Малахија

3 „Еве, јас го праќам мојот гласник, и тој ќе ми подготви* пат. Вистинскиот Господар, кого вие го барате, одеднаш ќе дојде во својот храм, а ќе дојде и гласникот на сојузот, кому му се радувате. Сигурно ќе дојде!“, вели Јехова над војските.

2 „Но, кој ќе биде подготвен за денот кога тој ќе дојде и кој ќе опстои кога тој ќе се појави? Зашто, ќе биде како оган што топи и пречистува, и како сапун* за перење облека. 3 Ќе седне како леар што топи и пречистува сребро, и ќе ги очисти синовите на Леви. Ќе ги пречисти како злато и како сребро, па ќе му принесуваат жртва на Јехова како праведни луѓе. 4 Тогаш жртвите што народот на Јуда и на Ерусалим ги принесува како дар ќе му бидат угодни на Јехова, исто како во дамнешните времиња.

5 Ќе дојдам кај вас за да ви судам и веднаш ќе ги осудам оние што гатаат, оние што прават прељуба, оние што лажно се колнат, оние што ги искористуваат наемникот, вдовицата и сирачето, како и оние што не му помагаат* на дојденецот. Тие немаат страв* од мене“, вели Јехова над војските.

6 „Јас сум Јехова и не се менувам,* а вие сте синови на Јаков и затоа не бевте уништени. 7 Уште од деновите на вашите прататковци отстапувате од моите одредби и не се држите за нив. Вратете се кај мене, и јас ќе се вратам кај вас“, вели Јехова над војските.

А вие прашувате: „Како да се вратиме?“

8 „Можно ли е човек да краде од Бог? А вие сепак крадете од мене.“

И велите: „Што крадеме од тебе?“

„Десеттини и прилози. 9 Ќе ве снајде проклетство* бидејќи крадете од мене. Да, целиот народ го прави тоа. 10 Донесете ги сите десеттини* во складиштето за да има храна во мојот дом. Испитајте ме во тоа, ве молам“, вели Јехова над војските, „па ќе видите дали нема да ви ги отворам небесните брани и да ви излеам толку голем благослов што ништо нема да ви недостига.

11 Повеќе нема да дозволам штетници* да го уништуваат вашиот род, ниту лозјата да ви останат без плод“, вели Јехова над војските.

12 „Сите народи ќе ве нарекуваат среќни, затоа што вашата земја ќе биде прекрасна“, вели Јехова над војските.

13 „Кажувате тешки зборови против мене“, вели Јехова.

А вие прашувате: „Што зборуваме против тебе?“

14 „Велите: ’Залудно е да му се служи на Бог. Зар имаме некаква корист што ги држиме заповедите на Јехова над војските и што му покажуваме дека жалиме за нашите гревови? 15 Ни изгледа дека оние што се дрски се среќни и дека на оние што прават лоши работи им оди добро во животот. Тие се осмелуваат да му грешат на Бог,* а сепак си поминуваат неказнето‘.“

16 А оние што имаат стравопочит кон Јехова тогаш си зборуваа еден со друг, и Јехова внимателно ги слушаше. И пред Јехова почна да се пишува книга со имињата на сите што треба да бидат запамтени, односно сите што имаат стравопочит кон него и што размислуваат за* неговото име.

17 „Тие ќе бидат мој народ“, вели Јехова над војските. „Во тој ден ќе станат мој скапоцен посед.* Ќе бидам милостив кон нив како што еден татко е милостив кон својот послушен син. 18 И повторно ќе ја видите разликата меѓу праведниот и злобниот, меѓу оној што му служи на Бог и оној што не му служи.“