Pa Les Nanye Anpes Twa Fer Seki Pli Inportan

1-2. Servi enn lexanp pou explike kouma enn kitsoz inportan kapav detourn nou latansion.

ESKI to rapel dernie fwa ki enn kitsoz inn detourn to latansion? Kitfwa to ti pe deza fer enn kitsoz ek lerla to’nn bizin deside ki kitsoz ti pli inportan. Par exanp, fer koumadir to pe roul to loto ek to gagn enn call telefonn. Mem si sa call-la bien inportan, to kone ki dan sa ler-la seki pli inportan se ki to res konsantre lor larout.

² Azordi, nou lavi bien ranpli ek nou ena boukou kitsoz inportan pou nou fer. Me seki pli inportan, se nou servis pou Zeova.a (Mat. 6:33) Se pou sa rezon-la ki nou bizin fer bien atansion ar bann kitsoz ki kapav pran nou letan ek detourn nou latansion ar seki pli inportan, setadir nou servis pou Zeova.—Prov. 4:25; Mat. 6:22.

3. Ki nou pou examine dan sa lartik-la?

³ Nou pa anvi les nanye vinn pli inportan ki nou servis pou Zeova. Selman, ena boukou kitsoz ki kapav anpes nou res konsantre lor nou servis. (Lik 21:34-36) Alor, pou ki nou kapav kontign met Zeova an premie dan nou lavi, dan sa lartik-la nou pou gete (1) ki kitsoz kapav detourn nou latansion ar nou servis pou Zeova, (2) kouma Zezi pa ti les nanye anpes li fer seki pli inportan, ek (3) kouma nou kapav swiv so lexanp.

KI KITSOZ KAPAV DETOURN NOU LATANSION AR NOU SERVIS POU ZEOVA?

4-6. Sit sertin kitsoz ki kapav detourn nou latansion ar nou servis pou Zeova.

⁴ Dan nou lavi, ena boukou kitsoz inportan ki nou bizin okipe ek ki pran nou letan. Par exanp, kitfwa nou ena bann problem lasante, bann problem dan lafami, ouswa bann problem personel pou okipe. Biensir, sa bann kitsoz-la zot inportan ek nou bizin pran letan pou okip zot. Selman, si nou res tro konsantre lor sa bann kitsoz-la ek si zot pran tro boukou nou letan ek nou lenerzi, sa kapav detourn nou latansion ar nou servis pou Zeova.

⁵ Anplis, boukou frer ek ser res dan bann pei kot ena laviolans ouswa bann pandemi, ek sertin kitfwa pena ase kas pou viv. (2 Tim. 3:1) Ek akoz sa, kitfwa zot telman trakase ki zot pa kapav aret pans zot bann problem.

⁶ Kitfwa nou konn bann dimounn ki’nn pas dan bann sitiasion difisil ek zot ankor pe soufer parski zot lavi inn sanze net. Zeova pa’nn kree nou pou ki nou touletan strese ouswa nou soufer. Alor, li normal ki kan sertin pas dan bann sitiasion difisil, zot panse ki zot lavi nepli ena enn sans. Ek akoz sa, ena ki pas boukou letan pou diverti ek pou amize, pou zot bliye zot bann problem. Si nou dan sa sitiasion-la, ki nou kapav fer? Anou gete kouma lexanp Zezi kapav ed nou pou nou res konsantre lor nou servis pou Zeova.

ZEZI PA TI LES NANYE ANPES LI FER SEKI PLI INPORTAN

7. Ki bann kitsoz ti kapav anpes Zezi pou fer seki pli inportan?

⁷ Zezi ti kapav les boukou kitsoz anpes li fer seki pli inportan, kouma par exanp, bann problem sosial ek bann zafer politik. Dan so lepok, boukou dimounn ti mizer ek malad. (Mat. 14:14; Mark 14:7) Bann Romin ek bann lezot Zwif ti rann lavi bann dimounn amer. Ek kan bann dimounn ti trouve ki Zezi ti ena pouvwar ek kapasite pou fer bann mirak, zot ti anvi fer li vinn zot lerwa. (Zan 6:14, 15) Anplis, Satan ti tant Zezi ek ti ofer li “tou bann gouvernman dan lemond ek zot laglwar.” Zezi ti kapav panse ki sa ti pou enn bon kitsoz si li ti diriz lemond. (Mat. 4:8, 9) Ek Pier, enn parmi bann bon kamarad Zezi, ti ankouraz li pou ena enn lavi pli konfortab. Li ti dir Zezi: “To bizin bon ar tomem, Segner.”—Mat. 16:21, 22.

