Kouma To Kapav Pran Bann Bon Desizion Si To Swazir pou Fer Plis Letid?

1-2. (a) Ki desizion bann zenn bizin pran? (b) Ki savedir “fer plis letid”? (Get “Expresion Ki’nn Explike.”)

BANN dimounn souvan poz bann zenn sa kestion-la: “Ki travay to anvi fer kan to vinn gran?” Meyer karyer ki to kapav swazir se servi Zeova aplintan. Me kanmem sa, to pou bizin travay ek gagn ase kas pou ki to kapav gagn seki to bizin. (2 Tes. 3:10) Ek sirman to’nn deza reflesi ki travay to pou fer plitar.

² Bann zenn souvan dir zot paran dan ki domenn zot ti pou kontan travay kan zot vinn gran. Lerla, apre lekol, kitfwa zot pou fer plis letid pou ki zot kapav gagn enn travay dan sa domenn-la.a Eski to’nn deza demann tomem si to bizin fer plis letid? Si wi, dan ki domenn? Dan sa lartik-la, to pou trouv bann prinsip Labib ki kapav ed twa pou pran bann bon desizion konsernan to ledikasion. Mem si sa lartik-la li sirtou pou bann zenn, li kapav ed ninport kisann-la ki pe pans pou fer plis letid. Sa bann prinsip-la kapav osi ed bann paran pou zot ed zot zanfan pou pran enn bon desizion.

ESKI TO BIZIN FER PLIS LETID?

3. Kifer sertin Kretien desid pou fer plis letid?

³ Dan sertin pei, li pa neseser ki enn kikenn fer plis letid pou li gagn enn travay. Selman, dan lezot pei, pou ki enn kikenn kapav gagn enn travay ki pey bien ouswa travay bann ler biro, kitfwa li pou bizin fer plis letid. Ek pou enn Kretien, kitfwa sa kapav permet li pou pas plis letan dan predikasion ouswa pou fer bann lezot form servis. Selman, bann ki desid pou fer plis letid, kitfwa zot bizin fer bann sakrifis ek zot gagn bann difikilte.

4. Kisann-la ki bizin deside si enn kikenn bizin fer plis letid ouswa non? (Get not osi.)

⁴ Labib dir ki sakenn bizin pran “so prop responsabilite.” (Gal. 6:5, not.) Savedir ki sak Kretien ki adilt bizin pran so prop desizion ek swazir si li pou fer plis letid ouswa non.b Bann paran ena responsabilite pou pran desizion konsernan ledikasion zot zanfan. (Efe. 6:1) Ek kan zot zanfan vinn gran, zot kapav ed li pou deside si li pou fer plis letid ouswa non.—Prov. 22:6.

5. Kan eski enn zenn pou koumans reflesi si li pou fer plis letid, ek kifer? (Get zimaz osi.)

⁵ An zeneral, enn zenn pou fini koumans reflesi si li pou fer plis letid avan mem ki li fini lekol. Ek li pou fini koz sa ar so bann paran pou ki ansam zot kapav fer bann resers ek gete ki bann opsion zot ena. Koumsa, zot kapav ed li pou swazir bann size pou li prepar li pou bann letid ouswa travay ki li pou fer apre. Me eski zot bizin pran sa desizion-la avan ki li fini so lekol? Pa forseman. (Prov. 21:5) Parski apre lekol, sertin zenn kapav koumans fer enn travay ek fer pionie pandan ki zot pe reflesi si zot pou fer plis letid ouswa non. Ek zot kapav mem pran sa desizion-la boukou lane apre.

6. Si enn kikenn pe pans pou fer plis letid, ki kitsoz kapav ed li pou pran enn bon desizion?

⁶ Si to pe pans pou fer plis letid, ki kitsoz kapav ed twa pou pran enn bon desizion? Pou koumanse, to bizin priye Zeova ek demann Li pou ed twa pou pran enn bon desizion. (Zak 1:5) Ek apre sa, to bizin reflesi lor sa de kitsoz-la. Premierman, demann tomem kifer to anvi fer plis letid. (Ps. 26:2) Ek deziemman, reflesi lor seki sa pou inplike pou twa. (Prov. 14:15) Anou koz inpe lor sa de kitsoz-la.

