളിത​മാ​യി പറഞ്ഞാൽ ഒരു മിഥ്യ വഴി​തെ​റ​റി​ക്കു​ന്ന​തോ ന്യായ​മി​ല്ലാ​ത്ത​തോ ആയ ഒരു വാദഗ​തി​യാണ്‌, അതിൽ മുൻ പ്രസ്‌താ​വ​ന​ക​ളു​ടെ തുടർച്ച​യാ​യോ സാഹച​ര്യ​ങ്ങൾക്കു ചേർച്ച​യി​ലോ നിഗമനം വരുന്നില്ല. എന്നുവ​രി​കി​ലും മിഥ്യകൾ ശക്തമായി പ്രേര​ണാ​ത്മ​ക​മാ​യി​രു​ന്നേ​ക്കാം, എന്തു​കൊ​ണ്ടെ​ന്നാൽ അവ ന്യായ​ബോ​ധ​ത്തെയല്ല പിന്നെ​യോ വികാ​ര​ങ്ങളെ ശക്തമായി ആകർഷി​ക്കു​ന്നു.

വഞ്ചന ഒഴിവാ​ക്കു​ന്ന​തി​നുള്ള ഒരു താക്കോൽ മിഥ്യ​യു​ടെ പ്രവർത്ത​നങ്ങൾ അറിയു​ന്ന​താണ്‌. അതു​കൊണ്ട്‌ നമ്മുടെ ദൈവ​ദ​ത്ത​മായ “ചിന്താ​ശക്തി”യെ നിശി​ത​മാ​ക്കു​ന്ന​തി​ന്റെ കാഴ്‌ച​പ്പാ​ടിൽ നമുക്ക്‌ അഞ്ച്‌ സാധാരണ മിഥ്യകൾ ഒന്ന്‌ പരി​ശോ​ധി​ച്ചു​നോ​ക്കാം.

ഒന്നാം നമ്പർ മിഥ്യ

വ്യക്തിയെ ആക്രമി​ക്കൽ ഇത്തരം മിഥ്യ പൂർണ്ണ​മാ​യും ശരിയായ ഒരു വാദഗ​തി​യെ അഥവാ പ്രസ്‌താ​വ​നയെ അത്‌ അവതരി​പ്പിച്ച വ്യക്തി​യു​ടെ​മേ​ലുള്ള അപ്രസ​ക്ത​മായ ഒരു ആക്രമ​ണ​ത്തി​ലൂ​ടെ അവമതി​ക്കാൻ അഥവാ ഖണ്ഡിക്കാൻ ശ്രമി​ക്കു​ന്നു.

ബൈബി​ളിൽനിന്ന്‌ ഒരു ദൃഷ്ടാന്തം പരിചി​ന്തി​ക്കുക. യേശു​ക്രി​സ്‌തു ഒരിക്കൽ തന്റെ വരാൻപോ​കുന്ന മരണവും പുനരു​ത്ഥാ​ന​വും സംബന്ധിച്ച്‌ മററു​ള്ള​വരെ പ്രബു​ദ്ധ​രാ​ക്കാൻ ശ്രമിച്ചു. ഇവ അവന്റെ ശ്രോ​താ​ക്കൾക്ക്‌ പുതി​യ​തും വിഷമം​പി​ടി​ച്ച​തു​മായ ആശയങ്ങ​ളാ​യി​രു​ന്നു. എന്നാൽ യേശു​വി​ന്റെ പഠിപ്പി​ക്ക​ലു​ക​ളു​ടെ ശ്രേഷ്‌ഠത തൂക്കി​നോ​ക്കു​ന്ന​തി​നു പകരം ചിലർ യേശു​വി​നെ​ത്തന്നെ ആക്രമി​ച്ചു, ഇപ്രകാ​രം പറഞ്ഞു​കൊണ്ട്‌: “അവന്‌ ഒരു ഭൂതമുണ്ട്‌, ഭ്രാന്ത​നു​മാണ്‌. നിങ്ങൾ അവനെ ശ്രദ്ധി​ക്കു​ന്ന​തെ​ന്തിന്‌?”—യോഹ​ന്നാൻ 10:20; പ്രവൃ​ത്തി​കൾ 26:24, 25 താരത​മ്യം​ചെ​യ്യുക.

