Gâd Bîla wina maisa pakanka kum: War sîa plapan nani dukiara bîla kaikanka

Mani bani, upla milian nani ai watla swih plapaia nit sa. ¿Aima kum baha mai takan sa ki? Upla kum bâra sa hilp mai munaia sip sa: Gâd. Witin ba rayaka kau pain kum pramis mai munisa. Bara Baibil ra baha pramiska nani ba lan takaia sip sma.

“War sîa plapan nani baa nawas baman hilp nit apia sa, baku sin bîla kaikanka kum nit sa naika piua dukiara” Christos Stylianides, Unión Europeab suldiarka kum kan ba baku aisan. Upla kum bîla kaikanka brisa taim, kaina piua dukiara lilia kaikaia sip sa. Sakuna baha purkara sin, war sîa plapan uplika nani ba ai insaitka insauhkanka nani rakaia dukiara maisa nihkanka nit sa.

“Kuntriki wina plapri taim, pamaliki swiaia kapri, bara diara sut bri kapri ba lus tiwri daira walri. Uba si bri kapri, sari kapri bara kupi kriwan daira walri” (Emmanuel, Haití).

¿Man sim baku damra walisma? Wamtla swiram kaka, bîla kaikanka bara maisa nihkanka maikbia pliska kum plikaia sma. ¿Baibil ba nahki hilp mai munaia sip sa?

Baibil wina maisa nihkanka

Baibil ba naku wisa: Jehovac “tringsar man nani tilamra iwi ba ra latwan kaiki [sa]” (Kli Smalkanka 10:17, 18).

Baibil ba naku wisa: “[Jehova] baha nani sut lamara sa, witin ra wini banhwi ba” (Lawana Nani 145:18).

Baibil ba naku wisa: “Lukaia apia sa Gâd karnika sut bri ba, saura daukbia, kasak apia ba sin daukbia […] witin saura kumi sin daukras sa” (Job 34:10, 12).

Naha tânka sa Gâd ba pât wahwanka pâtka âpu sa. Witin klala maikras bara traika kaikanka nani sin mai mangkras.

Baibil wina bîla kaikanka

Baibil wan marikisa wan kaina piua ra Gâd dîa daukaia luki ba. Kaiks naha bîla kaikanka upla kum kum ai watla swih taki wan nani ra nahki hilp munan ba.

Baibil ba naku wisa: “[Gâd] witin nani nakra laya ba sut dikbia, bara prura kau âpu kabia, inanka, pura mata inaia lâka, latwanka sin” (Param Marikan 21:4).

Naha tânka sa yawan danh pât wahbia apia. Gâd pramis wan munisa naiwa trabil nani sut ambuk wan muni ba âpu daukbia.

“Tisku pali Gâd ba kasak apia nani bara diara saura nani ra âpu daukbia. Naha bîla kaikanka ba hilp ai munisa pât wahwanka âpu kabia piua ra lukaia” (Karla, El Salvador).

Baibil ba naku wisa: “[Diara] almuk kata ba dukiara kli wan kupia kraukbia apia, ba dukiara wan lukanka ra sin kli bal dimbia apia” (Aiseya 65:17).

Naha tânka sa piu luan ra dîa wan takan ba ra luki kli panis wahbia apia. Piu luan ra diara saura mai takan ba mita ban kra sari iwisma, sakuna Gâd witin daukbia man danh sari kama apia dukiara.

“Baibil pramis wan munisa dîa lus tiwan ba bara panis wahwan ba kli sin wan kupia kraukbia apia. Naha bîla kaikanka ba hilp ai munisa naha trabilka nani mapara buaia, kan nu sna tisku diara sut chens takbia” (Natalia, Ucrania).

Baibil ba naku wisa: “Kasbrika purara Gâdka ba king lâka kum bukbia bara […] king lâka wala nani sut ra pura lubia” (Daniel 2:44).

Naha tânka sa gabamint kasakkira kum heven pura wina tasba na rul munbia. Tisku pali Gâd bui tasba gabamintka nani sut âpu dauki witin silp ai gabamintka bapi mangkbia. Baha gabamintka ba upla sut dukiara kupia kumi lâka, yamnika lâka, kasakka lâka bara pâwanka sin bri balbia (Miqueas 4:3, 4).

“Lilia ai daukisa nu takaia taibi munan lâka ba, rau sauhkanka ba, upla mawan kulkaia lâka ba, bara upla nani aihka wan kaiki ba sin danh âpu kabia. Tisku pali, Jehova Kingka lâka ba naha trabilka nani sut âpu daukbia” (Mustafá, Asia).

