Skul tara kau dimaia ba dukiara nahki wahbi sakanka pain nani daukaia sip sa

1, 2. a) ¿Wahma tiara nani ba ai rayaka dukiara dîa sât wahbi sakanka nani daukaia sa? b) ¿Skul tara bîla ba dîa tânka sa? (“Bîla tânka ba” sin kaiks).

WAHMA tiara sma kaka, ban kra aima ailal ra upla nani ba mamkabi walan sa: “¿Ramyaka wal dîa daukma sapa?”. Raitka ba dîa kau pain daukaia sip sma ba sika ramyaka aiska ba yus munaia Jehova warkka daukaia dukiara. Kuna, nitkam nani briaia dukiara wark takaia sma (2 Tes. 3:10). Ban kra man pat luki kaikram sa dîa sât warkka daukaia want sma ba.

² Wark kum pliki sakaia dukiara, wahma tiara kum kum nani ba ai aisa yapti wal aisan ningkara, wahbi sakisa skul kau tara kum dimaia.a Ban kra man pat luki kaikram sa skul tara dimma sapa bara dîa sât klaska nani brima. Baku sa kaka, naha stadika ra laki kaikbia wahbi sakanka pain nani briaia dukiara, ani Baibil smalkanka nani hilp mai munaia sip sa. Naha stadika ba wahma tiara nani dukiara aisisa, kuna skul tara dimaia luki kristianka nani sut ra hilp munaia sip sa. Bara aisa yapti nani ba naha stadika kupia kraukanka nani yus munaia sip sa ai luhpia nani ra pain tâ briaia dukiara.

“¿SKUL KAU TARA KUM DIMAIA SNA KI?”

3. ¿Dîa muni kristian kum kum nani ba skul kau tara kum dimaia lukaia sip sa?

³ Plis kum kum ra tuktan piua ra dimi skulka baman briaia ba wal aitani sa, wark kum pliki saki ai rayaka nitka nani briaia dukiara. Kuna plis wala nani ra nit sa skul tara kum dimaia wark pain kum pliki sakaia dukiara. Ban kra naha ba kristian kum ra chanska yabia smalkaia warkka apia kaka Jehova warkka ba tâ baikaia dukiara. Ban sakuna, skul tara dimaia dukiara sakripais nani daukaia sa bara kristian nani mapara trabil nani bri balaia sip sa.

4. ¿Kristian kum skul tara dimaia sapa wahbi sakanka ba ya mihta ra sa? (Wahia mina ulbanka ba sin kaiks).

⁴ Baibil ba wisa “upla bani yakan ai karbanka ba twilkaia sa” (Gal. 6:5). Baha mita, kristian kumi bani ba skul tara dimbia sapa silp wahbi sakaia sa.b Sakuna tuktan nani ba skul tara dimbia sapa wahbi sakanka nani ba aisa yapti nani mihta ra sa (Epe. 6:1). Baku sin, witin nani ba ai luhpia nani ra pain tâ briaia sa, kan baku witin nani aitani pâwbia taim, naha tânka ba dukiara wahbi sakanka pain nani briaia sip kabia (S.L. 22:6).

5. ¿Ahkia piua ra kristian kum ba wahbi sakaia sa skul tara dimbia sapa, bara dîa muni? (Lilkika ba sin kaiks).

⁵ ¿Ani piua ra kristian kum wahbi sakaia sa skul tara dimbia sapa? Aima aihkika ra, wahma tiara nani ba ai skulka tnata mangkras kainara baha tânka dukiara laki kaikisa. Kuna, tânkira sa baha tânka dukiara wahbi sakanka daukaia piua balras kainara ai aisa yapti nani wal aisaia. Kan baku tnatka ra, witin nani taim aitani bribia aikuki tânka ba laki kaikaia bara dîa daukaia sip ba aisaia dukiara. Ban kra kau skul dimisa piua ra, klaska kum kum nani ra ai sinska kau mangkaia sip sa. Baku tnatka ra, naika piua dukiara dîa skulka tara dimbia apia kaka dîa sât warkka bribia dukiara ridi takaia sip sa. Kuna, ¿skul tnata mangkras kainara naha dukiara wahbi sakanka kum mahka daukaia nit sa ki? Apia (S.L. 21:5). Wahma tiara kum kum nani ba wahbi sakisa ai skulka tnata mangkan ningkara, skul tara dimbia sapa laki kaikisa piua ra wark kum pliki sakaia bara tâura smasmalkra warkka ba alkaia. Bara kum kum nani ba luki kaikisa kau naika ra apia kaka piu wala ra skul tara dimaia wahbi sakanka ba daukaia.

