ചെറു​പ്പ​ക്കാർ ചോദി​ക്കു​ന്നു . . .

എന്റെ അദ്ധ്യാ​പകൻ ഇത്ര നീതി​യി​ല്ലാ​ത്ത​വ​നാ​യി​രി​ക്കു​ന്ന​തെ​ന്തു​കൊണ്ട്‌?

പതിനാല്‌ വയസ്സ്‌ പ്രായ​മുള്ള വിക്കി പല ചെറു​പ്പ​ക്കാർക്ക്‌ വേണ്ടി സംസാ​രി​ച്ചു​കൊണ്ട്‌ ഇങ്ങനെ പറയുന്നു: “എനിക്ക്‌ നീതി​യി​ല്ലാത്ത ഒരദ്ധ്യാ​പ​ക​നു​മാ​യി പൊരു​ത്ത​പ്പെ​ട്ടു​പോ​വുക അസാദ്ധ്യ​മാണ്‌.” എന്തിന്‌, 1981-ൽ നടന്ന 1,60,000 അമേരി​ക്കൻ ചെറു​പ്പ​ക്കാ​രു​ടെ ഒരു സർവ്വേ​യിൽ, 76 ശതമാനം ചെറു​പ്പ​ക്കാർ പക്ഷപാ​ത​പ​ര​മായ ഏതെങ്കി​ലും പ്രവർത്ത​ന​ത്തിന്‌ തങ്ങളുടെ അദ്ധ്യാ​പ​കരെ കുറ്റ​പ്പെ​ടു​ത്തി​ക്കൊണ്ട്‌ അഭി​പ്രാ​യം രേഖ​പ്പെ​ടു​ത്തി!—അമേരി​ക്കൻ കൗമാ​ര​പ്രാ​യ​ക്കാ​രന്റെ സ്വകാ​ര്യ​ജീ​വി​തം.

ചെറു​പ്പ​ക്കാ​രു​ടെ തോന്ന​ലിൽ, അവർ നല്ലനി​ല​യിൽ കഷ്ടപ്പെ​ട്ടിട്ട്‌ അവർക്ക്‌ താഴ്‌ന്ന റാങ്ക്‌ ലഭിക്കു​മ്പോൾ അവർ അസ്വസ്‌ത​രാ​കു​ന്നത്‌ നമുക്ക്‌ മനസ്സി​ലാ​ക്കാ​വു​ന്ന​താണ്‌. ശിക്ഷണം അമിത​മോ അനാവ​ശ്യ​മോ മുൻവി​ധി​യാൽ പ്രേരി​തം​പോ​ലു​മോ ആണെന്ന്‌ തോന്നു​മ്പോൾ അവർ അമർഷം പ്രകടി​പ്പി​ക്കു​ന്നു. “ഞാൻ ഒരിക്കൽ കോട്ടു​വാ​യി​ട്ടു; ഞാൻ കറുത്തവൻ ആയിരി​ക്കു​ന്ന​തു​കൊ​ണ്ടു​മാ​ത്രം, എനിക്ക്‌ വരാന്ത​യി​ലേക്ക്‌ പോ​കേ​ണ്ട​താ​യി വന്നു” എന്ന്‌ 12 വയസ്സുള്ള ഐവാൻ അവകാ​ശ​പ്പെ​ടു​ന്നു.

കൂടാതെ, അദ്ധ്യാ​പ​ക​രു​ടെ വാത്സല്യ​ഭാ​ജ​ന​ങ്ങൾക്ക്‌ പ്രത്യേക ശ്രദ്ധ കൊടു​ക്കു​മ്പോ​ഴോ അവരോട്‌ പ്രത്യേ​കം താല്‌പ​ര്യ​ത്തോ​ടെ ഇടപെ​ടു​മ്പോ​ഴോ യുവാ​ക്കൾക്ക്‌ അമർഷ​മു​ണ്ടാ​കു​ന്നു. പതിമൂന്ന്‌ വയസ്സ്‌ പ്രായ​മുള്ള സയാനാ കുറ്റ​പ്പെ​ടു​ത്തു​ന്നു: “അവർ ഏറ്റവും നന്നായി പഠിക്കു​ന്ന​വ​രോ​ടോ ഏറ്റവും അഴകു​ള്ള​വ​രോ​ടോ പ്രീതി കാട്ടുന്നു.” അങ്ങനെ​യാ​ണെ​ങ്കിൽ, മുകളിൽ പ്രസ്‌താ​വിച്ച സർവ്വേ​യിൽ ചെറു​പ്പ​ക്കാർ ഒരദ്ധ്യാ​പ​കന്റെ സത്യസ​ന്ധ​മായ പെരു​മാ​റ്റത്തെ, അദ്ദേഹം പഠിപ്പി​ക്കുന്ന വിഷയ​ത്തെ​ക്കു​റി​ച്ചുള്ള അദ്ദേഹ​ത്തി​ന്റെ ഗ്രാഹ്യ​ത്തെ​ക്കാൾ കൂടുതൽ പ്രധാ​ന​മാ​യി കണക്കാ​ക്കി​യത്‌ അതിശ​യ​ക​രമല്ല!

