Upla wala nani dîa wahbi saki ba rispik muns

1, 2. ¿Dîa muni sam taim yawan dîa wahbi saki ba wan muihni lakri nani dîa dauki ba wal sât wala sa?

¿PAT aima kum ra man dîa wahbi sakram tâka mita upla wala bui damhra saura aisan ki? ¿Apia kaka man pali muihni apia kaka lakri kum dîa wahbi sakan tâka mita lâka daukram ki? Ban kra, yawan sut baha sât trabilka nani bâk luan sa.

² Aima kum kum ra yawan dîa wahbi saki ba wan muihni lakri nani dîa dauki ba wal sât wala sa. Baha piua ra yawan tâ iwaia apia sa. ¿Dîa muni? Kan yawan kumi bani ba sât wala sa. Upla bani dîa luki ba ai iwanka tnatka, ai pamalika bara ai rayaka ra dîa takan ba wal asla sa. Kuna, yawan swiaia apia sa baha sât dukia nani ba kangrigisan bilara kupia kumi lâka bara asla lâka bri ba ambuk munbia (Epe. 4:3).

3. ¿Wan muihni lakri nani dîa wahbi saki ba yamni kaikras sa piua ra, yawan dîa daukaia want kabia?

³ Muihni apia kaka lakri kum dîa wahbi saki ba yawan yamni kaikras sa piua ra, ban kra lukaia sip sa mahka baha uplika wal aisaia sa ai lukanka chens munbia dukiara apia kaka dîa wahbi sakan ba dukiara wan lukanka ba upla wala nani wal aisaia. Yawan witin ra hilp munaia want ba mita baku daukisa. Wan muihni lakri nani ra latwan kaikisa bara witin nani rayaka yamni kabia want sa (S.L. 17:17). Baha mita, wan brinka apia sa dîa wahbi saki ba wal trabil ra dimbia apia kaka Jehova wal pânika lâka bri ba sauhkbia.

4, 5. ¿Kristian kum dîa wahbi saki ba yawan dîa luki ba wal sât wala sa piua ra, dîa daukaia sip sa?

⁴ ¿Muihni apia kaka lakri kum dîa wahbi sakan ba yawan yamni kaikras sa kaka wiaia sa ki? Naha ba pain laki kaikaia sa. Tânka kum baku, witin dîa wahbi sakan ba Baibil smalkanka nani mapara sa kaka, latwan lâka ba wan kupia bukbia witin ra hilp munaia ai lukanka ba chens munbia dukiara (S.L. 27:5, 6). Kuna, witin dîa wahbi sakan ba Gâd lâka nani mapara apia sa, kuna yawan dîa luki ba wal lika asla apia sa kaka, Roman 14:1 ba baha piua dukiara naku wan smalkisa: “Sakuna dîa ai tânka ba dukiara lika wal aisi blauhpara”.

⁵ Baku kabia sin ban kra, wala nani dîa luki ba rispik munaia karna wan munaia sip sa. Naha stadika ra yawan laki kaikbia dîa muni wala nani dîa wahbi saki ba rispik munaia sa bara nahki baha daukaia sip sa. Kuna aima kum kum ra muihni lakri nani dîa wahbi saki ba yawan yamni kaikras ba mita mapara aisaia want kabia. Kaisa naha dukiara tânka kum kum laki kaikaia.

¿DÎA TÂKA MITA WALA NANI DÎA WAHBI SAKI BA LÂKA AISI DAUKAIA WANT KABIA?

6, 7. ¿Ani piua ra yawan want kabia wala nani dîa wahbi sakan ba mapara aisaia?

⁶ Baiki sakanka luan nani ra kaikan baku, ban kra wan iwanka tnatka apia kaka wan rayaka ra dîa takan ba tâka, tânka kum kum dukiara silp wan lukanka nani bri kabia. Bara ban kra lukbia wala nani ba yawan dîa luki ba wal sim sât lukisa. Kuna baku apia sa, kaisa tânka kum kum laki kaikaia. Tânka 1: Jehova witniska kum takras kainara, kristian waitna kum ba kaikan nahki ai aisa ba rum diaia trabilka bri kan. Bara muihni lakri nani wal aikuki liliaka kum ra sa piua ra, wala nani nahki rum dîsa kaikisa taim, aihka lukisa bara mahka witin nani ra wisa dîa dauki ba saura sa. Tânka 2: Kristian mairin kum ba siknis saura kum wina rawan, bara ningkara nu takisa kristian mairin wala kum ba sim sikniska brisa. Witin ba hilp munaia want ba mita, kristianka mairin ra taibi munisa sim saika nani, pata pi kan ba bara sîka wala nani dibia dukiara. Tânka 3: Jehova witniska kum takras kainara, kristian waitna kum ba rilidian kuninkira kum wal asla kan. Bara nanara baha rilidianka dukiara aihka pali lukisa. Witin ba nu takisa, upla pruan kum ra wih kaikaia dukiara kristian waitna kum ba prias watla kum ra dimisa, bara witin ba baha dukiara tâ iwi aihka pali lukisa.a

