മാതാ​പി​താ​ക്ക​ളിൽ നിന്ന്‌ കുട്ടി​കൾക്ക്‌ എന്താണാ​വ​ശ്യം

ഒരു കുട്ടി​യു​ടെ വിദ്യാ​ഭ്യാ​സ​ത്തി​ന്റെ വിജയം കേവലം അവനു ലഭിക്കുന്ന മാർക്കി​ന്റെ അടിസ്ഥാ​ന​ത്തിൽ അളന്നു​കൂ​ടാ. അവൻ വളർത്തി​യെ​ടു​ക്കുന്ന മൂല്യങ്ങൾ, അവന്റെ ധാർമ്മിക നിലവാ​രങ്ങൾ, അവന്റെ പെരു​മാ​ററം, അവന്റെ ചിന്താ​രീ​തി ഇവയെ​ല്ലാം കൂടുതൽ പ്രാധാ​ന്യ​മു​ള്ള​വ​യാണ്‌. എന്നാൽ ഈ മണ്ഡലങ്ങ​ളിൽ കുട്ടി​യു​ടെ വളർച്ച​യ്‌ക്കുള്ള പ്രമുഖ ഉത്തരവാ​ദി​ത്തം ആരു വഹിക്കു​ന്നു?

“മാതാ​പി​താ​ക്കൾ വഹിക്കു​ന്നു” എന്നു ദീർഘ​കാ​ലം സ്‌കൂൾ കൗൺസെലർ ആയിരുന്ന ഒരാൾ പറയുന്നു. “പ്രായ​പൂർത്തി​യാ​കു​മ്പോ​ഴേക്ക്‌ ബുദ്ധി​പ​ര​മാ​യും ശാരീ​രി​ക​മാ​യും വൈകാ​രി​ക​മാ​യും നന്നായി വളർച്ച പ്രാപിച്ച ചെറു​പ്പ​ക്കാ​രെ ഉളവാ​ക്കാൻ മാതാ​പി​താ​ക്കളെ പിന്തു​ണ​യ്‌ക്കു​ക​യാണ്‌ ഔപചാ​രിക വിദ്യാ​ഭ്യാ​സ​ത്തി​ന്റെ പ്രഥമ​ല​ക്ഷ്യം.”

യോഗ്യൻമാ​രാ​യ ചെറു​പ്പ​ക്കാ​രെ ഉളവാ​ക്കുന്ന കാര്യ​ത്തിൽ എന്തു പ്രയോ​ജ​ന​ക​ര​മാ​ണെ​ന്നും പ്രയോ​ജ​ന​ക​ര​മ​ല്ലെ​ന്നും ഇങ്ങനെ​യുള്ള സ്‌കൂൾ കൗൺസെ​ലർമാർ മിക്ക​പ്പോ​ഴും മനസ്സി​ലാ​ക്കി​യി​രി​ക്കു​ന്നു. ഇത്തരം മറെറാ​രു കൗൺസെ​ല​റായ റോഡി കാമ​റോൺ വർഷങ്ങ​ളാ​യി നൂറു​ക​ണ​ക്കി​നു കേസുകൾ കൈകാ​ര്യം ചെയ്‌തി​ട്ടുണ്ട്‌. അദ്ദേഹ​ത്തോ​ടു ഉണരുക! ലേഖകൻ ചോദി​ച്ചു: “വിജയം നേടു​ന്ന​തിന്‌ കുട്ടി​കൾക്ക്‌ യഥാർത്ഥ​ത്തിൽ ഏററവും ആവശ്യം എന്താണ്‌?”

ഒരു നിമിഷം ചിന്തി​ച്ചിട്ട്‌ അദ്ദേഹം മറുപടി പറഞ്ഞു: “കുഴപ്പ​ക്കാ​ര​നായ ഒരു കുട്ടിയെ ചൂണ്ടി​ക്കാ​ണി​ക്കൂ, അവന്റെ മാതാ​പി​താ​ക്ക​ളും കുഴപ്പ​ക്കാ​രാ​യി​രി​ക്കാ​നാണ്‌ ഏററവും വലിയ സാദ്ധ്യ​ത​യെന്നു കാണാൻ കഴിയും.” അത്തരം മാതാ​പി​താ​ക്ക​ളോ​ടു സംസാ​രിച്ച അനുഭ​വങ്ങൾ അനുസ്‌മ​രി​ച്ചു​കൊണ്ട്‌ അദ്ദേഹം സൂചി​പ്പി​ച്ചു: “ഇത്ര കഠിനാ​ദ്ധ്വാ​നം ചെയ്യു​ന്ന​തും ഇത്ര​യേറെ വീട്ടിൽ നിന്നു വിട്ടു​നിൽക്കേ​ണ്ട​താ​യി വരുന്ന​തും എന്തി​നെന്ന്‌ എന്നോടു വിശദീ​ക​രി​ച്ചു​കൊണ്ട്‌ അവർ മിക്ക​പ്പോ​ഴും പറയു​ന്നത്‌ തങ്ങൾക്കി​ല്ലാഞ്ഞ വസ്‌തു​ക്കൾ മക്കൾക്കു നൽകാൻ അവർ ആഗ്രഹി​ക്കു​ന്നു എന്നാണ്‌.”