അദ്ധ്യാ​പ​ക​രും മനുഷ്യ​രാണ്‌

അദ്ധ്യാപർ അപ്രമാ​ദ​ഗ​തി​യിൽനിന്ന്‌ വിദൂ​ര​ത്തി​ലാണ്‌. അവർക്ക്‌ തങ്ങളു​ടേ​തായ ചിന്താ​ഗ​തി​ക​ളും ഒഴിക​ഴി​വു​ക​ളും, അതെ, മുൻവി​ധി​ക​ളും ഉണ്ട്‌. ചില​പ്പോൾ അവരുടെ വികാ​രങ്ങൾ അവരുടെ വിധി​കളെ ബാധി​ക്കു​ന്നു. തന്റെ അദ്ധ്യാ​പകൻ “എല്ലാവ​രോ​ടും പരുഷ​മാ​യി മറുപടി പറയു​ന്നത്‌” ഫ്രെഡി എന്ന്‌ പേരുള്ള ഒരു യുവാവ്‌ ശ്രദ്ധി​ച്ച​പ്പോൾ അവൻ ഇത്‌ തിരി​ച്ച​റി​ഞ്ഞു. ഫ്രെഡി നയപൂർവ്വം അദ്ധ്യാ​പ​കനെ സമീപിച്ച്‌ കർക്കശ​മായ ഈ പെരു​മാ​റ്റ​ത്തി​ന്റെ കാരണം മനസ്സി​ലാ​ക്കി. “എന്റെ കാറിന്‌ ഇന്നു രാവിലെ എന്തോ കുഴപ്പ​മാ​യി​രു​ന്നു. അത്ര മാത്രം,” എന്ന്‌ അദ്ധ്യാ​പകൻ വിവരി​ച്ചു. “ഞാൻ സ്‌കൂ​ളി​ലേക്ക്‌ വരു​മ്പോൾ അത്‌ അമിത​മാ​യി ചൂടായി. അതു​കൊണ്ട്‌ ഞാൻ താമസി​ച്ചാണ്‌ ഓഫീ​സി​ലെ​ത്തി​യത്‌.”

ഇതു​പോ​ലെ നിങ്ങൾ നിങ്ങ​ളെ​ത്തന്നെ—യാതൊ​രു വ്യക്തമായ കാരണ​വു​മി​ല്ലാ​തെ—ഒരദ്ധ്യാ​പ​കന്റെ ക്രോ​ധ​പാ​ത്ര​മാ​യി കണ്ടെത്തി​യേ​ക്കാം. എന്നാൽ ബൈബിൾ മുന്നറി​യി​പ്പു നൽകുന്നു: “കുപി​ത​നാ​കാൻ തക്കവണ്ണം നിങ്ങളെ നിങ്ങളു​ടെ വികാ​ര​ങ്ങൾക്ക്‌ പെട്ടെന്ന്‌ അടിമ​പ്പെ​ടു​ത്ത​രുത്‌.” (സഭാ​പ്ര​സം​ഗി 7:9) അതെ, ആ സംഗതി​യെ​ക്കു​റിച്ച്‌ നിങ്ങൾ യഥാർത്ഥ​ത്തിൽ എത്രമാ​ത്രം വേദനി​ക്കേ​ണ്ട​തുണ്ട്‌? അത്‌ പെട്ടെന്ന്‌ മറന്നു​പോ​കുന്ന വെറും ഒരു താൽക്കാ​ലിക പൊട്ടി​ത്തെ​റി​യാ​ണോ? സംശയ​ത്തി​ന്റെ പരിണ​ത​ഫലം അദ്ദേഹത്തെ കാണി​ച്ചു​കൊണ്ട്‌ നിങ്ങൾക്ക്‌ മുഴു​സം​ഗ​തി​യും മറക്കാൻ കഴിയു​മോ? ശിഷ്യ​നായ യാക്കോബ്‌ പറഞ്ഞു: “നാമെ​ല്ലാം പലപ്പോ​ഴും ഇടറുന്നു. ആരെങ്കി​ലും വാക്കിൽ ഇടറു​ന്നി​ല്ലെ​ങ്കിൽ, ഈ ഒരുവൻ ഒരു പൂർണ്ണ​മ​നു​ഷ്യ​നാണ്‌, അവന്റെ മുഴു​ശ​രീ​ര​ത്തെ​യും നിയ​ന്ത്രി​ക്കാൻ കഴിയു​ന്ന​വൻതന്നെ.”—യാക്കോബ്‌ 3:2.