⁷ Kaisa kau tânka kum kum laki kaikaia. Tânka 4: Kristian waitna kum ba sirpi wina lan takan waitna nani ba unmaya briaia saura sa bara mairin nani ba traus nani wal asla aidrubaia ba yamni apia sa. Witin ba nu sa baha tânka dukiara alba kasak ba dîa smalkan ba. Ban sakuna muihni lakri nani ra ban wisa unmaya briaia ba pain apia sa bara mairin nani ba Gâd warkka daukisa piua ra prâk yari dimaia sa. Tânka 5: Kangrigisan almukka kum ba kaikan nahki kristian waitna kum ba skul tara diman bara ningkara Jehova wina laihura takan. Bara nanara, kristian waitna wahma kum ba wahbi sakan sa skul tara dimaia. Kangrigisan almukka ba wari takisa bara trai munisa wahmika ra bara ai aisa yapti nani ra kupia alkaia witin nani dîa wahbi sakan ba chens muni banhbia dukiara.

8. a) ¿Dîa tâka mita aisa yapti kum kum ba aisa yapti wala nani lâka daukaia tâ krikaia sip sa? b) ¿Muihni lakri nani dîa wahbi saki ba mita yawan lâka daukisa kaka, dîa takaia sip sa?

⁸ Kaisa aisa yapti nani dukiara tânka kum laki kaikaia. Tânka 6: Aisa yapti nani man nani karna trai munisma luhpiam nani ra “Dawan latwan lâka ra” smalki pakaia dukiara (Epe. 6:4). Baha mita, utla ra man luhpiam nani dukiara lâ kum kum mangkisma. Kuna talia sa kristian kum kum nani ba ai luhpia nani ra lâ kau swapni nani mangkisa. Ban kra witin nani swisa ai luhpia nani ba utla ra let dimbia, diara sât sât wal pulbia, apia kaka sirpi wina telepon kum bribia. Baha mita, ban kra luhpiam ba mamkabi walaia sip sa: “¿Dîa muni man nani lâ karna ai mangkisma? ¿Dîa muni pâinika nani aisika nani baku man nani sip kapras?” bara naha sât dukia nani tâka mita aisa yapti wala nani lâka daukaia tâ krikaia sip sma. Naha kat yawan tânka kum kum baman laki kaikan sa, kuna kau ailal bâra sa. Tânka kum baku, ban kra yawan lukaia sip sa kristian waitna kum ba ai lalahka wal dîa daukisa sapa, aima an ra bakisan ra wisa, apia kaka dîa sât dukia nani ba wal lilia takisa. Raitka ba, muihni lakri nani dîa wahbi saki ba wan lukanka nani ba wal sât wala sa piua ra, trabil nani bri balaia sip sa. Ban sakuna, yawan swiaia apia sa baha sât dukia nani ba kangrigisan bilara aslika lâka bri ba ra ambuk munbia.

9. ¿Dîa ba wan kupia kraukaia sa? (Lilka ba sin kaiks).

⁹ Ban kra yawan dîa wahbi sâkbia ba muihni apia kaka lakri kum dîa wahbi sâkbia ba wal sât wala kabia, kuna naha tânka apia sa wahbi sakanka kum ba pain sa bara wala ba lika saura sa (Ro. 14:5). Baibil ba wisa yawan nani kristian baku “aikuki asla pain bara [kupia] kumi” kaia sa. Naha tânka sa yawan sut Jehova lâka nani ba dukiara sim lukanka briaia sa, kuna dîa wahbi saki ba lika sim sât kaia nit apia sa (2 Ko. 13:11). Nahara luki kaiks, upla kum kum ba plis kum ra impakaia want sa. Ban kra kumi bani ba baha kat nahki waia ba dukiara wahbi sakanka sât sât bribia. Naha nani ba witin nani dîa laik ba bara dîa nit ba wal asla kabia, kuna sut ba sim pliska ra wabia. Sim tnatka ra, ban kra kristian baku wan rayaka dukiara wahbi sakanka sât sât daukbia, kuna yawan sut ba sim lukanka brisa: Jehova kupia ba lilia daukaia. Baha mita wala nani dîa wahbi saki ba dukiara lâka daukras sa (Mt. 7:1; 1 Tes. 4:11).