നാം കേൾക്കാൻ ആഗ്രഹി​ക്കാത്ത എന്തെങ്കി​ലും ഒരാൾ പറയു​മ്പോൾ അയാളെ “മൂഢൻ,” “ഭ്രാന്തൻ,” അഥവാ “വിവരം​കെ​ട്ടവൻ” എന്ന്‌ മുദ്ര​യ​ടി​ക്കു​ന്നത്‌ എത്ര എളുപ്പ​മാണ്‌. പ്രച്ഛന്ന​മായ കുത്തു​വാ​ക്കു​കൊണ്ട്‌ വ്യക്തിയെ ആക്രമി​ക്കു​ക​യെ​ന്നത്‌ സമാന​മായ ഒരു തന്ത്രമാണ്‌. ഇതിന്റെ ദൃഷ്‌ടാ​ന്ത​ങ്ങ​ളാ​ണിവ: “നിങ്ങൾക്ക്‌ യഥാർത്ഥ​ത്തിൽ കാര്യം മനസ്സി​ലാ​യാൽ, ആ വീക്ഷണം നിങ്ങൾക്ക്‌ ഉണ്ടായി​രി​ക്ക​യില്ല,” അഥവാ “നിങ്ങ​ളോട്‌ അത്‌ വിശ്വ​സി​ക്കാൻ പറഞ്ഞി​രി​ക്കു​ന്ന​തു​കൊ​ണ്ടു മാത്രം അതു വിശ്വ​സി​ക്കു​ന്നു.”

എന്നാൽ വ്യക്തി​പ​ര​മായ ആക്രമ​ണങ്ങൾ പ്രച്‌ഛ​ന്ന​മാ​ണെ​ങ്കി​ലും അല്ലെങ്കി​ലും ഭീഷണി​പ്പെ​ടു​ത്തു​ക​യോ വശീക​രി​ക്കു​ക​യോ ചെയ്യാ​മെ​ന്നി​രി​ക്കെ, അവ ഒരിക്ക​ലും പറഞ്ഞ കാര്യങ്ങൾ തെററാ​ണെന്ന്‌ തെളി​യി​ക്കു​ന്നില്ല. അതു​കൊണ്ട്‌ ഈ മിഥ്യ​സം​ബ​ന്ധിച്ച്‌ ജാഗ്ര​ത​യു​ള്ള​വ​രാ​യി​രി​ക്കുക!

രണ്ടാം നമ്പർ മിഥ്യ

പ്രാമാ​ണി​ക​നോട്‌ അർത്ഥിക്കൽ വാചാ​ഭീ​ഷ​ണി​യു​ടെ ഈ രൂപം വിദഗ്‌ദ്ധ​രോ പ്രശസ്‌ത​രോ ആയ ആളുക​ളാ​യി അറിയ​പ്പെ​ടു​ന്ന​വ​രു​ടെ സാക്ഷ്യങ്ങൾ അഭ്യർത്ഥി​ച്ചു​കൊണ്ട്‌ സാധി​ക്കു​ന്നു. ഉപദേ​ശ​ത്തി​നു​വേണ്ടി എന്തെങ്കി​ലും സംബന്ധിച്ച്‌ നമുക്ക​റി​യാ​വു​ന്ന​തി​നെ​ക്കാൾ കൂടു​ത​ല​റി​യാ​വുന്ന ആളുക​ളി​ലേക്ക്‌ നോക്കു​ന്നത്‌ സ്വാഭാ​വി​കം മാത്ര​മാണ്‌. എന്നാൽ പ്രാമാ​ണി​ക​രോ​ടുള്ള അഭ്യർത്ഥ​നകൾ എല്ലാം ശരിയായ ന്യായ​ബോ​ധ​ത്തിൽ അടിസ്ഥാ​ന​പ്പെ​ട്ടതല്ല.