അദ്ധ്യാ​പ​ക​രും അവരുടെ വാത്സല്യ​ഭാ​ജ​ന​ങ്ങ​ളും

എന്നാൽ, അദ്ധ്യാ​പ​ക​രു​ടെ വാത്സല്യ​ഭാ​ജ​ന​ങ്ങൾക്കു നൽകുന്ന പ്രത്യേക പരിഗ​ണ​ന​ക​ളാണ്‌ വിശേ​ഷാൽ ശുണ്‌ഠി പിടി​പ്പി​ക്കു​ന്നത്‌. 13 വയസ്സുള്ള കരോ​ളിൻ വിവരി​ക്കു​ന്നു: “അദ്ധാപ​ക​രു​ടെ വാത്സല്യ​ഭാ​ജ​നങ്ങൾ പ്രീതി​യ​നു​ഭ​വി​ക്കുന്ന കുട്ടി​ക​ളാണ്‌—അവർ മറ്റ്‌ വിദ്യാർത്ഥി​ക​ളേ​ക്കാൾ കൂടുതൽ ഇഷ്ടപ്പെ​ടു​ന്ന​വർതന്നെ. സാധാ​ര​ണ​യാ​യി അദ്ധ്യാ​പ​രു​ടെ വാത്സല്യ​ഭാ​ജ​ന​ങ്ങ​ളാണ്‌ സ്‌കൂ​ളി​ലെ വളരെ നല്ല കുട്ടികൾ. അവർ വിരള​മാ​യേ പ്രശ്‌ന​ത്തിൽ ചാടു​ന്നു​ള്ളൂ.”

പ്രൈ​മ​റി സ്‌കൂൾ അദ്ധാപ​ക​രു​ടെ ഒരു സർവ്വേ, അദ്ധാപകർ “തറുതല പറയാതെ അനുസ​രി​ക്കു​ന്ന​വ​രും സാധാ​ര​ണ​യിൽ കവിഞ്ഞ പ്രാപ്‌തി​യു​ള്ള​വ​രു​മായ വിദ്യാർത്ഥി​ക​ളോട്‌, പ്രത്യേ​കിച്ച്‌ നന്നായി പഠിക്കു​ന്ന​വ​രും അനുസ​ര​ണ​മു​ള്ള​വ​രു​മായ പെൺകു​ട്ടി​ക​ളോട്‌” പ്രീതി​കാ​ട്ടാൻ ചായ്‌വു​ള്ള​വ​രാ​ണെന്ന്‌ വ്യക്തമാ​യി വെളി​പ്പെ​ടു​ത്തി. സെവൻറീൻ എന്ന മാസി​ക​യിൽ ഉദ്ധരിച്ച ഒരു യൂണി​വേ​ഴ്‌സി​റ്റി പ്രൊ​ഫസർ കൂടു​ത​ലാ​യി ഇങ്ങനെ പറഞ്ഞു: “ഒരു വിദ്യാർത്ഥി​നി ശ്രദ്ധ പിടി​ച്ചു​പ​റ്റു​ക​യും ചെയ്‌തേ​ക്കാം. കാരണം അവൾ ആ അദ്ധ്യാ​പ​കന്‌ പ്രധാ​ന​മാ​യി​രുന്ന ചിലതിൽ മികച്ചു നിന്നേ​ക്കാം.” കാരണം എന്തുത​ന്നെ​യാ​യാ​ലും, ഒരദ്ധ്യാ​പകൻ ഒരു വിദ്യാർത്ഥിക്ക്‌ പ്രത്യേക പ്രീതി​യോ ശ്രദ്ധയോ നൽകു​മ്പോൾ, അദ്ദേഹം പലപ്പോ​ഴും അമർഷം ജ്വലി​പ്പി​ക്കു​ക​യാണ്‌. കരോ​ളിൻ പറയുന്നു: “അദ്ധ്യാ​പ​രു​ടെ വാത്സല്യ​ഭാ​ജ​ന​ങ്ങ​ള​ല്ലാത്ത മറ്റു​ള്ള​വരെ സംബന്ധി​ച്ചി​ട​ത്തോ​ളം അത്‌ നീതി​യാ​ണെന്ന്‌ ഞാൻ കരുതു​ന്നില്ല.”

