Ki Leson Nou Kapav Aprann ar Bann Gabaonit?

1-2. Kifer li inportan ki nou kone seki Labib dir lor bann Gabaonit?

NOU an 1473 Avan Nou Lepok. Bann Izraelit inn rant dan Later Promiz. Zeova inn ed zot pou lager kont bann dimounn ki res Zeriko ek Ay, ek zot inn gagn enn gran viktwar. Me inpe apre, enn kitsoz ki personn pa atann arive. Enn group dimounn vinn get bann Izraelit. Zot dir ki zot sorti dan enn pei ki bien-bien lwin ek ki zot inn vini pou fer lape ar pep Bondie.

² Sa group dimounn la se bann Gabaonit. Se premie fwa ki Labib koz lor zot. Me apre sa, Labib pou rekoz lor zot ankor parski bann Gabaonit inn res ansam ar bann Izraelit pandan plizir santenn lane. Bann Gabaonit ena bann zoli kalite ki nou kapav imite, ek par fason ki Zeova inn azir ar zot, nou kapav aprann boukou lor bann zoli kalite ki Li ena.

NOU BIZIN ENA LAFWA DAN ZEOVA EK LIMILITE

3. (a) Kisann-la bann Gabaonit ti ete? (b) Kifer zot ti anvi fer lape ar bann Izraelit?

³ Kan bann Izraelit ti rant dan Later Promiz, zot ti bizin lager kont set pep ki ti trouv dan Kanaan. Sa bann pep-la ti pli gran ki pep Izrael ek zot ti ena pli boukou solda ki bann Izraelit. (Det. 7:1) Bann Ivit ti enn parmi sa bann pep-la, ek bann Gabaonit ti form parti pep Ivit. Bann Gabaonit ti res dan Gabaon, enn lavil ki ti antoure ar enn gran miray, ek zot ti ena boukou solda. (Zozwe 10:2) Bann lezot pep dan Kanaan ti anvi lager kont bann Izraelit. Me bann Gabaonit pa ti anvi lager parski zot ti kone ki zot pa ti pou kapav bat bann Izraelit. Zot ti kone ki se Zeova ki ti pe ed bann Izraelit pou gagn laviktwar, ek ki Li ti promet bann Izraelit ki Li ti pou donn zot pei Kanaan. (Ex. 34:11; Zozwe 9:24) Alor, apre ki bann Izraelit ti gagn laviktwar lor lavil Zeriko ek Ay, bann Gabaonit ti avoy enn group dimounna pou al get Zozwe dan Gilgal pou fer lape.

4. (a) Dapre Zozwe 9:8-13, kouma bann Gabaonit ti reisi anbet bann Izraelit pou fer lape? (Get zimaz osi.) (b) Ki bann Izraelit ti fer kan zot ti konpran ki bann Gabaonit ti koz manti?

⁴ Lir Zozwe 9:8-13. Bann Gabaonit ti fer bann Izraelit krwar ki zot ti sorti bien-bien lwin. Zot ti dir ki zot ti kone ki se Zeova ki ti detrir larme bann Ezipsien ek ki Li ti ed bann Izraelit pou gagn laviktwar kont bann Lerwa Amorit Sihonn ek Og. Selman, bann Gabaonit ti bien malin parski zot pa ti koz lor laviktwar ki bann Izraelit ti gagne kont lavil Zeriko ek Ay. Si zot ti koz lor la, bann Izraelit ti pou konpran ki zot pa ti sorti sa kantite lwin-la. Kifer? Parski bann Izraelit ti fek gagn sa viktwar-la, ek li inposib ki bann dimounn ki res lwin ti fini tann sa. Zozwe ek bann lezot Izraelit ti krwar zistwar bann Gabaonit ek ti promet zot ki zot pa ti pou lager kont zot. Me zot pa ti demann Zeova seki zot ti bizin fer. (Zozwe 9:14, 15) Inpe apre, zot ti konpran ki bann Gabaonit ti koz manti ar zot. Selman, zot ti tini promes ki zot ti fer bann Gabaonit parski zot ti “fer enn serman ar zot lor nom Zeova.” (Zozwe 9:16-19) Bann Izraelit ti dir bann Gabaonit ki zot ti kapav viv parmi zot, selman zot ti bizin fer travay ki bann esklav fer. Zot ti bizin “ramas dibwa ek tir delo pou lepep ek pou lotel Zeova.”—Zozwe 9:27.

