Nouvelle du Royaume No. 37

Enn message mondial

La fin fausse religion pé kosté!

▪ Ki été fausse religion?

▪ Couma li pou fini?

▪ Couma eski sa pou affecté ou?

Ki été fausse religion?

Eski ou tracassé kan ou tann bann crime ki dimoune pé faire au nom la religion? Eski ou pa trouve sa injuste kan bann ki dire ki zot servi Bondié, zot-mem zot responsable la guerre, terrorisme, ek corruption? Kifer c’est religion-mem ki parette la cause beaucoup problem?

Fodé pa nou blame tou religion a cause sa. C’est zis fausse religion ki responsable. Jésus Christ, enn zom religieux ki dimoune bien respecté, ti montré ki fausse religion rapporte bann mauvais kitsoz pareil couma “enn pié pourri rapporte bann fruit ki pa vaut nanyin.” (Matthieu 7:15-17) Ki fruit fausse religion rapporté?

Fausse religion . . .

◼ MELE-LI DAN LA GUERRE EK POLITIK: Journal Asiaweek dire: “En Asie ek dan lezot place, bann dirigeant ki soif pouvoir pé servi bann sentiment religieux le peuple pou gagne seki zot envie.” A cause sa, sa journal-la ajouté: “Coumadir le monde pré pou vinn fou.” Enn grand chef religieux en Amérique ti dire: “Bizin touye bann terrorist avant ki zot, zot touye nou.” Ki solution li proposé? “Touye zot tou au nom Bondié.” Parkont, la Bible dire: “Si enn kikenn dire: ‘Mo content Bondié,’ ek pourtant li ena la haine pou so frere, li enn menteur.” (1 Jean 4:20) Jésus ti mem dire: “Contigne content zot bann l’ennemi.” (Matthieu 5:44) Comié religion ou koné ki zot bann membre participe dan la guerre?

◼ ENSEIGNE BANN FAUSSE DOCTRINE: La plupart religion enseigné ki ena enn nâme ou-soit enn l’esprit ki contigne vive apré ki lekor enn dimoune, li mort. Beaucoup parmi sa bann religion-la profite sa l’enseignement-la pou tire l’argent ar zot bann membre, kan faire zot payé pou prié pou nâme bann dimoune ki’nn mort. Mais la Bible enseigne enn lot croyance. “Nâme ki faire peché​—li-mem li pou mort.” (Ézékiel 18:4) “Bann ki vivant koné ki zot pou mort. Mais bann dimoune mort pa konn nanyin ditou.” (Ecclésiaste 9:5) Jésus ti dire ki bann dimoune mort pou ressuscité​—seki pa ti pou necessaire si bann dimoune ti ena enn nâme ki pa mort. (Jean 11:11-25) Eski ou religion enseigné ki ou ena enn nâme ki pa mort?

◼ TOLERE BANN RELATION SEXUEL IMMORAL: Dan beaucoup pays, bann religion nomme bann homosexuel ek bann lesbienne couma bann pretre ek zot demann gouvernement pou reconette bann mariage entre deux zom ou-soit deux femme. Mem bann religion ki condamne l’immoralité, finn tolere bann pretre ki abuse bann zenfant. Mais, ki la Bible enseigné lor sa sujet-la? Li dire bien clair: “Pa laisse-zot trompé. Ni bann ki pratik fornication, ni bann ki pratik l’idolatrie, ni bann prostitué zom, ni bann zom ki dormi avek bann zom . . . pa pou herite royaume Bondié.” (1 Cor. 6:9, 10) Eski ou konn bann religion ki tolere sa bann pratik immoral-la?

Ki pou arrive bann religion ki rapporte bann fruit pourri? Jésus ti donne sa l’avertissement-la: “Pou coupe tou pié ki pa rapporte bon fruit ek pou jette zot dan difé.” (Matthieu 7:19) Oui, pou coupe fausse religion ek pou detruire li! Mais couma sa pou arrivé, ek kan? Enn vision prophetik ki ena dan la Bible, dan livre Révélation chapitre 17 ek 18, donne nou la reponse.

Couma eski fausse religion pou fini?

Mazinn sa scene-la. Enn prostitué pé assizé lor ledo enn bête sauvage ki faire peur. Bête sauvage-la ena sept la-tête ek dix corne. (Révélation 17:1-4) Kisannla sa prostitué-la representé? Li ena l’influence “lor bann lé-roi ki lor la terre.” Li habillé en rouge violet, li servi l’encens, ek li extra riche. En plus, par so bann pratik spiritisme, ‘li pé mette tou bann nation dan l’erreur.’ (Révélation 17:18; 18:12, 13, 23) La Bible aide nou pou comprend ki sa prostitué-la li enn l’organisation religieux ki existé partout lor la terre. Li pa represente zis enn sel religion, mais plutot tou bann religion ki rapporte fruit pourri.