“നിങ്ങൾക്ക്‌ മലമ്പനി​യുണ്ട്‌” എന്ന്‌ നിങ്ങളു​ടെ ഡോക്ടർ നിങ്ങ​ളോ​ടു പറയു​ന്നു​വെ​ന്നി​രി​ക്കട്ടെ. “ഡോക്ടർ, നിങ്ങൾക്ക്‌ എങ്ങനെ​യ​റി​യാം?” എന്നതാണ്‌ നിങ്ങളു​ടെ മറുപടി. അയാൾ ഇപ്രകാ​രം പറയു​ന്നത്‌ എത്ര യുക്തി​വി​രു​ദ്ധ​മാണ്‌: “നോക്കൂ, ഞാൻ ഒരു ഡോക്ട​റാണ്‌. ഈ കാര്യ​ങ്ങ​ളെ​ക്കു​റിച്ച്‌ നിങ്ങ​ളെ​ക്കാൾ വളരെ​ക്കൂ​ടു​തൽ എനിക്ക​റി​യാം. ഞാൻ പറയു​ന്നതു വിശ്വ​സി​ക്കുക, നിങ്ങൾക്ക്‌ മലമ്പനി​യുണ്ട്‌.” അയാളു​ടെ രോഗ​നിർണ്ണയം ശരിയാ​യി​രി​ക്കാ​മെ​ങ്കി​ലും, അയാൾ പറയു​ന്ന​തു​കൊണ്ട്‌ നിങ്ങൾക്ക്‌ മലമ്പനി​യു​ണ്ടെ​ന്നുള്ള ന്യായ​വാ​ദം മിഥ്യാ​ബോ​ധ​മാണ്‌. അയാൾ നിങ്ങളു​ടെ രോഗ​ല​ക്ഷ​ണ​ങ്ങ​ളും രക്തപരി​ശോ​ധ​ന​യു​ടെ ഫലങ്ങളും മററും അടങ്ങുന്ന വസ്‌തു​തകൾ ചർച്ച​ചെ​യ്യു​ന്നത്‌ കൂടുതൽ പ്രയോ​ജ​ന​പ്ര​ദ​മാ​യി​രി​ക്കും.

പ്രാമാ​ണി​ക​രോ​ടുള്ള വിരട്ടുന്ന അഭ്യർത്ഥ​ന​യു​ടെ മറെറാ​രു ദൃഷ്ടാന്തം യോഹ​ന്നാൻ 7:32-49ൽ വർണ്ണി​ച്ചി​രി​ക്കു​ന്നു. പോലീസ്‌ ഓഫീ​സർമാർ യേശു​വി​നെ അറസ്‌റ​റു​ചെ​യ്യാൻ അയക്ക​പ്പെ​ട്ട​താ​യി നാം അവിടെ നിന്ന്‌ മനസ്സി​ലാ​ക്കു​ന്നു. എന്നുവ​രി​കി​ലും അവർക്ക്‌ അവന്റെ പഠിപ്പി​ക്ക​ലിൽ വളരെ മതിപ്പു​തോ​ന്നി. അവനെ അറസ്‌റ​റു​ചെ​യ്യു​ന്ന​തി​നു പകരം അവർ മേലധി​കാ​രി​ക​ളോട്‌ ഇപ്രകാ​രം പറഞ്ഞു: “ഒരിക്ക​ലും മറെറാ​രു മനുഷ്യൻ ഇതു​പോ​ലെ സംസാ​രി​ച്ചി​ട്ടില്ല.” ഉത്തരമാ​യി യേശു​വി​ന്റെ ശത്രുക്കൾ പറഞ്ഞു: “നിങ്ങളും തെററി​പ്പോ​യോ? പ്രമാ​ണി​മാ​രി​ലും പരീശൻമാ​രി​ലും ആരും അവനിൽ വിശ്വാ​സ​മർപ്പി​ച്ചി​ട്ടില്ല, ഉണ്ടോ?” യേശു​വി​ന്റെ പഠിപ്പി​ക്ക​ലി​നെ ഖണ്ഡിക്കാൻ യാതൊ​രു ശ്രമവും ചെയ്‌തില്ല എന്നത്‌ കുറി​ക്കൊ​ള്ളുക. പകരം, യേശു പറഞ്ഞ കാര്യ​ങ്ങളെ അവഗണി​ക്കാ​നുള്ള ന്യായ​മാ​യി മോശ​യു​ടെ ന്യായ​പ്ര​മാ​ണ​ത്തിൽ “വിദഗ്‌ദ്ധർ” എന്ന നിലയിൽ യഹൂദ​നേ​താ​ക്കൻമാർ അവരുടെ സ്വന്തം അധികാ​രത്തെ ആശ്രയി​ച്ചു.