KIFER TO ANVI FER PLIS LETID?

7. Si to pe pans pou fer plis letid, lor ki kitsoz to bizin reflesi?

⁷ Si to pe pans pou fer plis letid, li bon ki to poz tomem sa kestion-la, ‘Kifer mo anvi fer plis letid?’ Boukou dimounn fer plis letid pou ki zot kapav gagn enn travay ki zot kontan ouswa ki pey bien. Eski se enn move kitsoz? Pa forseman. (1 Tim. 5:8) Selman, Labib met nou angard kont bann danze kouma fer larzan vinn kitsoz pli inportan dan nou lavi, ouswa met nou konfians dan kas. (Prov. 23:4, 5; 1 Tim. 6:8-10; 1 Zan 2:17) Si to lintansion se pou vinn ris ouswa pou inpresionn lezot, to pa pou ere ek sa kapav mem gat to lamitie ar Zeova.

8-9. (a) Kouma eski bann Kretien bizin konsider ledikasion? (Matie 6:33) (b) Ki to’nn aprann ar lexanp Josefina, Morine, ek Iris?

⁸ Kouma eski nou bizin konsider ledikasion? Pena nanye ki bizin pli inportan pou nou ki nou servis pou Zeova. (Mat. 22:37, 38; Fil. 3:8) Alor, nou bizin konsider ledikasion kouma enn mwayin ki permet nou gagn seki nou bizin pou ki nou kapav servi Zeova ar tou nou leker.—Lir Matie 6:33.

⁹ Anou gete kouma sertin zenn finn ena mem fason panse ki Zeova lor ledikasion. Josefina, ki res Chili, dir: “Mo’nn pran enn kour ki ti pou permet mwa fer plis pou Zeova. Mo kour pa ti pli inportan pou mwa; se mo lamitie ar Zeova ki pli inportan pou mwa.” Enn ser ki apel Morine ti swiv enn kour enn an pou vinn kwafez. Kifer? Li dir: “Mo ti fixe lobzektif pou servi dan enn teritwar kot ti bizin plis proklamater. Alor, mo ti swiv enn kour ki ti pou permet mwa realiz sa lobzektif-la. Apre mo kour, mo ti travay kouma kwafez pou ki mo kapav ramas mo kas. Ek kan mo ti demenaze pou al servi kot ti bizin plis proklamater, mo kour ti ed mwa pou gagn enn travay.” Iris, ki ti swiv bann pli long letid pou ki li kapav vinn enn dantis, dir: “Li vre ki ena bann lavantaz pou fer plis letid. Selman, zame sa pa pou rann nou vremem ere. Seki pli inportan, se ena enn bon lamitie ar Zeova. Se zis Li tousel ki kapav rann nou vremem ere ek donn nou tou seki nou bizin.” Wi, kan se nou lamitie avek Zeova ki kitsoz pli inportan pou nou, nou pou pran bann desizion ki pou rann nou vremem ere.

KI SA POU INPLIKE POU TWA?

