Mo’nn Les Zeova Form Mwa

Parmi bann kitsoz ki’nn plis tous mwa dan lizinn-la, se bann dimounn ki ti pe travay laba. Ti ena bann zenn frer ek bann zenn ser ki ti pe fer bann travay ki kitfwa lezot pa ti pou aksepte fer. Anplis, lezot souvan pa ti remark zot travay ek pa ti felisit zot pou sa. Selman, zot ti zwaye ek zot ti kontan seki zot ti pe fer. Zot lexanp inn aprann mwa ki sa vedir servi Zeova avek limilite.

Pandan boukou lane, Zeova inn kontign form mwa pou ki mo kapav servi Li pli bien. Me pou koumanse, les mo rakont zot kouma mo’nn rod laverite. Sa lepok-la, mo ti enn Boudis.

MO’NN ROD BONDIE DEPI KI MO TIPTI

Mo’nn ne ek mo’nn grandi dan Chicago, Illinois, Letazini. Momem pli gran dan enn fami kat zanfan. Mo bann paran ti kit Zapon ek zot ti vinn res Chicago parski zot ti panse ki lavi ti pou pli bon dan Letazini. Zot ti anvi ki zot zanfan gagn pli bon ledikasion ki ena ek ki nou reisi nou lavi.

Mo bann paran ti bann Boudis bien pratikan. Dan lakaz kot mo mama inn grandi, ti ena enn tanp Boudis. So papa ek so de frer ti bann mwann Boudis. Akoz sa, depi ki mo tipti, larelizion Boudis ti bien inportan pou nou fami. Nou ti ena enn stati Bouda kot nou, ek premie kitsoz ki mo ti fer kan mo ti rant lakaz apre lekol, se alim enn sandal ek ofer stati-la diri ek delo. Bann Dimans, nou ti al dan enn lot tanp. Laba, ti ena mem stati ki nou ti ena lakaz, selman li ti pli gran ek li ti rekouver ar lor. Nou ti al laba pou sant bann lapriyer pou sa stati-la.

Kan mo ti ena apepre set an, mo rapel ki mo ti pe get sa stati ki ti kot nou la, ek mo ti demann momem, ‘Kouma mo lavi pou ete apre mo lamor?’ Larelizion Boudis inn aprann mwa ki mo ti pou vinn enn lespri apre mo lamor. Sa ti fer mwa realize ki enn zour mo ti pou mor. Ek mem si mo ti pou vinn enn lespri, mo ti pou nepli kapav apresie lavi parski mo ti pou nepli ena enn lekor imin. Sa ti rann mwa bien tris, ek mo ti bien dekouraze.

Kan mo ti ena apepre 15 an, mo ti koumans konpran ki bann servis ki mo ti pe fer dan tanp, pa ti ena okenn sans. Ti ena enn kitsoz ki ti pe manke dan mo lavi! (Mat. 5:3) Dan fon mo leker, mo ti kone ki bizin ena enn Bondie Tou-Pwisan, ek mo ti anvi konn li. Lerla, mo ti dir ar momem ki Labib kitfwa ti pou kapav reponn mo bann kestion. Alor, kan mo ti al dan enn fet Boudis, mo ti aste enn Labib segonnme, La Bible du roi Jacques. Ti bien bizar pou trouv enn Labib dan sa kalite fet-la!

Kan mo ti ena 17 an, enn frer ti pres avek mwa kan mo ti pe amenn mo lisien promne. Frer-la ti apel Wilson Bashou. Li ti demann mwa, “Eski to kone ki promes Bondie inn fer pou lavenir?” Gras-a sa kestion-la, nou ti gagn enn zoli konversasion lor Labib. Wilson ti lir Revelasion 17:1, ek li ti demann mwa, “Dan sa verse-la, ki sa vedir lexpresion ‘boukou delo’ lor ki sa prostitie la pe asize?” Mo pa ti kone ki pou reponn li. Lerla, li ti montre mwa verse 15 ek li ti dir mwa ki sa bann delo-la reprezant bann dimounn. Sa ti inpresionn mwa, parski bann Temwin Zeova ti servi bann verse Labib pou explik bann lezot verse Labib. Avan ki Wilson ti ale, li ti donn mwa liv La vérité qui conduit à la vie éternelle. Sa ti-liv ble la ti sanz mo lavi net!

