Kontign Aprann Konn Zeova Pli Bien

1. Kan to reflesi lor tou seki Zeova kone ek lor tou bann kitsoz extraordiner ki Li’nn fer, ki to resanti?

NOU Bondie Zeova konn tou kitsoz, Li ena plis sazes ki ninport kisann-la, ek Li’nn fer boukou kitsoz extraordiner! Kan nou pans nou Kreater Zeova, nou inpresione, pa vre! Kitfwa nou ena mem santiman ki lapot Pol, ki ti dir: “A! bann benediksion Bondie zot gran, so sazes ek so konesans, zot profon! Kisann-la kapav konpran net so bann zizman ek kisann-la kapav konpran vremem seki li fer?”—Rom. 11:33, 34.

2. Kifer nou sir ki nou kapav aprann konn Zeova?

² Li vre ki zame nou pa pou reisi aprann konn tou kitsoz lor Zeova. Selman, nou kapav konn inpe kouma Li ete. Kifer nou dir sa? Lerwa David ti dir so garson Salomon: “Aprann konn Bondie to papa. Servi li avek tou to leker . . . Si to rod li, li pou les twa trouv li.” (1 Kro. 28:9) Plizir santenn lane apre, lapot Zan ti dir bann Kretien ki zot ti kapav gagn ‘bon zizman pou ki zot gagn konesans lor sa kikenn ki vre la.’ (1 Zan 5:20) Ek Zezi ti dir ki li ti pou ed bann dimounn pou “konn Papa-la bien.”—Mat. 11:27.

3. Ki nou pou examine dan sa lartik-la?

³ Tou bann Kretien ki’nn donn zot lavi Zeova ek ki’nn pran batem, deza konn boukou kitsoz lor Zeova. Selman, nou pou touletan ena bann nouvo kitsoz pou “aprann” lor Li. (Zan 17:3.) Par exanp, nou pou touletan aprann bann nouvo kitsoz lor kouma nou kapav fer Li plezir ek fer Li plis konfians. Mem si sa fer bien lontan ki nou pe servi Zeova, nou tou nou bizin aprann konn Li pli bien. Dan sa lartik-la, nou pou reponn trwa kestion ki pou ed nou pou fer sa: (1) Ki savedir aprann konn Zeova? (2) Kifer nou bizin kontign aprann konn Li pli bien? (3) Kouma nou kapav aprann konn Li pli bien?

KI SAVEDIR APRANN KONN ZEOVA?

4. Ki savedir konn Zeova?

⁴ Kan ti ariv ler pou ki bann Zwif kit Babilonn pou retourn Zerizalem, Zeova ti fer zot enn promes. Dan sa promes-la, nou aprann seki kapav ed nou pou konn Li. Zeova ti dir zot: “Mo pou donn zot enn leker pou konn mwa, pou kone ki mwa mo Zeova.” (Zer. 24:7) Sa bann Zwif-la ti deza konn boukou kitsoz lor Zeova. Selman, apre ki zot ti kit Babilonn, zot ti bizin fer zefor pou vinn pli pros ar Li. Konsernan sa verse-la, enn exper lor Labib dir: “Ena enn gran diferans ant konn Bondie ek konn Bondie telman bien ki nou vinn so bon kamarad. Li parey kouma ena enn gran diferans ant lir enn kitsoz lor lamour ek tom amoure ar enn kikenn.” Alor, li pa ase ki nou zis kone ki Bondie ena enn nom ek ki so nom se Zeova. Nou bizin kone kisann-la Zeova ete vremem ek ki bann zoli kalite Li ena.

5. Kouma lexanp Lerwa Zozias ed nou pou konpran seki savedir konn Zeova?

⁵ Amezir ki nou aprann konn Zeova, nou aprann osi ki kitsoz fer Li plezir ek ki kitsoz Li deteste. Anou gete seki nou kapav aprann ar lexanp Lerwa Zozias. Labib dir: “Dan 8^em lane so regn, alor ki li ti ankor enn garson, li ti koumans rod Bondie so anset David.” (2 Kro. 34:3) Zozias pa ti zis aprann boukou kitsoz lor Zeova, me li ti osi met an pratik seki li ti aprann. Se akoz sa ki Zeova ti dir Zeremi ki Zozias ti “respekte lazistis ek ladrwatir” ek ki li ti ed bann pov ek bann ki pa ti ena personn pou ed zot. Lerla, Zeova ti explike ki bann dimounn ki konn Li, se koumsa ki zot azir.—Zer. 22:15, 16.

