Fer Bondie Tou-Pwisan Zeova Konfians

1. Ki leprev Zob ti gagne?

ZOB, enn zom ki ti ena enn gran lafwa, enn sel kout ti gagn bann leprev enn deryer lot. Tou so bann zanfan ti mor. So bann zanimo swa ti mor, swa bann dimounn ti kokin zot. Laplipar so bann serviter ti mor. Zob ti osi gagn enn maladi bien grav. Ek parski li ti gagn tou sa bann maler-la, bann dimounn ti nepli respekte li. Anplis, trwa zom ki ti swadizan so bann kamarad, ti vinn get li, me zot ti dir bann move kitsoz lor li. Seki zot ti dir ti bien dekouraz li. So madam osi ti telman afekte par tousala, ki li ti dir Zob: “Modi [Bondie] ek mor.” (Zob 2:9; 15:4, 5; 19:1-3) Tou sa bann leprev-la ti kapav fer Zob perdi konfians dan Bondie ek fer li panse ki Zeova pa protez bann ki kontan Li ek ki servi Li!

2-3. Kan nou gagn bann difikilte, ki lefe sa kapav ena lor nou, ek ki nou pou aprann dan liv Zob?

² Nou pe viv enn “lepok kritik, difisil pou siporte.” (2 Tim. 3:1) Alor, parey kouma Zob, kan nou gagn bann difikilte, sa kapav fer nou perdi konfians dan Bondie. Kan nou gagn bann difikilte enn deryer lot, sa kapav telman afekte nou ki nou kapav trouv sa difisil pou andire. Ek lerla, sertin kapav demann zotmem si Zeova vremem kontan zot.

³ Si to ena sa santiman-la, fode pa to dekouraze. Zob ti konpran ki Zeova zame abandonn bann ki fidel anver Li. Nou osi, parey kouma Zob, nou kapav aprann pou ena foul konfians dan Zeova. Nou kapav sir ki nou Papa Zeova pou ed nou ek ki Li pou rekonpans nou. Aster-la, anou gete kouma liv Zob montre nou ki nou touletan kapav fer Zeova konfians parski Li nou Bondie Tou-Pwisan. Apre sa, nou pou gete kouma kan Zeova dir ki Li pou fer enn kitsoz, Li ena pouvwar pou fer li. Nou pou trouve osi kouma Zeova protez nou kan Li donn nou seki nou bizin pou ki nou kapav kontign res pros ar Li.

SATAN VINN DEVAN ZEOVA EK BANN ANZ KI FIDEL

4. Ki ti arive kan bann anz ti prezant zot devan Zeova?

⁴ Enn zour, ti ena enn renion dan lesiel ek “bann garson vre Bondie ti prezant zot devan Zeova.” Labib dir ki “Satan osi ti vinn parmi zot.” (Zob 1:6) Se premie fwa dan Labib ki nou trouv nom “Satan.” Apel li koumsa parski li opoz li ar Zeova. Zeova ti les Satan vinn dan sa renion-la mem si li ti nepli fidel ar Li. Satan, li lennmi Zeova ek li osi lennmi bann anz ek bann imin ki fidel ar Zeova. Nou kone ki Satan ti nepli form parti dan fami Zeova sa lepok-la. Kouma nou konn sa? Akoz seki Zeova ti dir Satan dan Zenez 3:15. Li ti dir li: “Mo pou met laenn ant twa ek fam-la.” “Fam-la” se bann anz ki fidel ek ki form parti dan fami Zeova. Ek se depi sa “fam-la” ki enn “desandans” ti pou sorti. Alor, li kler ki Satan pa form parti sa “fam-la.”

5. Ki leson nou kapav aprann ar seki ti arive dan lesiel?

⁵ Zeova anvi ki nou kone seki ti arive sa zour-la. Se pou sa rezon-la ki Li’nn fer ekrir sa zistwar-la dan Labib. Seki Satan ti dir sa zour-la montre ki li bien move ek ki li deteste bann serviter Zeova. (Zob 1:9; konpar ar Revelasion 12:10.) Sa zistwar-la aprann nou enn kitsoz lor Zeova ki vremem rekonfort nou: Mem si Zeova ena lotorite lor tou kitsoz ek ki so pouvwar pena okenn limit, Li touletan fer seki bon ek seki zis. Sa montre osi ki se Zeova, nou Bondie Tou-Pwisan, ki deside seki enn kikenn ena drwa ek pena drwa fer.

