Servi Bann Prinsip Labib pou Form To Konsians

1-2. (a) Ki kado Zeova ti donn Adan ek Ev? (b) Kouma zot ti bizin montre zot rekonesans pou sa zoli kado-la?

BANN zanimo azir dapre zot linstin, setadir zot fer bann kitsoz ki’nn kree zot pou fer. Bann laparey ek bann masinn fer bann kitsoz ki zot inn programe pou fer. Me pou bann imin, li bien diferan. Kan Zeova inn kree bann imin, Li’nn donn nou enn kado ki ena boukou valer. Sa kado-la se liberte pou swazir, setadir kapasite pou swazir ek pou pran nou prop desizion. Labib dir ki Zeova ti kree premie zom, Adan, dan So resanblans. (Zen. 1:26, 27) Savedir ki Zeova ti kree Adan ek Ev avek kapasite pou pran zot prop desizion.

² Zeova pa ti donn Adan ek Ev enn long lalis bann lalwa pou ki zot swiv. Li ti zis dir zot ki zot ti bizin okip later, ranpli later ar zot bann zanfan, ek respekte so drwa pou met bann limit lor seki zot ti gagn drwa ek pa gagn drwa fer. (Zen. 1:28; 2:16, 17) Kouma Adan ek Ev ti kapav montre Zeova zot rekonesans pou sa zoli kado ki Li ti donn zot la? Par rekonesans pou tou seki Zeova ti donn zot, zot ti bizin obeir so bann lalwa. Koumsa, sa ti pou montre ki zot kontan Li ek ki zot anvi fer Li plezir.—Prov. 23:15.

3. Kouma Adan ek Ev ti servi zot liberte pou swazir?

³ Labib dir ki Adan ek Ev ti mal servi zot liberte pou swazir. Zot ti swazir pou dezobeir Zeova. Zot ti fer sa parski zot ti egois. Zot ti plis kontan zotmem, ki Zeova. (Zen. 3:1-7) Ek akoz move desizion ki zot inn pran, nou tou nou soufer azordi.—Rom. 5:12.

4. (a) Dapre Galat 6:5, ki kitsoz nou tou nou bizin fer? (b) Ki kado ankor Zeova inn donn nou?

⁴ Nou lavi bien difisil azordi. Sak zour, nou tou nou ena bann desizion pou pran ek nou bizin asim responsabilite sa bann desizion-la. (Lir Galat 6:5 ek not) Sertin desizion fasil pou pran, me ena lezot ki bien difisil. Alor, kouma nou kapav pran bann desizion ki pou fer Zeova plezir? Pou koumanse, nou bizin aksepte ki nou bizin led Zeova pou ki nou kapav pran bann bon desizion. (Prov. 16:3; Zer. 10:23) Mem Zezi, ki ti enn zom parfe, ti kone ki li ti bizin led Zeova. (Ebre 5:7) Alor, nou ki inparfe, nou plis bizin So led ankor. Zeova pa’nn zis donn nou kapasite pou pran nou prop desizion, me Li’nn donn nou enn lot zoli kado osi. Se nou konsians. Anou gete kouma nou konsians kapav ed nou pou pran bann bon desizion.

KI ETE KONSIANS?

5. (a) Ki ete konsians? (b) Kouma nou konsians kapav ed nou? (Romin 2:14, 15)

⁵ Zeova inn kree nou avek enn konsians ki ed nou pou kone ki kitsoz ki bon ek ki kitsoz ki pa bon. Tou dimounn ena enn konsians, mem bann dimounn ki pa konn nanye lor bann lalwa Bondie. (2 Kor. 4:2) Nou konsians, li kouma enn ziz ki dir nou si seki nou pe panse ek seki nou pe fer, li bon ouswa li pa bon. (Lir Romin 2:14, 15.) Nou konsians kapav averti nou pou ki nou pa fer bann kitsoz ki nou kone pa bon. (1 Sam. 26:8-11) Ouswa, li kapav pous nou pou fer bann kitsoz ki nou kone bon. Mem si Zeova inn donn nou kapasite pou swazir ek pou pran nou prop desizion, sa pa vedir ki tou bann desizion ki nou pou pran, pou fer Li plezir. Selman, nou konsians kapav ed nou pou kone si enn desizion li bon ouswa li pa bon.

