Marit baku pâna lâka karna kum bri banhs

1. ¿Dîa muni pâna pain nani ba Jehova wina prisantka kum sa?

PÂNA pain nani ba Jehova wina prisantka kum sa (Je. 1:17). Witin ra latwan kaikisa bara yawan nani ra sin. Yawan lilia sa taim, witin nani sin lilia takisa, sari wan dara walisa piua ra, wan maisa nihkisa bara nit sa taim, param pali kupia kraukanka nani wankisa. Yawan nani wal kasak banhwisa. Param sa pâna pain nani ba wan kupia “lilia daukisa” (S.L. 27:9).

2. ¿Dîa muni tânka tara brisa maya waitna bara maya mairin ba ai pânika lâka bri ba kau karna dauki kabia? (Matiu 19:6).

² Maya waitna bara maya mairin ba karna trai munaia sa pâna pain kaia dukiara. Ai pânika lâka ba main kaikaia sa bara piu lui ba wal kau karna daukaia sa. Baku daukras sa kaka, tawa tawa yakan ai dara walaia tâ krikaia sip sa bara sari apia kaka, ai kupia sin baikaia sip sa. Kuna asla iwaia trai munisa kaka, ai pânika lâka ba kau dutki kabia (Matiu 19:6 ba aisi kaiks). Naha stadika ra lan takbia maya waitna bara maya mairin ba dîa daukaia sa ai pânika lâka ba kau karna daukaia dukiara. Kuna pas pali laki kaikbia kristian mayas kum ra dîa ba hilp munbia ai rayaka aiska dukiara, ai pânika kau pain baku upla kum ra wahbi sakisa piua ra.

RAMYAKA AISKA DUKIARA NAHKI PÂNA PAIN KUM WAHBI SAKAIA

3, 4. ¿Maya waitna apia kaka maya mairin pain kum wahbi sakaia dukiara, dîa ba hilp wan munbia? (Sins Lâka 18:22).

³ Tânka tara bri wahbi sakanka nani ba wan rayaka aiska ra yamni apia kaka saura wan munaia sip sa. Baha mita, kum alki daukras kainara aman luki kaikaia sa. Yawan laki kaikaia sa nahki yamni wan munbia bara nahki tnatka ra ambuk wan munaia sip sa.

⁴ Kau tânka tara bri wahbi sakanka nani tilara sa ya wal marit takbia ba, kan baha uplika ba wan rayaka aiska ra wan pânika kabia. Jehova sika marit lâka ba paskan. Baha mita aitani sa yawan marit takbia wahbi sakisa piua ra, witin tâ pahkanka ba nina blikaia. Witin brinka sa yawan maya waitna apia kaka maya mairin pain kum sâkbia. Bara nu sa yawan mapara dîa ba kau yamni kabia (Sins Lâka 18:22 ba aisi kaiks; Ais. 48:17, 18). Baibil smalkanka nani ba kristian mayas nani ra hilp munaia sip sa maya waitna apia kaka maya mairin pain kum sakaia dukiara.

5. ¿Dîa muni tânka tara brisa marit takaia dukiara wahbi sâkbia uplika ba Jehova witniska kum kabia?

⁵ Tahbi daukan lâka brisa piua ra, yawan Gâd pânika takisa (Law. 25:14). Baha mita marit takaia brinkam sa kaka, wahbi sâkma uplika ba Jehova wal pâna kaia sa (1 Ko. 7:39). Baku marikma man Jehova lâka nani ba rispik munisma bara maritkam ba Gâd blisinka kum baku kaikma (S.L. 19:14). Baku sin, trabil nani wina laihura kama, kan Baibil ba wisa: “Kasak lukras uplika nani wal asla kapara; kan baku daukma kaka, twilkaika kum wala wal baku apia ba baku asla prakisma” (2 Ko. 6:14). Tânkira apia sa lukaia, man witnis apia kum wal kakaira takisma kan, Jehova asla takanka bilara upla kum sip sakras kapram ba mita. Baku sin tânkira apia sa lukaia uplika ba yu kum Jehova witniska kum takbia.