Dis zour plitar, mo ti asiste mo premie renion dan Lasal bann Temwin Zeova. Zame mo pa pou bliye sa zoli lakey ki mo ti gagne la! Depi sa zour-la, mo’nn kontign asiste bann renion. Apre sa, mo ti koumans etidie Labib avek Wilson. Mo ti telman kontan seki mo ti pe aprann, ki parfwa nou ti pe etidie pandan wit-er-tan. Mo bann paran ti bien trakase ek zot pa ti dakor ditou ki mo etidie Labib. Me plis mo ti pe etidie, plis mo ti sir ki seki Labib dir, li laverite. Alafin, mo ti pran batem an 1983.

MO KIT LINIVERSITE POU AL FER PIONIE

Sa lepok ki mo ti pran batem la, mo ti pe al enn gran liniversite ek mo ti pe etidie medsinn. Mo bann paran ti fer boukou sakrifis pou ki mo kapav gagn sa ledikasion-la. Mo ti kapav kontign mo bann kour dan liniversite. Selman, mo ti anvi fer mo best pou Zeova ek servi Li aplintan.

Mo papa ti dir mwa, “Si to kit liniversite, mo pou met twa deor dan lakaz!” Mo ti bien tris ek mo pa ti kone ki pou fer. Mo ti kontan mo bann paran ek mo pa ti anvi desevwar zot. Alor, kan mo ti ankor liniversite, souvan mo ti sorti deor tar aswar pou priye Zeova. Mo ti dir Li, “Zeova, silteple, ed mwa pou pran enn bon desizion.” Kan mo ti desid pou kit liniversite, mo papa ti met mwa deor dan lakaz. Mo ti telefonn Wilson ek mo ti rakont li seki ti arive. Avek boukou zantiyes, li ti invit mwa pou vinn res dan so lapartman. Mo ti met tou mo bann zafer dan enn sak ek mo ti mont dan enn bis pou al kot li. Mo rapel ki enn sel kout, mo ti santi enn gran kalm. Mo ti kone ki mo ti pran enn bon desizion.

Mo ti santi mwa kouma enn zwazo ki’nn libere depi so lakaz! Mo ti lib pou konsantre mwa net lor mo servis pou Zeova. Ek an 1984, mo ti koumans fer pionie.

Pandan bann lane ki mo ti pionie permanan, Zeova ti ed mwa pou devlop bann kalite bien inportan, kouma perseverans. Enn zour, mo ti ena bann bon rezon pou mo pa al prese. Mo ti dekouraze parski pa ti ena personn pou akonpagn mwa dan predikasion lapremidi. Me kanmem sa, mo ti ale. Mo ti prese pandan apepre de-z-ertan, ek apre mo ti fer enn dernie lapartman dan enn batiman. Mo ti santi mwa tousel ek fatige, ek lapli ti pre pou koumans tonbe. Mo ti demann momem, ‘Eski mo bizin arete?’ Mo ti mont leskalie ziska trwaziem letaz ek mo ti trouv enn misie ki ti sorti Filipinn. Mo’nn dir ar momem, ‘Sirman li pa pou interese sa!’ Me mo ti ena tor! Mo’nn koumans enn letid Labib avek misie-la, ek avek letan, li’nn vinn mo frer spiritiel.