6. Kifer nou konsians pa touletan fonksionn kouma bizin?

⁶ Malerezman, nou konsians pa touletan fonksionn kouma bizin. Akoz nou inparfe, nou konsians osi li inparfe. Fason ki nou’nn grandi, pei kot nou sorti, ek nou bann move dezir, kapav ena enn move lefe lor nou konsians. Se akoz sa ki Labib dir ki enn konsians li kapav “feb,” “inpir,” “nepli sansib koumadir finn marke ar feray so,” ouswa “move.” (1 Kor. 8:12; Tit 1:15; 1 Tim. 4:2; Ebre 10:22) Sa kalite konsians-la pa kapav ed nou pou pran bann bon desizion, parski li parey kouma enn balans ki’nn fose ek ki bizin regle. Alor, nou bizin fer zefor pou form nou konsians. (1 Pier 3:16) Kouma nou kapav fer sa?

KOUMA NOU KAPAV FORM NOU KONSIANS?

7-8. (a) Ki kitsoz kapav ed nou pou form nou konsians? (b) Kouma nou kapav servi bann prinsip Labib pou gid nou? Donn enn lexanp. (Get zimaz osi.)

⁷ Pou nou form nou konsians, nou bizin lir Labib souvan ek aprann fer diferans ant seki bon ek seki pa bon devan lizie Zeova. Kan nou etidie bann lalwa Bondie, sa ed nou pou konpran so fason panse. Selman, kouma nou ti trouve dan lartik avan, pa dan tou sitiasion ki ena bann lalwa. Se akoz sa ki nou bizin rod osi bann prinsip ki ena dan Labib, parski zot kapav ed nou pou kone seki Zeova panse ek resanti dan ninport ki sitiasion.—Iza. 55:9.

⁸ Nou kapav konpar nou lavi ar enn randone dan enn dezer. Dan dezer, pena sime ek pena okenn pano pou indik nou nou sime. Pozision soley ek bann zetwal dan lesiel, kitfwa kapav ed nou pou kone dan ki direksion nou pe ale. Selman, si nou ena enn map avek bann indikasion lor la, sa pou plis ed nou. Sa map-la kapav ed nou pou kone si nou pe al dan bon ouswa dan move direksion. Nou lobzektif dan lavi se pou fer Zeova plezir, ek Labib li koumadir enn map ki kapav ed nou pou fer sa. Bann prinsip ki ena dan Labib, zot kouma bann indikasion lor nou sime, ek si nou swiv sa bann prinsip-la, nou pou reisi realiz nou lobzektif.

9. Ki kitsoz ankor kapav ed nou pou form nou konsians? (Romin 9:1)

⁹ Nou bizin led lespri sin Zeova pou ki nou kapav form bien nou konsians. (Lir Romin 9:1.) Lespri sin kapav ed nou pou konpran fason panse Zeova. Li kapav osi motiv nou ek donn nou lafors pou ki nou azir an-akor ar so volonte. (Fil. 2:13) Me ki nou bizin fer pou ki Zeova so lespri sin ed nou?

10. Kouma nou kapav gagn Zeova so lespri sin? (Lik 11:10, 13)

¹⁰ Priye pou gagn lespri sin. (Lir Lik 11:10, 13.) Nou kapav sir ki Zeova anvi donn nou so lespri sin. (Zan 3:34) Avredir, Li donn tou bann ki obeir Li so lespri sin “avek zenerozite.” (Prov. 1:23; Zak 1:5) Ki kitsoz ankor kapav ed nou pou form nou konsians?

11. (a) Ki kitsoz bizin nou lobzektif prinsipal dan lavi? (b) Kifer nou bizin fer sir ki nou konsians li bien forme ek ki li pe fonksionn kouma bizin?

¹¹ Touletan esey fer Zeova plezir. (Prov. 8:34, 35) Sa bizin nou lobzektif prinsipal dan lavi. Si nou rapel sa lobzektif-la dan tou bann difikilte ki nou gagne, sa kapav ed nou pou form nou konsians. Enn kikenn ki so konsians bien forme, li fer zefor pou pans parey kouma Zeova ek li pran kont santiman Zeova dan tou domenn so lavi. Nou lavi bien difisil azordi, alor nou konpran kifer li inportan ki nou ena enn konsians ki bien forme. Bien souvan, nou bizin pran bann desizion lor bann kitsoz ki pa mansione dan Labib. Par exanp, kitfwa nou bizin pran bann desizion konsernan nou bann divertisman, nou travay, nou ledikasion, ouswa nou relasion ar lezot. Alor, kouma nou kapav fer sir ki Zeova dakor ar bann desizion ki nou pran dan sa bann domenn-la?—2 Kor. 1:12.

