Liv Izai Kapav Rekonfort Twa

1-2. Kouma Zeova ed nou kan nou tris?

MAZINN enn zanfan ki bien tris ek ki pe plore. Kitfwa li pe plore parski so fami pe demenaze pou al res dan enn lot landrwa, savedir ki li pou bizin kit tou so bann kamarad. Ouswa kitfwa li bien tris akoz enn erer ki li’nn fer. Dan bann sitiasion koumsa, ki kitsoz enn mama ki ena boukou lamour pou fer pou konsol so zanfan? Li pou may li, li pou ekout li bien, ek li pou dir li ki li bien kontan li.

² Dan Labib, Zeova konpar Limem kouma enn mama ki ena boukou lamour ek ki pran swin ek rekonfort so zanfan. Zeova dir: “Parey kouma enn mama rekonfort so garson, koumsa mem mo pou kontign rekonfort zot.” (Iza. 66:13) Li vre ki enn paran ena boukou lamour pou so zanfan, me lamour ki Zeova ena pou nou, li boukou pli for ki lamour ki enn paran ena pou so zanfan. (Iza. 49:15) Gras-a so Parol, Labib, Zeova donn nou lafors ek rekonfor ki nou bizin kan nou tris, kan nou dekouraze, ouswa kan nou pe soufer.—Rom. 15:4.

3. Ki nou pou examine dan sa lartik-la?

³ Dan liv Izai, Zeova dir nou boukou kitsoz ki kapav rekonfort nou. (Iza. 40:1) Zeova ti fer profet Izai ekrir sa liv-la pou rekonfort bann abitan Zida parski zot ti pe gagn boukou problem. Azordi, nou osi nou pe viv “bann lepok kritik, difisil pou siporte.” Alor, nou bien bizin rekonfor. (2 Tim. 3:1) Anou get sertin verse dan liv Izai ki kapav rekonfort nou ek donn nou lafors (1) kan nou sitiasion sanze san ki nou atann, (2) kan nou kontign santi nou koupab pou bann erer ki nou’nn fer dan lepase, ek (3) kan nou tris parski enn kikenn ki nou kontan inn mor.

KAN NOU SITIASION SANZE SAN KI NOU ATANN

4. Kan nou sitiasion sanze san ki nou atann, ki lefe sa kapav ena lor nou?

⁴ Nou lavi kapav sanze san ki nou atann. (Ekle. 9:11; 1 Kor. 7:31) Par exanp, sa kapav arive akoz enn problem lasante, bann problem finans, bann problem politik dan pei, ouswa parski nou lafektasion inn sanze. Bann sanzman koumsa kapav fer nou panike ouswa trakase. Lerla, nou kapav demann nou-mem: ‘Ki mo bizin fer dan sa sitiasion-la?’ Enn frer ki apel Joseph, ti servi pandan 17 an dan Betel, me apre nou lorganizasion ti demann li pou al servi kouma pionie. Li dir: “Mo ti dan Betel depi bien lontan, alor sa ti bien difisil pou mo koumans enn nouvo lavi. Mo pa ti kone seki mo ti bizin fer ek seki ti pou ariv mwa apre.” Gras-a liv Izai, kouma Zeova kapav rekonfort nou kan nou sitiasion sanze san ki nou atann?

