Ed Lezot pou Aprann Konn Zeova

1. Ki to resanti kan enn etidian Labib koumans fer bann progre?

KI TO resanti kan enn etidian Labib asiste so premie renion, li koumans reponn, li koumans prese, ek apre li pran batem? Sirman to extra kontan, pa vre! Biensir, nou kone ki se Zeova ki’nn ed li pou fer tousala. Alor, se Zeova ki merite gagn laglwar pou sa.—1 Kor. 3:5-9; 3 Zan 3, 4.

2. Ki Zeova anvi pou bann etidian Labib? (1 Timote 2:3, 4)

² Zeova “anvi ki tou sort kalite dimounn gagn lavi sov ek gagn enn konesans exakt lor laverite.” (Lir 1 Timote 2:3, 4.) Zeova anvi ki bann dimounn aprann konn Li bien. Li anvi ki zot konn osi tou bann zoli kitsoz ki Li’nn fer ek tou seki Li pou fer dan lavenir. (Zer. 9:24) Pou ki enn kikenn aprann konn tousala, li bizin gagn enn “konesans exakt.” Ki savedir gagn enn konesans exakt? Enn konesans exakt se pa zis konn de-trwa kitsoz lor Bondie. Enn exper lor Labib dir ki kan enn kikenn gagn enn konesans exakt, sa motiv li pou fer tou seki li kapav pou vinn pros ar Bondie. Alor, kan enn etidian Labib aprann konn Zeova, sa bizin ena enn lefe lor fason ki li viv so lavi. Lerla, si li fer bann sanzman ki bizin, li gagn posibilite pou gagn “lavi eternel.”—Zan 17:3.

3. Ki nou pou examine dan sa lartik-la?

³ Zeova inn donn nou privilez pou ed bann dimounn pou aprann konn Li. Dan sa lartik-la, nou pou reponn sa trwa kestion-la: Kifer bann etidian Labib bizin aprann konn Zeova bien? Kouma nou kapav ed zot pou aprann konn Zeova? Ek kouma nou kapav ed zot pou met an pratik seki zot pe aprann lor Zeova?

ED TO ETIDIAN POU APRANN KONN ZEOVA BIEN

4. Dapre Mark 12:30, kan nou pe etidie Labib ar enn kikenn, ki kitsoz bizin nou lobzektif prinsipal?

⁴ Zezi inn dir ki pli gran komannman se kontan Zeova avek tou nou leker, tou nou lavi, tou nou lespri, ek tou nou lafors. (Lir Mark 12:30.) Enn etidian Labib bizin aprann konn Zeova pou ki li kapav kontan Li. Nou anvi ki nou etidian pran batem parski li kontan Zeova, pa parski li anvi vinn nou kamarad, vinn kamarad bann lezot frer ek ser, ouswa parski li kontan sertin lansegnman ki ena dan Labib. Alor, kan nou pe etidie Labib ar enn kikenn, nou lobzektif prinsipal se pou ed li pou aprann konn Zeova ek pou kontan Li.

5. Kan enn etidian Labib vremem kontan Zeova, ki sa pou motiv li pou fer?

⁵ Kan enn etidian Labib aprann konn Zeova ek aprann kontan Li, sa motiv li pou obeir Li. Par so lexanp, Zezi ti montre ki kan enn kikenn kontan Zeova, sa pous li pou obeir Li. Li ti dir: “Pou ki lemond kone ki mo kontan mo Papa, mo pe fer parey kouma mo Papa inn donn mwa lord pou fer.” (Zan 14:31) Alor, parey kouma Zezi, si enn etidian Labib vremem kontan Zeova, sa pou motiv li pou obeir Li ek pou res fidel ar Li.—1 Zan 5:3.

6. Kan enn etidian Labib aprann konn Zeova bien, kouma sa kapav ed li pou pran bann bon desizion? Servi enn lexanp pou explike.

⁶ Kan enn etidian Labib aprann konn Zeova bien, sa kapav ed li pou pran bann bon desizion. Anou pran enn lexanp pou explik sa. Pou ki enn sofer aprann roul bien enn loto, li bizin pa zis etidie kod-de-larout ek al lor test oral. Li bizin osi kondir souvan. Si li kondir souvan, avek letan li pou aprann kouma pou roul bien dan ninport ki sitiasion ek li pou kapav pran bann bon desizion kan li roule. Dan mem fason, pou ki enn etidian aprann konn Zeova, li bizin pa zis etidie Labib. Li bizin osi trouve kouma so lavi ameliore kan li pran bann desizion ki an-akor ar bann prinsip Labib. Avredir, plis enn etidian aprann konn Zeova ek trouve kouma Zeova pe ed li dan so lavi, plis li pou kapav pran bann bon desizion dan ninport ki sitiasion.