10. Kouma prinsip ki trouv dan Deteronom 32:29 kapav ed twa pou deside si to pou fer plis letid?

¹⁰ Kitfwa ena enn travay ki to ti pou kontan fer. Selman, li bon osi ki to reflesi lor bann lezot opsion ki to ena, kouma par exanp fer bann lezot travay ki bien diferan ar travay ki to ti pou kontan fer. (Konpar ar Proverb 18:17.) Azordi, ena osi bann opsion dan domenn ledikasion ki pa ti ena dan lepase, kouma par exanp swiv bann kour online. Pa bliye osi pou gete si to kapav gagn enn travay ki permet twa gagn seki to bizin pou viv, san ki to bizin fer plis letid. Par exanp, Johanna, ki res Finland, pa’nn bizin fer plis letid. Li dir: “Apre lekol, mo’nn fer bann travay part-time pou mo fer pionie. Mo’nn fer plizir travay, ek mo’nn touletan trouve kouma Zeova inn tini so promes ek inn donn mwa seki mo bizin.” Kan to pran bann desizion konsernan to ledikasion, kouma par exanp si to pou fer plis letid ouswa dan ki domenn to pou fer plis letid, pa bliye ki sa pou ena bann lavantaz ek bann dezavantaz osi. Alor, to bizin reflesi ek demann tomem: ‘Eski ena pli boukou lavantaz ki dezavantaz? Eski sa vo lapenn?’ (Lir Deteronom 32:29; 1 Kor. 10:23) Anou get bann lezot kestion ki kapav ed twa pou pran enn desizion.

11. Kifer li inportan ki nou reflesi lor kantite letan ki nou bann kour ouswa nou formasion pou pran sak semenn? (Get zimaz osi.)

¹¹ Ki kantite letan sa pou pran twa sak semenn? Reflesi komie lertan to pou pase sak semenn pou swiv bann kour, pou gagn formasion, ek pou fer to bann devwar. Eski to pou ankor ena letan pou to bann laktivite spiritiel ek to bann responsabilite familial? (Fil. 1:10) Eski to pou ankor ena lafors ek lenerzi pou prepar to bann renion, pou lir ek pou etidie Labib? Ouswa eski to pou tro fatige? Se seki ti ariv Jeroz, enn frer ki res Lenn. Li dir: “Mo ti gagn difikilte pou prese sak semenn ek pou swiv dan renion. Bien souvan, mo ti rat mo bann renion. Azordi, mo panse ki mo pa ti bizin swiv sa kour-la parski sa ti pran tro boukou mo letan ek mo lenerzi.” Parkont, ena bann kour ki pa pran tro boukou letan, kouma par exanp bann kour ki part-time ouswa bann kour kot pena boukou devwar pou fer. Rabeca, enn ser ki res Mozanbik, bien kontan ki li’nn swiv sa kalite kour-la. Li dir: “Mo kour ti zis de-z-er tan par zour. Alor, sa ti permet mwa pou kontign fer pionie.”

12. Pou to kapav servi to “letan dan meyer fason posib,” ki kestion to kapav poz tomem? (Ekleziast 12:1)

¹² Komie letan sa pou pran pou to terminn kour-la ouswa formasion-la? Reflesi komie mwa ouswa komie lane sa pou pran pou to terminn kour-la. Eski sa kour-la pou permet twa servi to “letan dan meyer fason posib”? (Efe. 5:15-17) Si to enn zenn, eski bann kour ki to pe anvi pran pou permet twa pou fer to best pou Zeova, kitfwa dan servis aplintan, pandan ki to ankor zenn? (Lir Ekleziast 12:1.) Dan domenn ki to pe rode, eski ena bann kour ki pou pran mwins to letan? Par exanp, kitfwa ena bann lekol ouswa bann staz dan bann konpagni, ki kapav fer twa gagn konpetans ki to pe rode pli vit, ek li kapav osi kout mwin ser ki al liniversite. Mario, enn frer ki res Chili, dir: “Mo ti swiv enn kour teknik lor de-z-an, ek li ti kout mwin ser ki al liniversite. Mo ti swiv bann kour zis kat fwa par semenn, ek sa ti permet mwa fer pionie.”