6, 7. Upla kum wal kut takaia lukisma kaka, ¿dîa ba silp mamkabi walaia sma?

⁶ Ban sakuna, Jehova witniska kum kabia kra sin naha tânka apia sa uplika ba marit pain kum kabia. Man upla kum wal kut takaia lukisma kaka, silp mamkabi wals: “¿Uplika ba ai pamalika ra nahki munisa? ¿Latwan lâka bara rispik lâka marikisa ki? ¿Dîa sât pânika nani brisa? ¿Trabil kum takisa piua ra, witin dîa daukisa? ¿Ai yamnika ra baman lukisa ki, apia kaka trabilka ba Baibil smalkanka kum pura luras sa kaka, bawaia wilin sa ki? ¿Lalah dukiara witin dîa lukisa?”

⁷ Baku sin yamni kabia naku silp mamkabi walma: “¿Uplika ba Jehova ra latwan kaiki ba param sa ki? ¿Karna trai munisa Gâd yamni kaiki daukanka nani ba pakaia?¿Jehova warkka kau daukaia dukiara hilp ai munbia ki? ¿Jehova warkka daukaia dukiara yang wal sim lukanka nani brisa ki? ¿Yang nani sip kamna ki pâna pain kum kaia?” (Kol. 3:9, 10). Kristian mairin ba sin luki kaikaia sa kristian waitna ba pâna pain kum kaia purkara, pamali lalka pain kum kabia sapa (1 Ko. 11:3). Kristian waitna ba sin luki kaikaia sa, ai mistikka nani tilara kristian mairin ba pamali lalka baku witin tâ bribia swibia sapa. Param sa naha makabi walanka nani ra ansa munaia dukiara, taim nit kabia. Baha mita, kut takisma uplika ra pain kakaira takaia dukiara piua brisma ba pain yus muns.

8, 9. ¿Kristian kum ra upla kum wal marit takbia sapa wahbi sakaia dukiara dîa ba hilp munbia? (Lilka ba sin kaiks).

⁸ Kut takisa piua ra, wahbi sakanka pain kum briaia dukiara hilp wan munbia ba sika, trai munaia nu takaia uplika ba dîa sât daukanka nani brisa sapa. Wala nani ra sip sa makabi walaia, uplika ba dukiara dîa lukisa bara dîa sât daukanka nani brisa. Tânka kum baku, ¿wala nani ba uplika dukiara bawikira, latwankira, bara tânkira sa lukisa ki? Guayana Francesa kuntrika wina kristian mairin kum nina Sarah ba kristian waitna kum nina Daniel ba wal marit takan. Witin ba naku wisa: “Yang Daniel dukiara wala nani dîa luki kan sapa makabi walri, witin wal aikuki tâura smasmalkra warkka dauki kan lakrika kum wal aisari, ai kangrigisanka wina almuk kum wal, ai pânika nani wal, bara muihni wala nani wal sin”. Baku sin, tânkira lâka wal uplika ra makabi walaia sip sma, ai rayaka ra piua luan ra apia kaka naiwa piua ra diara kum takan ba dukiara man nu takaia nit sma sapa, kan ningkara ban kra baha dukia nani ba marit lâka ra trabil nani brih balaia sip sa.

⁹ Man uplika dukiara namhpa namhpa lukanka nani brisma, apia kaka spirit lainka ra pâwan ai pânika nani tila wina kum witin dukiara dîa aisan ba yamni apia sa kaka, diara nani ba pain aman luki kaiks. Baha ba hilp mai munbia wahbi sakaia uplika wal marit takma sapa.a Nanara laki kaikbia, pat marit takan nani ba ai pânika lâka bri ba nahki kau karna daukaia sip sa.

AIKUKI TAIM LUS

10. ¿Dîa muni yamni sa marit nani ba aikuki luaia dukiara taim sakaia?