7. Ki kitsoz ti ed Zozef pou pran enn bon desizion?

⁷ Zozef ti konn Zeova bien, ek sa ti ed li kan madam Potifar ti anvi gagn relasion sexiel avek li. Kan li ti zenn, Zozef ti tann zistwar Adan ek Ev, ek zistwar Abraam ek Sara. (Zen. 2:24; 20:3, 6) Gras-a sa, li ti kone seki Zeova panse lor maryaz ek lor bann relasion sexiel. Zozef ti konn Zeova telman bien, ki li ti refiz gagn relasion sexiel ar madam Potifar. Li ti dir li: “Kouma mo kapav fer enn move kitsoz koumsa ek vremem fer pese kont Bondie?” (Zen. 39:7-9) Zozef ti kone ki kitsoz Zeova kontan ek ki kitsoz Li pa kontan. Li ti konpran ki, si li ti gagn relasion sexiel ar madam Potifar, Zeova so leker ti pou fermal. Ek parski Zozef ti konn Zeova bien, li ti pran enn bon desizion. Si nou ed nou bann etidian Labib pou aprann konn Zeova bien, zot osi zot pou pran bann desizion ki pou fer Zeova plezir.

ED LI POU KONPRAN KI KALITE BONDIE ZEOVA ETE

8. Kouma to kapav servi liv Viv Ere pou Touletan! pou ed to etidian pou aprann konn Zeova?

⁸ Kouma to kapav ed to etidian Labib pou aprann konn Zeova? Zeova ti ed Zob pou aprann plis lor Li kan Li ti poz Zob bann kestion. Li ti poz Zob plis ki 50 kestion! (Zob 38:1–41:34) Nou osi, nou bizin poz nou etidian Labib bann kestion. Bann kestion ki ena dan liv Viv Ere pou Touletan! kapav ed nou etidian pou aprann plis lor Zeova ek lor so bann zoli kalite. (Get lankadre “Bann Kestion ki Kapav Ed Nou Kan Nou Pe Ansegn Nou Etidian Labib.”) Alor servi sa bann kestion-la pou ed to etidian pou aprann konn Li.

9-10. (a) Ki kitsoz pou ed to etidian pou aprann plis lor Zeova kan li lir Labib? (Zak 5:11) (b) Servi enn lexanp pou explike kouma enn zistwar Labib kapav ed enn kikenn pou kone seki fer Zeova plezir ek seki pa fer Li plezir.

⁹ Kan nou koumans etidie Labib ar enn kikenn, nou ankouraz li pou lir Labib sak zour.a Kouma nou kapav ed nou etidian pou aprann plis lor Zeova atraver so lektir Labib? Par exanp, nou kapav dir li ki, sak fwa ki li lir Labib, li bon ki li poz limem bann kestion kouma, ‘Kifer Zeova inn fer ekrir sa bann verse-la? Ki sa bann verse-la aprann mwa lor bann kalite ki Zeova ena?’ Se seki disip Zak ti fer kan li ti koz lor zistwar Zob. Zak pa ti zis atir latansion lor bann kalite ki Zob ena, kouma landirans, me li ti osi atir latansion lor bann kalite ki Zeova ena, kouma lafeksion, tandres, ek mizerikord.—Lir Zak 5:11.

¹⁰ Nou anvi ed nou etidian pou konpran ki sak zistwar ki ena dan Labib, kapav ed li pou kone seki fer Zeova plezir ek seki pa fer Li plezir. Kouma nou kapav fer sa? Fer koumadir to etidian dir twa ki li’nn trouv tablo “Mo Koumans Lir Labib,” ki dan liv Viv Ere pou Touletan! ek ki li’nn desid pou lir zistwar Daniel dan lakav bann lion. To kapav ankouraz li pou reflesi lor bann kestion kouma: ‘Kifer Zeova inn sap Daniel? Ki sa zistwar-la aprann mwa lor seki fer Zeova plezir?’ (Dan. 6:10, 22) Demann li pou reflesi lor sa de kestion-la osi: ‘Ki ti ariv bann zom ki ti akiz Daniel? Ki sa zistwar-la montre mwa lor seki pa fer Zeova plezir?’ (Dan. 6:4, 5, 24) Apre sa, to kapav osi ankouraz to etidian pou reflesi lor bann lezot kitsoz ki li’nn aprann lor Zeova dan sa zistwar-la.—Dan. 6:26, 27.

