МЛАДИТЕ ПРАШУВААТ

Дали да се крстам? — Прв дел: Што претставува крштавањето?

Секоја година се крштаваат голем број млади лица кои пораснале како Јеховини сведоци. Дали и ти размислуваш да се крстиш? Тогаш, најпрво треба да разбереш што значи да му се заветуваш на Бог и да се крстиш.

Што е крштавањето?

Крштавањето за кое се зборува во Библијата се врши со целосно потопување во вода, а не само попрскување со вода, и има длабоко симболично значење.

При крштавањето, со тоа што ќе бидеш потопен во водата јавно покажуваш дека повеќе не живееш за да си угодуваш само себеси.
Со излегувањето од водата покажуваш дека почнуваш нов живот во кој ќе ти биде најважно да му угодуваш на Бог.

Со крштавањето јавно покажуваш дека го прифаќаш правото на Јехова да поставува мерила за исправно и погрешно и дека си му ветил дека по своја волја избираш да го правиш она што тој го бара од тебе.

Размисли: Зошто треба пред другите да покажеш дека сакаш да живееш во склад со Јеховината волја? (Види 1. Јованово 4:19 и Откровение 4:11.)

Што значи да се заветуваш?

Пред да се крстиш, треба да му се заветуваш на Јехова. Како?

Во лична молитва му ветуваш на Јехова дека ќе му служиш засекогаш и дека ќе го правиш она што тој го бара од нас без разлика на ситуацијата и без разлика на тоа што прават другите.

Со крштавањето покажуваш пред сите дека си му го заветил својот живот на Јехова. Покажуваш дека си се откажал од себеси и дека сега му припаѓаш на Јехова (Матеј 16:24).

Размисли: Зошто ќе имаш поубав живот ако му припаѓаш на Јехова? (Види Исаија 48:17, 18 и Евреите 11:6.)

Зошто крштавањето е важно?

Исус заповедал неговите следбеници да бидат крстени (Матеј 28:19, 20). Истото важи и за христијаните денес. Всушност, Библијата јасно кажува дека крштавањето е неопходно за спасение (1. Петрово 3:21).

Меѓутоа, мотив за да се крстиш треба да бидат твојата љубов и ценење кон Јехова. Треба да имаш ист став како псалмистот кој напишал: „Со што да му возвратам на Јехова за сите добра што ми ги направи?... Ќе го повикам името Јеховино. Ќе му ги исполнам на Јехова своите завети“ (Псалм 116:12-14).

Размисли: Какви добра ти направил Јехова тебе и како можеш да му возвратиш? (Види 5. Мојсеева 10:12, 13 и Римјаните 12:1.)

Што велат други млади

„Му се заветуваш лично на Јехова, и тоа е сериозна работа. Животот посветен на Јехова е полн со благослови. И тоа е логично, зашто Јехова може да се грижи за нас подобро отколку ние самите“ (Миџин).

„Јехова веќе ја покажал својата љубов кон тебе. А со крштавањето, ти ја покажуваш својата љубов кон него. Огромна чест и огромен благослов е да си крстен слуга на Јехова!“ (Ембер).

„Најважната одлука што некој може да ја донесе е да му се заветува на Бог и да се крсти. Но, тоа не треба да те плаши. Ако си подготвен и ако сакаш да се крстиш од исправни мотиви, тоа е најдобрата одлука во твојот живот“ (Џулијан).

Заблуди и вистини

ЗАБЛУДА — Само возрасните се доволно зрели за да може да се крстат.

ВИСТИНА — Нечија зрелост не се одредува првенствено според неговата возраст, туку според неговата љубов кон Јехова и спремноста да му биде послушен. Иако сѐ уште биле млади, Јосиф, Самоил и Јосија покажале таква зрелост. Истото може да се каже и за многу млади денес.

Библијата вели: „Детето се познава по она што го прави, дали е неговото дело чисто и исправно“ (Изреки 20:11).

ЗАБЛУДА — Ако твоите пријатели се крстени, и ти треба да се крстиш.

ВИСТИНА — Одлуката да се заветуваш и да се крстиш е лична одлука, и тој чекор треба да го направиш затоа што ти сакаш. Крштавањето не е обичај што треба го направиш на одредена возраст затоа што тоа се очекува од тебе или затоа што другите се крстиле.

Библијата вели: „[Божјиот] народ спремно ќе се понуди“ (Псалм 110:3).

ЗАБЛУДА — Ако не си крстен, не одговараш за своите постапки.

ВИСТИНА — Ти одговараш пред Јехова, не откако ќе се крстиш, туку кога веќе знаеш што е исправно, а што погрешно во негови очи.

Библијата вели: „Ако некој знае да го прави она што е исправно, а не го прави, тоа му е грев“ (Јаков 4:17).

СОВЕТ: Ако те плаши одговорноста што доаѓа со тоа да си крстен Јеховин сведок, зошто не размислиш што е тоа што те плаши и што можеш да направиш во врска со тоа? Од помош може да ти биде поглавје 37 од книгата Младите прашуваат — делотворни одговори, том 2.