എന്തു​കൊ​ണ്ടാണ്‌ ചില അദ്ധ്യാ​പകർ ഈ വിധത്തിൽ പ്രതി​വർത്തി​ക്കു​ന്നത്‌? കൊള്ളാം, ഒരദ്ധ്യാ​പകൻ അനുപ​മ​മായ ആവശ്യ​ങ്ങ​ളും സമ്മർദ്ദ​ങ്ങ​ളും അഭിമു​ഖീ​ക​രി​ക്കു​ന്നു​വെന്ന്‌ മനസ്സിൽ പിടി​ക്കുക. കൗമാ​ര​ത്തി​ലാ​യി​രി​ക്കൽ എന്ന പുസ്‌തകം, അദ്ധ്യാ​പകർ ഒരു “ഗുരു​ത​ര​മായ വിഷമാ​വസ്ഥ”യിലാ​ണെന്ന്‌ വർണ്ണി​ച്ചു​കൊണ്ട്‌ ഇപ്രകാ​രം പറയുന്നു: “അവർ മനസ്സ്‌ പലപ്പോ​ഴും മറ്റൊ​രി​ട​ത്താ​യി​രി​ക്കുന്ന ഇതുപ​തോ അതില​ധി​ക​മോ ചെറു​പ്പ​ക്കാ​രെ അഭിമു​ഖീ​ക​രി​ക്കു​ന്നു. അവരുടെ ജോലി​വി​വ​ര​ങ്ങൾകൊണ്ട്‌ വിദ്യാർത്ഥി​ക​ളു​ടെ ശ്രദ്ധേ​യാ​കർഷി​ക്കു​ക​യെ​ന്ന​താണ്‌ . . . ആ വിവരങ്ങൾ വിദ്യാർത്ഥി​യു​ടെ വ്യക്തി​പ​ര​മായ ജീവി​ത​ത്തോട്‌ നേരിട്ട്‌ ബന്ധമി​ല്ലാ​ത്ത​വ​യാണ്‌. കൂടാതെ, അവ പഠിക്കാൻ അവർക്ക്‌ വിഷമ​മു​ള്ള​വ​യു​മാ​യി​രി​ക്കാം. അദ്ധ്യാ​പ​ക​രു​ടെ മുമ്പിൽ സാധാ​ര​ണ​യാ​യി 15 മിനി​റ്റിൽ കൂടുതൽ ഏതെങ്കി​ലും സംഗതി​യിൽ ശ്രദ്ധ കേന്ദ്രീ​ക​രിച്ച്‌ ശീലി​ച്ചി​ട്ടി​ല്ലാത്ത വളരെ വിഷണ്ണ​രും ശ്രദ്ധ പതറു​ന്ന​വ​രു​മായ ഒരു കൂട്ടം ചെറു​പ്പ​ക്കാ​രാ​ണു​ള്ളത്‌.” ഇതിൽ ഒരളവി​ല​ധി​കം വാസ്‌ത​വ​മു​ള്ള​താ​യി നിങ്ങൾ സമ്മതി​ക്കു​മെന്ന്‌ യാതൊ​രു സംശയ​വു​മില്ല.

അങ്ങനെ​യെ​ങ്കിൽ, ഒരദ്ധ്യാ​പകൻ സ്‌കൂ​ളി​ലെ ‘നല്ലവനും പ്രശ്‌ന​ത്തിൽ ചാടാ​ത്ത​വ​നു​മായ’ വിദ്യാർത്ഥി​യോട്‌ മത കാട്ടി​യേ​ക്കാ​മെ​ന്നത്‌ അതിശ​യി​ക്ക​ത്ത​ക്ക​താ​ണോ? എന്തായി​രു​ന്നാ​ലും നമുക്കു​വേണ്ടി ജീവിതം കൂടുതൽ സുഗമ​മാ​ക്കുന്ന ആരോ​ടെ​ങ്കി​ലും അടുപ്പ​ത്തി​ലാ​കു​ന്നത്‌ മാനു​ഷ​പ്ര​കൃ​ത​മാണ്‌. “മുഖപക്ഷം” കാണി​ക്കു​ന്ന​തി​നെ ബൈബിൾ കുറ്റം വിധി​ക്കു​ന്നു എന്നത്‌ സത്യം​തന്നെ. (യാക്കോബ്‌ 3:17) കൂടാതെ, വാത്സല്യ​ഭാ​ജ​ന​ങ്ങൾക്ക്‌ നിങ്ങ​ളെ​ക്കാൾ കൂടുതൽ ശ്രദ്ധ ലഭിക്കു​ന്ന​താ​യി തോന്നു​മ്പോൾ അത്‌ നിങ്ങളെ പ്രകോ​പി​പ്പി​ച്ചേ​ക്കാം. എന്നാൽ ഇത്‌ ആവശ്യം ദുഷ്ടമാ​ണോ?