¹⁰ Maya waitna bara maya mairin ba wark bri kabia kra sin, ai pânika lâka bara ai maritka lâka ba kau karna daukaia dukiara, taim sakaia sa. Baku daukaia ba witin nani ra sans yabisa yu aiska ra dîa takan ba dukiara aisaia, dîa luki ba bara nahki ai dara wali ba dukiara sin, pana pana latwan lâka marikaia, bara aikuki diara liliakira daukaia.

11. ¿Dîa ba maya waitna bara maya mairin pânika lâka bri ba sauhkaia sip sa?

¹¹ Maya waitna bara maya mairin ba pâna pain banhwisa kaka, ai brinka kabia piu bani asla kaia. Rait sa, aima kum kum ra aikuki kaia sip apia kabia. Kuna piu yari laihura kaia ba witin nani ra ambuk munaia sip sa. Tânka kum baku, kum kum nani ba wahbi sakisa kuntri wala ra wark kum briaia bara baha tâka mita piu yari ai pamalika wina laihura sa. Naha ba ban kra lalah lainka ra yamni munbia, kuna marit lâka bilara, trabil ailal brih balaia sip sa.

12, 13. a) ¿Marit nani kum kum ba dîa daukan sa aikuki taim luaia dukiara? (Lilka ba sin kaiks). b) ¿Maritkam wal pânika lâka brisma ba nahki kulkaia sma? (“¿Ramyaka ra maritkam ba dîa kulkanka brisa?” bakska ba sin kaiks).

¹² Kaisa laki kaikaia marit kum kum nani ba aikuki taim luaia dukiara dîa dauki banhwisa. Guam kîka wina kristian mairin kum nina Leah ba wisa: “Mayi bara yang ba diara sât sât dauki aikuki taim luaia laik sna. Aima wiria nani ra baman liliaka kum kum nani ra aikuki asla apia sna”. Stech kuntrika wina kristian mairin kum nina Roxanne ba wisa: “Piu bani wark kau ailal bri ba mita, dîa dauki ba tilara aikuki luaia dukiara taim sakisa, bara naha ba tânka tara bri warkka kum baku kulkisa” (Emus 3:3 wal praki kaiks). Francia kuntrika wina kristian waitna kum nina Damien ba wisa: “Yang nani kaikri sa nahki yamni sa wan maritka dîa laik kaiki dukia nani ra sin wan sinska mangkaia bara piu lui ba wal yawan sin baha wina lilia sakisa” (Mt. 7:12). Bara Stech kuntrika wina sin kristian mairin kum nina Katie ba wisa: “Sam taim yawan aikuki taim luisa piua ra, diara kumi sin ambuk wan munbia apia dukiara wan teleponka nani ba sait ra swisa”.

¹³ Diara sut purkara, Jehova warkka dauki aikuki taim lus. Francia kuntrika wina kristian mairin kum nina Myriam ba wisa: “Wan yua ba Baibil aisi kaiki tâ krikisa bara ningkara yawan dîa laik kaikan ba dukiara pana pana aisisa bara nahki wan rayaka ra alki daukaia sip ba dukiara sin. Baha piua nani ba pranakira sa”. Baku sin naku aisisa: “Yang laik sna mayi wal aikuki wan pura sunisa taim, kan baku walaia sip sna nahki witin Jehova ra latwan kaiki ba”. Baiki sakanka luan ra, kristian mairin nina Katie ba naku sin aisan: “Marit baku aikuki smalkaia ba uba laik banhwisna. Jehova dukiara wan maritka nahki smalki ba walaia kau asla wan daukisa bara pana pana kau lan takisa” (S.L. 27:17).

TRABIL NANI BÂRA KABIA KRA SIN BAN ASLA BANHWI KAP

14, 15. ¿Dîa muni marit nani ba karna trai munaia sa trabil nani ba wapni ra mangkaia dukiara? Tânka kum wal mariks.