8. Ki kitsoz ti ed Zezi pou res konsantre lor so servis pou Zeova?

⁸ Ki kitsoz ti ed Zezi pou res konsantre lor so servis pou Zeova? Premierman, li ti fer zefor pou ena mem fason panse ki Zeova. (Zan 8:28; 14:9) Deziemman, li ti res bien okipe dan so servis pou Zeova, setadir pou prese ek pou ansegn bann dimounn. (Mat. 9:35) Ek trwaziemman, li ti konpran bien ki kitsoz ki ti vremem inportan. (Zan 4:34) Li pa ti les Satan tant li. Ek mem si li ti kone ki Pier ti pe esey ed li, li ti konpran ki sa pa ti seki Zeova ti anvi. (Mat. 4:10; 16:23) Zezi pa ti les seki bann dimounn panse, dir, ek fer, anpes li fer seki pli inportan. Kitfwa bann kitsoz ki anpes nou pou met Zeova an premie dan nou lavi bien diferan ar bann kitsoz ki Zezi ti bizin fer fas. Selman, si nou fer sa trwa kitsoz ki Zezi ti fer la, sa pou ed nou pou kontign res konsantre lor nou servis pou Zeova.

KOUMA NOU KAPAV SWIV LEXANP ZEZI?

9. Kouma nou kapav “kontign konpran ki volonte Zeova ete”? (Efezien 5:17)

⁹ Fer zefor pou ena mem fason panse ki Zeova. Kan to fer sa, sa pou ed twa pou “kontign konpran ki volonte Zeova ete.” (Lir Efezien 5:17.) To kapav aprann seki fer Zeova plezir kan to lir Labib ek to reflesi lor bann kitsoz ki to pe aprann. Mem si Labib pa koz lor enn sitiasion presi ki to pe viv, to kapav kone seki Zeova anvi to fer. Kouma? Se kan to etidie Labib pou konpran pli bien seki Zeova panse lor sa sitiasion-la, ek ki to fer zefor pou met an pratik seki to pe aprann.

10. Kouma nou kapav aprann pou ena mem fason panse ki Zeova?

¹⁰ Nou kapav aprann pou ena mem fason panse ki Zeova kan nou etidie Labib ek nou reflesi lor fason ki Li ti azir avek bann dimounn. (Zer. 45:5) Kan nou lir sa bann zistwar-la dan Labib, nou kapav demann nou-mem: ‘Ki sa ansegn mwa lor Zeova? Kouma mo kapav sanz mo fason panse ek pans parey kouma Zeova?’ Biensir, nou kone ki fason panse Zeova, li “pli ot” ki nou fason panse. (Iza. 55:9) Alor, nou bizin priye Zeova pou ki Li ed nou pou fer so volonte. (Ps. 143:10) Nou bizin osi priye Li pou ki Li ed pou nou pans parey kouma Li.—1 Zan 5:14.

11. Ki kitsoz Zeova anvi?

¹¹ Zeova anvi ki nou res konsantre lor bann kitsoz ki pli inportan, koumsa nou pou pare kan lafin vini. (Mat. 24:44) Li pa anvi ki nou trakase plis ki bizin ek ki sa dekouraz nou. (Mat. 6:31, 32) Alor, Li donn nou bann bon konsey pou ki nou kapav kone seki nou bizin fer kan nou trakase konsernan nou lasante, nou travay, nou lakaz, ouswa nou fami. Si nou priye Li pou nou gagn sazes ek lafors pou fer fas ar nou bann problem, nou sir ki Li pou reponn nou lapriyer.—Ps. 55:22; Prov. 3:5-7.