5. Dapre Izai 42:16, ki Zeova pou fer pou nou? (Get zimaz osi.)

⁵ Lir Izai 42:16. Zeova promet ki Li pou gid ‘bann ki aveg’ ek ki pe mars lor “bann semin ki zot pa abitie.” Li dir osi ki Li “pou fer nwarte vinn lalimier.” Bann lexpresion kouma “aveg,” “semin ki zot pa abitie,” “nwarte,” ek “terin kot ena ros,” dekrir bien fason ki nou kapav trouv nou lavenir kan nou sitiasion sanze san ki nou atann. Kan nou sitiasion sanze, nou kapav ena linpresion ki nou pe mars dan enn gran lafore, san ki nou kone kotsa nou pe ale. Selman, Zeova promet nou ki dan ninport ki sitiasion nou ete, Li pou touletan gid nou ek zame Li pa pou abandonn nou. Li pou trap nou lame ek gid nou dan nwarte, Li pou ekler nou sime, ek Li pou fer bann “terin kot ena ros” vinn plat. Kouma Li pou fer sa? Gras-a bann bon konsey ki ena dan so Parol Labib ek gras-a so lorganizasion. (Ps. 119:105; Iza. 30:21) Li kapav osi servi nou bann frer ek ser, ek ninport kisann-la, pou ed nou. Mem si nou pa kone seki kapav arive dime, nou kapav sir ki Zeova pou touletan ed nou parski Li kontan nou ek Li konpran nou.—Iza. 41:10; 1 Pier 5:6, 7.

6. Si nou sitiasion sanze san ki nou atann, ki kitsoz nou kapav sir?

⁶ Joseph, ki nou’nn mansione avan, explike seki li ek so madam ti resanti kan zot ti trouve kouma Zeova ti soutenir zot apre ki zot ti kit Betel. Li dir: “Pandan sa sanzman-la, nou’nn trouv lame Zeova ek nou’nn resanti so lamour pou nou. Li’nn servi nou bann frer ek ser pou ed nou. Li’nn pran nou swin lor plan materyel ek emosionel kan nou ti bizin, ek Li ankor pe fer sa.” Si to sitiasion sanze san ki to atann, twa osi to kapav sir ki Zeova pou gid twa ek ki Li pou donn twa lafors ki to bizin, mem si sa sanzman-la paret difisil. (Iza. 54:10; 58:11) Joseph dir: “Mo bien kontan bann parol enn parmi nou bann sante, ki dir, ‘Dime ki pou’arive, mo pa kone, mo kone ki [Zeova] pou dan mo kote.’a Wi, mem si sertin kitsoz pa pas kouma nou atann, nou kone ki Zeova pou touletan ed nou.”

KAN NOU KONTIGN SANTI NOU KOUPAB POU BANN ERER KI NOU’NN FER DAN LEPASE

7. Ki difikilte sertin kapav gagne akoz bann erer ki zot inn fer dan lepase?

⁷ Kan nou dir bann ansien ki nou’nn fer enn pese grav, zot pou ed nou parski zot kontan nou. Apre sa, nou pou fer tou seki nou kapav pou nou pa refer mem erer. (Prov. 28:13; Zak 5:14-16; 1 Zan 1:9) Selman, mem si Zeova inn fini pardonn nou pou enn pese ki nou’nn fer dan lepase, li kapav arive ki nou kontign santi nou koupab. Lerla, nou kapav demann nou-mem, ‘Kouma Zeova kapav pardonn mwa pou sa?’ (2 Kor. 2:7) Li normal ki nou ena sa santiman-la parski sa kapav bien difisil pou bliye bann erer ki nou’nn fer dan lepase, ek kitfwa sa kapav pran boukou letan pou ki nou aret pans lor la. Lerwa David, ki ti ena sa santiman-la, ti dir: “Pena lape dan mo lezo akoz mo pese.” Li ti dir osi: “Mo lekor inn angourdi ek mo’nn santi mwa kraze ziska dernie degre.” (Ps. 38:3, 8) Si parfwa twa osi to ena sa santiman-la akoz bann erer ki to’nn fer dan lepase, liv Izai kapav rekonfort twa.

8-9. Ki Izai 1:18 dir lor fason ki Zeova pardonn nou?

⁸ Lir Izai 1:18. Zeova servi enn zoli lexanp pou montre ki kan Li pardonn enn kikenn, Li pardonn li net. Li dir ki mem si nou bann pese zot “rouz vif,” Li pou fer zot vinn “blan kouma lanez.” “Rouz vif,” se enn rouz bien fonse. Si nou ena enn tas rouz fonse lor nou linz, li bien difisil pou fer sa tas-la ale. Parkont, kan Zeova pardonn enn pese, Li efas li net ek nepli ena okenn tras sa pese-la ki reste.