5. Kouma bann Gabaonit ti montre ki zot ti ena lafwa dan Zeova?

⁵ Kan sink lerwa Amorit ti aprann ki bann Gabaonit ti fer lape ar Izrael, zot ti fer enn lalians pou atak lavil Gabaon. Bann Gabaonit ti per ek zot ti sipliy Zozwe pou ed zot pou lager. (Zozwe 10:3-7) Alor, Zozwe ek so larme ti al Gabaon pou lager kont larme bann Amorit, ek Zeova ti ed zot pou gagn laviktwar. Zeova ti mem touy sertin Amorit par bann gro lagrel, ek Li ti osi fer soley res anplas ziska ki bann Izraelit gagn laviktwar. (Zozwe 10:9-14) Kan bann Gabaonit ti fer lape ar bann Izraelit ek kan zot ti rod led ar bann-la, zot ti montre ki zot ti ena lafwa dan Zeova. Zot ti sir ki Zeova ti pou tini so promes ek protez zot.

6. Ki nou aprann lor Zeova par fason ki Li ti azir ar bann Gabaonit?

⁶ Ki sa zistwar-la aprann nou lor Zeova? Zeova ena limilite ek Li montre bonte anver bann ki ena lafwa dan Li. Inpe avan, Li ti donn bann Izraelit lord pou touy “tou bann abitan pei” Kanaan, ek parmi zot ti ena bann Gabaonit. (Nonb 33:51, 52) Selman, kan bann Izraelit ti promet bann Gabaonit ki zot pa ti pou touy zot, Zeova ti les bann Gabaonit viv. Li ti aksepte sa, mem si bann Izraelit pa ti demann Li so direksion avan ki zot fer sa promes-la. Li ti mem ed bann Izraelit pou tini zot promes ek Li ti fer enn mirak pou protez bann Gabaonit.—Zozwe 9:26; 11:19.

7. Parey kouma bann Gabaonit, kouma nou kapav montre ki nou ena lafwa ek limilite? (Get zimaz osi.)

⁷ Kouma nou kapav imit bann Gabaonit? Nou imit bann Gabaonit kan nou fer zefor pou ena enn lafwa for dan Zeova. Azordi, nou konn pli boukou kitsoz lor Zeova ki bann Gabaonit. Alor, nou ena boukou plis rezon pou fer Li foul konfians. (Ps. 40:4, 5) Dan nou servis pou Zeova, nou kapav osi imit bann Gabaonit kan nou aksepte fer bann travay ki paret pa inportan ouswa bann travay ki difisil pou fer. (Zozwe 9:23, 27) Luke, enn zenn frer ki dan Betel, rapel kouma li ti trouv enn vie frer ki servi depi lontan dan Betel, montre limilite. Mem si sa frer-la ti fer bann travay ki inportan dan Betel, li ti port li volonter pou al fer gardien pou enn Lasal Renion ki ti an konstriksion. Luke dir: “Li pa ase ki nou zis panse ki nou ena limilite. Enn kikenn ki ena limilite, li montre sa par seki li fer.” Parey kouma bann Gabaonit, nou bizin montre ki nou ena lafwa dan Zeova kan nou fer Li konfians toulezour pou ed nou pou fer fas ar nou bann difikilte. Nou montre ki nou ena lafwa osi kan nou ena limilite ek nou fer ninport ki travay ki demann nou pou fer dan lorganizasion Zeova.

KAN TO PAS PAR ENN LINZISTIS, ENA PASIANS EK ATANN KI ZEOVA ED TWA

8. Dan ki fason Sail ti kriel ek inzis ar bann Gabaonit?

⁸ Labib explike seki ti ariv bann Gabaonit lepok ki Sail ti lerwa. Sa lepok-la, Sail ti esey touy tou bann Gabaonit ki ti pe viv parmi pep Bondie dan Izrael ek Zida.b (2 Sam. 21:2, 5, 6) Seki Sail ti fer ti bien kriel ek inzis! Sail pa ti tini promes ki bann Izraelit ti fer pou protez bann Gabaonit.

9. Kan eski Zeova ti montre ki Li ti ankoler akoz seki ti ariv bann Gabaonit?

⁹ Zeova pa ti pini deswit bann dimounn ki ti tret bann Gabaonit dan enn fason inzis. Plizir lane apre, kan David ti vinn lerwa lor Izrael, Zeova ti fer lapli aret tonbe pandan trwa-z-an. Ek akoz sa, ti ena enn gran lafaminn dan pei. Kan David ti demann Zeova kifer ti ena sa lafaminn-la, Zeova ti dir li ki Li ti ankoler parski Sail ek sertin zom dan so fami ti fer enn pese kan zot ti touy boukou Gabaonit.—2 Sam. 21:1.