എന്നാൽ ചെറു​പ്പ​മാ​യി​രു​ന്ന​പ്പോൾ അനേകം മാതാ​പി​താ​ക്കൾക്കി​ല്ലാ​തി​രുന്ന ഭൗതിക സൗകര്യ​ങ്ങ​ളാ​ണോ കുട്ടി​കൾക്ക്‌ യഥാർത്ഥ​ത്തിൽ ആവശ്യം? ചെല​വേ​റിയ കാറു​ക​ളും മനോഹര വസ്‌ത്ര​ങ്ങ​ളും വിചി​ത്ര​മായ അവധി​ക്കാ​ല​ങ്ങ​ളു​മാ​ണോ വിജയ​മുള്ള യോഗ്യ​രായ വിദ്യാർത്ഥി​ക​ളാ​യി​ത്തീ​രാൻ പ്രധാ​ന​പ്പെട്ടവ? “ഒരാ​ശ്ലേഷം, ഒരു ചുംബനം, സ്‌നേഹം, ശ്രദ്ധ ഇവ നൽകു​ന്ന​തിൽ എന്താണു​തെ​ററ്‌?” കാമെ​റോൺ ചോദി​ച്ചു: “ഇവയ്‌ക്കൊ​രു ചെലവു​മില്ല, എന്നാൽ കുഞ്ഞു​ങ്ങൾക്ക്‌ ഏററവും ആവശ്യം ഇവയാണ്‌.”

സമയം, സ്‌നേഹം, താൽപ​ര്യം

വാത്സല്യ​വും സ്‌നേ​ഹ​വും നിറഞ്ഞ ശ്രദ്ധയാണ്‌ കുട്ടി​ക​ളു​ടെ അടിസ്ഥാ​നാ​വ​ശ്യം. ഇതു നൽകാൻ മാതാ​പി​താ​ക്കൾക്കു കഴിയുന്ന ഏററവും ഫലപ്ര​ദ​മായ മാർഗ്ഗം നിസ്വാർത്ഥ​മാ​യി തങ്ങളെ​ത്തന്നെ നൽകു​ക​യും സമയം അവരോ​ടൊത്ത്‌ ചെലവി​ടു​ക​യും ആത്മാർത്ഥ​വും തടസ്സമി​ല്ലാ​ത്ത​തു​മായ സ്‌നേ​ഹ​വും ആഴമായ താല്‌പ​ര്യ​വും പ്രകട​മാ​ക്കാൻ ലജ്ജിക്കാ​തി​രി​ക്കു​ക​യും ചെയ്യു​ക​യാണ്‌. ഒരെഴു​ത്തു​കാ​രൻ ചൂണ്ടി​ക്കാ​ട്ടി​യ​തു​പോ​ലെ ഒരുവനു മറെറാ​രാൾക്കു നൽകാൻ കഴിയുന്ന ഏററവും നല്ല സമ്മാനം “അവിടെ ഉണ്ടായി​രി​ക്കുക” എന്നതാണ്‌.