12. Kouma nou kapav kone si nou konsians pe gid nou pou pran bann bon desizion? (Efezien 5:10)

¹² Reflesi lor seki to lir dan Parol Bondie. (Ps. 49:3) Kan to lir Labib, rod bann prinsip ki kapav ed twa pou konpran fason panse Zeova. (Lir Efezien 5:10.) Koumsa, kan to pou gagn bann difikilte, sa pou ed twa pou kone si to konsians pe gid twa pou pran bann bon desizion. (Prov. 2:4-9, 11-13) Bann prinsip Labib kapav ed nou pou redres nou konsians ek ed nou pou fer seki Zeova anvi nou fer.—Ebre 5:14.

13. Avan ki nou pran enn desizion, ki kitsoz nou bizin fer? Donn enn lexanp.

¹³ Avan ki nou pran enn desizion, nou bizin kone seki Zeova panse lor la. Fode pa ki nou swiv lexanp bann Izraelit ki ti res dan Zida apre destriksion Zerizalem an 607 Avan Nou Lepok. Zot ti dir Zeremi: “Ki Zeova to Bondie dir nou ki semin nou bizin pran ek seki nou bizin fer.” (Zer. 42:3-6) Selman, zot ti fini deside seki zot ti pou fer. Zot pa ti kontan seki Zeova ti demann zot fer, alor zot pa ti obeir Li. Zot ti fer par zot latet, ek akoz sa zot ti gagn boukou maler. (Zer. 42:19-22; 43:1, 2, 4) Alor, avan ki nou pran enn desizion, nou bizin rod bann prinsip Labib ki pou montre nou seki Zeova panse lor sa sitiasion-la, ek nou bizin azir an-akor ar sa bann prinsip-la.

14. Kifer nou bizin swiv bann prinsip Labib kan nou pran bann desizion?

¹⁴ Pran bann desizion ki an-akor ar bann prinsip Labib. (Mat. 7:24-29; Zak 1:23-25) Kan nou swiv bann prinsip Labib kan nou pran bann desizion, nou les lespri sin Zeova diriz nou. Lerla, Zeova pou kontign donn nou so lespri sin. (Zist. 5:32) Parkont, si nou pa les lespri sin Zeova diriz nou, nou riske fer bann kitsoz ki pa an-akor ar lespri sin. (Efe. 4:30; Iza. 63:10; Zist. 7:51) Zeova kapav mem tir so lespri sin lor nou. (Ps. 51:11; 1 Tes. 5:19) Si sa arive, sa pou bien tris parski nou bizin lafors ki Zeova donn nou gras-a so lespri sin.—Efe. 3:16.

KOUMA NOU KAPAV TROUV BANN PRINSIP LABIB KI KAPAV ED NOU?

15-16. (a) Kouma nou kapav trouv bann prinsip Labib ki kapav ed nou? (b) Ki prinsip kapav ed to etidian Labib pou li aret fime?

¹⁵ Fer bann resers dan nou bann piblikasion. Pou ki nou kapav swiv bann prinsip Labib, pou koumanse nou bizin kone kotsa zot ete dan Labib. Par exanp, kitfwa to etidian Labib pa konpran kifer li bizin aret fime. Li kapav dir twa: ‘Labib pa koz lor sigaret. Alor, kouma nou kone ki sigaret pa bon?’ Kouma to kapav ed li pou trouv bann prinsip Labib ki kapav ed li? Enn zouti ki to kapav servi se Liv Resers pou Bann Temwin Zeova. Dan sa liv-la, anba tit “Sigaret ek Fime,” ena referans enn lartik ek so tem se, “Ki Bondie Panse lor Sigaret?” (Get Latour Degard 1^e Ziliet 2014.) Ki bann verse ek ki bann prinsip li pou trouve dan sa lartik-la?

¹⁶ Anou get sink prinsip ki ena dan sa lartik-la. (1) Nou bizin pa vinn esklav enn kitsoz ki kapav touy nou. (Rom. 6:16) (2) Nou bizin evit tou kitsoz ki kapav fer nou lekor ditor. (2 Kor. 7:1) (3) Zeova anvi ki nou servi Li “avek tou [nou] lavi.” (Mat. 22:37) (4) Nou bann aksion bizin pa fer lezot ditor. (Mat. 22:39; 1 Kor. 10:24) (5) Zeova kapav donn nou lafors pou fer seki bon. (Fil. 4:13) Alor, mem si Labib pa koz lor sigaret, bann prinsip ki ena dan Labib kapav ed to etidian pou kone seki Zeova panse lor la.

