MANONTANY NY TANORA
Mampiaraka—Fizarana 3: Tokony Hisaraka ve Izahay?
Efa elaela angamba ianareo roa no niaraka, nefa lasa misy zavatra manalasala anao amin’ilay olona miaraka aminao. Dia ahoana? Mbola hiaraka aminy ihany ve ianao sa tokony hisaraka aminy? Natao hanampiana anao hanapa-kevitra ity lahatsoratra ity.
Ho hitantsika ato hoe:
Ahoana raha misy zavatra manalasala anao?
Rehefa avy miaraka elaela ny tovolahy iray sy ny tovovavy iray, dia mety hahita hoe hay misy zavatra tsy itovizan’izy roa ihany, tsy araka ny noeritreretin’izy roa tamin’ny voalohany. Ohatra hoe:
Ny iray tia mankeny amoron-dranomasina, fa ny iray tia mandehandeha an-tongotra.
Ny iray be resaka fa ny iray tsy dia be teny.
Ny iray tia mamitapitaka fa ny iray milaza ny marina foana.
Tsy mitovy ireo toe-javatra telo ireo. Ny zavatra mahaliana no tsy mitovy, amin’ilay voalohany. Amin’ilay faharoa indray, ny toetra no tsy mitovy. Amin’ilay fahatelo, ny fitsipika arahina no tsy mitovy.
Eritrereto izao: Raha lasa mpivady ianareo roa any aoriana any, iza amin’ireo telo ireo no hitanao hoe tsy ho vitanao ny handefitra amin’ilay izy? Ary iza no mety ho azonareo roa itadiavana marimaritra iraisana, raha misy?
Tadidio hoe ny olon-droa mifanentana tsy midika mihitsy hoe tsy maintsy mitovy be. Afaka ny ho sambatra foana ny tokantrano, na dia tsy mitovy aza ny zavatra mahaliana ny mpivady sy ny toetrany. Azo atao tsara ny mitady marimaritra iraisana. Misy, ohatra, mba miezaka manao ny zavatra mahaliana na mahafinaritra ny vadiny indraindray. Misy koa miezaka mijery hoe sao dia mahasoa azy ny toetran’ny vadiny na dia tsy azoazony aza ilay izy.a
Fa misy zavatra tena tokony hitovizanareo roa anefa. Tokony hitovy ny fitsipika arahinareo. Tokony hitovy, ohatra, ny zavatra inoanareo sy ny fitsipika arahinareo momba ny fitondran-tena. Samy tokony hitovy koa ny zavatra ekenareo roa hoe tsara sy ratsy. Raha tsy mitovy ireo, dia aleo manapa-kevitra hoe tsy hiaraka amin’ilay olona intsony.
Ahoana, ohatra, raha tsy mitovy ny zavatra inoanareo? Hoy ilay boky hoe Fighting for Your Marriage: “Hita tamin’ny fikarohana natao hatramin’izay fa ny mpivady tsy mitovy fivavahana no tena matetika misaraka.”
Torolalan’ny Baiboly: “Aza manaiky hiray zioga amin’ny tsy mpino.”—2 Korintianina 6:14.
Nahoana ianao no tokony handinika tsara aloha vao manapa-kevitra?
Resahin’ny Baiboly hoe “ny manambady dia tsy ilaozam-pijaliana.” (1 Korintianina 7:28, Dikan-teny Iombonana Eto Madagasikara) Tsy tokony ho gaga àry ianao raha hoe na izao vao miaraka izao aza ianareo roa dia efa samy mahatsapa kely an’izany.
Mety hoe miadiady kely ianareo indraindray, nefa tsy voatery hidika izany hoe tsy mifanentana ianareo. Hainareo roa ve ny mifandamina rehefa mitranga izany, nefa tsy mifampila vaniny? Tsara be raha mahavita an’izany ianareo satria mbola hilainareo izany ao an-tokantrano.
Torolalan’ny Baiboly: ‘Miezaha ho tsara fanahy amin’ny namanareo avy, ka hangoraka sy hifamela heloka tanteraka.’—Efesianina 4:32.
Ahoana anefa raha mifamaly lava ianareo sady mifamaly be mihitsy? Mety hidika izany hoe tsy mifanentana ianareo. Aleo hita dieny izao izany toy izay rehefa lasa mpivady!
Raha mifamaly lava ianareo sady mifamaly be mihitsy, dia mety hidika izany hoe tsy mifanentana ianareo
Tadidio àry izao: Misy zavatra manalasala be anao ve amin’ilay olona miaraka aminao? Sa mbola misalasala ianao hoe vonona hanambady sa tsia? Aza odiana tsy hita izany!
Torolalan’ny Baiboly: “Mahatsinjo ny loza ny olona malina ka miafina, fa izay tsy dia nahita fiainana kosa mbola miroso ihany ka voa.”—Ohabolana 22:3.
Ahoana raha tena tapa-kevitra ianao hoe hisaraka aminy?
Mety ho mafy be izany hoe misaraka izany. Aleo anefa misaraka raha misy zavatra tena manalasala anao na tena manalasala anareo roa momba an’ilay fiarahanareo, indrindra moa raha hoe tsy mety voalamina mihitsy ilay izy.
Dia ahoana no hataonao rehefa hiteny aminy hoe hisaraka aminy ianao? Aleo tsy amin’ny SMS na e-mail na tambazotran-tserasera, raha tsy hoe misy antony tsy azo anoarana angaha. Zava-dehibe ilay horesahinareo, dia aleo mifidy fotoana sy toerana mety tsara hifampiresahana imasoimaso momba an’ilay izy.
Torolalan’ny Baiboly: “Samia milaza ny marina amin’ny namany avy.”—Zakaria 8:16.
Raha hoe nisaraka tamin’ny olona iray ianao, midika ve izany hoe ianao mihitsy no olana? Tsy izany mihitsy. Tadidio hoe matoa ianao miaraka amin’ilay olona aloha fa tsy tonga dia manambady azy, dia satria natao hanampiana anao hanapa-kevitra izany hoe hanambady azy ianao sa tsia. Tadidio koa hoe na misaraka aza ianareo, dia misy zavatra tsara azonao ianarana foana avy amin’ilay fiarahanareo.
Eritrereto hoe: ‘Inona no zava-baovao hitako momba ahy avy tamin’iny fiarahanay iny? Mbola misy zavatra mila iezahako ve mba ho vonona hanambady aho? Inona no tsy hataoko intsony raha misy olon-kafa miaraka amiko any aoriana any?’
a Raha tianao ho fantatra hoe inona no vokany eo amin’ny mpivady rehefa tsy mitovy ny zavatra mahaliana azy roa sy ny toetrany, dia jereo ireto lahatsoratra ireto: “Ho An’ny Fianakaviana: Ahoana Raha Samy Hafa Be Izahay?” sy ilay hoe “Ho An’ny Fianakaviana: Misy Toetran’ny Vadinao Tsy Azoazonao Ve?”