FORMASION DAN BETEL BROOKLYN

Pandan de-z-an mo’nn res kot Wilson, ek apre an 1985, mo ti gagn linvitasion pou al servi dan Betel Brooklyn. Kouma mo ti mansione dan koumansman sa lartik-la, mo ti travay dan departman ki relie bann liv. Enn zour, kan mo ti pe travay lor enn masinn ki inprim bann tit lor kouvertir bann liv, mo ti fer enn erer. Akoz sa, bann santenn kouvertir liv ti gate ek ti bizin zet zot. Bann frer ti demann mwa pou fer mo responsab kone seki ti arive. Mo ti explik li kouma sa erer-la ti arive, selman mo pa ti dir li enn kitsoz bien inportan. Avek zantiyes, li ti dir mwa, “Demann exkiz, se touletan enn bon kitsoz.” Dan sa ler-la, mo’nn aprann linportans pou aksepte mo bann erer ek pou dir, “Exkiz mwa.”

Mo ti aprann osi kouma pou servi lezot pli bien kan mo ti get bann frer ek ser aze ki ti pe servi avek fidelite dan Betel. Enn fwa, Frer Milton Henschel, enn manb Komite Santral, ti pe asiz ansam ar nou lor latab pou dezene. Sa zour-la, bann frer pa ti atann ki ti pou ena sa kantite dimounn-la dan sal-a-manze. Bann server ti pe panike ek zot ti pe fer tou seki zot kapav pou servi manze vit-vit. Nou, bann zenn frer ki ti pe asize atab, nou ti pe plengne kifer bann-la ti pe tarde pou servi manze. Lerla, Frer Henschel ti leve trankil ek li ti koumans donn bann-la enn koudme pou servi bann brok delo ek bann pla dipin ek diber. Sa aksion ranpli ar limilite la inn res grave dan mo lespri. Sa ti rapel mwa kouma Zezi ti servi so bann zapot.—Zan 13:3-5.

“TO BIZIN APRANN ZAPONE!”

An 1987, mo ti al Zapon. Mo ti inpresione par limilite bann frer ek ser laba, ek zot ti bien devwe. Mo ti anvi ed zot, selman mo pa ti kapav parski mo pa ti aprann koz Zapone. Enn ser dan Betel, ki apel Michiko Oda, ti get mwa dan mo figir ek li ti dir mwa, “To bizin aprann Zapone!” Ek samem ki mo ti fer! Sa lepok-la, mo pa ti ankor konpran kouma sa konsey-la ti pou sanz mo lavi.

De-trwa mwa apre, mo ti sanz lasanble ek mo ti al servi dan enn lasanble Zapone ki trouv dan New York. Ek parski mo ti aprann Zapone, sa ti donn mwa lokazion pou servi Zeova dan lezot fason ankor. An 1989, mo ti asiste mo premie lasanble rezional an Zapone, dan Los Angeles, Californie. Laba, mo ti remark enn ser Zapone ki ti pe zwe dan enn dram. Li ti apel Miwako Onami.

Miwako ek mwa, nou’nn marye an 1992, ek nou ti gagn privilez pou servi ansam dan Betel Brooklyn. Miwako bien kontan pran kont lezot, ek li touzour pre pou ede. So lexanp inn ed mwa pou amelior fason ki mo tret lezot. Li enn kado Zeova; li enn lasours lazwa ek rekonfor pou mwa.

BIRO NASIONAL EK TERITWAR DAN ZAPON

Avek letan, bann paran Miwako, ki ti pe res dan Zapon, ti tom bien malad. Avek boukou bonte, bann frer ti permet nou pou al servi dan biro nasional Zapon, pou ki nou kapav okip bann-la. Nou ti al res laba an 1999.

Lafami Betel Zapon ti bien akeyir nou, ek nou ti adapte nou vit laba. Zeova ti kontign form mwa kan mo ti imit bann zoli kalite ki bann frer ek ser Zapone ena, kouma par exanp zot zenerozite ek zot lospitalite extraordiner. Bann Zapone, zot bien konsantre ek bien serye dan zot travay. Zot travay bien osi an-ekip. Kifer? Parski dan kiltir Zapone, li pli inportan ki bann dimounn travay ansam dan linite, ki zot fer bann kitsoz tousel. Zoli lexanp sa bann frer ek ser-la ti ankouraz mwa pou travay avek limilite ek pou apresie ninport ki ti kitsoz ki mo fer pou Zeova so gran proze.

