Skul tara dimisma piua ra Jehova lamara bas

1, 2. a) Skul tara dimaia wahbi sakisma kaka, ¿dîa ba ban dauki kaia sma? b) ¿“Yawan luki iwi kaia sa dîa pat alkan ba kat” bîla nani ba dîa tânka sa? (Pilipai 3:16).

JEHOVA uplika kum kum nani ba skul tara tnata mangkan ningkara wahbi sakan sa skul kau tara kum dimaia. Kan luki banhwisa baku tnatka ra sip kabia wark kum pliki sakaia bara baha tilara Jehova warkka ba ban dauki kaia. Man skul tara dimaia wahbi sakram sa kaka, ¿dîa ba hilp mai munbia Jehova wal pânika lâka brisma ba main kaiki bri kaia dukiara? (Je. 4:8a). Ban kra man skul dimi kapram piua ra, kasak lukankam lâka mapara traika kaikanka ailal briram kaia sa. Baku ba ra nanara man naha bîla nani ba alki daukaia sma “yawan luki iwi kaia sa dîa pat alkan ba kat”, naha tânka sa, Jehova warkka ba man kasak dauki kaia sma, naiwa kat dauki aulma ba baku (Pilipai 3:16 ba aisi kaiks).

² Grik bîla ra “yawan luki iwi kaia sa dîa pat alkan ba kat” bîla nani ba yus muni kan suldawa nani nahki asla wapi kan ba tânka marikaia dukiara. Baha mita, man skul tara dimaia wahbi sakram kaka, nit kama ninam ra tauraskira Jehova warkka ra “ban wapi kaia”. Naha stadika ra yawan Baibil smalkanka walhwal pat kakaira ba laki kaikbia, bara hilp mai munbia tâpahkanka briaia dukiara. Naha nani ba patitara piua ra alki daukram ba baku, skul tara dimma piua ra alki daukaia sma bara tnata mangkma piua ra sin.

JEHOVA WAL PÂNIKA LÂKA BRISMA BA KARNA DAUKI DUKIA NANI BA DAUKS

3. Skul tara dimisma piua ra, ¿yu bani man dîa daukma laki kaikma taim, dîa ba aman laki kaikaia sma?

³ Dîa ba aman kaikaia sma. Skul tara dimaia ba taimkam implikaia sip sa. Ban kra yu bani dîa daukaia sma ba chens munaia nit kama. Rait sa, man stadi tatakra lankira kum kaia want kama. Kuna aman kaikras sma kaka, tawa tawa Jehova warkka daukaia ba sait ra swiaia sip sma, baha tilara asla aidrubaia, smalkaia warkka ra takaia, silp Baibil stadi takaia bara puram sunaia (Par.M. 2:4).

4. ¿Yawan “piua bani Dawan warkka ba kau ban dauki [kaia]” smalkanka ba nahki nina blikaia sip sa? (1 Korint 15:58).

⁴ (1 Korint 15:58 ba aisi kaiks). Baisikil kum ra impaki waia dukiara yawan ban waki kaia sa, sim tnatka ra Jehova wal pânika lâka bri ba karna kabia dukiara yawan ai warkka ba ban dauki kaia sa. Baha mita Baibil ba wisa “piua bani Dawan warkka ba kau ban dauki bas”. Rait sa, yawan Gâd warkka daukaia dukiara taim an yus munbia laki kaikaia ba tânka tara brisa. Kuna, kau tânka tara bri ba sika, naha dukia nani ba wan rayaka ra pas tâura mangkaia. Wan kupia kraukaia sa yawan Jehova uplika kum sa bara ningkara stadi tatakra kum (Mt. 22:37). Kristian mairin tiara kum nina Samantha ba win: “Yang silp pramis takri, yu kum skulki dimisna ba Jehova wal pânika lâka brisna ba ra ambuk munisa kaka, skulka ba swimna”.

5. ¿Jehova warkka ban dauki kaia dukiara dîa daukaia sip sma?