ത്രിത്വം, ദേഹി​യു​ടെ അമർത്ത്യത, അഗ്നിന​രകം എന്നിവ​പോ​ലുള്ള ഉപദേ​ശങ്ങൾ ബൈബി​ളിൽനിന്ന്‌ തെളി​യി​ക്കാൻ കഴിയാ​തെ​വ​രു​മ്പോൾ ഇന്ന്‌ പുരോ​ഹി​തൻമാർ സമാന​മായ തന്ത്രങ്ങ​ളി​ലേക്ക്‌ തിരി​യു​ന്നു​വെ​ന്നത്‌ പ്രസി​ദ്ധ​മാണ്‌.

പ്രാമാ​ണി​ക​രോ​ടുള്ള ദുർബ​ല​മായ അർത്ഥനകൾ പരസ്യ​ത്തിൽ വളരെ​യ​ധി​ക​മാണ്‌, അവിടെ പ്രസി​ദ്ധ​രായ ആളുകൾ തങ്ങൾക്ക്‌ പ്രാവീ​ണ്യ​മുള്ള മണ്ഡലങ്ങ​ളോട്‌ പുലബ​ന്ധ​മി​ല്ലാത്ത മണ്ഡലങ്ങ​ളിൽ സാധാരണ സാക്ഷ്യം നൽകുന്നു. ഒരു നല്ല ഗോൾഫ്‌ കളിക്കാ​രൻ ഫോ​ട്ടോ​പ​കർപ്പെ​ടു​ക്കുന്ന ഒരു യന്ത്രം വാങ്ങാൻ നിങ്ങളെ പ്രോൽസാ​ഹി​പ്പി​ക്കു​ന്നു. ഒരു ഫുട്‌ബോൾ കളിക്കാ​രൻ ഫ്രിഡ്‌ജ്‌ വാങ്ങാൻ പ്രചോ​ദി​പ്പി​ക്കു​ന്നു. ഒരു ഒളിം​ബിക്ക്‌ കായി​കാ​ഭ്യാ​സി പ്രഭാ​ത​ഭ​ക്ഷ​ണ​ത്തി​നുള്ള ഒരു ധാന്യം ശുപാർശ​ചെ​യ്യു​ന്നു. അത്തരം “പ്രാമാ​ണി​കർക്ക്‌” അവർ വിൽക്കുന്ന ഉല്‌പ​ന്ന​ങ്ങളെ സംബന്ധിച്ച്‌ അല്‌പമേ അറിയാ​വൂ എന്നോ ഒട്ടും​തന്നെ അറിയി​ല്ലെ​ന്നോ ഉള്ള സംഗതി അനേക​രും ആലോ​ചി​ക്കു​ന്നില്ല.

ന്യായ​മാ​യും വിദഗ്‌ദ്ധ​രാ​യി​രി​ക്കു​ന്ന​വർപോ​ലും—മററ്‌ ഏതൊ​രു​വ​നെ​യും​പോ​ലെ—പക്ഷംപി​ടി​ക്കു​ന്ന​വ​രാ​കാ​മെ​ന്ന​തും തിരി​ച്ച​റി​യുക. ഉയർന്ന അധികാ​ര​പ​ത്ര​ങ്ങ​ളുള്ള ഒരു ഗവേഷകൻ പുകവലി ഹാനി​ക​ര​മ​ല്ലെന്ന്‌ അവകാ​ശ​പ്പെ​ട്ടേ​ക്കാം. എന്നാൽ അയാളോ അവളോ പുകയി​ല​വ്യ​വ​സാ​യ​ത്തി​ന്റെ ഉദ്യോ​ഗ​ത്തി​ലാ​ണെ​ങ്കിൽ അത്തരം “വിദഗ്‌ദ്ധ”സാക്ഷ്യം സംശയി​ക്കേ​ണ്ട​തല്ലേ?