11. Kouma nou kapav ed nou etidian pou trouve ki se Zeova ki pe ansegn li?

¹¹ Kan nou etidian trouve kouma so lavi pe ameliore gras-a so letid Labib, nou bien kontan pa vre! Selman, nou bizin ed li pou trouve ki seki li pe aprann sorti kot Zeova, nou Gran Ansegnan. (Iza. 30:20, 21) Nou etidian kapav remersie nou pou tou seki li pe aprann ek dir nou ki nou enn bon ansegnan. Se enn fason ki li pe montre nou so rekonesans! Selman, nou bizin touletan rapel li ki se Zeova ki pe ansegn li. Se Zeova ki li bizin remersie ek donn laglwar.

ED LI POU MET AN PRATIK SEKI LI PE APRANN LOR ZEOVA

12-13. Si to etidian pa pe konpran enn zistwar ki ena dan Labib, kouma to kapav ed li gras-a seki li kone lor Zeova? (Get zimaz osi.)

¹² Pou ki enn etidian Labib so lavi ameliore, li bizin met an pratik seki li pe aprann lor Zeova. Kouma to kapav ed to etidian pou met an pratik seki li pe aprann? Si li pa pe tro konpran enn zistwar ki ena dan Labib, to kapav ed li pou rapel seki li kone lor Zeova. Par exanp, fer koumadir to etidian inn lir enn zistwar dan Labib, ki rakonte kouma Zeova inn ziz bann dimounn dan lepase, ek li pa konpran kifer Zeova inn touy sertin dimounn ek inn les lezot viv. Kouma to kapav ed li?

¹³ To kapav ankouraz li pou reflesi lor seki li’nn aprann lor Zeova. Par exanp, to kapav fer li reflesi lor bann kestion kouma: ‘Ki kitsoz Zeova anvi ki bann dimounn fer?’ (2 Pier 3:9) ‘Ki kitsoz extraordiner Li’nn fer pou sap nou, bann dimounn ki inparfe?’ (Efe. 2:4, 5) ‘Si enn kikenn pa merite ki pini li, eski Zeova pou pini li? Parkont, si li vremem merite ki pini li, eski Zeova pa pou pini li?’ (Ex. 34:6, 7) Parfwa, Labib pa donn tou bann detay pou nou konpran kifer Zeova inn azir dan enn sertenn fason. Selman, nou pa bizin konn tou bann detay. Nou konn nou Bondie Zeova, ek nou kone ki Li touletan fer seki drwat.

14. Si to etidian pe gagn difikilte pou adapte ar enn kikenn dan lasanble, kouma to kapav ed li?

¹⁴ Anou get enn lot sitiasion kot nou kapav ed nou etidian pou met an pratik seki li kone lor Zeova. Fer koumadir sa fer inpe letan aster-la ki to etidian pe asiste bann renion. Selman, li gagn difikilte pou adapte ar enn frer ouswa enn ser dan lasanble. Sa dimounn-la kitfwa inn dir li enn kitsoz ki’nn bien ofans li. Kouma to kapav ed to etidian? To kapav ankouraz li pou reflesi lor fason ki Zeova konsider nou bann frer ek ser. Par exanp, to kapav fer li reflesi lor bann kestion kouma: ‘Ki sakrifis Zeova inn fer pou Li montre ki Li kontan zot?’ (Zan 3:16) ‘Kifer lape ek linite dan lasanble bien inportan pou Zeova?’ (Ps. 133:1) ‘Ki Zeova resanti kan Li trouv nou fer nou best pou ki ena lape ek linite?’ (2 Kor. 13:11) Ed to etidian pou konpran ki Zeova bien kontan kan Li trouv nou fer zefor pou konsantre lor bann kalite ki lezot ena, olie ki nou konsantre lor zot bann defo.