⁵ Skul tara dimras kainara man dîa daukaia sip sma. Dîa kau tânka tara bri ba amya tiwbiara. Silp mamkabi wals: “¿Yang pat luki kaikri sa ki dîa daukamna asla aidrubanka nani ra waia, smalki taki waia, bara silp Baibil stadi takaia dukiara?” (Jas. 1:8; Mt. 28:19, 20; Hib. 10:25). Baku sin, patitara dîa daukram ba wina lan takaia yamni sa. Silp mamkabi wals: “¿Skul dimi kapri piua ra spirit warkka nani ba pas tâura mangki bri kaia dukiara dîa daukri? ¿Dîa wahbi sakri tila ba wina, dîa ba kau pain daukaia sip kapri ki? ¿Naiwa ba dîa ba kau pain daukaia sip sna?”. Silp wahbi sâks skul tara dimi kama piua ra Jehova warkka ba ban dauki kaia. Stadi tatakra lankira kum kaia dukiara karna trai muns, kuna Jehova wal pânika lâka brisma ba sauhkpara (Mt. 6:24).a

6. ¿Wînam kat man dîa silp laki kaikaia sip sma? (Lilka ba sin kaiks).

⁶ Skul tara dimaia tâ krikma taim, piu bani wînam kat nahki auma sapa laki kaiks. Tânka kum baku, kati bani silp mamkabi walaia sip sma: “¿Rayaki ra Gâd warkka ba ban pas tâura mangkisna ki?”. Aman laki kaiki bas bara nahara luks: ¿Asla aidrubaia lâka ba swisna ki apia kaka let wisna ki? ¿Aidrubanka nani ra sna piua ra skul warkka nani ra baman lukisna ki apia kaka Internet bâk baman asla aidrubisna ki? Man laki kaikaia sma, nanara puram sunaia bara Baibil aisi kaikaia ba kau wiria daukisma sapa apia kaka smalkaia warkka ba nanara kau isti danh takbia bara mahka wamtla ra waia want sma sapa. Naha sât dukia nani daukisma kaikisma kaka, mahka pali diara kum daukaia sma. Swipara skul ba alki mai takaskbia, Jehova ra ramyaka ra pas tâura mangki bri kama dukiara.

SWIPARA WALA NANI MITA MAN DÎA LUKISMA BA CHENS MUNBIA

7. Skul tara dimisma piua ra, ¿dîa sât dukia nani ba aman kaikaia sma?

⁷ Dîa ba aman kaikaia sma. Skul tara kum kum nani ra “upla iwanka lâka kat bara naha tasba lâka” tâ baiki dukia nani baman smalkisa. Baha tilara, Gâd kum âpu sa lukanka apia kaka diara nani sut ban wina bal takan smalkanka ba (Kol. 2:8). Apia kaka sip sa kupiam bukaia silp karnikam ra kasak lukma dukiara. Kristian waitna wauhma kum ba naku aisan: “Wark nani daukaia wan smalki kan, kuna baha purkara sin wan kupia buki kan lukanka saura kum briaia, baha ba Jehova kupia lâka ba wal asla apia kan. Witin nani ba aima manis ra wan wi kan, wan rayaka ba yamni kabia dukiara, yawan silp wan karnika ra kasak lukaia sa. Naha sât lukanka ba, wan rayaka wina Jehova ra sait ra swi kan, bara karna ai muni kan witin ra kasak lukaia”.

8. ¿Dîa muni tânka tara brisa wan lukanka nani ba kaina kahbaia? (Sins Lâka 5:1, 2).

⁸ (Sins Lâka 5:1, 2 ba aisi kaiks). Baibil ba wan kupia kraukisa yawan wan lukanka nani ba main kaikaia sa. Bara diara kum main kaikaia wan wisa kaka tânka sa saura wan munaia sip sa dukia kum bâra ba mita. Sitan bara ai tasbaya ba wan lukanka nani ra ambuk munaia want sa (1 Pi. 5:8). Naha tasba ra upla nani dîa ba pain bara dîa ba saura sa lukanka, wan rayaka nahki bal takan bara Gâd kum bâra sa sapa lukanka nani ba sip sa wan kasak lukanka lâka ba swapni daukaia. Upla nani ba ban kra wiaia sip sa ai lukanka nani ba “kau tara sa” kuna raitka ba baku apia sa, kan naha tasba sinska lâka ba Gâd mapara sins âpu dukia baku sa (1 Ko. 3:18-20).

