Tasba aiska ra kupia kumi lâka bâra kabia

Yawan sut ba kupia kumi lâka ra iwaia want sa. Mani ailal luan wina naiwa piua ba kat, gabamint tâ bri uplika nani ba ban trai kaiki banhwisa war aiklabanka nani danh daukaia bara kupia kumi lâka bri balaia, bara aima kum kum ra kupia kumi lâka bri balan kan, kuna piu kunhku kum ra baman. Sakuna sari sa, kan baha trabilka nani ban bâra sa. ¿Piu kum tasba aiska ra kupia kumi lâka bâra kabia ki? ¡Âu sika! Jisas Kraist dîa smalkan ba kaisa kaikaia.

Jisas kaina piua ra dîa daukbia ba

Baibil ba marikisa Jisas piu kunhku bilara rait aihwa kupia kumi lâka bri balaia dukiara dîa daukbia ba.

• Jisas ra “mâkan kabia [...] Kupia Kumi lâka Kingka. [...] bara ai kingka lâka ba plis bani ra yaka wabia bara kupia kumi lâka ba ban kabia” (Aiseya 9:6, 7). Gâd Kingka Lâka Kingka baku, Jisas daukbia tasba aiska ra kupia kumi lâka bâra kabia ban kaia ra.

• “Witin bui swaki sâkbia baha umpira nani makabi ba bara diara luha nani upla bui hilp munras nani ba” (Lawana Nani 72:12-14). Jisas kasak lâka rait aihwa bri balbia, baku tnatka ra, war aiklabanka nani, rausauhkanka bara panis wahwanka ba sut âpu daukbia.

• “Nisan kum, nisan wala mapara kli war aiklabaia lukbia apia, war aiklabaia lâka nani sin kli smalkbia apia” (Aiseya 2:4). Jisas tasba ra king aimakbia piua ra, upla kumi sin war aiklabaia dukia nani lan takbia apia, kau ni tasba aiska ra upla sut ba rait aihwa kupia kumi lâka ra iwbia.

Jisas kaina piua dukiara nahki kupia kumi lâka wankbia ba bara yawan dîa daukaia sa lan takaia dukiara, naha lilkika ba kaiks: ¿Gâd Kingka Lâka ba dîa sa ki?

Jisas dîa smalkan ba

Jisas smalkanka nani ba upla milian milian ra naiwa ban hilp munisa kupia kumi lâka ra iwaia dukiara. Jisas il purara aisanka ra diara tânka kasak nani ba smalkan, bara baha ba hilp wan munisa naiwa piua ra kupia kumi lâka ra ban iwi kaia. Kaisa tânka kum kum kaikbia.

• “Lilia pali sa kupia kumi lâka dadaukra nani ba” (Matiu 5:9). Jisas ba ai disaipilka nani ra smalkan unsabanka nani wina sait ra kaia trai kaikaia baman apia kan, sakuna kupia kumi lâka tâ baikaia kan.

• “Muihkam wal wih kupiam kumi taks. Baha kat lika sip sma kli altar ra bal prisantkam ba Dawan ra yabaia” (Matiu 5:23, 24). Jisas upla ra smalki kan blahwanka nani bri kan ba isti wapni mangkaia. Bara marikan, Gâd wal pana lâka kum briaia dukiara upla sut aikuki kupia kumi lâka ra iwaia kan.

• “Uplikam lâka aisi daukpara, baku mika Gâd mita man nani lâmka aisi daukbia apia” (Matiu 7:1). Jisas smalkan mawan wâl briaia bara upla lâka aisi daukaia ba saura pali sa, kan baha daukanka saura nani ba blahwanka bukisa. Bara sin ai nina blablikra nani ra smalkan, upla nina aisaia watlika ra, wala nani mistikka padin munaia kan (Luk 6:37).

Tasba aiska ra, upla ailal ba Jisas dîa smalkan ba alki daukisa. Rau munan lâka bara tar baiwan lâka uba bâra sa pliska nani ra kat sin, naha uplika nani ba ai trabilka nani unsaban âpukira wapnika mangkaia lan takisa, bara ai latwanka lâka bara padin lâka marikaia trai kaiki banhwisa, rau munanka lâka bâra kabia sin.

Jisas smalkanka nani ba nahki upla ailal ra kupia kumi lâka ra iwaia hilp muni ba kaikaia want sma kaka, naha ulbanka “Cómo sentir paz a pesar de las guerras y los conflictos armados” aisi kaiks.