12. Ki kitsoz kapav ed nou kan nou trakase akoz bann move kitsoz ki pe pase dan lemond? (Matie 5:3)

¹² Res bien okipe dan nou servis pou Zeova. Nou tou nou trakase akoz bann move kitsoz ki pe pase dan lemond. Selman, nou pa kapav anpes sa bann kitsoz-la arive. Alor, nou bizin res bien okipe dan nou servis pou Zeova parski sa pou ed nou pou nou pa trakase plis ki bizin konsernan sa bann kitsoz-la. Si nou kontign fer tou seki nou kapav pou nou ena enn bon lamitie ar Zeova, sa pou rann nou ere parski se pou sa rezon-la ki Li’nn kree nou. (Lir Matie 5:3.) Ek pou nou ena enn bon lamitie ar Zeova, nou bizin etidie Labib ek fer tou seki nou kapav pou servi Li. Anplis, kan nou fer sa, sa pou fer Li plezir parski nou pe servi nou letan avek sazes.—Prov. 23:15.

13. Kouma nou kapav “servi [nou] letan dan meyer fason posib”?

¹³ Nou bien deside pou “servi [nou] letan dan meyer fason posib.” (Efe. 5:15, 16) Dan sa bann verse-la, Labib pa pe zis koz lor fason ki nou servi nou letan toulezour. Li pe ankouraz nou pou fer bien atansion ar fason ki nou servi nou letan avan ki lafin vini. Alor, kouma nou kapav servi nou letan dan meyer fason posib? Si nou pas tro boukou letan pou lir, pou get, ouswa pou ekout bann linformasion lor bann move kitsoz ki pe pase otour nou, sa kapav dekouraz nou ek fer nou vinn mwin aktif dan nou servis pou Zeova. Akoz sa, li pli bon ki nou pa lir, get, ouswa ekout bann linformasion tro boukou. Koumsa, nou pou ena plis letan ek lenerzi pou fer bann kitsoz dan nou servis pou Zeova. Nou bizin osi reflesi lor kouma nou kapav fer plis dan predikasion, kouma par exanp, fer pli boukou vizit. Anplis, nou bizin sezi tou lokazion ki nou gagne pou nou ed bann dimounn pou ki zot kapav “gagn lavi sov ek gagn enn konesans exakt lor laverite.”—1 Tim. 2:4.

14. Kouma sa ed nou kan nou res bien okipe dan nou servis pou Zeova? (Get zimaz osi.)

¹⁴ Kan nou res bien okipe dan nou servis pou Zeova, sa ed nou pou nou pa bliye kifer bann move kitsoz arive. Lerla, nou pa pou trakase plis ki bizin kan nou trouv laviolans, lamizer, ouswa bann pandemi, parski nou kone ki Labib ti fini predir tou sa bann kitsoz-la. Olie ki nou per, nou bizin ena konfians ki Zeova pou tir tou bann move kitsoz ek ki Li pou fer later vinn enn paradi. Me an-atandan, nou bizin res kalm parski nou kone ki Zeova pou ed nou pou andire.—Ps. 16:8; 112:1, 6-8.

15. Ki kitsoz “bon zizman” ed nou pou fer? (1 Pier 4:7)

¹⁵ Konpran bien ki kitsoz ki vremem inportan. Azordi, boukou dimounn kontan amize ek zot pa rann zot kont ki lafin pou vini biento. Li pa move ki nou amize. Selman, pou ki nou pa les nou inflianse par fason panse sa lemond-la, nou bizin ena “bon zizman.” (Lir 1 Pier 4:7.) Kouma bon zizman kapav ed nou? Bon zizman kapav ed nou pou pran bann bon desizion, ek pou montre nou rezonab konsernan letan ki nou pase dan bann divertisman. Kan nou servi nou letan avek sazes, sa montre ki nou konpran ki kitsoz ki vremem inportan ek ki nou konpran osi fason panse Zeova.—2 Tim. 1:7.

16. Ki leson nou aprann ar seki Zezi ti fer lanwit avan so lamor?

¹⁶ Zezi ti touletan rapel ki kitsoz ti pli inportan. Lanwit avan so lamor, li ti res konsantre lor seki pli inportan, setadir res fidel ar Zeova ek fer So volonte. Akoz sa, li ti priye Zeova ar tou so leker. Parkont, bann disip Zezi ti dormi, parski “zot ti fatige telman zot ti sagrin.”—Lik 22:39-46; Zan 19:30.