9. ¿Lukankam nani main kaikaia dukiara dîa daukaia sip sma?

⁹ Skul tara dimras kainara man dîa daukaia sip sma. Lukankam nani main kaikaia dukiara man kasak lukaia sma Baibil dîa smalki ba kasak sa. Baha mita, skul tara dimras kainara naha makabi walanka nani ra luki kaiks: “¿Yang dîa muni Gâd ra kasak lukisna? ¿Baibil ba Gâd bîla sa yang dîa muni kasak lukisna ki? ¿Dîa muni kasak lukisna Baibil smalkanka lâka nani ba naha tasba lâka nani ba wal kau tara sa?”. Baku sin yamni sa man luki kaikma skul dimi kapram piua dukiara. Silp mamkabi wals: “¿Skul watla ra diara nani ban wina bal takan ai smalki kan piua ra Gâd kum bâra sa namhpa namhpa lukaia tâ krikri? ¿Skul watla ra pâniki nani ba diara saura nani dauki kan nina blikaia apia dukiara karna ai muni kan ki? ¿Diara kum bâra sa yang kau pain daukaia sip kapri ba? ¿Yang kasak lukanki lâka ba kau karna daukaia dukiara dîa daukaia sip sna?”. Skul tara dimisma piua ra lukankam nani main kaikaia trai muns (2 Ti. 2:16-18).b

10. ¿Lukankam nani kaina kahbaia dukiara man dîa ban dauki kaia sip sma?

¹⁰ Skul tara dimaia tâ krikma piua ra, piu bani wînam kat nahki auma sapa laki kaiks. Bara naha makabi walanka nani ra luks: “¿Kaini kir ra iwi uplika nani daukanka ba nanara yang uya saura kaikras sna ki? ¿Param kaikaia sip sna ki upla kum naha tasba lukanka ai smalkaia want sa taim? ¿Yang kasak lukisna ki Gâd Kingka Lâka ba baman naha tasba trabilka nani wapni ra mangkaia sip sa?”. Skulkam pânika bara smasmalkrikam nani ba lukankam nani ra ambuk munbia apia dukiara man Baibil stadi takaia sma bara dîa aisi kaikisma ba ra tihu luki kaikaia. Baibil stadi tatakra lankira kum kaia ba hilp mai munbia namhpa namhpa lukanka nani mapara aiklabaia dukiara (1 Ti. 4:15).

PIUA BRISMA BA PAIN YUS MUNS

11. Skul tara dimisma piua ra, ¿dîa muni karna kaia sip sa piuam brisma ba pain yus munaia?

¹¹ Dîa ba aman kaikaia sma. Skul tara dimaia ba taimkam aiska yus munaia sip sa, kau pali examen nani daukisa piua ra apia kaka wark kum mahka yabaia nit sa taim. Man piua brisma ba pain yus munaia lan takras sma kaka, uba trabil taki lukaia sip sma apia kaka swapan damra walma. Baha mita, tânka tara brisa wînam tara bara nahki damra walisma ba main kaikma.

12. ¿Dîa dukia wala nani ra sin wan taimka yus munaia nit kabia? (Epesus 5:15, 16).

¹² (Epesus 5:15, 16 ba aisi kaiks). Man piua brisma ba pain yus munisma sapa nu takaia dukiara tânkira lâka marikaia nit sma. Naha ba isi apia sa kan diara ailal daukaia bri kama. Tânka kum baku, taim sakaia nit kama stadi takaia dukiara, kuna kau tânka tara bri ba sika pamali bara kangrigisan muihni lakri nani wal taim luaia (Law. 133:1; S.L. 18:1). Wan rayaka ra pas tâura mangkaia ba sika, spirit lainka ra warkka nani ba (Mt. 6:33). Baku sin ban kra pamali lalka baku wark nani daukaia nit kama. Bara nitkam nani briaia dukiara sin wark takaia sma. Baku sin amya tiwbiara wînam tara ba wark ra dingkaia bara aitani ris takaia, baha ba wan wina tara main kaikaia dukiara tânka tara brisa (Smas. 4:6; 1 Ti. 4:8). Naha dukia nani sut daukaia dukiara wan piua bri ba pain yus munaia nit sa.