15-16. (a) Kouma enn etidian Labib kapav swiv lexanp Zezi kan li ena enn desizion inportan pou pran? (Zan 8:29) (b) Kouma Marianne ti ed so etidian pou pran enn bon desizion? (Get zimaz osi.)

¹⁵ Enn lot domenn kot nou kapav ed nou etidian pou met an pratik seki li pe aprann lor Zeova, se kan li ena bann desizion inportan pou pran. Par exanp, to kapav atir so latansion lor leson 35 dan liv Viv Ere pou Touletan! Tit sa leson-la se “Kouma Ou Kapav Pran Bann Bon Desizion?” Me fer koumadir to etidian inn priye Zeova ek inn fer bann resers dan nou bann piblikasion, me li ankor pe gagn difikilte pou pran enn desizion. Kitfwa li pa pe kapav pran enn bon desizion parski ena tro boukou prinsip Labib ki aplike dan so sitiasion. Kouma to kapav ed li? To kapav ankouraz li pou reflesi lor lexanp Zezi. Ki kitsoz ti ed Zezi pou pran bann bon desizion? Li ti dir: “Mo touletan fer bann kitsoz ki fer [mo Papa] plezir.” (Lir Zan 8:29.) To kapav poz to etidian sa kestion-la: ‘Dapre bann resers ki to’nn fer ek seki to’nn aprann lor Zeova, ki desizion pou fer Li plezir?’ Ed to etidian pou trouve ki enn desizion ki fer Zeova plezir, se enn bon desizion.

¹⁶ Enn etidian Labib ki res Chili ti bizin pran enn desizion bien inportan. So fami ti pe met presion lor li pou li aksepte enn travay ki ti pou pey bien. Selman, si li ti aksepte sa travay-la, li pa ti pou gagn tou so bann renion. Marianne, so ansegnan Labib, dir: “Mo ti ankouraz li pou reflesi lor lefe ki so desizion ti pou ena lor Zeova. Eski sa ti pou fer Zeova kontan ouswa eski Li ti pou tris? Mo ti osi ankouraz li pou priye Zeova ek pou gete kouma Zeova ti pou reponn so lapriyer. Alafin, li ti refiz sa travay-la. Ek bien vit apre, li ti gagn enn travay ki ti permet li gagn tou so bann renion.” Marianne pa ti dir so etidian ki desizion li ti bizin pran, me li ti ed li pou reflesi lor seki li ti deza kone lor Zeova. Sa sitiasion-la ti fer so etidian vinn pli pros ar li, me sirtou pli pros ar Zeova. Marianne dir: “Li’nn konpran ki Zeova pran nou swin kan nou met Li an premie dan nou lavi.”

ZEOVA POU BENI BANN KI APRANN KONN LI BIEN

17. Ki kitsoz pli inportan bann etidian Labib bizin aprann?

¹⁷ Nou bann etidian aprann boukou kitsoz inportan dan zot letid Labib. Zot etidie bann lansegnman inportan, kouma par exanp, laranson, Rwayom Bondie, ek seki arive kan nou mor. Zot aprann osi kouma bann Temwin Zeova organiz zot. Par exanp, zot aprann seki pase pandan bann renion, ki travay bann ansien fer, ek kisann-la Komite Santral ete. Selman, kouma nou ti dir taler-la, nou pa anvi ki nou etidian aprann zis sa bann kitsoz-la. Seki pli inportan, se ki zot aprann konn Zeova bien.

18. Ki benediksion nou gagne kan nou aprann konn Zeova?

¹⁸ Zeova inn donn nou privilez pou ed bann dimounn pou aprann konn Li. Bann ki aprann konn Zeova ek ki servi Li, zot ena enn zoli lavi depi aster-la mem. (Ps. 25:12-15) Dan lavenir, tou bann ki’nn “gagn konesans” lor Zeova, pou viv ere pou touletan. (1 Zan 5:20) Me ena enn lot benediksion osi ki nou gagne depi aster-la mem. Labib dir ki si enn kikenn fer zefor pou aprann konn Zeova ek pou kontan Li, Zeova “konn sa dimounn-la.” (1 Kor. 8:3) Nou Gran Bondie Zeova konn nou ek Li konsider nou kouma so kamarad! Wi, se pli gran benediksion ki kapav ena, ek nou gagn sa benediksion-la kan nou aprann konn sel vre Bondie, Zeova!