DÎA MUNI WALA NANI DÎA WAHBI SAKI BA RISPIK MUNAIA SA

10. Jems 4:12 ra wi ba baku, ¿yawan dîa daukaia raitka âpu sa bara dîa muni?

¹⁰ Baibil ba wan smalkisa dîa muni yawan wala nani dîa wahbi saki ba rispik munaia sa. Kaisa tila wina smalkanka kum kum laki kaikaia. Yawan wala nani dîa wahbi saki ba dukiara lâka daukaia raitka âpu sa (Jems 4:12 ba aisi kaiks). Jehova baman lâ dadaukra bara wihta tara sa. Baha mita, witin baman lâ nani bara adar nani mangkaia raitka brisa, witin baman muihni lakri nani dîa dauki ba dukiara lâka daukaia raitka brisa (Ro. 14:10). Wan mihta ra apia sa wan lukanka nani ra baman tniwi wala nani dîa wahbi saki ba dukiara lâka daukaia.b

11. ¿Yawan dîa daukisa kangrigisan bilara asla lâka bâra kabia dukiara? (Lilka ba sin kaiks).

¹¹ Jehova bîla kaikisa ai uplika nani ba asla lâka ra iwbia kuna sim sât kabia lika apia. Wan Gâdka ba laik sa diara sât sât kaikaia. Bara naha ba yawan ai paskanka ra param kaikisa. Tânka kum baku, dus kum ra wahia ailal bâra sa, kuna kumi bani ba sât wala sa. Bara upla nani ba wal sim sât takisa. Naha tasba ra upla 8.000 milian bâra sa, bara kumi bani ba ai wîna tara bara ai daukanka nani ba sât wala sa. Jehova baku wan paskan, yawan kumi bani sât wala kabia dukiara. Kuna witin want sa yawan sut ba asla lâka ra iwbia. Baha mita, yawan lukanka bara daukanka nani sât wala bri kabia kra sin, swiras sa wan aslika lâka ba sauhki tikbia. Yawan mapara kangrigisan bilara kupia kumi lâka bara asla lâka bri ba kau tânka tara brisa, yawan dîa laik ba bara dîa luki ba wal (Ro. 14:19).

WALA NANI LUKANKA BARA DÎA WAHBI SAKI BA YAWAN NAHKI RISPIK MUNAIA SIP SA

12, 13. ¿“Upla kum saurka” kum daukan yawan lukisa piua ra, dîa ba silp wan makabi walaia sa? (Galesha 6:1; “Upla kum dîa wahbi sakan ba yawan saura kaikisa kaka” bakska ba sin kaiks).

¹² Wala nani ai rayaka dukiara wahbi sakanka nani daukisa piua ra. Silp mamkabi wals: “¿Kristian ba saurka kum daukan sa ki apia kaka dîa wahbi sakan ba yang dîa lukisna ba wal sât wala sa?”. Witin ba saurka kum daukan sa kaka, wibia sa kaka Baibil smalkanka kum pura luisa kaka, silp mamkabi wals: “¿Aitani sa ki yang witin wal wih aisamna, apia kaka upla wala daukaia sa ban kra kangrigisan almukka kum? Man witin ra hilp munaia aitani sma lukisma kaka, latwan lâka ni witin kupia alkaia trai muns (Galesha 6:1 ba aisi kaiks). Kuna aima aihkika ra yawan baku lukisa, kan uplika dîa wahbi sakan ba wan lukanka nani ba wal asla apia ba mita. Baha piua ra, uplika dîa wahbi sakan ba dukiara dahra saura aisaia apia sa. Witin silp ai rayaka dukiara wahbi sakanka nani daukaia raitka bri ba rispik munaia sa bara lâka aisi daukaia apia sa (Ro. 14:2-4).

¹³ Nahara luki kaiks, wan pânika aikuki plun piaia dukiara plis kum ra dimisa, ¿rait apia yawan witin ra taibi munbia apia yawan makabia pata ba witin sin pibia dukiara? Yawan swibia witin dîa want ba wahbi sâkbia. Kan las kat, witin dîa pata wahbi sâkbia ba wan rayaka ra ambuk munbia apia. Bara saura wan dara walbia wan tâka mita witin dîa laik ba piras sa kaka. Sim tnatka ra, wala nani silp ai rayaka dukiara wahbi sakanka nani daukbia swisa piua ra rispik lâka marikisa.

14. Wan rayaka dukiara wahbi sakanka nani daukisa piua ra, ¿yawan nahki kangrigisan bilara asla lâka bâra kabia dukiara tâ baikaia sip sa? (1 Korint 8:12, 13).