13. ¿Man dîa daukaia sip sma piua brisma ba pain yus munaia dukiara?

¹³ Skul tara dimras kainara man dîa daukaia sip sma. Baibil ba wisa, aman pali luki kaiki daukan dukia nani ba sut pain takisa (S.L. 21:5). Baha mita skul tara dimras kainara tânkira lâka ni taimkam wal dîa daukma ba pain laki kaiks. Yamni kabia naha makabi walanka nani ra lukma: “¿Skul dimi kapri piua ra taimki ba pain yus muni kapri? ¿Dîa daukri tila wina diara kum bâra sa kau pain daukaia trai munaia want sna ba? ¿Diara nani kau pain daukaia dukiara dîa daukaia sip sna?”. Trai muns taimkam brisma ba pain yus munaia bara baku trabil taki luki kama apia.c

14. ¿Dîa sât makabi walanka nani ra lukaia yamni kabia?

¹⁴ Skul tara dimaia tâ krikma taim, piu bani wînam kat nahki auma sapa laki kaiks. Silp mamkabi wals: “¿Yang dîa daukisna tilara ejercicio daukaia bara ris takaia dukiara taim aitani brisna ki? ¿Muihni lakri nani wal kaia dukiara taim brisna ki? ¿Wark nani mihti ra mangki ba piua kat daukaia sip sna ki?. Baku apia sa kaka, ¿yang diara ailal daukaia brisna ba mita, apia kaka diara sut las ra swiaia lâka brisna ba mita baku ai takisa ki? ¿Pâniki bara pamaliki nani ba yang dîa ansa munamna ba aitani sa lukbia ki?”. Man taimkam nahki yus munisma ba chens munaia nit sma apia kaka kau sinskam mangkaia nit sma kaikisma kaka, mahka pali alki dauks. Ai taimka pain yus muni muihni lakri nani ra sip sma makabaia kupia kraukanka nani maikbia (S.L. 11:14).

“SINSKIRA NANI WAL TAUKI BAS”

15. Skul tara dimisma piua ra, ¿dîa ba aman kaikaia sma?

¹⁵ Dîa ba aman kaikaia sma. Skul dimisma piua ra ban kra pâmnikam nani ba klaska nani danh takisa ningkara witin nani wal aikuki taim luma mai paiwbia kaia sa, bara ban kra man witin nani wal waia want sma. Kan las kat, witin nani wal sim skulka dimisma ba mita, diara ailal nani dukiara sim sât luki banhwisma. Ban kra lukaia sip sma witin nani ba wal kau asla sma kangrigisan muihni lakri nani ba wal. Kuna aman kaikaia sma. Kan rait sa, witin nani ba wal sim skulka dimisma, kuna man Jehova kupia lilia daukaia want sma, witin nani lika apia. Bara witin nani aikuki kau taim luma kaka ai lukanka nani ba ambuk mai munaia sip sa (1 Ko. 15:33). Naha sika Michael ra takan, witin ba mani 4 bilara skul tara kum diman, bara naku aisisa: “Yang ba wik bilara 40 awar baku pâiniki nani wal aikuki taim lui kapri, piu luan ba wal tawa tawa witin nani mairin nani ra nahki kaiki kan ba, dîa sât miusikka nani wali kan ba bara bîla saura nani aisi kan ba uya saura kaikras kapri”.

16. ¿Sins Lâka 13:20 ba dîa wan smalkisa?

¹⁶ (Sins Lâka 13:20 ba aisi kaiks). Baibil ba wan marikisa pana saura nani wal taukaia ba nahki ambuk wan munaia sip sa. Baku sin, naku wan smalkisa: “Sinskira nani wal tauki bas, bara sinskira kama”. ¿Naha wina yawan dîa lan takisa? Yawan dîa sât uplika nani wal tauki ba sip sa wan rayaka ra yamni apia kaka saura wan munaia. Baha mita, ramyaka ra yamni mai muni pânika nani ra plikaia sma, bara man baku ai kupia aiska ni Jehova ra latwan kaiki uplika nani ra (Law. 101:6, 7; 119:63).

17. ¿Pana saura nani wina laihura kaia dukiara dîa daukaia sip sma?