13. Si enn kikenn demenaze pou al fer plis letid, ki lefe sa kapav ena lor li?

¹³ Eski to pou bizin demenaze? Kitfwa to kapav rod enn kour ki pa tro lwin depi kot twa. Me ki to pou fer si to bizin demenaze pou al res dan enn lot lavil ouswa dan enn lot pei? Ouswa, ki to pou fer si to bizin al res dan liniversite pou ki to kapav swiv sa kour-la? Pa bliye ki si to kit to fami pou to al res ar bann fami ouswa bann kamarad ki pena mem krwayans ki twa, sa kapav ena enn move lefe lor to lamitie ar Zeova. (Prov. 22:3; 1 Kor. 15:33) Matias, enn frer ki res Mozanbik, ti swiv enn kour enn an ki pa ti kout tro ser. Selman, li regrete ki li’nn fer sa. Kifer? Li dir: “Pandan enn an, mo’nn res lwin ar mo fami ek mo al viv dan liniversite. Toulezour, mo ti gagn tantasion pou fer bann move kitsoz. Akoz sa, mo konsey tou dimounn pou pa swiv bann kour ki pou fer zot al lwin ar zot fami.” Enn ser ki res Larisi, dir: “Mo ti reisi evit bann danze ek bann tantasion parski mo ti kontign res kot mo fami, olie ki mo ti al res dan liniversite ar lezot etidian.” Pa bliye osi ki to kapav swiv bann kour online.

14. Si to pe pans pou fer plis letid, kouma prinsip ki trouv dan Lik 14:28 kapav ed twa?

¹⁴ Komie sa pou koute? Sertin kour pa kout ser, ek ena mem bann kour ki gouvernman peye. Dan bann sitiasion koumsa, si to fer plis letid, sa kapav ed twa pou gagn bann konpetans ki bizin pou ki to gagn enn travay san ki to bizin depans boukou kas. Me bien souvan, fer plis letid kout bien ser, ek kitfwa to pou ena bann lezot depans osi. Par exanp, pou ki to kapav gagn enn plas pou swiv bann kour dan domenn ki to pe rode, kitfwa to pou bizin pran bann leson an prive avan. Sertin kour telman ser ki sertin zelev bizin pran bann loan, ek zot pey sa pandan boukou lane apre. Adilson, ki res Mozanbik, regret bann desizion ki li’nn pran konsernan so ledikasion. Li dir: “Se mo bann gran-paran ki’nn elve mwa ek zot inn fer boukou sakrifis pou zot kapav pey kour kat-r-an ki mo ti pran. Ena zour, manze zot pa ti ena pou manze.” Si to pe pans pou swiv enn kour, demann tomem: ‘Komie sa pou koute? Eski mwa ouswa mo fami pou kapav pey sa? Eski ena enn kour ki pli bomarse ki sa?’ (Lir Lik 14:28.) ‘Si mo pran enn loan, dan komie letan mo pou kapav ranbours li? Travay ki mo pou fer apre, eski li pou pey mwa ase pou ki mo kapav gagn seki mo bizin ek pey sa loan-la?’—Prov. 22:7.

15. Avan ki to al swiv enn kour, kifer li bon ki to reflesi lor bann travay ki to kapav gagne?

¹⁵ Eski to pou gagn enn travay? Reflesi lor bann travay ki ena dan to landrwa ouswa dan landrwa kot to pou al reste. Eski sa kour ki to pe anvi swiv la pou ed twa pou gagn enn travay? Sertin kour pa vremem ansegn bann dimounn bann konpetans pou ki zot kapav gagn enn travay. Par exanp, ena bann kour ki ansegn zis bann teori ek bann filozofi. (Kol. 2:8) Enn ser ki res Lenn, dir: “Avek mo kour, mo pa ti gagn bann konpetans ki bizin pou mo fer travay ki mo ti anvi fer. Akoz sa, mo pa ti reisi gagn enn travay dan domenn ki mo ti etidie.” Ena bann kour osi ki montre kouma pou fer enn travay, me kitfwa ena deza ase dimounn ki pe fer sa travay-la. Sublime, ki res Sant-Afrik, ti swiv enn kour pou repar bann klimatizer. Li dir: “Kot mo reste, laplipar dimounn repar bann kitsoz zotmem, alor li pa fasil pou gagn enn travay.”

