Bon religion li encourage pou ena bann principe moral ki bien elevé

BON religion enseigne nou pou pense lor bann kitsoz ki bon ek li montré nou couma pou ameliore nou conduite. Li soutenir nou dan nou bann zeffort pou faire seki droite ek aide nou pou vinn bann pli bon dimoune ki nou kapav vini. Kifer nou kapav dire sa?

Guetté ki l’apotre Paul ti ecrire bann chretien premier siecle ki ti vive dan Corinthe, en Grèce. Sa ancien la ville-la ti ena enn mauvais reputation parski li ti enn la ville kot bann dimoune ti bien immoral. Paul ti donne sa l’avertissement-la: “Pa pou ena okenn l’heritage dan royaume [Bondié] pou bann ki ena enn mauvais conduite sexuel, ki pratik l’idolatrie, bann adultere, bann ki prend plaisir pou faire bann kitsoz immoral ou-soit bann homosexuel, bann voleur, bann ki toujours envie gagne plus, bann soulard, bann ki koz en mal lor lezot pou gate zot reputation ou-soit bann ki malhonnete.” Apré sa Paul ti ajouté: “Pourtant, ala couma certain parmi zot ti été. Mais finn purifié zot, mais finn faire zot vinn saint, mais finn declare zot juste au nom Seigneur Jésus-Christ ek par l’esprit nou Bondié.” (1 Corinthiens 6:9-11, Bible du Semeur) Ou realisé—sa bon religion-la ti aide certain ki avant pa ti ena bann principe moral, pou vinn bann serviteur Bondié ki pur ek ki ena enn conduite droite!

Parkont la Bible donne sa l’avertissement-la: “Pou arrive enn moment kot certain dimoune pou nepli envie ecoute l’enseignement ki juste. Mais plutot zot pou suive zot prop desir. Zot pou rod conseil ar enn grand quantité enseignant ki pou dire zot seki zot envie tendé.”—2 Timothée 4:3, Parole de Vie.

Ki bann religion ki ou koné, faire dan sa domaine-la? Eski zot suive bann principe la Bible concernant seki bon ek seki mauvais? Ou-soit eski zot diminué valeur bann conseil clair ki ena dan Parole Bondié kan zot dire bann dimoune zis “seki zot envie tendé”?

Pou aide ou koné si enn religion pé produire bon fruit, nou encourage ou pou prend le temps pou reponn sa bann question ki suive-la.

SUJET: Mariage.

SEKI LA BIBLE ENSEIGNÉ: “Tou dimoune bizin respecté mariage. Enn mari ek enn femme bizin reste fidele envers zot camarade. Bondié pou juge bann ki amenn enn la vie immoral ek bann ki commette l’adultere.”—Hébreux 13:4, Parole de Vie.

QUESTION: Eski sa religion-la demann bann couple pou marié devant la loi?

SUJET: Divorce.

SEKI LA BIBLE ENSEIGNÉ: Kan ti demann Jésus si ena enn raison valable ki permette enn dimoune divorcé, li ti dire: “Enn kikenn ki renvoye so madame ek marié avek enn lot, commette l’adultere—excepté si finn ena l’immoralité sexuel.”—Matthieu 19:9, Parole vivante.

QUESTION: Eski sa religion-la respecté conseil Jésus ek permette ki enn dimoune divorcé ek remarié—zis si finn ena l’immoralité?

SUJET: Moralité sexuel.

SEKI LA BIBLE ENSEIGNÉ: “Sauvé al loin ar l’immoralité sexuel. Tou lezot peché ki enn zom commette li en dehors so lekor, mais enn kikenn ki pratik l’immoralité sexuel faire peché kont so prop lekor.”—1 Corinthiens 6:18, Segond 21.

“Zot bann femme nepli dormi avek bann zom, mais zot dormi avek lezot femme, ek kan zot agir coumsa zot faire seki kont nature. Bann zom faire pareil. Zot nepli dormi avek bann femme, mais zot ena enn grand desir sakenn pou so camarade. Zot dormi ensam ek c’est enn la honte! A cause sa zot gagne punition ki zot merité pou zot mauvais action.”—Romains 1:26, 27, Parole de Vie.

QUESTION: Eski sa religion-la enseigné ki relation sexuel, ki li entre enn zom ek enn femme ki pa marié ou-soit entre deux dimoune ki mem sexe li enn peché?

SUJET: So bann membre defann bann principe la Bible avek courage.

SEKI LA BIBLE ENSEIGNÉ: “Zot bizin pa gagne contact avek bann ki appel zot-mem chretien mais ki immoral, ki toujours envie gagne plus, ki adore bann zidole, ki koz en mal lor lezot pou gate zot reputation, ki soulard ou-soit voleur. Fodé mem pa ki zot mange avek enn zom coumsa.” (1 Corinthiens 5:11, Bible en français courant) Ki pou arrive bann ki pretann ki zot chretien mais zot faire peché ek pa’lé repenti? Parole Bondié dire: “Tire sa zom ki mauvais-la parmi zot.”—1 Corinthiens 5:13, Bible à la Colombe.

QUESTION: Enn kikenn ki pa suive bann principe la Bible ek ki pa repenti, eski sa religion-la considere li toujours couma enn so bann membre?