⁹ Anou pran lexanp Lerwa David. Mem si li ti komet ladilter ek ki li ti fer enn krim, Zeova ti pardonn li, ek apre so lamor, Zeova ti konsider li kouma enn kikenn ki ti fidel anver Li. (2 Sam. 11:3, 4, 14, 15; 12:13; 1 Ler. 9:4, 5) Kan Zeova ti mazinn David, Li pa ti rapel so bann pese; Li ti rapel kouma li ti fidel anver Li. Dan mem fason, kan nou repanti, Zeova pardonn nou ar tou so leker, ek Li ed nou pou ki nou ena enn konsians kler pou ki nou kapav ere. Kouma liv Izai kapav rekonfort nou ankor kan nou santi nou koupab pou bann erer ki nou’nn fer dan lepase?

10. Kouma Izai 38:17 rekonfort nou?

¹⁰ Lir Izai 38:17 ek not. Kan Izai dir, “To’nn zet tou mo bann pese deryer to ledo,” sa vedir osi, “To’nn tir tou mo bann pese devan to lizie.” Sa verse-la montre ki kan enn kikenn repanti, Zeova pran pese sa dimounn-la ek Li avoy sa deryer So ledo, savedir ki Li nepli trouv zot ek ki Li nepli pans lor la. Enn diksioner explik sa verse-la koumsa: “To’nn fer koumadir zame mo’nn fer pese.” Alor, kan Zeova pardonn nou bann pese, pou Li se koumadir zame nou pa’nn fer pese. Kan Li pardonn nou pese, Li pa revinn lor la ankor ek Li pa pou pini nou pou sa. Li efas tou tras pese ki nou’nn fer. Li promet nou ki Li “pa pou rapel [nou] bann pese.” (Iza. 43:25) Sa bien rekonfort nou, pa vre! Si Zeova, ki Ziz lor later antie, nepli rapel nou bann pese, alor nou osi nou bizin bliye zot ek nou bizin aret santi nou koupab pou sa bann pese-la.

11. Ninport ki erer ki nou’nn fer dan lepase, ki kitsoz pli inportan pou Zeova? (Get zimaz osi.)

¹¹ Sak fwa ki nou santi nou koupab akoz bann erer ki nou’nn fer dan lepase, nou bizin rapel promes ki Zeova inn fer nou. Kan Li pardonn nou, Li pardonn nou net! Zeova Li pa kouma bann dimounn ki inparfe; Li pena okenn santiman negatif ek Li pa gard nou dan leker akoz bann erer ki nou’nn fer dan lepase. (Iza. 57:16) Seki pli inportan pou Li, se pa kouma nou ti ete dan lepase, me se kouma nou ete azordi ek bann zefor ki nou pe fer pou vinn bann pli bon dimounn. (Iza. 55:7) Nou Bondie Zeova vremem kontan nou, ek Li anvi pardonn nou kan nou fer bann pese. Alor, fode pa ki nou les bann erer ki nou’nn fer dan lepase fer nou perdi nou lazwa, ouswa anpes nou servi Li ek fer nou perdi posibilite pou viv pou touletan.

KAN NOU TRIS PARSKI ENN KIKENN KI NOU KONTAN INN MOR

12. Kan enn kikenn ki nou kontan mor, ki santiman nou kapav ena?

¹² Kan enn kikenn ki nou kontan mor, nou kapav santi nou bien tris ek sa santiman-la kapav dire pandan boukou letan. Parfwa, nou kapav demann nou-mem kifer Zeova inn les sa dimounn-la mor. Michael so bann paran ti mor kan zot lakaz ti pran dife. Li dir: “Lamor mo bann paran ti kas mo leker, ek mo ti bien ankoler ar Zeova parski Li ti les zot mor. Mo kone ki se pa akoz Zeova ki zot inn mor. Selman, Li pa ti anpes sa maler-la arive.” Kitfwa twa osi to’nn deza ena sa santiman-la. Dan bann moman koumsa, ki rekonfor ek ki lespwar Zeova donn nou?