SE ZEOVA KI DESIDE SEKI ENN KIKENN ENA DRWA EK PENA DRWA FER

6. Kouma nou kone ki se Zeova ki ti deside seki ti pou arive dan sa renion-la? (Zob 1:7, 8)

⁶ Lir Zob 1:7, 8. Sa verse-la montre ki se Zeova Limem ki’nn deside seki ti pou arive dan sa renion-la. Kan Zeova ti demann Satan si li ti “remark [So] serviter Zob,” sa montre ki Li ti kone ki Satan ti anvi atak Zob. Aster-la, anou gete kouma Zeova ti servi so lotorite pou ed Zob.

7. Dapre Zob 1:10, 11, ki Satan ti panse lor bann serviter Zeova?

⁷ Lir Zob 1:10, 11. Zeova Li Bondie Tou-Pwisan. Li ena lotorite ek pouvwar pou fer tou seki Li anvi, ek Li kone seki bizin fer dan sak sitiasion. (Zer. 32:17; Dan. 4:35) Kanmem sa, Satan ti dir ki Zeova servi So pouvwar dan enn move fason. Li ti dir ki se parski Zeova soutir bann dimounn, kouma Zob, ki zot servi Li. Satan ti pretann osi ki bann dimounn zot egois ek ki zot servi Zeova par lintere. Kouma Zeova ti reponn Satan?

8-9. Ki kitsoz Satan ti ena drwa fer ek ki kitsoz li pa ti ena drwa fer, ek kifer? (Zob 1:12) (Get zimaz osi.)

⁸ Lir Zob 1:12. Zeova ti permet Satan teste Zob pou li montre ki Zob pa vremem kontan Zeova. Selman, Li ti donn Satan enn lord ki li ti bizin swiv. Li ti dir li: “Fode pa to met lame lor [Zob]!” Tou bann anz ti tann Zeova donn sa lord-la Satan, ek li ti bizin obeir sa lord-la. Mem si Zeova ti permet li teste Zob, li pa ti ena drwa fer plis ki seki Zeova ti permet li fer. Azordi osi, Satan pena drwa fer plis ki seki Zeova permet li fer. Wi, Zeova ti servi so pouvwar ek so lotorite pou protez Zob, ek sa montre ki Li enn Bondie ki zis ek ki ena lamour.

⁹ Satan so plan pa ti reisi parski Zob ti kontign res fidel ar Zeova. (Zob 1:22) Selman, Satan pa ti ankor fini ar Zob.

10. Kifer Zeova ti permet Satan teste Zob ankor? (Zob 2:2-6)

¹⁰ Lir Zob 2:2-6. Aster-la, Satan anvi montre enn lot kitsoz: Si Zob so lavi an danze, li pou modi Bondie zis pou li sap so lavi. Pou montre ki Satan ena tor, Zeova ti permet li atak Zob ek fer li gagn enn maladi bien grav. Me sann fwa-la osi, Zeova ti donn enn lord Satan. Li ti dir li: “Pa touy li!” Satan pa ti ena drwa touy Zob parski Zeova pa ti permet li fer sa. Ankor enn fwa, Zeova ti montre ki Li Bondie Tou-Pwisan ek ki Li ena lotorite lor tou kitsoz, parski mem Satan pena drwa fer plis ki seki Zeova permet li fer.

ZEOVA FER AN-SORT KI ZOB ARET SOUFER

11. Alafin, kouma Zeova ti rekonpans Zob? (Zob 42:10-13)

¹¹ Lir Zob 42:10-13. Kan Zob ti montre ki li ti pou touletan res fidel ar Zeova, Zeova pa ti les Satan kontign atak Zob. Li ti osi fer an-sort ki Zob aret soufer. Satan pa ti kapav fer nanye pou anpes Zeova beni ek protez so serviter, Zob.