അത്‌ ആ വിധത്തിൽ തോന്നി​യേ​ക്കാം. എന്നാൽ യാക്കോബ്‌ തന്റെ പുത്ര​നായ യോസ​ഫി​നെ തന്റെ മറ്റ്‌ പുത്രൻമാ​രെ​ക്കാൾ കൂടുതൽ സ്‌നേ​ഹി​ച്ചു എന്ന്‌ ബൈബിൾ പറയു​ന്ന​താ​യി ഓർക്കുക. എന്തു​കൊണ്ട്‌? യാക്കോ​ബി​ന്റെ ചില പുത്രൻമാർ യാക്കോ​ബിന്‌ തലവേ​ദ​ന​യു​ണ്ടാ​ക്കി. എന്നാൽ യോ​സേ​ഫി​ന്റെ പെരു​മാ​റ്റം നിർദ്ദോ​ഷ​മാ​യി​രു​ന്നു. കൂടാതെ, യോ​സേഫ്‌ യാക്കോ​ബി​ന്റെ ഇഷ്ടഭാ​ര്യാ​യ റാഹേ​ലി​ന്റെ പുത്ര​നാ​യി​രു​ന്നു. ഇത്‌ യാക്കോബ്‌ അവന്റെ മറ്റു പുത്രൻമാർക്കു​വേണ്ടി കരുതി​യില്ല എന്ന്‌ അർത്ഥമാ​ക്കി​യോ? മറിച്ചാണ്‌. ഒരവസ​ര​ത്തിൽ യാക്കോബ്‌ തന്റെ മറ്റു പുത്രൻമാർ “ക്ഷേമാ​യും സുഖമാ​യു​മി​രി​ക്കു​ന്നു​വോ” എന്നറി​യാൻ യോസ​ഫി​നെ അയയ്‌ക്കു​ക​പോ​ലും ചെയ്‌തു. മാത്രമല്ല, യാക്കോബ്‌ തന്റെ മരണശ​യ്യ​യിൽവെച്ച്‌ അനു​ഗ്ര​ഹങ്ങൾ നൽകു​മ്പോൾ, അവൻ തന്റെ സകല പുത്രൻമാ​രോ​ടും നീതി​യും നിഷ്‌പ​ക്ഷ​ത​യും ഉള്ളവനാ​യി​രു​ന്നു.—ഉല്‌പ്പത്തി 34:30; 35:22; 37:2, 3, 14; 49:1-33.

അതു​കൊണ്ട്‌, നിങ്ങളു​ടെ വിദ്യാ​ഭ്യാ​സ​പ​ര​മായ ആവശ്യങ്ങൾ അവഗണി​ക്കാ​ത്തി​ട​ത്തോ​ളം​കാ​ലം, പ്രയത്‌ന​ശാ​ലി​യായ ഏതെങ്കി​ലും വിദ്യാർത്ഥി അദ്ധ്യാ​പ​കന്റെ ഒരു വാത്സല്യ​ഭാ​ജ​ന​മാ​യി​രി​ക്കു​ന്ന​തിൽ എന്തു​കൊണ്ട്‌ അസ്വസ്‌ത​രാ​വു​ക​യോ അസൂയ​പ്പെ​ടു​ക​യോ ചെയ്യണം? അതോ​ടൊ​പ്പം തന്നെ, നിങ്ങൾ സ്വല്‌പ​മേറെ പ്രയത്‌ന​ശാ​ലി​യാ​യി​രി​ക്കു​ക​യെ​ന്നത്‌ മോശ​മായ ഒരാശ​യ​മാ​യി​രി​ക്ക​യില്ല.

ക്ലാസ്സ്‌ മുറി​യി​ലെ മത്സരം

എന്നാൽ തന്റെ വിദ്യാർത്ഥി​ക​ളോട്‌ യഥാർത്ഥ​മാ​യും വൈരാ​ഗ്യ​മു​ള്ള​വ​നാ​യി കാണ​പ്പെ​ടുന്ന അദ്ധ്യാ​പ​കനെ സംബന്ധി​ച്ചെന്ത്‌? ഒരു വിദ്യാർത്ഥി തന്റെ അദ്ധ്യാ​പ​കനെ സംബന്ധിച്ച്‌ ഇപ്രകാ​രം പറഞ്ഞു: “നാമെ​ല്ലാം അദ്ദേഹ​ത്തോട്‌ യുദ്ധം പ്രഖ്യാ​പി​ച്ചി​രി​ക്ക​യാ​ണെന്ന്‌ അദ്ദേഹം ചിന്തി​ച്ചു​കൊ​ണ്ടി​രി​ക്കു​ന്നു. അദ്ദേഹം നമ്മു​ടെ​മേൽ വിജയം നേടണ​മെന്ന്‌ തീരു​മാ​നി​ച്ചു. അദ്ദേഹം ഒരു ഭ്രാന്ത​നാ​യി​രു​ന്നു.” എന്നിരു​ന്നാ​ലും, തങ്ങൾക്കും അല്‌പ​സ്വ​ല്‌പം “മാനസി​ക​രോ​ഗി​യെ​പ്പോ​ലെ” ആയിരി​ക്കാ​നുള്ള ഒരവകാ​ശം ഉണ്ടെന്ന്‌ പല അദ്ധ്യാ​പ​ക​രും വിചാ​രി​ക്കു​ന്നു.