6. ¿Skul tara dimaia sapa pain wahbi sakaia dukiara, dîa ba hilp mai munbia?

⁶ ¿Skul tara dimaia sapa pain wahbi sakaia dukiara dîa ba hilp mai munbia? Jehova wal aisas (Je. 1:5). Baku sin, naha tânka wâl ba ra luki kaikaia sip sma: Pas ba, silp mamkabi wals dîa muni kau skul dimaia want sma sapa (Law. 26:2). Bara tânka wala ba, luki kaiks skul tara dimma kaka, ramyaka ra dîa sât yamnika nani bara dîa sât trabilka nani bri balbia sapa (S.L. 14:15). Kaisa naha tânka wâl ba dukiara aisaia.

“¿DÎA MUNI YANG BAN SKUL DIMI KAIA WANT SNA?”

7. ¿Dîa ba silp wan makabi walaia sa, bara dîa muni?

⁷ Skul tara kum dimaia lukisma kaka, yamni sa naha makabi walanka ra lukma: “¿Dîa muni yang baha skulka dimaia want sna ki?”. Upla aihkika ba skul tara kum dimaia wahbi sakisa, kan want sa wark pain kum pliki sakaia bara lalah pain win takaia. ¿Baku lukaia ba saura sa ki? Apia (1 Ti. 5:8). Ban sakuna, Baibil ba wan kupia kraukisa nahki naha tasba dukia nani bara lalah plikaia ba trabil ra wan dingkaia sip sa (S.L. 23:4, 5; 1 Ti. 6:8-10; 1 Jn 2:17). Man lalahkira takaia apia kaka naha tasba ra kulkanka tara briaia plikisma kaka, las kat yakan damra walma bara kau saura ba sika, Jehova wina laihura takma.

8, 9. a) ¿Kristian nani ba skul tara dimaia ba nahki kaikaia sa? (Matiu 6:33). b) Josefina, Morine, bara Iris dîa aisan ba wina, ¿man dîa lan takisma?

⁸ Yawan sut mapara Jehova warkka ba wan rayaka ra pas tâura mangkaia ba kau tânka tara bri kaia sa (Mt. 22:37, 38; Pil. 3:8). Baku sa kaka, ¿skul tara dimaia ba nahki kaikaia sa ki? Naha ba wan nitka nani briaia bara wan kupia aiska ni Jehova warkka daukaia dukiara hilpka kum baku kaikaia sa (Matiu 6:33 ba aisi kaiks).

⁹ Kaisa laki kaikaia kristian kum kum ra dîa hilp munan sa tânkira lâka wal skul tara dimaia ba dukiara wahbi sakanka nani daukaia. Chile kuntrika wina, Josefina ba naku wisa: “Jehova warkka ra kau daukaia chanska briaia dukiara skul kum dimaia bara wark kum pliki sakaia wahbi sakri. Kuna sinskira bri kapri kau tânka tara bri ba sika Jehova warkka ba, skul dimaia ba lika apia”. Mani kum bilara, kristian mairin kum nina Morine ba upla tâwa klakaia skulka ba diman. ¿Dîa muni? Witin ba naku aisisa: “Kau nitka bri pliska nani ra wih tâ baikaia want kapri, bara baha daukaia dukiara skul sirpi kum dimi sakri. Skulki tnata mangkri ningkara, upla tâwa klakaia warkka ba daukaia tâ krikri bara baku impakaia dukiara lalah apahkaia. Nitka bri pliska ra wih tâ baikaia wari taim, dîa stadi takri ba wark kum pliki sakaia hilp ai munan”. Iris, skul kau yari kum dimaia wahbi sakan, witin ba upla napa daktarka kum takan bara naku wisa: “Skul tara kau yari kum dimaia ba yamnika nani brisa, kuna lilia lâka rait aihwa ba maikras sa. Yawan wan rayaka ra Jehova ra pas tâura mangkisa kaka, lilia lâka rait aihwa briaia sip sa”. Param sa, wan rayaka ra Jehova wal pânika lâka bri ba kau tânka tara brisa kaka, dîa wahbi saki ba wal yawan lilia kabia.