മൂന്നാം നമ്പർ മിഥ്യ

‘ആൾക്കൂ​ട്ട​ത്തോ​ടു ചേരുക’ ഇവിടത്തെ അപേക്ഷ ജനസമ്മ​തി​യുള്ള വികാ​ര​ങ്ങ​ളോ​ടും മുൻവി​ധി​ക​ളോ​ടും വിശ്വാ​സ​ങ്ങ​ളോ​ടു​മാണ്‌. ആളുകൾ പൊതു​വിൽ പൊരു​ത്ത​പ്പെ​ടാൻ ഇഷ്ടപ്പെ​ടു​ന്നു. നിലവി​ലുള്ള അഭി​പ്രാ​യ​ങ്ങൾക്കെ​തി​രാ​യി സംസാ​രി​ക്കു​ന്ന​തി​നുള്ള ചിന്തയിൽനിന്ന്‌ പിൻവ​ലി​യാൻ നാം ചായ്‌വു​കാ​ണി​ക്കു​ന്നു. ഭൂരിപക്ഷ അഭി​പ്രാ​യം ശരി​യെന്ന്‌ വീക്ഷി​ക്കാ​നുള്ള ഈ പ്രവണത, ‘ആൾക്കൂ​ട്ട​ത്തോ​ടു ചേരുക’ എന്ന മിഥ്യാ​ബോ​ധ​ത്തിൽ ഊററ​മായ ഫലത്തോ​ടെ ഉപയോ​ഗി​ക്ക​പ്പെ​ടു​ന്നു.

ഉദാഹ​ര​ണ​ത്തിന്‌, പ്രചാ​ര​മുള്ള ഒരു യൂ.എസ്‌. മാസി​ക​യി​ലെ ഒരു പരസ്യം ഒരു ഗ്ലാസ്‌ റം ആസ്വദി​ക്കുന്ന പുഞ്ചി​രി​ക്കുന്ന കുറെ ആളുകളെ ചിത്രീ​ക​രി​ച്ചു. ആ ചിത്ര​ത്തോ​ടു​കൂ​ടെ ഈ മുദ്രാ​വാ​ക്യ​വും ഉണ്ടായി​രു​ന്നു: “സംഭവി​ക്കു​ന്നത്‌ അതാണ്‌. അമേരി​ക്ക​യി​ലു​ട​നീ​ളം ആളുകൾ റമ്മി​ലേക്കു തിരി​യു​ന്നു.” ഇത്‌ ആൾക്കൂ​ട്ട​ത്തോ​ടു ചേരാ​നുള്ള സ്‌പഷ്ട​മായ ഒരു അഭ്യർത്ഥ​ന​യാണ്‌.

മററു​ള്ള​വർ എന്തെങ്കി​ലും ചിന്തി​ക്കു​ക​യോ ചെയ്യു​ക​യോ ചെയ്‌തേ​ക്കാ​മെ​ന്നി​രി​ക്കെ നിങ്ങൾ അതു ചെയ്യണ​മെന്ന്‌ അതിനർത്ഥ​മു​ണ്ടോ? കൂടാതെ ജനസമ്മ​തി​യുള്ള അഭി​പ്രാ​യം അതിൽത്തന്നെ സത്യത്തി​ന്റെ ആശ്രയ​യോ​ഗ്യ​മായ ഒരു അളവു​കോ​ലല്ല. കഴിഞ്ഞ നൂററാ​ണ്ടു​ക​ളിൽ എല്ലാത്തരം ആശയങ്ങ​ളും സാധാ​ര​ണ​യാ​യി അംഗീ​ക​രി​ക്ക​പ്പെ​ട്ടി​രു​ന്നു, പിൽക്കാ​ലത്ത്‌ തെറെ​റന്ന്‌ തെളി​യി​ക്ക​പ്പെ​ടു​വാൻമാ​ത്രം. എങ്കിലും ‘ആൾക്കൂ​ട്ട​ത്തോ​ടു ചേരുക’ എന്ന മിഥ്യാ​ബോ​ധം നിലനിൽക്കു​ന്നു. ‘അത്‌ എല്ലാവ​രും ചെയ്യുന്നു!’ എന്ന മുദ്രാ​വാ​ക്യം മയക്കു​മ​രു​ന്നു​പ​യോ​ഗി​ക്കാ​നും വ്യഭി​ചാ​രം ചെയ്യാ​നും തൊഴി​ലു​ട​മ​ക​ളിൽനിന്ന്‌ മോഷ്ടി​ക്കാ​നും നികു​തി​വെ​ട്ടി​ക്കാ​നും ആളുകളെ പ്രേരി​പ്പി​ക്കു​ന്നു.