Kanmem sa, akoz nou pa sorti dan mem kiltir, parfwa mo ti gagn difikilte pou konpran kifer bann frer Zapone ti fer bann kitsoz dan enn sertenn fason. Mo ti bizin aprann pou ena pasians ek pou pa ankoler kan mo pa ti konpran enn kitsoz. Avek letan, mo ti sanz mo latitid. Mo ti konpran ki Zeova kapav beni ninport ki desizion, tanki nou soumet ar bann instriksion so lorganizasion. Mo ti konpran ki se Zeova ki fer enn travay reisi.

Souvan mo konpar formasion ki mo’nn gagne dan Betel ar formasion ki profet Moiz ti gagne. Zeova ti ed Moiz pou ena limilite pandan sa 40 an ki li ti berze la. Parey kouma Moiz, mo ti gagn enn gran ledikasion. Sa ti fer mwa vinn gran-nwar ek mo ti kont lor momem. Betel ti aprann mwa pou ena limilite ek pou kont lor Zeova. Parey kouma Zeova ti form Moiz avek boukou pasians, Zeova inn form mwa pandan tou sa bann lane-la.

Miwako ek mwa, nou’nn pran swin so bann paran pandan 24 an ziska ki zot mor. Pandan sa bann lane-la, ti ena boukou call telefonn, boukou stres, ek nou ti pe ale-vini lopital. Masako, Miwako so mama, ti nepli kapav leve pou marse telman so lasante ti deteryore. Li pa ti fasil pou Masako pou asiste bann renion ek pou sorti predikasion. Dan bann dernie semenn so lavi, li ti bizin servi enn sez-roulant. Selman, malgre tou sa bann difikilte-la, so lamour pou Zeova zame ti diminie. Sak fwa ki li ti koz lor laverite, ti ena enn gran lazwa lor so figir. Dan ninport ki sitiasion ki li ti ete, Masako ti servi Bondie avek lazwa ek li ti ere. Li ti enn zoli lexanp pou mwa.

An 2024, ti ena enn gran sanzman dan nou lavi. Apre ki nou ti servi dan Betel pandan plis ki 30 an, nou ti gagn lafektasion pou al servi dan teritwar. Aster-la, nou pe servi kouma pionie spesial lor lil Okinawa, ek nou ena privilez pou pres ar bann dimounn ki travay ek ki viv lor enn baz militer ki pre ar nou. Bon formasion ki nou’nn gagne dan Betel inn ed nou pou adapte nou vit dan nou nouvo lafektasion. Nou’nn esey gard enn bon program spiritiel ek nou’nn servi bien nou letan, kan nou’nn res bien konsantre dan predikasion. Avek boukou bonte, Zeova inn beni nou ek Li’nn donn nou bann etidian Labib ki’nn vinn kouma nou prop fami. Sa finn ed nou pou konpran pli bien ki kantite li inportan ki nou kontan bann dimounn. Miwako ek mwa, nou remersie Zeova toulezour pou sa zoli lafektasion-la.

MO BIEN DETERMINE POU LES ZEOVA KONTIGN FORM MWA

Mem si mo bann fami nepli opoze ar laverite, zot pankor koumans ador Zeova. Zezi inn promet bann ki’nn kit zot fami pou vinn so disip, ki zot pou gagn 100 fwa plis frer ek ser; enn gran fami spiritiel. (Mark 10:29, 30) Ek se seki finn ariv mwa! Mo pa kapav konte ki kantite fami dan lemond antie, inn kontan mwa ek inn konsider mwa kouma zot prop fami.

Mo ankor ena liv Vérité ki Wilson ti donn mwa. Sa liv ble la rapel mwa kouma avek bonte Zeova inn les mwa trouv Li. (1 Kro. 28:9) Mo bien deside pou les Zeova kontign form mwa ek pou ed lezot pou aprann konn laverite ki fer nou gagn lavi eternel.