¿Rilidian nani ra dîa takbia? | ¿Baibil ba dîa wisa?

¿Rilidian nani dukiara sari apia kaka praut damra walisma ki? Kasak sa, rilidian nani ba upla bara tawan kum kum dukiara diara yamni nani daukan sa, sakuna diara saura nani manis sin daukan sa. Enciclopedia bukka kum rilidian bara war nani dukiara naku wisa: “Rilidian nani taka mita tasba ra war kau saura nani ba bukan sa” (Encyclopedia of Religion and War). Aima aihkika ra, rilidian tâ uplika nani ba Gâd ra mayunaia dukiara rilidian ba yus munras sa, kau ni pulitik tâ baikaia dukiara yus munisa. Wala nani ba ai rilidianka ba yus munisa rug munan lâka apia kaka, lalah warbanka nani yukuwan lâka ra bri kaia dukiara.

Rilidian nani ba ai warkka pain daukras sa lukisma kaka, ban kra lukaia sip sma: “¿Rilidian nani dukiara Gâd dîa lukisa ki?”. Baibil ba tânka marikisa Gâd ba rilidian aihkika nani ra yamni kaikras sa bara prapit aisanka nani wal wan marikisa rilidian nani wal dîa daukbia ba. Maprika lilka kum yus muni Baibil ba wan wisa Gâd mita tasba aiska rilidianka nani sut mapara bubia.

¿Rilidian nani wal dîa takbia sapa Baibil ba dîa smalkisa ki?

Prapit aisanka: Param Marikan bukka ba rug mairin kum dahra aisisa bara Babilon tara ba nina mâkisa. Naha ba daiwan saura pauni kum purara iwisa. Sakuna ningkara, baha daiwra saura ba rug mairin ba ra ikisa (Param Marikan 17:3, 5, 16).

Tânka ba: Rug mairin, Babilon tara ba, rilidian kuninkira nani sut Gâd yamni kaikras nani ba tânka marikisa.a Daiwan saura pauni ba Organización de las Naciones Unidas (ONU) asla takanka ba tânka marikisa.b. ¿Rug mairin daiwan saura pauni purara iwi ba dîa tânka marikisa? Tânka sa rilidian kuninkira ba ONU asla takanka ra tâ briaia trai munisa. Bara daiwan saura nani ba bui rug mairin ba ra iki banhwaisa, kan ONU bara tâ baiki kuntrika nani ba mita, tasba aiska rilidian kuninkira nani sut ra mapara bui sauhki tikbia.

¿Rilidian kuninkira nani ra nahki sauhki tikbia?

Prapit aisanka: Baibil ba naku wisa: “Bara aringka [10] daiwan saura bri kan kaikram ba mita mairin rugkira ba ra misbara kaiki banhbia […] bara witin ba pauta ni angki sauhki tikbia. Gâd mita witin nani kupia ra mangkan [wibia kaka, tasba aiska gabamintka nani sinska ra mangkbia] witin kupia lâka daukaia, baha nani wal ai lukanka kumi daukan bamna, bara daiwan saura ba ra king nani karnika yan ba mita, Gâd bîla nani aisan ba aimakbia ba kat”. Bara naku sin wisa: “Baha tâwan, yu kumi bilara ai pâtka tara nani ba balbia: prura, sari, bara plun wahwan; witin ba pauta ni angkan kabia. Kan [Jehova]c Gâd, witinka ra lâka dauki ba, karnakira sa” (Param Marikan 17:16, 17; 18:8).

Tânka ba: Gâd bui witin ai lukanka ba gabamint tâ bri nani sinska ra mangkbia bara witin nani bui king karnika bri ba ONU ra laki yabia, wibia kaka pulitik karnika bri ba. Bara baku, ONU ba gabamint nani wina karnika raya brin ba wal, tasba aiska rilidian kuninkira nani ra sauhki tikbia. Naha sut ba isti bara bîla kaikras kira aimakbia. Upla ailal ba sirang iwbia (Param Marikan 18:21).

¿Dîa tâwan rilidian kuninkira nani ra sauhki tikbia?

Prapit aisanka: “Kan ai saurka nani ba aipaswi taki, kasbrika purara ba kat alkan sa, bara ai watawanka nani ba Gâd ai kupia ra bri kan” (Param Marikan 18:5).