എല്ലാവ​രും ആ കാര്യങ്ങൾ ചെയ്യു​ന്നി​ല്ലെ​ന്നു​ള്ള​താണ്‌ വസ്‌തുത. അവർ ചെയ്‌താൽപോ​ലും അത്‌ നിങ്ങൾ അങ്ങനെ ചെയ്യാ​നുള്ള ന്യായമല്ല. പുറപ്പാട്‌ 23:2ൽ നൽകപ്പെട്ട ഉപദേശം അങ്ങനെ​യൊ​രു നല്ല പെരു​മാ​റ​റ​ച്ച​ട്ട​മാ​യി ഉതകുന്നു: “നിങ്ങൾ ജനക്കൂ​ട്ടത്തെ പിൻപ​ററി തിൻമ ചെയ്യരുത്‌.”

നാലാം നമ്പർ മിഥ്യ

അതോ ഇതോ എന്ന യുക്തി​വാ​ദം ഈ മിഥ്യ തെര​ഞ്ഞെ​ടു​ക്കാ​നുള്ള ഒട്ടനവധി അവസര​ങ്ങളെ രണ്ടായി ചുരു​ക്കു​ന്നു. ഉദാഹ​ര​ണ​ത്തിന്‌ ഒരു വ്യക്തി​യോട്‌ ഇപ്രകാ​രം പറഞ്ഞേ​ക്കാം: ‘രക്തപ്പകർച്ച സ്വീക​രി​ക്കുക അല്ലെങ്കിൽ നിങ്ങൾ മരിക്കും.’ ഏതു രൂപത്തി​ലുള്ള ‘രക്തവും വർജ്ജി​ക്കാ​നുള്ള’ അവരുടെ ബൈബി​ള​ധി​ഷ്‌ഠിത തീരു​മാ​നം നിമിത്തം യഹോ​വ​യു​ടെ സാക്ഷികൾ പലപ്പോ​ഴും അത്തരം ന്യായ​വാ​ദത്തെ നേരി​ടു​ന്നു. (പ്രവൃ​ത്തി​കൾ 15:29) ഈ ന്യായ​വാ​ദ​ത്തി​ന്റെ ബലഹീ​ന​ത​യോ? ശരിയായ മററു സാദ്ധ്യ​ത​കളെ അതു പുറന്ത​ള്ളു​ന്നു. പകരം​ചി​കി​ത്സകൾ ഉണ്ടെന്നും മിക്ക ശസ്‌ത്ര​ക്രി​യ​ക​ളും രക്തംകൂ​ടാ​തെ വിജയ​ക​ര​മാ​യി ചെയ്യാൻ കഴിയും എന്നും വസ്‌തു​തകൾ പ്രകട​മാ​ക്കു​ന്നു. വിദഗ്‌ദ്ധ​രായ ഡോക്‌ടർമാർ ഏററവും കുറഞ്ഞ രക്തനഷ്ട​ത്തോ​ടെ ശസ്‌ത്ര​ക്രിയ നടത്തുന്നു. മറെറാ​രു സാദ്ധ്യത പ്ലാസ്‌മാ​യു​ടെ അളവ്‌ കൂട്ടു​ന്ന​തിന്‌ രക്തമല്ലാത്ത ദ്രാവ​ക​ങ്ങ​ളു​ടെ ഉപയോ​ഗ​മാണ്‌.b അതിനു​പു​റമേ, അനേകർ രക്തപ്പകർച്ച സ്വീക​രിച്ച്‌ മരിച്ചി​ട്ടുണ്ട്‌. അതേ​പ്ര​കാ​രം അനേകർ രക്തം നിരസിച്ച്‌ ജീവി​ച്ചി​ട്ടുണ്ട്‌. അങ്ങനെ അതോ ഇതോ എന്ന യുക്തി​വാ​ദം പിളർപ്പു​ണ്ടാ​ക്കുന്ന ഒന്നാണ്‌.