6. Plis nou aprann konn Zeova, ki lefe sa pou ena lor nou? (Psom 9:10)

⁶ Lir Psom 9:10. Plis nou aprann konn Zeova, plis nou pou fer Li konfians. Se seki ti ariv lapot Pol. Kan li ti dan prizon inpe avan so lamor, li ti explike kifer li pa ti gagn onte ki li ti pe soufer parski li ti enn Kretien. Li ti dir: “Parski mo konn sa Kikenn dan ki mo’nn krwar la.” (2 Tim. 1:12) Gras-a tou seki li ti aprann lor Zeova ek tou seki Zeova ti fer pou li, Pol ti ena foul konfians dan Zeova. Enn not pou letid pou sa verse dir ki Pol ti sir ki Zeova ti pou rapel kouma li’nn servi Li avek fidelite, ek li ti sir ki Zeova ti pou resisit li.

KIFER NOU BIZIN KONTIGN APRANN KONN ZEOVA PLI BIEN?

7. Si sa fer lontan ki nou pe servi Zeova, ki kitsoz kapav arive?

⁷ Kan nou ti fek konn laverite, kitfwa nou ti fer boukou zefor pou etidie ek pou aprann plis lor Zeova. Me aster-la ki sa fer lontan ki nou dan laverite, kitfwa nou nepli fer sa kantite zefor la pou aprann plis lor Zeova. Kifer nou dir sa? Kan nou lir Labib lakaz ouswa dan renion, souvan nou reflesi lor kouma seki nou pe aprann kapav ed nou ek ed lezot. Se enn bon kitsoz parski Labib ankouraz nou pou fer sa. (2 Tim. 3:16, 17) Me ena enn kitsoz pli inportan lor ki nou bizin osi reflesi. (Ps. 25:8-10) Nou bizin demann nou-mem, ‘Ki sa aprann mwa lor Zeova?’a Fode zame ki nou telman konsantre lor kouma Labib kapav ed nou ek ed lezot, ki nou bliye aprann plis lor sa Kikenn ki’nn fer ekrir Labib la.

8. Kan nou aprann konn Zeova pli bien, ki lefe sa ena lor nou lamitie avek Li? (Psom 73:24-28)

⁸ Amezir ki nou aprann konn Zeova pli bien, nou lamitie avek Li pou vinn pli for. Par exanp, ki to resanti pou Zeova apre ki to’nn fini fer to lektir Labib, to’nn get Program Televizion JW, ouswa to’nn asiste enn lasanble? Bien souvan, nou santi nou pli pros ar nou Papa Zeova, pa vre! Kifer? Parski nou’nn aprann plis lor Li. Lerla, sa motiv nou pou donn Li laglwar ek pou montre Li nou rekonesans. Nou ena mem santiman ki Asaf, ki ti rapel ki kantite Zeova kontan li. Li ti dir: “Bondie Li enn ros ki soutenir mo leker ek Li mo par pou touletan.” (Lir Psom 73:24-28.) Wi, sak fwa ki nou fer zefor pou aprann konn Zeova pli bien, sa ogmant nou rekonesans pou Li parski Limem nou pli bon Kamarad.

9. Kan nou “mazinn” Zeova, ki lefe sa pou ena lor bann desizion ki nou pran? Servi enn lexanp pou explike.

⁹ Labib dir nou ki nou bizin “mazinn” Zeova. (Prov. 3:5, 6) Savedir ki nou bizin reflesi lor tou seki nou’nn aprann lor Li ek ki nou bizin pran kont so santiman dan tou seki nou fer. Anou pran enn lexanp. Boukou frer ek ser met enn foto zot konzwin lor zot biro, dan zot portmone, ouswa lor zot portab. Sa ed zot pou pans zot konzwin souvan, ek sa rapel zot ki zot bien kontan zot konzwin. Sa ed zot osi pou pran bann desizion ki pou fer zot konzwin plezir, ek pou pa fer nanye ki kapav kas leker zot konzwin. Dan mem fason, kan nou “mazinn” Zeova souvan, sa ed nou pou pran bann desizion ki fer Li plezir.—Ps 19:13, 14.

