Harato Tamin’ny Andron’ny Baiboly

Mpanarato ny sasany tamin’ny mpanara-dia an’i Jesosy. (Mar. 1:16-20) Nampiasa harato ry zareo rehefa nanarato teo amin’ny Ranomasin’i Galilia.

Tady na kofehy rongony no nanamboarana harato. Arakaraka ny haben’ny trondro tiana ho azo ny haben’ireo makarakara eo amin’ilay harato. Nasiana firaka na vato ny harato kely mba ho mora milentika. Nasiana zavatra mavesatra kosa ny fanambanin’ny harato tarihina, ary nasiana hazo na bosoa mitsingevana teo amin’ny tampony.

Lafo ny harato tamin’izany. Nety ho nanimba azy ireny ny vato tany amin’ny fanambanin’ny ranomasina. Nety ho rovitra koa ny harato rehefa tena be dia be ny trondro azo. (Lioka 5:6) Milaza ny Baiboly fa “nanamboatra ny simba tamin’ny haratony” i Jakoba sy Jaona. (Mat. 4:21) Nampiasa fanjaitra sy kofehy rongony angamba ry zareo tamin’izany. Nety ho nanamboatra ny simba tamin’ny haratony ny mpanarato isaky ny avy nanarato. Nilaza koa i Lioka hoe “nanasa ny haratony” ireo mpanarato, mba hanesorana ny fotaka teo amin’ilay izy. (Lioka 5:2) Nahahy izy ireny rehefa avy nosasana, amin’izay mba tsy lo.​—Ezek. 47:10.

Nasain’i Jesosy ho lasa “mpanarato olona” ireo lehilahy zatra nampiasa harato ireo.