Iza no Fahavalon’Andriamanitra?

I Satana Devoly no fahavalon’Andriamanitra lehibe indrindra. Anjely nikomy tamin’i Jehovah izy. Manohitra an’Andriamanitra foana i Satana ary mampijaly ny olombelona. Ratsy fanahy izy, sady mpandainga sy mpamono olona.—Jaona 8:44.

Nisy anjely hafa koa niara-nikomy tamin’i Satana. Antsoina hoe demonia izy ireny ao amin’ny Baiboly. Fahavalon’ny olombelona ny demonia. Tia mampijaly olona koa izy ireo, toa an’i Satana. (Matio 9:32, 33; 12:22) Kely sisa dia tsy havela hampijaly ny olona intsony i Satana sy ny demoniany. Haringan’i Jehovah mandrakizay mantsy izy ireo.—Apokalypsy 12:12.

Tsy tokony hanao izay tian’i Satana ianao, raha te ho naman’Andriamanitra. Mankahala an’i Jehovah i Satana sy ny demonia. Fahavalon’Andriamanitra izy ireo, ary tiany ho toy izany koa ianao. Tsy maintsy mifidy ianao hoe iza no tianao: i Satana sa Jehovah. Tsy maintsy mifidy ny hanao ny sitrapon’Andriamanitra ianao, raha te hiaina mandrakizay. Mampiasa tetika sy fomba maro anefa i Satana mba hamitahana olona, ary efa voafitany ny ankamaroany.—Apokalypsy 12:9.