10. Kan nou aprann konn Zeova, ki nou pou kapav fer?

¹⁰ Zeova inn kree nou dan so resanblans, savedir ki nou kapav imit so bann zoli kalite. (Zen. 1:26) Ek plis nou aprann konn Zeova ek bann zoli kalite ki Li ena, plis nou pou konpran kouma nou kapav imit Li. Zezi ti kondann bann exper Lalwa ek bann Farizien parski zot pa ti imit bann zoli kalite Zeova. Mem si zot ti pran kont bann ti detay ki ena dan Lalwa, zot ti “negliz bann kitsoz pli inportan dan Lalwa, kouma lazistis, mizerikord, ek fidelite.” (Mat. 23:23) Nou pa anvi resanble zot, pa vre! Olie sa, nou anvi kontign aprann plis lor nou Bondie Zeova gras-a bann lalwa ek bann prinsip ki ena dan Labib. Ek kan nou fer sa, sa ed nou pou imit so bann zoli kalite.—1 Zan 4:8, 11.

KOUMA NOU KAPAV APRANN KONN ZEOVA PLI BIEN?

11. Eski to rapel kisann-la premie dimounn ki’nn koz lor Zeova avek twa?

¹¹ Eski to rapel kisann-la premie dimounn ki’nn koz lor Zeova avek twa? Si to’nn grandi dan laverite, kitfwa sa ti to bann paran. Sirman zot inn rakont twa bann zistwar ki ena dan Labib, ki montre bann zoli kalite ki Zeova ena. Kitfwa zot inn ansegn twa osi kouma pou trouv bann kalite Zeova atraver bann kitsoz ki Li’nn kree. Ouswa, kitfwa to ti aprann konn Zeova kan enn Temwin ti fer to letid. Sa Temwin-la kitfwa ti servi enn liv letid, kouma liv Viv Ere pou Touletan! Atraver bann zistwar ki ena dan Labib ek bann kitsoz ki ena dan lanatir, li ti ed twa pou trouv bann zoli kalite ki Zeova ena.b (Ne. 8:8; Zist. 14:17) Aster-la, anou gete kouma nou kapav kontign aprann konn Zeova pli bien.

12-13. Kan nou lir Labib, ki kitsoz nou kapav aprann lor Zeova? Donn enn lexanp. (Zeremi 39:15-18) (Get zimaz osi.)

¹² Premierman, pou nou aprann konn Zeova pli bien, nou bizin lir ek etidie so Parol Labib. Parfwa, Labib montre dan enn fason bien kler bann kalite ki Zeova ena. (Ex. 34:6, 7) Me bien souvan, Labib koz lor bann dimounn ek lor bann desizion ki zot inn pran. Ek kan nou lir sa bann zistwar-la, nou bizin demann nou-mem seki sa ansegn nou lor Zeova.

¹³ Anou pran enn lexanp. Kan nou lir Zeremi 38:6-13, nou trouve kouma enn Etiopien, ki apel Ebed-Melek, ti sov profet Zeremi. Sirman li bien fasil pou tir bann leson ar lexanp Ebed-Melek, ki ti montre lamour, kouraz, ek ki ti riske so lavi pou Zeremi. Me eski to trouv bann kalite ki Zeova ena atraver sa zistwar-la? (Lir Zeremi 39:15-18.) Par exanp, eski to trouve ki verse ki montre (1) ki Zeova bien kontan kan nou fer enn kitsoz pou Li, (2) ki Zeova Li enn Bondie ki zis, ek (3) ki Zeova gagn traka tou dimounn, ninport ki ras zot ete? Ki kitsoz ankor to’nn aprann lor Zeova dan sa zistwar-la? Kan to lir Labib, esey trouve seki to kapav aprann lor Zeova ek lor so bann kalite. Apre sa, remersie Li ek dir Li ki kantite to kontan Li parski Li ena sa bann zoli kalite-la.

14. Kifer nou bizin pran letan pou reflesi lor bann kitsoz ki Zeova inn kree?

¹⁴ Deziemman, pou nou aprann konn Zeova pli bien, nou bizin pran letan pou reflesi lor bann kitsoz ki Li’nn kree. (Ps. 145:9, 10) Li pa ase ki nou zis get bann kitsoz ki ena dan lanatir. Sertin dimounn toutlong zot lavi inn etidie bann kitsoz ki ena dan lanatir, kouma bann plant ouswa bann zanimo. Selman, zot pa’nn arive konpran ki ena enn Bondie ki’nn kree tousala ek ki sa Bondie-la ena bann zoli kalite. Lapot Pol dir ki Bondie “so bann kalite invizib, . . . kapav trouv sa bien depi kreasion lemond, parski kapav trouv sa atraver bann kitsoz ki li’nn fer.” (Rom. 1:20) Enn lot tradiksion Labib pou sa verse-la dir ki “enn kikenn ki reflesi, kapav trouv bann kalite ki Bondie ena.” Alor, li inportan ki nou pran letan pou reflesi lor bann kitsoz ki Zeova inn kree ek lor seki sa aprann nou lor nou Kreater.