10. Dapre 2 Samiel 21:3-6, kouma bann Gabaonit ti montre respe pou Lalwa Bondie?

¹⁰ Lir 2 Samiel 21:3-6. David ti koz ar bann Gabaonit ek li ti demann zot seki li kapav fer pou zot. Bann Gabaonit ti konn Lalwa Bondie bien ek zot pa ti demann David pou donn zot larzan. Zot ti kone ki dapre Lalwa, kan enn kikenn fer enn krim, bizin touy li. Sa kikenn ki fer enn krim la pa kapav donn enn som larzan pou ki li res an-vi. (Nonb 35:30, 31) Zot ti kone osi ki zot pa kapav touy enn kikenn san permision lerwa. Alor, David ti dir bann Gabaonit ki zot ti kapav touy set zom dan fami Sail, bann zom ki ti donn enn koudme pou touy bann Gabaonit. Inpe apre, lapli ti rekoumans tonbe dan Izrael ek ti nepli ena lafaminn dan pei. Sa ti montre ki Zeova ti nepli ankoler ar bann Izraelit pou fason ki zot ti tret bann Gabaonit.—2 Sam. 21:9, 10, 14.

11. Ki sa zistwar-la aprann nou lor Zeova?

¹¹ Ki sa zistwar-la aprann nou lor Zeova? Sa zistwar-la montre nou ki “Zeova kontan lazistis.” (Ps. 37:28) Azordi, boukou dimounn pa tret dan enn bon fason bann dimounn ki diferan ar zot ouswa ki sorti dan lezot pei. Selman, Zeova anvi ki sakenn tret so kamarad dan enn bon fason. Boukou serviter Zeova pe fer fas ar linzistis ouswa zot pe gagn persekision. Selman, Zeova promet ki biento Li pou rekonpans zot ek ki zot pou nepli soufer. Sa zistwar-la montre nou osi ki Zeova atann ki nou tini nou bann promes, parey kouma Li ti atann ki bann Izraelit tini zot promes ek protez bann Gabaonit.—Konpar ar Amos 1:9.

12. Kan lezot tret nou dan enn move fason, kouma nou kapav imit bann Gabaonit?

¹² Kouma nou kapav imit bann Gabaonit? Kan nou bann frer ek ser azir dan enn move fason anver nou, nou bizin ena pasians ek atann ki Zeova ed nou. Kan nou fer sa, nou montre ki nou ena konfians ki Zeova pou sanz sa sitiasion-la dan moman ki Li Li anvi. Anou get lexanp Ser Laura French, enn ser fidel ki ti ena lesperans pou al dan lesiel. An 1926, li ti koumans servi dan Betel Kanada. Apepre di-z-an plitar, li ti pas par enn gro linzistis. Sertin frer ti dir ki li ti form parti enn group aposta ki ti dan Betel, ek mem si sa ti fos, bann frer ti demann li pou kit Betel. Kouma Ser French ti reazir? Mem si sa ti bien bles li, zame li pa ti dir bann kitsoz negatif lor bann frer ek lor lorganizasion. Olie sa, li ti res bien okipe dan predikasion ek li ti servi kouma pionie pandan kat-r-an. Lerla, an 1940, li ti bien kontan kan bann frer ti invit li pou revinn Betel. Li ti servi dan Betel pandan 50 an ek li ti res fidel ar Zeova ziska so lamor. Ki leson nou aprann? Parey kouma Ser French, kan lezot tret nou dan enn move fason, nou bizin kontign fer seki bon ek atann ki Zeova sanz nou sitiasion dan moman ki Li Li anvi.—Iza. 26:3, 4.

KONTIGN SERVI ZEOVA AVEK FIDELITE

13. Kisann-la bann Netinim ti ete, ek ki zot ti fer apre ki zot ti kit Babilonn?

¹³ Apepre 500 an apre lepok Lerwa David, Labib rekoz lor bann Gabaonit ek lor seki ti ariv zot. Sa fer 70 an ki bann Zwif dan Babilonn, ek an 537 Avan Nou Lepok, enn premie group Zwif ti retourn Zerizalem avek Gouverner Zorobabel. (Esdr. 2:1, 2, 58) An 468 Avan Nou Lepok, enn lot group ti retourn Zerizalem avek Esdras. (Esdr. 7:1-7) Pa ti ena boukou dimounn ki ti kit Babilonn avek Zorobabel ek Esdras pou retourn Zerizalem, me toule-de fwa ti ena bann Netinim avek zot. (Esdr. 2:58; 7:7) Kisann-la bann Netinim ti ete? Zot pa ti bann Zwif. Zot ti “bann serviter tanp” ek boukou parmi zot ti bann desandan bann Gabaonit.