“¿DÎA YAMNIKA NANI BARA DÎA SÂT TRABILKA NANI BRIBIA?”

10. ¿Kli Smalkanka 32:29 ba nahki hilp mai munbia skul tara dimaia dukiara wahbi sakanka pain kum daukaia?

¹⁰ Ban kra man dîa sât warkka daukaia want sma ba dukiara pat luki kaikram sa. Baku sa kaka, yamni kabia wark wala nani dukiara sin luki kaikaia, ban kra man laik sma dukia nani apia kaka diara wala (Sins Lâka 18:17 ba wal praki kaiks). Naiwa piua ra tnatka sât sât bâra sa, patitara piua ra âpu kan nani ba. Tânka kum baku, Internet bâk skul sirpi kum dimaia. Baku sin, man sip sma luki kaikaia skul tara kum dimras kira nahki nitkam nani briaia sip sma sapa. Tânka kum baku, Finlandia kuntrika wina kristian mairin kum nina Johanna ba skul tara dimras kan. Witin ba wisa: “Skulki tnata mangkri ningkara, tâura smasmalkra takri bara wark sirpi nani alkri. Yang wark ailal nani briri, bara kaikri sa nahki Jehova yawan dîa nit ba wankbia pramiska ba alki daukisa”. Kupiam krauks dîa wahbi sâkma ba yamnika nani bara trabil nani bri balbia. Baha mita, silp mamkabi wals: “¿Yang dîa wahbi sakamna ba wal yamnika apia kaka trabil nani kau brimna ki?” (Kli Smalkanka 32:29 ba aisi kaiks; 1 Ko. 10:23). Naha makabi walanka ra ansa munaia dukiara kaisa tânka kum kum laki kaikaia.

11. ¿Dîa muni yamni sa luki kaikaia skul tara dimbia dukiara awar an yus munaia nit kabia ba? (Lilka nani ba sin kaiks).

¹¹ Wik bani awar an yus munaia nit kama. ¿Skul tara dimaia dukiara wik bilara awar an yus munaia nit kama ki? ¿Man taim aitani brima ki spirit warkka bara utla warkka nani daukaia dukiara? (Pil. 1:10). ¿Skul dimisma ba mita, uba swapan damra walma bara Baibil silp stadi takaia apia kaka aidrubanka nani dukiara ridi takaia danh karnika âpu kama ki? Naha sika kristian waitna kum nina Jeroz ra takan, witin ba India kuntrika wina sa. Bara naku aisan: “Smalkaia warkka tâ baikaia karna ai muni kan, asla aidrubaia bara bahara sinski mangkaia sin. Nanara, nu sna baha skulka dimi kapri ba ra taimki bara karnika mangkaia ba aitani apia kan”. Rait sa, skul kum kum nani ra lika wan taimka aiska yus munaia nit apia sa: kan tilara kum kum ba awar kum kum baman yus munaia nit sa bara wala nani ra uya wark maikras sa. Tânka kum baku, Mozambique kuntrika wina kristian mairin kum nina Rabeca ba wisa dîa wahbi sakan ba wal witin uba lilia sa bara naku aisan: “Dimi kapri skulka ra awar wâl baman yus munaia nit kapri. Naha hilp ai munan tâura smasmalkra warkka ba ban dauki kaia dukiara”.

12. ¿Piua brisma ba pain yus munaia dukiara ani makabi walanka nani ba hilp mai munaia sip sa? (Smasmalkra 12:1).

¹² Piua an yus munaia nit kama. ¿Skulkam tara tnata mangkaia dukiara kati apia kaka mani an nit kama ki? ¿Piua brisma ba pain yus munisma ki? (Epe. 5:15-17). ¿Baha skulka ba chanska maikbia ki man dîa brisma ba wina Jehova ra diara kau pain ba yabaia bara ai warkka ba piu aiska daukaia dukiara? (Smasmalkra 12:1 ba aisi kaiks). ¿Dîa lan takaia laik sma ba wina skul wala kum kau kunhku bâra sa ki? Tânka kum baku, skul watla apia kaka kampani kum kum nani ra wark sirpi nani daukma lan mai daukaia sip sa, naha nani ba piu wiria ra daukisa bara skul tara nani baku apia sa, kan kau sipar sa. Chile kuntrika wina, Mario ba naku aisan: “Mani wâl bilara wark sirpi kum daukaia dukiara skul dimri, naha ba skul tara ra waia ba wal kau sipar sa. Yang na wik bilara yu walhwal baman skul ra wi kapri. Bara baku tnatka ra, stadi taki kapri piua ra tâura smasmalkra warkka ba sin daukaia sip kapri”.