ഒരു യുവാവ്‌ ഒരു ഉണരുക! ലേഖക​നോട്‌ ഇപ്രകാ​രം പറഞ്ഞു: “എന്റെ സ്‌കൂ​ളിൽ അദ്ധ്യാ​പ​കർക്ക്‌ വിദ്യാർത്ഥി​കളെ ഭയമാണ്‌.” അതെ, ബൈബിൾ മുൻകൂ​ട്ടി​പ​റ​ഞ്ഞ​തു​പോ​ലെ ഇവ “ഇടപെ​ടാൻ പ്രയാ​സ​മുള്ള ദുർഘ​ട​കാ​ല​ങ്ങ​ളാണ്‌.” ചെറു​പ്പ​ക്കാർ പലപ്പോ​ഴും “ആത്മനി​യ​ന്ത്ര​ണ​മി​ല്ലാ​ത്ത​വ​രും ഉഗ്രൻമാ​രും നൻമ​പ്രി​യ​മി​ല്ലാ​ത്ത​വ​രു​മാണ്‌.” (2 തിമോ​ഥെ​യോസ്‌ 3:1-3) യു. എസ്‌. ന്യൂസ്‌ ആൻഡ്‌ വേൾഡ്‌ റിപ്പോർട്ട്‌ ഇപ്രകാ​രം പറഞ്ഞു: “പരിഷ്‌കൃ​ത​മായ പല സ്‌കൂൾ ജില്ലക​ളി​ലെ​യും അദ്ധ്യാ​പകർ അക്രമ​ത്തി​ന്റെ ഭയത്തി​ലാണ്‌. കഴിഞ്ഞു​കൂ​ടു​ന്നത്‌.”

ശാരീ​രി​ക​മാ​യി കയ്യേറ്റം ചെയ്യ​പ്പെ​ടു​ന്നി​ല്ലെ​ങ്കിൽ, അവരുടെ മാന്യത അക്രമ​വി​ധേ​യ​മാ​കു​ന്ന​താ​യി അദ്ധ്യാ​പകർ മിക്ക​പ്പോ​ഴും കണ്ടെത്തു​ന്നു. അദ്ധ്യാ​പ​ക​നാ​യി​രുന്ന റോളണ്ട്‌ ഡബ്‌ളി​യു. ബെറ്റ്‌സ്‌ എഴുതി: “അവർ അന്തിമ​മാ​യി പൊട്ടി​ത്തെ​റി​ക്കു​ന്ന​തി​നു മുമ്പ്‌ അവർ എത്രമാ​ത്രം താഴു​മെ​ന്നോ അല്ലെങ്കിൽ വലിച്ചു​നീ​ട്ടു​മെ​ന്നോ വെറുതെ കാണു​ന്ന​തിന്‌ അവരെ (സാലങ്കാ​ര​മാ​യി) ഉന്തുന്ന​തും തള്ളുന്ന​തും . . . തങ്ങളുടെ ജൻമസി​ദ്ധ​മായ ഉത്തരവാ​ദി​ത്വ​മാ​യി കുട്ടികൾ മനസ്സി​ലാ​ക്കു​ന്നു.” കുട്ടികൾ ഒരു പുതിയ അദ്ധ്യാ​പ​കനെ തകർക്കുന്ന ഘട്ടത്തിൽ, അദ്ദേഹത്തെ ഒരു തലമുടി നാരു​വ​ണ്ണ​ത്തിൽ തള്ളിയ​താ​യി തിരി​ച്ച​റി​യു​മ്പോൾ, അവർ കുറേ​ക്കൂ​ടെ തള്ളും. നിങ്ങളോ നിങ്ങളു​ടെ സഹപാ​ഠി​ക​ളോ ക്ലാസ്സ്‌ മുറി​യി​ലെ ശല്യക​ര​മായ കുസൃ​തി​ത്ത​ര​ങ്ങൾക്കോ അതു​പോ​ലു​ള്ള​വ​യ്‌ക്കോ ഭാഗഭാ​ക്കാ​യി​രു​ന്നി​ട്ടു​ണ്ടോ? അങ്ങനെ​യു​ണ്ടെ​ങ്കിൽ, നിങ്ങളു​ടെ അദ്ധ്യാ​പ​കന്റെ പ്രതി​ക​ര​ണ​ത്തിൽ അതിശ​യി​ക്കേ​ണ്ട​തില്ല.