12. Sit enn lexanp pou montre kouma Zeova sov so bann serviter ki fer Li konfians.

¹² Pandan bann dernie zour, Zeova inn servi so pwisans pou ed boukou parmi so bann serviter. Par exanp, an 1945, bann solda ti obliz 230 Temwin pou fer enn long lamars bien danzere depi enn kan konsantrasion dan Lalmagn. Zot ti bizin al ziska lamer kot bann solda-la ti pou touy zot. Selman, zot tou ti gagn lavi sov. Kan zot ti rakont zot zistwar, zot explike kouma Zeova inn sap zot parey kouma li ti sap sa trwa zenn Ebre-la dan enn four dife. Sa trwa zenn Ebre-la pa ti mem ena loder lafime lor zot. Dan mem fason, sa 230 Temwin-la ti reisi gagn lavi sov, ek zot lafwa ti vinn pli for apre sa. Zeova ti donn zot so pwisans. Zot ti santi zot parey kouma Daniel ki ti sorti vivan dan lakav bann lion. Depi sa zour-la, zot ti bien deside pou servi Zeova pou touletan. Zot ti dir ki pli gran rekonpans ki zot kapav gagne, se pou kontign servi Zeova pou touletan.—Konpar ar Daniel 3:27; 6:22.

13. Kan nou gagn bann difikilte, ki kitsoz nou kapav sir? (Get zimaz osi.)

¹³ Parfwa, akoz bann difikilte ki nou gagne, nou kapav ena linpresion ki’nn zet nou dan lakav bann lion. (1 Pier 5:8-10) Ek ena fwa, nou kapav telman dekouraze ki nou panse ki zame nou bann problem pa pou fini. Dan sa bann moman-la, zistwar Zob kapav ed nou. Kifer? Parski so lexanp rapel nou ki Zeova ena pouvwar pou fer bann dimounn aret soufer. Ek nou kapav sir ki Li pou fer li swa aster-la swa dan lemond nouvo. Zeova inn fini fixe enn dat kan Li pou detrir sa move lemond-la, ek nou kapav sir ki Li pou respekte sa dat-la!

ZEOVA KONTAN SO BANN SERVITER KI FIDEL

14-15. Ki kitsoz Zeova anvi fer pou so bann fidel serviter, ek kifer? (Zob 14:15) (Get zimaz osi.)

¹⁴ Lir Zob 14:15. Nou Papa Zeova, Li fidel ar bann ki fidel anver Li. Ek Li telman kontan zot ki si arive zot mor, Li pou redonn zot lavi. Dan lemond nouvo, kan Zeova pou resisit so bann serviter ki fidel, tou dimounn pou zwaye.—Iza. 65:17.

¹⁵ Mem si Zeova ti fer an-sort ki Zob aret soufer, Zob ti bizin kontign viv dan move lemond Satan. Selman, Labib montre nou ki Zeova ti rekonpans Zob dan enn fason extraordiner. Li ti geri Zob ek Li ti donn Li boukou plis ki seki Li ti ena avan. Sa bann benediksion ki Zob ti gagne la, ti zis enn avangou bann kitsoz ki Zeova pou fer pou li dan lavenir. Zeova anvi ki bann dimounn ki fidel anver Li, zot ere ek ki zot ena enn zoli lavi. Avredir, Zeova pou rekonpans tou bann ki fidel anver Li ek zot pou kapav viv pou touletan lor later ki pou vinn enn paradi. (Rev. 21:3, 4) Zeova vremem anvi fer sa pou so bann serviter, ek parski Li Bondie Tou-Pwisan, personn pa pou kapav anpes Li fer sa. Alor, kan nou mazine kouma Zeova pou rekonpans nou, sa kapav rekonfort nou si nou pe gagn bann difikilte!

16. Sit enn lot rezon kifer nou kapav fer konfians nou Bondie Tou-Pwisan.

¹⁶ Gras-a benediksion Zeova, Zob ti viv boukou lane ankor. Me kanmem sa, avek letan, li ti mor. Selman, Zeova ena pouvwar pou resisit li parski Li Bondie Tou-Pwisan. (Det. 32:39) Dan moman ki Li’nn fixe, Li pou resisit tou bann ki Li kontan, ek personn pa pou kapav anpes Li fer sa.—Rom. 8:38, 39.