¹⁴ Yawan mistikkira ba mita, marit lâka bilara trabil nani bribia. Baibil ba marit nani ra naha smalkanka param yabisa: “Sakuna marit taki uplika nani ba [...] trabil nani bribia” (1 Ko. 7:28). Naha borska tânka mariki wahia mina ulbanka kum ba wisa “naha bîla nani ba tânka marikisa marit bilara trabilka nani bribia ba”. Marit kau asla banhwi nani kat sin trabil nani bribia. Trabil nani takisa taim, maya waitna bara maya mairin ba karna trai munaia sa baha nani wapni ra mangkaia dukiara bara ban asla iwi kaia. ¿Dîa muni?

¹⁵ Utla painkira kum ra luki kaiks. Diara kum aisawbia kaka, dawanka nani ba kli paskaia wahbi sâkbia kaia sa. Ban kra baha dukiara lalah ailal tikbia bara diara wala nani sin. Baku tnatka ra mani ailal bilkara main kaiki bri kaia sip sa. ¿Kuna dîa muni baku daukisa? Kan witin nani mapara naha watla ba tânka tara brisa. Marit nani ba wal sim sât takisa, ai maritka lâka ba kulkanka tara brisa. Baha watla painkira baku, diara kum aisawbia kaka kli paskaia sip sa. Marit lâka bilara trabil tara nani bribia kra sin baha nani wapni ra mangkaia sip sa. Rait sa trabil nani wapni ra mangkaia dukiara karna wark takaia sa bara taim nit kabia, kuna maya waitna bara maya mairin ba ai pânika lâka kau karna daukaia dukiara dîa dauki banhwi ba Jehova kaikisa taim, lilia ai dara walisa (Mal. 2:16). Baku daukisa taim, witin nani pana pana latwan lâka bara rispik lâka mariki banhwisa, bara baha purkara Jehova ra sin, kan witin sika marit lâka paskan bamna.

16. 1 Korint 13:4-8a ra wi ba baku, ¿trabil tara nani bâk lui maritka nani ra dîa ba hilp munaia sip sa? (Lilka bara “Pânikam lâka kau karna daukaia dukiara hilpka nani” bakska ba sin kaiks).

¹⁶ Maritkam lâka bilara trabil nani takbia kaka, isti pali dakwi takaia lukpara (1 Ko. 7:10, 11). Kau ni silp mamkabi wals, “¿Yang dîa daukaia sip sna maritki wal pânika lâka brisna ba kau karna daukaia dukiara?”. Baibil ba latwan lâka marikaia dukiara dîa smalki ba laki kaiks bara luki kaiks man dîa daukaia sip sma 1 Korint 13:4-8a (aisi kaiks) ra dîa wi ba rayakam ra alki daukaia dukiara. Maritkam wina dakwi takaia tnatka plikaia watlika ra, mayam waitna apia kaka mayam mairin kupia alkaia tnatka nani pliks. Luki kaiks man dîa daukaia sip sma maritkam lâka wapni ra mangkaia dukiara. Jehova tâm bribia makas. Wan ulbi sakanka bara wan lilkika nani ra baha tânka laki kaiks. Baku sin, kangrigisan almukka bara spirit lainka ra pâwan kristian wala nani wal aisas. Kupiam krauks kristian maritka lâka ba trit awa yumhpa kum baku sa bara tritka kau dutki ba sika Jehova. Baha mita, wâlsut witin ra tniwisa kaka, maritkam lâka ba ban pali dakbia apia (Smas. 4:12).

17. ¿Marit takaia luki nani bara marit nani ba nahki lilia kaia sip sa?

¹⁷ Jehova brinka sa ai uplika nani sut ba lilia kabia, baha tilara marit takaia luki nani bara pat marit takan nani ba sin. Man marit takaia want sma kaka, ramyaka aiska ra pâmnika kabia uplika aman pali wahbi sâks. Bara pat marit sma kaka, maritkam wal pânika lâka brisma ba ban dutki dauki bas. Karna trai muns marit bilara trabil nani takbia ba wapni ra mangkaia bara piu sut ra Jehova ra tniwaia. Baku daukma kaka, mayam waitna apia kaka mayam mairin wal liliakira iwma (Smas. 9:9).