ബൈബിൾ പറയുന്നു: “എന്തു​കൊ​ണ്ടെ​ന്നാൽ വെറും സമ്മർദ്ദം ഒരു ജ്ഞാനിയെ മൂഢമാ​യി പ്രവർത്തി​ക്കാൻ ഇടയാ​ക്കി​യേ​ക്കാം.” (സഭാ​പ്ര​സം​ഗി 7:7) ചില സ്‌കൂ​ളു​ക​ളിൽ പടർന്നു​പി​ടി​ച്ചി​രി​ക്കുന്ന ഭീതി​യു​ടെ​യും അനാദ​ര​വി​ന്റെ​യും അന്തരീ​ക്ഷ​ത്തിൽ, ചില അദ്ധ്യാ​പകർ അതിരു​ക​ടന്ന്‌ പ്രതി​വർത്തി​ക്കു​ക​യും പരുഷ​രായ ശിക്ഷണ​നി​ഷ്‌ണാ​ത​രാ​യി​ത്തീ​രു​ക​യും ചെയ്യു​ന്നത്‌ മനസ്സി​ലാ​ക്കാ​വു​ന്ന​താണ്‌. വളരെ​യ​ധി​കം പേർ സുബോ​ധം നഷ്ടപ്പെ​ട്ടിട്ട്‌ അദ്ധ്യാ​പ​ക​വൃ​ത്തി ഉപേക്ഷി​ക്കു​ക​പോ​ലും ചെയ്‌തി​ട്ടുണ്ട്‌. അതു​കൊണ്ട്‌ വിഷമ​ഘ​ട്ടങ്ങൾ വിജയ​പൂർവ്വം അഭിമു​ഖീ​ക​രി​ക്കാൻ ശ്രമി​ക്കുന്ന അദ്ധ്യാ​പ​ക​രോട്‌ നിങ്ങൾക്ക്‌ അല്‌പം സഹാനു​ഭൂ​തി കഴിയു​ക​യി​ല്ലേ?

ശിക്ഷണം—എന്തു​കൊണ്ട്‌ ആവശ്യം?

എന്നാൽ, നിങ്ങളു​ടെ റാങ്കു​പോ​ലെ പ്രധാ​ന​പ്പെട്ട എന്തെങ്കി​ലും ഉൾപ്പെ​ട്ടി​രി​ക്കു​മ്പോൾ വിവേ​ച​ന​യു​ള്ള​വ​രാ​യി​രി​ക്കുക പ്രയാ​സ​മാണ്‌. ഉദാഹ​ര​ണ​ത്തിന്‌ പതി​നൊന്ന്‌ വയസ്സുള്ള സ്‌റ്റീ​ഫൻ പരാതി​പ്പെ​ടു​ന്നു: “ഒരദ്ധ്യാ​പകൻ ഒരു കുട്ടി​യോട്‌ അവന്റെ മാർക്കി​ലൂ​ടെ പ്രതി​കാ​രം കാട്ടു​ന്നത്‌ ശരിയല്ല. ദൃഷ്ടാ​ന്ത​ത്തിന്‌, എന്റെ അദ്ധ്യാ​പ​ക​രിൽ ഒരാൾ അപ്രകാ​രം ചെയ്യാ​റുണ്ട്‌. ഒരു കുട്ടി ഡസ്‌ക്കി​ലേക്ക്‌ മിഠാ​യി​ക്ക​ട​ലാസ്‌ എറിയു​ന്ന​താ​യി കണ്ടുപി​ടി​ച്ചാൽ അവന്റെ റിപ്പോർട്ട്‌ കാർഡിൽനിന്ന്‌ 1 1⁄2 മാർക്ക്‌ കുറയ്‌ക്കും.”