അതു​കൊണ്ട്‌ അതോ ഇതോ എന്ന യുക്തി​വാ​ദം അവതരി​പ്പി​ക്കു​മ്പോൾ നിങ്ങ​ളോ​ടു​തന്നെ ചോദി​ക്കുക, ‘യഥാർത്ഥ​ത്തിൽ രണ്ടു സാദ്ധ്യ​തകൾ മാത്രമേ ഉള്ളോ? മററുള്ളവ ഉണ്ടായി​രി​ക്കാൻ ഇടയു​ണ്ടോ?’

അഞ്ചാം നമ്പർ മിഥ്യ

അമിത ലഘൂക​രണം ഇവിടെ ഒരു പ്രസ്‌താ​വ​ന​യോ വാദഗ​തി​യോ പ്രസക്ത​മായ പരിഗ​ണ​ന​കളെ അവഗണി​ക്കന്നു, ഒരു സങ്കീർണ്ണ വിഷയ​മാ​യി​രി​ക്കാ​വു​ന്ന​തി​നെ അതിയാ​യി ലഘൂക​രി​ച്ചു​കൊ​ണ്ടു​തന്നെ.

സങ്കീർണ്ണ​മാ​യ ഒരു വിഷയം ലളിത​മാ​ക്കു​ന്ന​തിൽ യാതൊ​രു തെററു​മില്ല—നല്ല ഉപദേ​ഷ്‌ടാ​ക്കൾ എപ്പോ​ഴും അതു ചെയ്യുന്നു. എന്നാൽ ചില​പ്പോൾ സത്യം വളച്ചൊ​ടി​ക്കുന്ന അളവോ​ളം ഒരു വിഷയം ലളിത​മാ​ക്ക​പ്പെ​ടു​ന്നു. ഉദാഹ​ര​ണ​ത്തിന്‌, നിങ്ങൾ ഇപ്രകാ​രം വായി​ച്ചേ​ക്കാം: ‘ത്വരിത ജനസം​ഖ്യാ​വർദ്ധ​ന​വാണ്‌ വികസ്വ​ര​രാ​ജ്യ​ങ്ങ​ളിൽ ദാരി​ദ്ര്യ​ത്തി​നു കാരണം.’ അതിൽ അല്‌പം സത്യമുണ്ട്‌, എന്നാൽ അത്‌ രാഷ്‌ട്രീയ ദുർഭ​ര​ണ​വും വ്യാപാര ചൂഷണ​വും കാലാ​വ​സ്ഥ​യും​പോ​ലെ മററു പ്രധാന കാരണങ്ങൾ അവഗണി​ക്കു​ന്നു.

ദൈവ​വ​ച​ന​മാ​യ ബൈബി​ളി​ന്റെ സംഗതി​യി​ലേക്കു വരു​മ്പോൾ അമിത ലഘൂക​രണം പല തെററി​ദ്ധാ​ര​ണ​ക​ളിൽ കലാശി​ച്ചി​രി​ക്കു​ന്നു. ഉദാഹ​ര​ണ​ത്തിന്‌ പ്രവൃ​ത്തി​കൾ 16:30, 31ലെ വിവരണം പരിചി​ന്തി​ക്കുക. അവിടെ ഒരു ജയിൽ ഉദ്യോ​ഗസ്ഥൻ രക്ഷ സംബന്ധിച്ച്‌ ഒരു ചോദ്യം ചോദി​ച്ചു. പൗലോസ്‌ ഇപ്രകാ​രം ഉത്തരം നൽകി: “കർത്താ​വായ യേശു​വിൽ വിശ്വ​സി​ക്കുക, നീ രക്ഷിക്ക​പ്പെ​ടും.” രക്ഷക്ക്‌ വെറുതെ മാനസി​ക​മാ​യി യേശു​വി​നെ അംഗീ​ക​രി​ക്കു​ന്നതു മതി​യെന്ന്‌ അനേകർ നിഗമ​ന​ത്തി​ലെ​ത്തി​യി​രി​ക്കു​ന്നു!