FER ZEOVA FOUL KONFIANS

17. Kouma nou kone ki Satan pa kapav detrir bann serviter Zeova?

¹⁷ Gras-a liv Zob, nou’nn trouve ki nou ena boukou rezon pou fer Zeova foul konfians. Nou bien rekonesan anver Zeova parski Li pa’nn les Satan detrir So bann fidel serviter! Mem si plizir fwa Satan inn atak bann serviter Zeova pou ki zot aret servi Li, sa pa’nn marse. Bann sef relizie ek bann gouvernman bien pwisan plizir fwa inn esey anpes nou ador Zeova ek pres bon nouvel, me zot pa’nn reisi parski Zeova inn ed so bann serviter. (Iza. 54:17) Azordi, ena apepre nef milyon dimounn ki pe servi Zeova avek fidelite, ek sa montre ki Zeova Li Bondie Tou-Pwisan! Wi, nanye pa kapav anpes nou pou fer lezot kone ki Zeova Li vre Bondie ek ki Satan li enn manter. Ek mem si arive nou mor, nou sir ki Zeova pou resisit tou bann ki fidel anver Li.—Oze 13:14.

18. Kifer fode pa nou per seki pou arive dan lavenir?

¹⁸ Kan nou reflesi lor zistwar Zob, sa pou ogmant nou konfians ek nou lafwa dan Zeova. Nou pou sir ki Zeova pou avek nou ninport ki arive dan lavenir. Alor, nou pena nanye pou per. Pandan gran soufrans, Satan ek so larme pou panse ki bann serviter Zeova zot feb, ek zot pou atak nou. Selman, Zeova pou servi so lotorite ek so pwisans pou ed nou parey kouma Li ti fer pou Zob. Zeova zame pa pou permet Satan detrir So pep. Biento, Zeova pou tir tou soufrans ki’nn arive akoz Satan. Zezi pou zet Satan ek so bann demon dan “trou san fon” ek zot pou res ladan pandan 1,000 an. (Lik 8:31; Rev. 20:1-3) Apre sa 1000 an-la, Satan ek tou bann ki rebel kont Zeova pou detrir net, parey kouma Zeova ti dir.—Zen. 3:15; Rom. 16:20; Rev. 20:10.

19. Kouma Zeova pou rekonpans bann ki fer Li konfians? (Get zimaz osi.)

¹⁹ Nou inpasian pou viv dan lemond nouvo, kot nou pou parfe ek kot nou pou vremem ere! Nou lavi pou vremem zoli dan paradi. Dan Labib, Zeova fer sa promes-la: “Gete! Mo pe fer tou kitsoz nouvo.” (Rev. 21:5) Ki Li pe rod dir? Pou premie fwa depi zardin Eden, Satan ek so bann demon pou nepli kapav inflians bann dimounn ek fer zot ditor. Lerla, nou pou santi nou anpe ek sa pou vremem enn gran soulazman! Nou pou kapav dormi bien aswar parski nou latet pou nepli fatige akoz bann traka sa lemond-la. Bann ki pou travers Armagedon, pou trouv bann mirak. Bann ki malad, pou geri ek bann dimounn ki nou kontan, me ki’nn mor, pou resisite. Sa lepok-la, nou pou viv lavi ki nou Papa Zeova ti anvi nou viv, setadir enn zoli lavi kot nou vremem ere!

20. Ki to bien deside pou fer?

²⁰ Ziska ki lafin vini, nou kapav sir ki nou pou gagn bann leprev ek ki nou pou bizin kouraz pou ki nou reisi res fidel ar Zeova. Alor, anou kontign fer Zeova foul konfians ek anou kontign obeir nou Bondie Tou-Pwisan. Anou kontign montre ki nou vremem kontan nou Papa Zeova ek montre ki tou seki Satan inn dir lor Zeova ek so bann serviter, li fos. Wi, nou kapav sir ki si nou res fidel ar Zeova, nou Bondie Tou-Pwisan, nou pou ena enn zoli lavi parski Zeova vremem anvi rekonpans so bann fidel serviter, ek nou sir ki Li pou fer li!