14. Kouma bann Gabaonit ti montre ki zot fidel anver Zeova? (1 Kronik 9:2)

¹⁴ Lir 1 Kronik 9:2. “Bann serviter tanp” ti parmi bann premie pou retourn Zerizalem. Sa ti montre ki zot ti ena plis lafwa ki sertin Zwif dan Babilonn. Boukou Zwif ti ena bann zoli lakaz dan Babilonn ek zot ti ena boukou kas. Alor, zot pa ti anvi abandonn zoli lavi ki zot ti ena dan Babilonn pou retourn Zerizalem ek donn enn koudme pou rekonstrir lavil. Me sertin desandan bann Gabaonit ek sertin Zwif ki ti fidel, ti anvi retourn Zerizalem pou aranz enn nouvo tanp ek pou ador Zeova laba. Alor, zot ti retourn dan Izrael mem si sa pa ti fasil pou zot ek ki zot ti bizin fer bann sakrifis. Bann Zwif ti ena bann later dan Izrael, me bann desandan bann Gabaonit pa ti ena okenn leritaz dan Izrael. Kanmem sa, zot ti retourn dan Izrael pou ki zot kapav travay dan tanp Zeova ek donn enn koudme pou rekonstrir miray Zerizalem.—Ne. 3:26.

15. Ki sa zistwar-la aprann nou lor Zeova?

¹⁵ Ki sa zistwar-la aprann nou lor Zeova? Sa zistwar-la montre nou ki Zeova kontan bann dimounn ki fidel anver Li ek Li touletan pran zot swin. Apre ki Zeova ti protez bann Gabaonit dan lepok Zozwe, Li ti kontign beni zot bann desandan. Kan bann Babilonien ti detrir Zerizalem, Zeova ti sap bann desandan bann Gabaonit. Ek apre ki zot ti retourn Izrael, Zeova ti kontign servi zot pou bann travay ki fer dan tanp. Kitfwa sertin parmi zot ti mem res pre ar tanp. (Esdr. 2:70; Ne. 11:21) Anplis, parski zot ti pe travay dan tanp, lerwa Pers pa ti fer zot pey okenn tax.—Esdr. 7:24.

16. Parey kouma bann Gabaonit, kouma nou kapav montre Zeova ki nou fidel anver Li?

¹⁶ Kouma nou kapav imit bann Gabaonit? Nou osi, nou anvi fer nou best pou servi Zeova, ek nou anvi ed lezot osi pou fer sa. Nou aksepte fer bann sakrifis pou servi Zeova parski nou kontan Li ek nou anvi fer Li plezir. Se seki Alwin, enn frer ki res Filipinn, ti fer. Li ti pe travay pou enn konpagni petrol ek so travay ti pe pey bien. Selman, li ti anvi fer plis pou servi Zeova. Sak fwa ki responsab sirkonskripsion ti vizit so lasanble, li ti pran konze pou ki li kapav fer plis dan predikasion, ek sa ti rann li bien zwaye. Apre inpe letan ek boukou lapriyer, Alwin ti kit so travay ek li ti rod enn lot travay ki ti permet li fer pionie. Li vre ki sa nouvo travay-la ti pey boukou mwins, selman li ti ere parski li ti reisi realiz so lobzektif. Avek letan, so madam osi ti koumans fer pionie, ek ansam zot inn ed 21 dimounn pou vinn dan laverite. Nou sir ki Zeova bien kontan bann zefor ki Alwin ek so madam inn fer pou servi Li! Nou osi, nou kapav sir ki Zeova bien kontan kan Li trouv nou fer bann sakrifis pou servi Li, ek nou kapav sir ki Li pou touletan pran nou swin.—Mat. 6:33.

17. Sit bann leson ki nou’nn aprann ar lexanp bann Gabaonit.

¹⁷ Par fason ki Zeova ti azir ar bann Gabaonit, nou’nn aprann boukou lor bann zoli kalite ki Li ena. Li ena limilite ek bonte, Li kontan lazistis, ek Li fidel. Li touletan rekonpans bann ki servi Li avek fidelite. Nou’nn aprann osi bann zoli leson ar lexanp bann Gabaonit. Parey kouma zot, nou bizin ena enn lafwa for dan Zeova ek ena konfians ki Li pou ed nou kan nou gagn bann difikilte. Nou bizin osi ena limilite ek fer ninport ki travay ki Zeova demann nou pou fer. Kan nou pas par enn linzistis, nou bizin ena pasians ek atann ki Zeova sanz nou sitiasion. Nou sir ki Li pou rezoud tou nou bann problem ek ki Li pou rekonpans nou dan moman ki Li Li anvi. Nou bizin osi kontign fer nou best pou servi Zeova avek fidelite. Si nou fer tousala, nou pou montre ki nou’nn tir bann zoli leson ar lexanp bann Gabaonit.