മോശ​മാ​യ മാർക്ക്‌ മേടി​ക്കുന്ന വിദ്യാർത്ഥ​കളെ വഴക്കു​പ​റ​യു​ന്നത്‌ നീതി​യാ​യി കാണ​പ്പെ​ടാ​തി​രു​ന്നേ​ക്കാ​മെന്ന്‌ സമ്മതി​ക്കേ​ണ്ടി​യി​രി​ക്കു​ന്നു. എന്നാൽ ഇത്‌ യഥാർത്ഥ​ത്തിൽ അനീതി​യാ​ണോ—അതോ വെറും കാർക്ക​ശ്യ​മാ​ണോ? അദ്ധ്യാ​പ​കർക്ക്‌ ക്രമപ​രി​പാ​ല​ന​ത്തി​ന്റെ ഉത്തരവാ​ദി​ത്വ​മുണ്ട്‌. അത്‌ ചില​പ്പോൾ ശിക്ഷണം നൽകു​ന്നത്‌ അർത്ഥമാ​ക്കു​ന്നു. എന്നിരു​ന്നാ​ലും, ബൈബി​ളി​ന്റെ ബുദ്ധി​യു​പ​ദേശം ഇതാണ്‌: “ശിക്ഷണം മുറു​കെ​പ്പി​ടിക്ക. വിട്ടു​ക​ള​യ​രുത്‌. അത്‌ കാത്തു​കൊൾക, എന്തു​കൊ​ണ്ടെ​ന്നാൽ അത്‌ നിന്റെ ജീവന​ല്ലോ?” (സദൃശ​വാ​ക്യം 4:13) ശിക്ഷണ​മി​ല്ലെ​ങ്കിൽ പഠന​പ്ര​ക്രിയ പരിതാ​പ​ക​ര​സ്ഥി​തി​യി​ലാ​കു​ന്നു. എന്ന്‌ ഓർക്കുക. ഒരു ചെറു​പ്പ​ക്കാ​രൻ സമ്മതി​ച്ചു​പ​റ​യു​ന്ന​തു​പോ​ലെ: “ കർക്കശ​ര​ല്ലാത്ത അദ്ധ്യാ​പ​ക​രോ​ടൊ​പ്പം നിങ്ങൾക്ക്‌ എവി​ടെ​യും നടന്നു​ക​യ​റാം, പക്ഷേ നിങ്ങൾ അദ്ദേഹ​ത്തിൽനിന്ന്‌ ഒന്നും​തന്നെ പഠിക്കാൻ പോകു​ന്നില്ല.”

എന്നാൽ നിങ്ങൾ സ്‌കൂ​ളി​ലാ​യി​രി​ക്കു​ന്നത്‌ പഠിക്കാ​നാണ്‌ അതിനു​വേണ്ടി പ്രയാ​സ​പ്പെ​ടു​ത്തുന്ന ശിക്ഷണം ശാന്തമാ​യി സ്വീക​രി​ക്കു​ന്ന​തും ഭഗ്നാശ​നായ ഒരദ്ധ്യാ​പ​കന്റെ ക്രോ​ധ​പാ​ത്ര​മാ​കു​ന്ന​തും ആവശ്യ​മാ​ണെ​ങ്കിൽ അങ്ങനെ ചെയ്യുക. അധികാ​ര​ത്തി​ലി​രി​ക്കു​ന്ന​വ​രോട്‌ ആദരപൂർവ്വം ഇടപെ​ടാ​നുള്ള പ്രാപ്‌തി ഒരു വൈദ​ഗ്‌ധ്യ​മാണ്‌; അത്‌ ഒരിക്കൽ തൊഴിൽ ലഭിക്കു​ന്ന​തും ലഭിക്കാ​തി​രി​ക്കു​ന്ന​തും തമ്മിലുള്ള വ്യത്യാ​സം സൂചി​പ്പി​ച്ചേ​ക്കാം. ഒരു ഭാവി ലേഖനം കാണി​ക്കു​ന്ന​തു​പോ​ലെ, നിശ്ചയ​മാ​യും നിങ്ങൾ സ്‌കൂ​ളി​ലെ അനീതി​യു​ടെ മുമ്പിൽ പരിപൂർണ്ണ​മാ​യും നിസ്സഹായ നിലയി​ലല്ല. എന്നാൽ അതിനി​ടക്ക്‌ നിങ്ങളു​ടെ അദ്ധ്യാ​പ​ക​നോട്‌ അല്‌പം സഹാനു​ഭൂ​തി പ്രകടി​പ്പി​ക്കാൻ ശ്രമി​ക്കുക. ഒരുപക്ഷേ, അവരിൽ ചിലർ നിങ്ങൾ വിചാ​രി​ക്കു​ന്ന​തു​പോ​ലെ അത്ര നീതി​യി​ല്ലാ​ത്ത​വ​ര​ല്ലെന്ന്‌ നിങ്ങൾ തിരി​ച്ച​റി​യും. (g85 8/21)

[13-ാം പേജിലെ ചിത്രം]

അദ്ധ്യാപകരുടെ വാത്സല്യ​ഭാ​ജ​ന​ങ്ങൾക്ക്‌ നൽകുന്ന ശ്രദ്ധ പലപ്പോ​ഴും നീരസം വളർത്തു​ന്നു.

[14-ാം പേജിലെ ചിത്രം]

സ്‌കൂളിലെ അക്രമ​ത്തി​ന്റെ വേലി​യേ​റ്റം അദ്ധ്യാ​പ​ക​വൃ​ത്തി പ്രയാ​സ​മുള്ള ഒന്നാക്കി​ത്തീർന്നി​രി​ക്ക​യാണ്‌.