13. Ki promes Zeova inn fer dan Izai 25:8?

¹³ Lir Izai 25:8. Zeova promet ki Li pou “aval lamor pou touletan.” Sey mazine kouma sa pou ete kan lamor pou nepli existe! To nepli pou tris parski enn kikenn ki to kontan inn mor. (Iza. 35:10) To rapel kouma to leker ti fermal dernie fwa ki to ti al lor tom sa dimounn-la? To nepli pou resanti sa douler-la! Olie sa, to ena lespwar ki bann dimounn ki to kontan, zot pou touletan avek twa, zot pou vivan, ek zot pou an bonn sante. Sa promes-la pou vremem realize parski se Zeova ki’nn fer sa promes-la, ek se Li tousel ki kapav realiz sa.—Rev. 21:4, 5.

14. Ki to resanti kan to reflesi lor lesperans rezireksion? (Izai 26:19) (Get zimaz osi.)

¹⁴ Lir Izai 26:19. Zeova pa pou zis fer lamor disparet, me Li pou osi resisit bann dimounn ki’nn mor. Kan Li koz lor bann ki’nn mor, Zeova dir: “Mo bann kadav pou resisite.” Sa verse-la montre ki bann dimounn mor, zot pou Zeova, savedir ki zot lor so responsabilite. Li’nn gard zot dan so memwar, ek dan ler ki Li deside, Li pou resisit zot. Parey kouma laroze ki redonn lavi bann plant ki’nn sek, Zeova, Lasours lavi, pou redonn lavi bann dimounn ki nou kontan me ki’nn mor. Sey mazine ki kantite nou pou zwaye kan nou pou retrouv zot!—Konpar ar Mark 5:42.

15. Kouma promes konsernan rezireksion kapav ed nou kan enn kikenn ki nou kontan mor?

¹⁵ Mem si nou krwar dan rezireksion, sa pa anpes nou pou santi nou tris kan enn kikenn ki nou kontan mor. Selman, kan nou kone ki Zeova pa’nn bliye zot, sa vremem rekonfort nou. Se seki ti rekonfort Michael, ki nou’nn mansione avan. Li dir: “Izai 26:19 inn ed mwa pou konpran ki mo bann paran ena boukou valer pou Zeova. Zot an sekirite dan so memwar. Zeova pou kontign gard zot dan so memwar ziska ki Li resisit zot. Kan mo mazinn sa, sa bien rekonfort mwa ek sa donn mwa lafors.” Nou osi, li bon ki nou pran letan pou reflesi lor lepok kot nou pou retrouv bann dimounn ki nou kontan. Si nou fer sa, sa pou vremem rekonfort nou ek nou pou santi nou mwin tris.

16. Ki verse Labib inn rekonfort twa kan to’nn pas par enn sitiasion difisil?

¹⁶ Dan sa lartik-la, nou’nn get de-trwa verse dan liv Izai ki kapav rekonfort nou kan nou sitiasion sanze san ki nou atann, kan nou kontign santi nou koupab pou bann erer ki nou’nn fer, ek kan nou tris parski enn kikenn ki nou kontan inn mor. Nou bien rekonesan ki Zeova rekonfort nou atraver so Parol Labib, pa vre! (Ps. 94:19) Eski ena enn verse Labib ki vremem rekonfort twa kan to pas par enn sitiasion difisil? Esey aprann li par-ker, ouswa ekrir li lor enn bout papie ek met li dan enn plas kot to pou trouv li souvan. To Papa Zeova bien kontan twa ek Li pou touletan rekonfort twa gras-a so Parol.