15. Ki Patrick inn fer pou li aprann konn Zeova pli bien, ek kouma twa osi to kapav fer parey? (Get zimaz osi.)

¹⁵ Boukou parmi nou res dan bann gran lavil kot pena boukou plant ek zanimo. Si to dan sa sitiasion-la, kouma to kapav aprann konn Zeova pli bien atraver bann kitsoz ki Li’nn kree? Anou get lexanp Patrick, ki res Brazzaville, enn gran lavil dan Repiblik Kongo. Li dir: “Toulezour, mo fer zefor pou trouv enn kitsoz ki Zeova inn kree. Souvan mo trouv bann ti bebet ouswa bann ti zwazo ki pe rod manze ouswa enn plas pou reste. Enn fwa, mo ti trouv bann zwazo pe fer zot nik. Zot ti trouv bann kitsoz dan lavil pou zot fer enn zoli nik pou zot bann tipti.” Patrick pa ti zis get sa bann zwazo-la, me li ti osi pran letan pou reflesi lor seki sa ti aprann li lor so Kreater. Li dir: “Sa ti aprann mwa ki Zeova Li enn Bondie ki bon ek ki Li mem pran swin bann ti zanimo ki Li’nn kree. Sa finn aprann mwa ki Li gagn mo traka ek ki Li pou touletan donn mwa seki mo bizin.”

16. Kouma Mari ti aprann konn Zeova pli bien, ek kouma nou kapav swiv so lexanp? (Get zimaz osi.)

¹⁶ Enn trwaziem fason ki nou kapav aprann konn Zeova pli bien, se kan nou reflesi lor tou seki Li’nn fer pou nou. Se seki Mari, Zezi so mama, ti fer. Li ti deza konn Zeova bien ek li ti ‘gagn so faver.’ (Lik 1:30) Me apre, Zeova ti demann li pou fer enn kitsoz bien inportan ek bien difisil. Li ti demann li pou vinn mama Zezi, setadir Zeova so Garson. Zeova ti servi anz Gabriel ek Elizabet pou rasir Mari, ek pou fer li kone ki Li ti fer li konfians ek ki Li ti pou ed li. Mari ti pran letan pou reflesi lor seki bann-la ti dir li ek lor seki sa ti aprann li lor Zeova. Lerla, li ti trouve ki Zeova Li bien pwisan, Li bon anver tou dimounn, ek Li gagn traka bann ti-dimounn. (Lik 1:46-55) Mari ti bien rekonesan ki Zeova ti ed li, ek nou osi nou bien rekonesan ki Zeova ed nou “dan ler ki bizin.” (Ebre 4:16) Alor, sak fwa ki to santi ki Zeova inn ed twa, demann tomem: ‘Ki sa aprann mwa lor Zeova? Ki kalite Zeova inn montre anver mwa?’

ZAME NOU PA POU ARET APRANN KONN ZEOVA

17-18. Kifer zame nou pa pou aret aprann konn Zeova?

¹⁷ Sey mazine ki kantite kitsoz ankor nou pou aprann lor Zeova dan lemond nouvo. Dan Paradi, Zeova pou donn nou bann nouvo roulo, ek ladan Li pou dir nou seki nou bizin fer. (Rev. 20:12) Nou pou kapav osi apresie pli bien tou bann kitsoz ki Li’nn kree, ek sa pou aprann nou bann lezot kitsoz lor Zeova. (Iza. 11:6-9) Nou pou osi viv bann nouvo kitsoz, ki pou ed nou pou konpran pli bien nou Papa Zeova. Par exanp, bann dimounn ki nou kontan pou resisite, ek tigit-tigit nou pou vinn parfe.

¹⁸ Zame nou pa pou aret aprann konn Zeova! Li konn boukou plis kitsoz ki nou, ek “so lintelizans pena limit.” (Ps. 90:2; 147:5) Labib dir ki “zame [nou] pa pou dekouver travay ki vre Bondie inn fer depi koumansman ziska lafin.” (Ekle. 3:11) Alor, ninport ki kantite letan ki nou dan laverite, anou sezi tou lokazion ki nou gagne pou aprann plis lor nou Papa ki kontan nou, Zeova.