13. ¿Skul dimaia dukiara plis wala ra waia ba dîa sât trabilka nani bri balaia sip sa?

¹³ Skul tara dimaia dukiara anira takaskma. Ban kra, man iwisma pliska lamara skul watla kum sakaia sip sma. Kuna, ¿tawan wala ra waia apia kaka skulka watla bilara iwaia nit sma kaka? Kupiam krauks, pamalikam wina laihura wama kaka bara ban kra tamya nani apia kaka witnis apia nani wal iwma kaka, Jehova wal pânika lâka brisma ba ra ambuk munaia sip sa (S.L. 22:3; 1 Ko. 15:33). Mozambique kuntrika wina, Matias ba mani kum bilara skul sirpi kum diman. Bara naha ba uya mana apia kan, ban sakuna dîa daukan ba wal sari ai dara walan. ¿Dîa muni? Witin ba naku wisa: “Yang skul watla ra iwaia nit kapri bara yu bani traika kaikanka nani mapara bui kapri. Skul kum dimaia dukiara pamalikam wina laihura takaia ba yamni apia sa”. Bara Rusia kuntrika wina kristian mairin kum ba wisa: “Yang trabil nani bara traika kaikanka nani wina laihura kapri, kan skul watla ra iwaia watlika ra aisiki nani wal kapri”. Bara ban kra, Internet bâk man skul dimaia sip sma.

14. ¿Nahki Luk 14:28 smalkanka ba hilp mai munaia sip sa wahbi sakanka pain kum briaia dukiara?

¹⁴ Lalah an tikma. Skul kum kum dimaia ba uya mana apia sa apia kaka gabamint aibapi ba mita, mana luha sa. Baha piua nani ra, skul tara kum dimaia ba hilp mai munbia kau lankira takaia bara wark kum pliki sakaia dukiara. Kuna aima wala nani ra, skul kau tara nani dimaia ba mana sa. Baku sin lalah kau tikaia nit kama. Tânka kum baku, skul tara kum kum ra dimaia dukiara ban kra smasmalkra kum hilpka aibapaia nit kama. Upla kum kum ba ai skulka aibapaia dukiara mani ailal bilara tras ra dimisa. Mozambique kuntrika wina, Adilson ba dîa wahbi sakan ba dukiara sari lukisa bara naku aisan: “Pamaliki ba skulki aibapaia dukiara mani walhwal bilara plun bara ai nitka wala nani lainka ra sakripais nani daukaia kan”. Baha mita, naha makabi walanka nani ra lukaia yamni sa: “¿Skul dimaia dukiara lalah an tikamna? ¿Pamaliki bara yang aibapaia sip kamna ki? ¿Tnatka wala kau sipar kum bâra sa ki? (Luk 14:28 ba aisi kaiks). Bara ¿tras ra dimamna kaka, piua an ra aibapi takamna? Bara skulki tnata mangkamna ningkara, ¿traski aibapaia bara nitki nani briaia dukiara wark pain kum pliki sakaia sip kamna ki?” (S.L. 22:7).

15. ¿Dîa sât skulka dimbia wahbi sakras kainara dîa muni yamni sa laki kaikaia dîa sât warkka nani bâra sa sapa?

¹⁵ Wark kum pliki sakaia isi kabia ki. Man iwisma pliska ra apia kaka iwaia want sma pliska ra, ¿dîa sât warkka nani kau ailal bâra sa? ¿Dîa skulka dimram ba hilp mai munbia wark kum pliki sakaia dukiara? Skul kum kum nani ba wark aihwa daukaia dukiara lan daukras sa. Kan naiwa piua tânka nani, upla lukanka apia kaka buk nani sturka baman lan daukisa (Kol. 2:8). India kuntrika wina kristian mairin kum ba wisa: “Skulka tara dimri ba ra kampani nani warkka makabi ba daukaia lan ai daukras kan. Baha mita, yang dîa lan takri ba wina wark kum pliki sakaia sip apia ai munan”. Skul wala nani ra wark nani daukaia lan mai daukisa, kuna wark sakaia dukiara karna mai munaia sip sa. República Centroafricana tasbaya pîska wina kristian waitna kum nina Sublime ba naha trabilka brin. Witin ba masin nani paskaia skulka diman, kuna naku wisa: “Yang iwisna pliska ra upla aihkika nani ba silp ai dukia nani kli paskisa. Baha mita wark kum pliki sakaia ba karna ai munisa”.