¹⁴ Ramyaka dukiara wahbi sakanka nani daukma piua ra. Man wala nani kupia sauhkaia apia dukiara karna trai munisma kaka, kangrigisan bilara asla lâka bâra kabia dukiara tâ baikma (1 Korint 8:12, 13 ba aisi kaiks). Nahara luki kaiks, man wahbi sakanka kum daukaia want sma bara dîa daukaia lukisma ba “saura apia sa” kuna, muihni apia kaka lakri kum mina prukaia sip sa. Baku sa kaka, ¿baha wahbi sakanka ba “yamni” kabia ki? (1 Ko. 10:23, 24).c Baha piua ra, man raitkam brisma ba ra tniwaia watlika ra, kau yamni kabia dîa laik sma ba tnaya ra swiaia (Ro. 15:1). Rait sa yawan pat laki kaikan baku, wala nani dîa wahbi saki ba yawan rispik munaia sa bara pana witin nani ba rispik lâka wan marikaia sa. Ban sakuna, yawan ba Roman 12:18 smalkanka ra lukaia sa. Bahara wisa: “Man nani sin trai kaiks, sip sma ba kat, upla sut wal kupia kumi lâka ra iwi kaia”. Baha mita, yawan sip ba kat upla sut wal kupia kumi lâka ra iwaia trai munisa bara witin nani kupia sauhkaia apia.

15. ¿Kangrigisan bilara asla lâka bâra kabia dukiara kangrigisan almukka nani ba dîa daukaia sip sa? (1 Korint 4:6).

¹⁵ Kangrigisan almukka nani ba wala nani dîa wahbi saki ba rispik munisa. Witin nani ba kangrigisan bilara asla lâka bâra kabia tâ baikisa wala nani dîa wahbi saki ba dukiara lâ nani mangkras sa piua ra, bara Baibil ra “diara nani ulban ba, pura lui” banhras piua ra sin (1 Korint 4:6 ba aisi kaiks). Baku sin wan ulbi sakanka nani ra Baibil smalkanka nani taki ba yus muni kau pura praki smalkras sa. Baku sin, muihni apia kaka lakri kum hilp makabisa piua ra, witin nani ba ai rayaka ra dîa takan bara luki smalkanka nani yabras sa, kau ni Gâd Bîla ba yus muni banhwisa (Ais. 48:17, 18).

16. Kangrigisan almukka daknika ba wahbi sakanka kum daukisa piua ra, ¿kangrigisan almukka nani ba nahki mariki banhwisa baha lukanka ba witin nani rispik munisa?

¹⁶ Kangrigisan almukka nani ba sin kangrigisan almukka nani daknika dîa wahbi saki ba rispik munisa. Wahbi sakanka kum briaia dukiara kangrigisan almukka daknika ba ai pura sunan sa spirit holikira makaban sa, bara Baibil dîa smalki ba laki kaikan sa, bara dîa wahbi saki ba kangrigisan almukka kumi bani ba ai lukanka wal asla kabia apia kra sin tâ baikaia sa (Epe. 5:17). Baku sin kangrigisan almukka nani ba Gâd asla takanka wina maisa pakanka nani aisi kaikisa piua ra witin nani aman kaikisa, kan ai lukanka ra tniwi dîa aisi kaiki ba alki daukaia want apia sa, apia kaka dîa aisi kaiki banhwi ba wina kau pura praki alki daukaia want apia sa. Tânka kum baku, witin nani wan ulbi sakanka nani wina pîska kum baman yus munras sa witin nani dîa luki banhwi ba tâ baikaia dukiara.

17. ¿Wala nani dîa wahbi saki ba rispik munisa taim, dîa sât yamnika nani sakisa?

¹⁷ Laki kaikan baku, yawan kumi bani ba sât wala sa. Dîa laik ba bara wan lukanka nani ba sim sât apia sa. ¡Jehova uplika nani tilara baku kaia ba yamni sa! Kan plis sât sât wina balisa bara wan daukanka nani ba sât wala ba mita, kangrigisan bilara yawan kumi bani ba pain wan dara walisa. Naha sât dukia nani ba yawan tilara trabil nani bukbia swiaia watlika ra, kupia kumi lâka bâra kabia dukiara tâ baikisa. Yawan karna trai munisa wala nani kupia sauhkaia apia bara ai rayaka dukiara dîa wahbi saki banhwi ba rispik munisa. Baku dauki ba mita kangrigisan ba asla lâka bara lilia lâka ra iwisa (Law. 133:1; Mt. 5:9).