Baibil wina smalkanka yamni nani

Baibil ba hilp mai munaia sip sa dîa mai takan ba tawa tawa amya tikma dukiara. Ai smalkanka yamni nani ba hilp mai munaia sip sa rayakam iwaia lan takma dukiara, bara dîa lus tiwram ba ra uya lukaia apia. Kaiks nahki ai watla swih plapan kum kum ra naha smalkanka nani hilp munan ba:

Baibil ba naku wisa: “Upla rayaka ba lika diara ailal bri ba mita raya apia” (Luk 12:15).

¿Naha bîla nani ba nahki hilp mai munaia sip sa? Ban kra man sirang iwram sa bara dîa lus tiwram ba ra luki uba sari damra walisma. Sakuna, kau raya sma ba ra luki dîa lus tiwram ba bahki sa lukma kaka, ban kra sât wala damra walma.

“Rayaka ba kau manakira sa tasba dukia nani ba wal, bara aima aihkika nani ra lalah bara yuyaka nani ba hilp wan munras sa” (Natalia, Ucrania).

Baibil ba naku wisa: “Aima kumi sin makabi walpara, dîa kan piua luan ba kau yamni kan” (Smasmalkra 7:10).

¿Naha bîla nani ba nahki hilp mai munaia sip sa? Ramyaka ra trabil ailal bri kama sin, piu luan ra nahki iwi kapram ba wal praki kaikpara. Baha ba hilp mai munbia uba sari kaia apia.

“Nawas rayaki ra nahki sna ba ra lukaia ba hilp ai munisa lukanka yamni nani briaia” (Eli, Ruanda).

Baibil ba naku wisa: “Yawan na plun bara kwala sin brisa kaka, baha ba aitani sa wal lilia kaia” (1 Timoti 6:8).

¿Naha bîla nani ba nahki hilp mai munaia sip sa? Dîa nit sma ba kat iwaia trai munma kaka, ban kra uba wari takma apia bara nahki damra walisma ba sin alki takaskma.

“Baibil smalkanka nani ra tingki diara nani ba sât wala kaikisna bara dîa lus tiwri ba ra uba lukras sna. Mayi mairin bara yang lilia daira wali banhwisna raya bara pain banhwisna ba mita” (Iván, Ucrania).

Baibil ba naku wisa: “Upla wala nani man nani ra dîa mai daukaia brin mai dauki ba baku, man nani sin dauks” (Matiu 7:12).

¿Naha bîla nani ba nahki hilp mai munaia sip sa? Wihka bîla kaikan lâka bara kupia yamni lâka marikaia trai munma kaka, wala nani wal kau pain iwma. Ban kra baku wala nani ba pain main kaikbia bara man dukiam ra saura lukbia apia.

“Aima ailal ra upla nani ra rispik, yamni bara latwan lâka marikma kaka, pana pain mai muni banhwisa. Baha ba hilp mai munisa iwisma pliska uplika nani wal pain iwaia dukiara”(Angelo, Sri Lanka).

Baibil ba naku wisa: “Dîa dîa luha sma ba sut, Gâd ra puram sunra nani ra wis […] bara Gâd ai kupia kumi lâka [...] kupiam nani lukanka nani sin main kaiki kabia” (Pilipai 4:6, 7).

¿Naha bîla nani ba nahki hilp mai munaia sip sa? Gâd ra puram suns bara nahki damra walisma ba, dîa nit sma ba, dîa si brisma ba, bara dîa wari mai muni ba sin wis. Puram sunaia ba hilp mai munbia wari takisma ba daskaia bara trabilkam ba mita uba sari lukaia apia.

“Trabil brisna piua bani ra Gâd ra puri sunisna bara witin ansa ai munisa. Baibil wina dîa lan takri ba sut rait aihwa âiyapah aikan sa”(Yol, Sudán del Sur).

“Baibil smalkanka yamni nani ba kupia kumi lâka aikan sa, naha trabilka saura na mapara buaia dukiara” (Valentina, Ucrania).

“Jehova mita rayaka kau pain kum pramis wan muni ba mita, âiyapah pali daira walisna” (Emmanuel, Haití)

¿Baibil pramiska nani wina maisa nihkanka bara bîla kaikanka wanki ba dukiara, bara nahki baha nani ra kasak lukaia sip sma ba sin kau nu takan mai daukisa ki? Wamtla kat Jehova witniska kum wabia makas bara liliakira ni mana luha witin hilp mai munbia.