16. ¿Dîa skulka dima wahbi sakras kainara, dîa muni yamni sa luki kaikaia baha dukiara wark kum pliki sakaia sip kama sapa?

¹⁶ Skulkam tnata mangkma ningkara, wark kum pliki sakaia sip kama sapa luki kaiks. ¿Dîa daukma ba laik kama ki? (Smas. 3:12, 13). ¿Warkka pliska ba nahki kabia? ¿Bahara tnatka kum ra saura mai munbia apia kaka warkkam pânika nani ba yamnika briaia dukiara pana pana unsabi kabia ki? ¿Lalah an aibapisa? ¿Nitki nani briaia dukiara aitani kabia ki? ¿Ban skul dimi kaia nit kama warkkam ba lus tiwaia apia dukiara? Bara kau tânka tara bri ba sika, ¿Gâd Kingka Lâka ba pas tâura ban mangki kaia sip kama ki? (Smas. 12:13). Rait sa, uya wark âpu sa kaka, ban kra karna wan munbia yawan laik sa warkka ba pliki sakaia. Kuna naiwa dîa sât skulka dimma wahbi sâkma ba naika piua ra hilp mai munbia wark kum pliki sakaia dukiara. India kuntrika wina, Tabitha ba kati 6 bilkara kwala sipaia skulka ra diman. Witin ba naku aisan: “Kwala sipaia lan takri kan baku tnatka ra tâura smasmalkra warkka ba daukaia sip sna. Bara naha warkka ba yamni sa, kan upla manis ba kwala sipaia dukiara plikisa, yang awarka ba mangkaia sip sna, bara uya lalah tikaia nit apia sna”. Bara baku dîa lan takan ba wal witin ai nitka nani briaia bara tâura smasmalkra warkka daukaia sip kan.

17. a) ¿Wahbi sakanka pain nani briaia dukiara, ani wina tânka nani pliki sakaia sip sma ki? b) ¿Ani Baibil smalkanka nani ba hilp mai munbia wahbi sakanka kum briaia dukiara? (“Baibil smalkanka yuskira nani” bakska ba sin kaiks).

¹⁷ Naha stadika ra wahbi sakanka nani daukaia dukiara tânka yuskira nani laki kaikan sa. Kuna, ¿wahbi sakanka pain kum briaia dukiara ani ra sip sma tânka nani pliki sakaia? Skul kum dimaia lukisma kaka, skulka watla apia kaka Internet pliska ra dimi tânka ba laki kaiks. Baku sin, baha skulka dukiara dîa sât warkka nani bâra sa pliki kaiks. Bara sin, baha sât skulka diman apia kaka warkka bri uplika nani wal aisaia sip sma (S.L. 13:10). Witin nani ra makabi walaia sip sma, “¿Baha skulka diman ba wina apia kaka warkka ba wina dîa sât yamnika apia kaka trabilka nani bri banhwan?” Bara Gâd warkka dauki lilia ai dara wali kristianka nani ba wal naha tânka dukiara aisaia sip sma (S.L. 15:22). ¿Baha skulka apia kaka warkka ba dukiara, dîa kupia kraukanka nani maikaia sip sa? Ban kra witin nani dîa mai wibia ba man kau luki kaikras kapram kaia sa.

18. ¿Dîa ba wan kupia kraukaia sa?

¹⁸ Yawan laki kaikan baku, skul tara dimaia ba yamnika nani brisa, kuna trabil nani sin bri balaia sip sa. Baha mita, dîa daukaia sip sma ba laki kaiks, bara baha dukiara puram suns. Kupiam krauks, skul tara dimaia ba ban kra lalah lainka ra hilp mai munaia sip sa, kuna lilia lâka rait aihwa briaia dukiara Jehova wal pana lâka kum briaia nit sa (Law. 16:9, 11). Witin ba ai uplika nani sut ra main kaikisa, skul diman apia kaka skul dimras kabia kra sin (Hib. 13:5). Kuna nanara, ¿skul tara dimaia pat wahbi sakram sa kaka, dîa ba hilp mai munbia Jehova wal pânika lâka brisma ba main kaikaia dukiara? Stadika aula ra laki kaikbia.