യു. എസ്സ്‌. നാഷനൽ ഇൻസ്‌റ​റി​റ​റ്യൂട്ട്‌ ഫോർമെൻറൽ ഹെൽത്ത്‌ മക്കളെ വളർത്തു​ന്ന​തി​നെ​പ്പ​റ​റ​യുള്ള ലളിത സത്യങ്ങൾ എന്ന അവരുടെ ലഘുപ​ത്രി​ക​യിൽ വിജയ​പ്ര​ദ​രായ മാതാ​പി​താ​ക്ക​ളെ​ക്കു​റി​ച്ചുള്ള ഒരു സർവ്വേ​യു​ടെ ഫലങ്ങൾ റിപ്പോർട്ടു ചെയ്‌തു. “കർമ്മോ​ത്സു​ക​രും നമ്മുടെ സമൂഹ​ത്തി​നു യോഗ്യൻമാ​രു​മാ​യി കാണപ്പെട്ട” 21 വയസ്സി​നു​മേൽ പ്രായ​മുള്ള മക്കളു​ള്ള​വ​രാ​യി​രു​ന്നു ഈ മാതാ​പി​താ​ക്കൾ. ഈ ഉത്തമരായ ചെറു​പ്പ​ക്കാ​രു​ടെ മാതാ​പി​താ​ക്ക​ളോ​ടു ഇങ്ങനെ ചോദി​ച്ചു: “നിങ്ങളു​ടെ വ്യക്തി​പ​ര​മായ അനുഭ​വ​ജ്ഞാ​നം അടിസ്ഥാ​ന​പ്പെ​ടു​ത്തി മററു മാതാ​പി​താ​ക്കൾക്കു നൽകാൻ നിങ്ങൾക്കുള്ള നല്ല ഉപദേശം എന്താണ്‌?” കൂടുതൽ പേരു​ടെ​യും മറുപടി ഇങ്ങനെ​യാ​യി​രു​ന്നു: ‘ധാരാളം സ്‌നേ​ഹി​ക്കുക,’ ‘ക്രിയാ​ത്മ​ക​മാ​യി ശിക്ഷണം നൽകുക,’ ‘യാഥാർത്ഥ്യ​ബോ​ധ​മു​ള്ള​വ​രാ​യി​രി​ക്കുക.’

ഇതു വിരസ​മാ​യി, പഴഞ്ചനാ​യി തോന്നു​ന്നു​വോ? എന്നാൽ മാതാ​പി​താ​ക്കൾ സ്വയം ചോദി​ക്കട്ടെ: ‘ചിലതു പ്രയോ​ജ​ന​ക​ര​മാ​ണെ​ങ്കിൽ വ്യത്യ​സ്‌ത​മായ, പ്രയോ​ജ​ന​ക​ര​മ​ല്ലാത്ത എന്തി​നെ​ങ്കി​ലും വേണ്ടി അതു തിരസ്‌ക്ക​രി​ക്കു​ന്ന​തെ​ന്തിന്‌? ഉവ്വ്‌ സമയവും സ്‌നേ​ഹ​വും താൽപ​ര്യ​വും കുടും​ബ​ങ്ങളെ ഒന്നായി പിടിച്ചു നിർത്തുന്ന വജ്രപ്പ​ശ​യാണ്‌. തങ്ങളുടെ കുട്ടി​കൾക്കു ഈ അടിസ്ഥാ​നാ​വ​ശ്യ​ങ്ങൾ നൽകുക മാതാ​പി​താ​ക്ക​ളു​ടെ ഗൃഹപാ​ഠ​മാണ്‌. സ്വന്തം ഉത്തരവാ​ദി​ത്തങ്ങൾ മാതാ​പി​താ​ക്കൾ നിറ​വേ​റ​റു​ന്നത്‌ വിജയ​പ്ര​ദ​രായ വിദ്യാർത്ഥി​ക​ളും ഉത്തമൻമാ​രായ മുതിർന്ന​വ​രും ആയിത്തീ​രാൻ തങ്ങളുടെ മക്കളെ സഹായി​ക്കും. കുറു​ക്കു​വ​ഴി​കൾ ഒന്നുമില്ല, കുട്ടികൾ വേണ്ട വ്യത്യാ​സം വരുത്തി​ക്കൊ​ള്ളും എന്നു കരുതി ഭൗതിക വസ്‌തു​ക്കൾ നൽകി​ക്കൊണ്ട്‌ ഒന്നും പകരം വയ്‌ക്കാ​നു​മില്ല.

ചെടി​ക​ളോ​ടു താരത​മ്യം

പല സംഗതി​ക​ളി​ലും കുട്ടികൾ ചെടി​ക​ളെ​പ്പോ​ലെ വളർന്നു വികാസം പ്രാപി​ക്കു​ന്നു. ഒരു നല്ല വിളവു കൊയ്യു​ന്ന​തിന്‌ എന്താണാ​വ​ശ്യ​മെന്ന്‌ സമർത്ഥ​നായ ഒരു കൃഷി​ക്കാ​രന്‌ അറിയാം—വളക്കൂ​റുള്ള കൃഷി​യോ​ഗ്യ​മായ മണ്ണ്‌, ചൂടുള്ള സൂര്യ​പ്ര​കാ​ശം, വെള്ളം, കളയെ​ടുപ്പ്‌, നല്ല പരിച​രണം. മിക്ക​പ്പോ​ഴും പ്രയാ​സ​ക​ര​മായ അവസര​ങ്ങ​ളും വിള​വെ​ടു​പ്പു​വരെ ഉടനീളം മനക്ലേ​ശ​ങ്ങ​ളു​മുണ്ട്‌. എന്നാൽ കഠിനാ​ദ്ധ്വാ​ന​ത്താ​ലു​ള​വായ നേട്ടം കാണു​മ്പോൾ വിജയി​ക​ളായ കൃഷി​ക്കാർക്ക്‌ എത്ര അഭിമാ​നം!