17. Si enn frer ek enn ser pe organiz zot maryaz, ki prinsip Labib kapav ed zot pou pran bann bon desizion?

¹⁷ Si enn frer ek enn ser pe organiz zot maryaz, ki prinsip Labib kapav ed zot pou pran bann bon desizion? Ankor enn fwa, dan Liv Resers pou Bann Temwin Zeova, ena bann verse ek bann prinsip ki kapav ed zot. Anba tit “Maryaz ek Resepsion,” ena plizir lartik kot ena bann prinsip Labib ki kapav ed zot. Anou get sis prinsip ki kapav ed bann Kretien ki pe pans pou marye. (1) Tou seki nou organize pou nou maryaz bizin donn laglwar Zeova. (1 Kor. 10:31, 32) (2) Fode pa ki nou linz li indesan ouswa li sok lezot. (1 Tim. 2:9; 1 Pier 3:3, 4) (3) Fode pa ki nou fer letalaz ar seki nou ena ouswa ki nou esey inpresionn lezot, parey kouma bann dimounn dan lemond Satan fer. (Zan 17:14; Zak 1:27; 1 Zan 2:15, 16) (4) Nou maryaz ek nou resepsion bizin bien organize. (1 Kor. 14:40) (5) Fode pa ki nou resepsion maryaz li kouma “bann fet kot pena okenn kontrol,” kot bann dimounn bwar ziska sou. (Gal. 5:21) (6) Nou bizin donn enn kikenn responsabilite pou veye ki tou pe pas bien.—Zan 2:8, 9.

18-19. (a) Ki piblikasion kapav ed nou? (b) Kouma to kapav servi sa piblikasion-la pou trouv bann prinsip ki kapav ed twa pou pran bann bon desizion konsernan bann fet? (Get lankadre “Kouma To Kapav Kone Seki Zeova Panse Lor la?”)

¹⁸ Enn lot piblikasion ki kapav ed nou se liv Bann Verse pou Nou Lavi Kretien. Dan sa liv-la, ena plizir verse ki kapav ed nou dan diferan domenn. Anba sak size, ena bann kestion ek bann verse ki kapav ed nou pou konpran bann prinsip Labib. Par exanp, enn Kretien kitfwa pe demann limem si li kapav asiste enn fet. Dan liv-la, anba tit “Fet,” ena sou-tit “Bann fet ki bann Kretien pa fer,” ek ladan li kapav trouv bann verse ek bann prinsip ki kapav ed li pou pran enn bon desizion.

¹⁹ Anou get sertin lide ki ena dan seksion: “Kifer fode pa nou partisip dan bann fet ki ena enn lien ar fos relizion? (1Ko 10:21; 2Ko 6:14-18; Ef 5:10, 11).” Sa seksion-la koz lor sertin fet ki pa bon. Anba sou-tit “Bann fet nasional,” ena bann prinsip Labib ki kapav ed enn Kretien pou pran enn bon desizion si enn kikenn demann li pou asiste bann fet ki donn loner enn pei ouswa enn kominote, bann seremoni ki ena enn lien ar bann lager ouswa ki donn loner bann dimounn. Nou bien rekonesan anver lorganizasion Zeova, ki donn nou bann zouti koumsa pou ki nou kapav form nou konsians!

FORM BIEN TO KONSIANS

20. Kouma nou kapav kone si nou konsians li bien forme?

²⁰ Liberte pou swazir, se vremem enn zoli kado ki Zeova inn donn nou, pa vre! Selman, pou ki nou kapav servi li dan enn fason ki fer Zeova plezir, nou bizin form nou konsians. Enn konsians ki bien forme pou ed nou pou pran bann desizion ki donn laglwar Zeova ek ki an-akor ar so volonte. Ek pou nou form nou konsians, nou bizin led lespri sin. Nou bizin demann Zeova so lespri sin ek nou bizin les so lespri sin diriz nou lavi. Bann prinsip Labib osi kapav form nou konsians. Alor, anou servi bien tou sa bann kado ki Zeova inn donn nou la. Koumsa, nou pou trouve ki “parol Bondie, li vivan ek li pwisan,” ek li kapav ed nou dan nou lavi toulezour.—2 Tim. 3:16, 17; Ebre 4:12.