17. Kifer boukou dimounn servi bann rezo sosio, ek kouma kapav sa detourn nou latansion ar seki pli inportan? (Get zimaz osi.)

¹⁷ Parey kouma bann disip Zezi, parfwa nou osi nou trakase ek fatige akoz bann kitsoz ki pe arive dan lepok lafin. Alor, boukou dimounn pas boukou letan lor bann rezo sosio pou zot bliye zot bann problem. Par exanp, zot servi bann rezo sosio pou avoy zot bann kamarad ek zot fami bann foto ek pou rakont bann-la seki pe arive dan zot lavi. Zot osi servi bann rezo sosio pou get bann video, bann fim, ek pou zwe bann video game. Selman, ena telman boukou nouvo kitsoz pou lir ek pou gete lor bann rezo sosio, ki sa pran boukou zot letan ek zot lenerzi toulezour. Pou nou pa tom dan sa piez-la, nou kapav demann nou-mem, ‘Seki mo gete ek seki mo fer lor bann rezo sosio, eski sa ed mwa pou santi mwa bien, ouswa eski sa detourn mo latansion ar seki pli inportan?’

18. Kifer li inportan ki nou ena bon zizman kan nou swazir bann divertisman?

¹⁸ Bann rezo sosio ek bann lezot divertisman, zot interesan ek zot kapav ed nou pou rilax. Selman, kan nou get bann fim, bann ti video, ek bann seri lor Internet, ouswa kan nou zwe bann video game, nou bizin ena bon zizman. Par exanp, lor bann rezo sosio, kan nou fini get enn video, enn lot video aparet lor nou lekran. Lerla, li kapav arive ki nou koumans get bann video enn deryer lot, ek kitfwa dan sertin sa bann video-la, ena bann kitsoz ki violan ek imoral. Se seki ti ariv enn frer dan Lazi. O-koumansman, li ti koumans get bann bout-bout fim lor Internet. Me amezir ki li ti pe get sa bann video-la, li ti koumans get bann kitsoz ki imoral. Ek avek letan, li ti koumans get pornografi. Selman, gras-a led bann ansien ek led so bann bon kamarad, li’nn aret fer sa. Par exanp, li ti tir sertin aplikasion lor so portab ek li ti diminie kantite letan ki li ti pase lor so telefonn. Sa lexanp-la montre nou kifer li inportan ki nou ena bon zizman kan nou swazir bann divertisman.

19. Ki kapav arive si nou pas tro boukou letan pou rilax ouswa pou amize?

¹⁹ Nou bizin osi ena bon zizman konsernan bann vakans ek bann kitsoz ki nou fer pou rilax. Akoz nou lavi bien ranpli ek nou bien okipe, nou tou nou bizin enn moman pou rilax ek pou repoze. Sa li bon pou nou parski sa ed nou pou res an bonn sante. Selman, si nou pas tro boukou letan pou rilax, sa kapav detourn nou latansion ar bann kitsoz ki pli inportan. (Fil. 1:10) Akoz sa, nou bizin deside kouma nou pou rilax ek osi ki kantite letan nou pou pase pou fer sa. Kan to ena pou pran bann desizion koumsa, demann tomem: ‘Eski kantite letan ki mo pase pou pran vakans ek pou rilax montre ki mo ena bon zizman? Eski mo pe met an premie seki pli inportan, setadir mo servis pou Zeova? Eski mo’nn pare pou “lafin tou kitsoz”?’

20. Ki bienfe nou gagne kan nou pa les nanye anpes nou fer seki pli inportan?

²⁰ Nou gagn bann bienfe kan nou pa les nanye anpes nou fer seki pli inportan, setadir nou servis pou Zeova. (Iza. 48:17) Avek led Zeova, nou pou reisi andir bann difikilte ki nou gagne. Nou pa pou trakase plis ki bizin akoz bann kitsoz ki pe arive otour nou. Ek nou pa pou pas tro boukou letan dan bann divertisman. Alor, anou fer tou seki nou kapav pou ena mem fason panse ki Zeova, pou res bien okipe dan nou servis pou Li, ek pou konpran bien ki kitsoz ki vremem inportan. Kan nou fer tousala, depi aster-la mem nou pou reisi met Zeova an premie dan nou lavi, ek nou pou osi “trap for vre lavi.”—1 Tim. 6:19.