ഇത്‌ അമിത ലഘൂക​ര​ണ​മാണ്‌. നമ്മുടെ മറുവി​ല​ക്കാ​ര​നെന്ന നിലയിൽ യേശു​വി​ലുള്ള വിശ്വാ​സം അത്യന്താ​പേ​ക്ഷി​ത​മാ​ണെ​ന്നു​ള്ളത്‌ സത്യം​തന്നെ. എന്നാൽ യേശു പഠിപ്പി​ച്ച​തും കല്‌പി​ച്ച​തു​മായ കാര്യങ്ങൾ വിശ്വ​സി​ക്കു​ന്ന​തും ബൈബിൾസ​ത്യ​ങ്ങ​ളു​ടെ ഒരു പൂർണ്ണ​ഗ്രാ​ഹ്യം നേടു​ന്ന​തും ആവശ്യ​മാണ്‌. പൗലോ​സും ശീലാ​സും തുടർന്ന്‌ “[ജയില​റോ​ടും] അയാളു​ടെ ഭവനത്തി​ലുള്ള എല്ലാവ​രോ​ടും യഹോ​വ​യു​ടെ വചനം സംസാ​രി​ച്ചു.” (പ്രവൃ​ത്തി​കൾ 16:32) രക്ഷയിൽ അനുസ​ര​ണ​വും ഉൾപ്പെ​ടു​ന്നു. യേശു “തന്നെ അനുസ​രി​ക്കുന്ന ഏവർക്കും നിത്യ​ര​ക്ഷ​യു​ടെ ഉത്തരവാ​ദി​യാ​യി​ത്തീർന്നു” എന്ന്‌ എഴുതി​യ​പ്പോൾ പൗലോസ്‌ പിന്നീട്‌ ഇത്‌ പ്രകട​മാ​ക്കി.—എബ്രായർ 5:9.

ഒരു പുരാതന സദൃശ​വാ​ക്യം പറയുന്നു: “അനുഭ​വ​പ​രി​ച​യ​മി​ല്ലാ​ത്തവൻ ഏതു വാക്കും വിശ്വ​സി​ക്കു​ന്നു, എന്നാൽ പ്രാ​യോ​ഗി​ക​വീ​ക്ഷ​ണ​മു​ള്ളവൻ തന്റെ കാലടി​കൾ സൂക്ഷി​ക്കു​ന്നു.” (സദൃശ​വാ​ക്യ​ങ്ങൾ 14:15) അതു​കൊണ്ട്‌ മിഥ്യാ​ബോ​ധ​ങ്ങൾക്ക്‌ വശംവ​ദ​രാ​ക​രുത്‌. പറഞ്ഞ കാര്യങ്ങൾ സംബന്ധിച്ച ന്യായ​മായ ആക്രമ​ണ​ങ്ങ​ളും വ്യക്തി​ത്വ​ങ്ങ​ളു​ടെ​മേ​ലുള്ള വിലകെട്ട ആക്രമ​ണ​ങ്ങ​ളും തമ്മിൽ വേർതി​രി​ക്കാൻ പഠിക്കുക. “പ്രാമാ​ണി​ക​രോ”ടുള്ള ദുർബ​ല​മായ അർത്ഥന​ക​ളാ​ലും ‘ആൾക്കൂ​ട്ട​ത്തോ​ടു ചേരാ’നുള്ള പ്രേര​ണ​ക​ളാ​ലും അതോ ഇതോ എന്ന യുക്തി​വാ​ദ​ത്താ​ലും അമിത ലഘൂക​ര​ണ​ത്താ​ലും കബളി​പ്പി​ക്ക​പ്പെ​ട​രുത്‌—വിശേ​ഷി​ച്ചും മതസത്യം പോലെ ജീവൽപ്ര​ധാ​ന​മായ എന്തെങ്കി​ലും ഉൾപ്പെ​ട്ടി​രി​ക്കു​മ്പോൾ. എല്ലാ വസ്‌തു​ത​ക​ളും പരി​ശോ​ധി​ക്കുക, അല്ലെങ്കിൽ ബൈബിൾ പറയുന്ന പ്രകാരം “സകലവും നിശ്ചയ​പ്പെ​ടു​ത്തുക.”—1 തെസ്സ​ലോ​നീ​ക്യർ 5:21. (g90 5⁄22)

[അടിക്കു​റി​പ്പു​കൾ]