നിശ്ചയ​മാ​യും ഒരു മനുഷ്യ​ജീ​വി​തം ഒരു കൃഷി​ക്കാ​രന്റെ വിള​വെ​ടു​പ്പി​നേ​ക്കാൾ വളരെ വിലയു​ള്ള​താണ്‌! അതിനാൽ ആഗ്രഹി​ക്കുന്ന ഫലം കുറഞ്ഞ പ്രയത്‌ന​ത്താൽ ലഭ്യമാ​ക​ണ​മെന്നു പ്രതീ​ക്ഷി​ക്ക​ണ​മോ? നാഷനൽ ഇൻസ്‌റ​റി​റ​റ്യൂട്ട്‌ ഓഫ്‌ മെൻറൽ ഹെൽത്ത്‌ സർവ്വേ ചെയ്‌ത മാതാ​പി​താ​ക്ക​ളു​ടെ​യും കഴിഞ്ഞ രണ്ടു വർഷം ഉണരുക! ഇൻറർവ്യൂ ചെയ്‌ത മാതാ​പി​താ​ക്ക​ളു​ടെ​യും വിദ്യാർത്ഥി​ക​ളു​ടെ​യും അഭി​പ്രാ​യ​മ​നു​സ​രിച്ച്‌ പ്രതീ​ക്ഷി​ക്കാൻ പാടില്ല.

ഒരു കുഞ്ഞിനെ വളർത്തു​ന്നത്‌ കടപ്പാ​ടു​കൾ കൈവ​രു​ത്തു​മെന്ന്‌ വിജയ​പ്ര​ദ​രായ മാതാ​പി​താ​ക്കൾക്ക്‌ അറിയാം. ഭവനത്തി​ലെ സാഹച​ര്യ​ങ്ങൾ നല്ല ഊഷ്‌മ​ള​ത​യോ​ടും ധാരണ​യോ​ടും കൂടെ ഉചിത​മാ​യ​താ​യി​രി​ക്കണം. മക്കളിൽ പഠന​ത്തോ​ടും ജീവി​ത​ത്തോ​ടു​മുള്ള ഒരു വിലമ​തിപ്പ്‌ മാതാ​പി​താ​ക്കൾ ശാന്തമാ​യും സ്ഥിരോ​ത്സാ​ഹ​ത്തോ​ടെ​യും വളർത്തി​യെ​ടു​ക്കേ​ണ്ട​തുണ്ട്‌. അവർ ക്ഷമാപൂർവ്വം നിരീ​ക്ഷി​ക്കു​ക​യും അനുരൂ​പ​പ്പെ​ടു​ക​യും ഓരോ ജീവി​ത​പ​ന്ഥാ​വി​നെ​യും ബുദ്ധി​മു​ട്ടി​ക്കുന്ന മനഃ​ക്ലേ​ശ​ങ്ങ​ളും പ്രയാ​സ​ങ്ങ​ളും ഉണ്ടാകു​മ്പോൾ സ്‌നേ​ഹ​പൂർവ്വം സഹകരി​ക്കു​ക​യും ചെയ്യേ​ണ്ട​തുണ്ട്‌. മാതാ​പി​താ​ക്കൾ ഈ കാര്യങ്ങൾ ചെയ്യു​ന്നു​വെ​ങ്കിൽ വിളവ്‌ ഉത്തമനായ മകനോ ഉത്തമയായ മകളോ ആയിരി​ക്കും. (g88 9/8)

[6-ാം പേജിലെ ആകർഷ​ക​വാ​ക്യം]

‘കുഴപ്പ​ക്കാ​ര​നായ ഒരു കുട്ടിയെ ചൂണ്ടി​ക്കാ​ണി​ക്കൂ, അവന്റെ മാതാ​പി​താ​ക്ക​ളും കുഴപ്പ​ക്കാ​രാ​യി​രി​ക്കാ​നാണ്‌ ഏററവും വലിയ സാദ്ധ്യ​ത​യെന്ന്‌ കാണാൻ കഴിയും’

[6-ാം പേജിലെ ആകർഷ​ക​വാ​ക്യം]

സമയവും സ്‌നേ​ഹ​വും താൽപ്പ​ര്യ​വും കുടും​ബ​ങ്ങളെ ഒന്നായി പിടി​ച്ചു​നിർത്തുന്ന വജ്രപ്പ​ശ​യാണ്‌