ELDADA

(Eldàda) [mety hidika hoe Andriamanitra dia Nitia].

Iray tamin’ireo anti-panahy 70 nofidin’i Mosesy mba hanampy azy, satria navesatra taminy ny nitondra ny vahoaka. Nitaraina mantsy i Mosesy fa tsy vitany irery ny nitondra an’ilay vahoaka, satria nimenomenona ny Israelita sy ireo olona samihafa firenena niaraka tamin’izy ireo, ka nilaza hoe leo mana fa te hihinan-kena. Nasain’i Jehovah nanangona anti-panahy 70 sy nitondra azy ireo tany amin’ny tranolay fihaonana àry i Mosesy. Nakan’i Jehovah ny fanahy tao amin’i Mosesy, avy eo, ka nataony tao amin’ireo anti-panahy. Nanomboka naminany àry izy ireo. Nijanona tao an-toby kosa ny anti-panahy roa lahy, izany hoe i Eldada sy Medada, ary azo antoka fa noho ny antony nitombina. Nahazo fanahy masina koa izy roa lahy, ary nanao hoatran’ny mpaminany, tao an-toby. Nolazaina tamin’i Mosesy izany, ary ren’i Josoa ka nahasaro-piaro azy. Nasainy norarana izy roa lahy, nefa hoy i Mosesy: “Ny fahefako ve no mahasaro-piaro anao? Tsy mety izany! Satriko aza raha mpaminany daholo ny vahoakan’i Jehovah rehetra, ka homen’i Jehovah ny fanahiny!”​—No 11:13-29.