¹⁷ Skul tara dimras kainara man dîa daukaia sip sma. Skul dimisma uplika nani wal ani pitka kat wal asla kaia wahbi sâks. Jehova witniska kum nina Trenton ba wisa: “Yang skulki pâniki nani wal pain sna, kuna aikuki taim luras sna. Witin nani ba wal dis sim skulka baman dimisna, kuna pâniki nani apia sa”. Bara man, ¿ani pitka kat skulkam pânikam nani wal taim luaia wahbi sakram ki? Silp mamkabi wals: “¿Skul tara dimi kapram piua ra ani pitka kat pamnikam nani wal asla kapram? ¿Diara kum bâra sa kau pain daukaia want sma ba? ¿Nahki diara nani ba kau pain daukaia sip sma?”. Man wahbi sâks sinskira nani wal taukaia bara Jehova ra latwan kaikras uplika nani wina laihura kaia.d

18. ¿Dîa ba silp mamkabi walaia yamni sa? (Lilka ba sin kaiks).

¹⁸ Piu lui ba wal wînam kat nahki auma sapa laki kaiks. Silp mamkabi wals: “¿Skul pânika nani wal kau asla sna daira walisna ki? ¿Witin nani aisaia tnatka lukanka bara daukanka nani ba ambuk ai munisa ki? ¿Dîa ansa munamna ba Jehova yamni kaikbia ki?” (Law. 1:1). Man daukanka saura nani briaia tâ krikisma kaikisma kaka mahka pali chenska nani dauks. Trai muns man baku Jehova ra latwan kaiki uplika nani wal pana lâka briaia. Bara, namhpa namhpa lukpara skulkam pânika nani ra smalkaia dukiara. Kan, man sanska pranakira kum brisma witin nani ra tânka kasak lan takbia hilp munaia dukiara.

KAINA MANIS WINA RIDI TAKS

19. Skul tara kum tâ krikras kainara, ¿man dîa daukaia sip sma traika kaikanka nani takbia mapara ridi kaia dukiara? Tânka kum wal mariks.

¹⁹ Nahara luki kaiks, upla kum impakanka kum daukras kainara diara kum kum ridi daukaia sa. Tânka kum baku, witin laki kaikaia sa karnika aitani brisa sapa, kwala pain brih wisa sapa bara ani kat waia want sa sapa. Rait sa, witin nu âpu sa ai yabalka aiska ra dîa takbia sapa, kuna pain ridi takisa kaka ai impakanka ba yamni takbia. Skul tara dimaia ba wal sim sât takisa. Man kasak lukan lâka karna kum briaia sma bara “Gâd mita aiklabaia dukia nani wanki ba sut brih” dims. Bara sinskam ra bri bas, man lalahkira takaia apia kaka kulkanka tara briaia lukanka wal diara nani daukras sma, man want sma dîa daukisma ba wal Jehova ra prana yabaia (Epe. 6:11-13; 1 Ko. 9:26, 27; 10:31).

20. ¿Man “kasak lukan lâka ra aitani sma sapa kaikaia” dukiara dîa daukaia sip sma?

²⁰ Baibil ba naha kupia kraukanka wankisa: “Man nani laki kaiks wînam tânka ba aitani sma sapa, kasak lukan lâka ra aitani sma sapa kaikaia” (2 Ko. 13:5). ¿Man nahki naha smalkanka ba skul dimisma piua ra alki daukaia sip sma? Piu bani wînam kat nahki auma sapa laki kaiks, luki kaiks naha stadika ra hilpka walhwal laki kaikan ba alki daukisma sapa. ¿Spirit lainka ra ban karna wark takisma ki? ¿Lukankam nani ba main kaikisma naha tasba “sinska lâka” ambuk munbia apia dukiara? ¿Piua brisma ba pain yus munisma ki? ¿Muihni lakri nani pânika lâka plikisma bara pana saura nani wina laihura sma ki? Raitka ba, naha sât makabi walanka nani ba piu bani ramyaka ra daukaia nit kama, skul dimi kama piua ra, wark ra apia kaka plis wala ra. Karna trai muns diara sut mapara kasak lukan lâka karna kum briaia dukiara. Man kasak lukaia sip sma dîa daukisma ba sut Jehova blisin munbia (S.L. 3:5, 6).