Tânka ba: Pat piua aihwa wina rilidian kuninkira nani ba diara saura nani daukan sa. Naha saurka nani dauki ba mita Gâd bui witin nani ra sauhki tikbia:

Pulitik bisniska tilara dimisa. Jisas Kraist ba ai nina blablikra nani ra lan daukan pulitik tilara dimaia apia bara Gâd Kingka lâka ra kasak lukaia. Naha ba heven ra gabamint kum sa bara tasba gabamintka nani ba âpu dauki witin baman aimakbiad (Daniel 2:44; Matiu 6:9, 10; Jan 6:15; 18:36). Sakuna rilidian kuninkira nani ba bîla walras sa: Gâd Kingka lâka ra kasak kaia watlika ra pulitik bisniska ra aima bani dimi banhwisa. Baha mita, Param Marikan bukka prapit aisanka ra wan wisa Babilon tara ba sika rug lâka ra kauhan sa, bara baha tâwan rug mairin ba nina mâkisa (Param Marikan 17:1, 2; Jems 4:4).



Rau munan lâka. Baibil ba wisa rilidian kuninkira nani sut ba “naha tasba ra ikan nani” sut tâlia ba pâtka brisa (Param Marikan 18:24). Rilidian aihkika nani ba ai uplika nani ra kupia kumi lâka lan daukras sa, kau ni war bara rau sauhkanka nani ra tâ baikisa.



Gridi lâka. Rilidian kuninkira nani ba diara bahki nani ra ai swira âpu kira lalah ailal tikisa (Param Marikan 17:4; 18:7). Aihkika nani ba ai uplika nani ra yus munisa kau yuyakira kaia dukiara. Bara Gâd baha gridika lâka ba misbara kaikisa (Taitus 1:7).



Kunin lâka. Rilidian kuninkira nani ba upla ra smalkisa Baibil dîa wi ba mapara kaia.e Baibil ba rilidian kuninkira ra “tasba ra misbara lâka nani ba sut yaptika” nina mâkisa, kan witin wina smalkanka bara daukanka kuninkira nani balisa (Param Marikan 17:5; 18:23).

¿Rilidian nani sut ra sauhki tikbia ki?

Apia. Dîa muni sapa kaisa kaikaia. Baibil ba wan smalkisa pât tara piua kum bâra kabia. Baha piua ra rilidian kuninkira nani bara Gâd waihla nani ra sin sauhki tikbia. Param Marikan bukka ba sin wan wisa nisan nani tila wina upla kwâra tara kum sin swakwi takbia. Naha kwâra tara ba kwala pihni bara yari dimisa. Baha tânka sa witin nani ba Jehova ra kasak sa bara witin dîa makabi ba kat mayunisa (Param Marikan 7:9, 13, 14; 19:11, 19-21). Kwâra tara uplika nani ba rait aihwa rilidianka tilara sa bara ban kaia ra kabia.f

¿Rilidian kuninkira nani ra sauhki tikbia ba man ra nahki ambuk mai munisa?

Rilidian nani diara saura nani daukan ba Gâd misbara kaikisa nu takaia ba âmyapah lâka maikisa kaia sa. Bara Gâd nina sauhki rilidianka nani danh âpu kabia nu takaia ba sin kaina piua ra bîla kaikanka kum maikisa kaia sa.

Baha purkara sin nu bas Gâd makabi ba kat mayunaia sip sa. Baibil ba wisa: “Aisa ra ai pura suni mayuni banhwi ba lika, ai pura suni mayunbia kasak tânka ra bara Spirit ra sin. Aisa ba baku brin daukisa, witin ra ai pura suni mayuni banhwi ba baku daukbia” (Jan 4:23). Gâd wisa: “Yang upliki nani, baha tawanka [Babilon tara] ba wina bal taks. Baku lika ai saurka nani ba aikuki brima apia bara ai pâtka tara nani ba sin mai alkbia apia” (Param Marikan 18:4, 5). Baku ba ra Gâd upla nani ra paiwisa rait Baibil dîa smalki ba kat witin ra mayunbia (1 Timoti 2:3, 4). Bara pramis munisa ya baha paiwanka alkbia ba ban kaia ra iwbia (1 Jan 2:17).