16. Kifer li bon ki to reflesi lor bann travay ki to pou kapav fer gras-a kour ki to pe pans pou pran?

¹⁶ Reflesi osi lor bann travay ki to pou kapav fer ar sa kour-la. Eski to pou kontan fer sa travay-la? (Ekle. 3:12, 13) Kotsa to pou fer sa travay-la ek ar kisann-la to pou travay? Eski sa travay-la li danzere? Eski pou ena boukou konpetision laba? Eski to pou ena boukou presion lor twa? Komie kas to pou gagne ar sa travay-la? Eski li pou ase pou ki to gagn seki to bizin? Eski to pou bizin kontign swiv bann formasion pou ki to kapav gard travay-la? Ek pli inportan, eski avek sa travay-la to pou kapav kontign met Zeova an premie dan to lavi? (Ekle. 12:13) Biensir, si dan to pei li difisil pou gagn enn travay, kitfwa to pa pou reisi gagn travay ki to anvi fer. Alor, bann desizion ki to pran konsernan to ledikasion pou ena enn lefe lor bann travay ki to pou kapav gagne dan lavenir. Tabitha, enn ser ki res Lenn, ti swiv enn kour sis mwa pou aprann koud. Li dir: “Mo ti desid pou koud linz parski sa ti pou ed mwa pou fer pionie. Mo kone ki mo ti pou touletan gagn travay. Mo ti pou kapav swazir ler ki mo travay, ek sa travay-la pa demann enn bel linvestisman.” Gras-a so kour, Tabitha ti reisi gagn enn travay ki ti permet li kontign fer pionie.

17. (a) Si to pe pans pou fer plis letid, kotsa to kapav gagn bann ransegnman ki bizin pou to kapav pran enn bon desizion? (b) Ki prinsip Labib kapav ed twa pou to pran to desizion? (Get lankadre “Reflesi lor Sa Bann Prinsip-La.”)

¹⁷ Dan sa lartik-la, to’nn trouv plizir kestion ki to kapav poz tomem si to pe pans pou fer plis letid. Kotsa to kapav gagn bann ransegnman ki bizin pou ki to kapav pran enn bon desizion? Si to pe pans pou swiv enn kour, to kapav al kot pe donn kour-la pou to gagn plis ransegnman, ouswa to kapav al lor so sit Internet. To kapav osi fer bann resers pou kone ki kantite travay ena dan sa domenn-la. To kapav osi pran ransegnman ar bann dimounn ki’nn swiv sa kour-la ouswa ki pe travay dan sa domenn-la. (Prov. 13:10) Demann zot ki bann lavantaz ek bann dezavantaz ena si to swiv sa kour-la ouswa si to fer sa travay-la. Koz ar bann frer ek ser ki zwaye dan zot servis pou Zeova, ek demann zot ki kour ouswa ki travay zot konsey twa pou fer. (Prov. 15:22) Kitfwa zot kapav konsey twa pou al dan enn domenn ki to pa’nn mem panse.

18. Ki kitsoz fode pa nou bliye?

¹⁸ Kouma nou’nn trouve dan sa lartik-la, ena bann lavantaz ek bann dezavantaz si to swazir pou fer plis letid. Alor, priye Zeova ek reflesi bien lor bann swa ki to ena. Li vre ki si to fer plis letid, sa kapav fer twa gagn enn travay ki pou permet twa gagn seki to bizin. Selman, pa bliye ki se enn bon lamitie avek Zeova ki pou vremem rann twa ere. (Ps. 16:9, 11) Zeova pou touletan pran swin so bann serviter, ninport ki nivo ledikasion zot ena. (Ebre 13:5) Aster-la, fer koumadir to’nn desid pou fer plis letid. Pandan sa moman-la, ki kitsoz pou ed twa pou res pros ar Zeova? Se seki nou pou examine dan prosin lartik.