Sa bête sauvage lor ki sa prostitué-la été, represente bann puissance politik sa lé-monde-la.a (Révélation 17:10-13) La fausse religion inn assizé lor ledo sa bête sauvage politik-la, ek li pé essaye influence so bann decision ek dirige li.

Mais bientot, enn kitsoz incroyable pou arrivé. “Sa dix corne ki to finn trouvé-la, ek sa bête sauvage-la, zot pou ena la haine pou sa prostitué-la ek zot pou ravage li ek zot pou mette li touni, ek zot pou mange so la-chair ek zot pou brule li net dan difé.” (Révélation 17:16) Enn sel coup, bann puissance politik sa lé-monde-la pou tourne kont fausse religion ek zot pou detruire li net! Ki pou pousse zot pou faire sa? Livre Révélation reponn: “Bondié inn mette dan zot leker pou faire seki Li pensé.” (Révélation 17:17) Oui, Bondié pou demann fausse religion rann compte pou tou sa bann kitsoz degoutant ki li’nn faire lor So nom-la. Avek so justice ki parfait, Bondié pou servi system politik ki associé avek fausse religion, pou detruire li.

Ki ou bizin faire si ou pa’lé konn mem sort ki fausse religion? Messager Bondié dire nou: “Sorti ladan, mo peuple.” (Révélation 18:4) Oui, inn arrive l’heure pou sauvé, pou quitte fausse religion! Mais kot-sa ou kapav allé? Ou pa kapav arrete croire dan Bondié, parski pena okenn l’espoir pou bann ki pa croire dan Bondié aussi. (2 Thessaloniciens 1:6-9) Sel secours ki ena, trouve dan vrai religion. Couma ou kapav reconette vrai religion?

Couma pou reconette vrai religion

Ki bon fruit vrai religion bizin rapporté?​—⁠Matthieu 7:​17.

Vrai religion . . .

◼ MONTRÉ L’AMOUR: Bann ki pratik vrai religion “pa faire partie dan le monde.” Zot pa divisé ni par zot race ni par zot culture. Zot montré “l’amour entre zot.” (Jean 13:35; 17:16; Actes 10:34, 35) Zot pa touye zot camarade; au contraire zot tellement ena l’amour entre zot ki zot paré pou mort pou zot camarade.​—1 Jean 3:16.

◼ ENA CONFIANCE DAN PAROLE BONDIÉ: Vrai religion pa base so l’enseignement lor “tradition” ek lor “bann commandement humain couma bann doctrine,” mais plutot lor Parole Bondié, la Bible. (Matthieu 15:6-9) Kifer? Parski “tou l’Écriture finn inspiré par Bondié, ek li utile pou enseigné, pou corrigé, pou mette bann kitsoz en ordre, pou discipliné dan la justice.”​—2 Timothée 3:16.

◼ FAIRE BANN FAMILLE VINN PLI SOLID EK FAVORISE ENN NIVEAU MORALITÉ KI HAUTE: Vrai religion montré bann missié couma pou ‘content zot madame couma zot prop lekor.’ Li aide bann madame pou ena ‘enn grand respé pou zot mari,’ ek li montré bann zenfant pou “obeir zot bann parent.” (Éphésiens 5:28, 33; 6:1) En plus, bann ki ena bann responsabilité bizin ena enn niveau moralité bien haute.​—1 Timothée 3:1-10.

Eski ena enn religion ki rempli sa bann condition-la? Livre La politique de l’Holocauste publié en 2001 en anglais, dire: “Si ti ena plus dimoune ki ti suive l’enseignement bann Témoins de Jéhovah ek ki ti vive couma zot, ti pou kapav inn evite l’Holocauste ek ti pou nepli ena bann genocide, setadir destruction total bann group dimoune.”

Dan 235 pays, bann Témoins de Jéhovah pa zis preche bann principe moral ki ena dan la Bible​—mais zot aussi applik sa bann principe-la dan zot la-vie. Nou encourage ou pou demann bann Témoins de Jéhovah pou aide ou aprann seki Bondié demann ou faire, pou ki ou kapav adore Li dan fason ki Li accepté. Asterla, inn arrive l’heure pou faire kitsoz. Pa tardé. La fin fausse religion pé kosté!​—Tsephania 2:2, 3.

Si ou envie gagne plus renseignement lor message la Bible ki bann Témoins de Jéhovah preché, pa hesité pou contacté zot lor l’adresse ki ena en-bas.

□ Mo demann enn copie brochure Contigne veillé!, sans okenn engagement.

□ Contacté moi pou enn l’etude la Bible gratis.

[Note]

[L’encadré page 3]

“Sorti ladan, mo peuple”

[L’encadré page 3]

La fausse religion ena l’influence “lor bann lé-roi ki lor la terre”