Bon religion li encourage pou ena l’amour pou nou prochain

LA Bible dire: “Enn kikenn ki pena l’amour li pa konn Bondié, parski Bondié Li l’amour.” (1 Jean 4:8, Bible en français courant) Alors, bon religion bizin encourage so bann membre pou ena l’amour pou zot prochain.

Beaucoup religion faire enn bon travail kan zot prend soin bann malade, bann vié dimoune, ek bann pauvre. Zot encourage zot bann membre pou suive conseil ki l’apotre Jean ti ecrire: “Si enn kikenn ena seki li bizin pou vive dan sa le monde-la, ek li trouve so frere dan le besoin mais sa pa faire li nanyin, couma li pou kapav ena l’amour pou Bondié? Mo bann zenfant nou bizin content: pa par bann parole ek bann discours, mais par bann action ek en verité.”—1 Jean 3:17, 18, Traduction officielle de la liturgie.

Mais, ki arrivé kan bann nation al laguerre? Eski zis kan ena la paix ki nou bizin suive commandement Bondié, ki dire “content nou prochain pareil couma nou-mem”? Eski nou nepli suive sa commandement-la kan enn politicien ou-soit enn le roi decide pou laguerre avek enn pays voisin?—Matthieu 22:39, Traduction Œcuménique de la Bible.

Jésus ti dire: “Si zot ena l’amour entre zot, alors tou dimoune pou koné ki zot mo bann disciple.” (Jean 13:35, Bible en français courant) A mesure ki ou reponn sa bann question ki suive-la, demann ou-mem: ‘Eski bann dimoune ki dan sa religion-la touletan montré l’amour envers tou dimoune, par zot bann parole ek aussi par zot bann action?’

SUJET: La guerre.

SEKI LA BIBLE ENSEIGNÉ: Jésus ti donne so bann disciple sa commandement-la: “Content zot bann l’ennemi; faire le bien envers bann ki ena la haine pou zot.”—Luc 6:27, Bible de Darby.

Kan bann soldat ti vinn arrete Jésus, l’apotre Pierre ti tire enn zarme pou defann Jésus. Mais, Jésus ti dire: “Remette to l’epée dan so place, parski tou bann ki servi l’epée pou mort par l’epée.”—Matthieu 26:52, Parole vivante.

L’apotre Jean ti ecrire: “C’est coumsa ki nou trouve difference entre bann zenfant Bondié ek bann zenfant diable: enn kikenn ki pa faire seki juste li pa pou Bondié, ni enn kikenn ki pa content so frere. En realité ala message ki zot finn tendé depuis commencement: nou bizin ena l’amour entre nou. Fodé ki personne pa suive l’exemple Caïn ki ti pou le diable ek ki finn touye so frere.”—1 Jean 3:10-12, Bible du Semeur.

QUESTION: Eski sa religion-la encourage so bann membre pou participe dan bann la guerre?

SUJET: Politik.

SEKI LA BIBLE ENSEIGNÉ: Apré ki certain ti trouve bann mirak ki Jésus ti faire, zot ti envie ki li prend part dan bann activité politik dan zot pays. Couma Jésus ti reagir? “Jésus, ki ti koné ki zot pou vinn prend li pou faire li vinn le roi, encore enn fois li ti sauvé pou al dan montagne tousel.”—Jean 6:15, Bible de Jérusalem.

Kan ti arrete Jésus ek ti mette enn fausse l’accusation lor li, ki soi-disant li pé leve enn rebellion kont gouvernement, li ti reponn: “Mo royaume pa sorti dan sa le monde-la. Si mo royaume ti sorti dan sa le monde-la, mo bann dimoune ti pou laguerre pou ki pa livré moi ar bann Juif. Mais mo royaume pa sorti ici.”—Jean 18:36, Bible de Jérusalem.

Kan li ti prié Bondié concernant so bann disciple, Jésus ti dire: “Mo finn donne zot to parole, ek le monde finn ena la haine pou zot parski zot pa pou sa le monde-la, couma moi mo pa pou sa le monde-la.”—Jean 17:14, Bible en français courant.

QUESTION: Eski sa religion-la suive l’exemple Jésus ek evite mele dan politik, mem si apré, bann politicien pou ena la haine pou so bann membre?

SUJET: Bann prejugé.

SEKI LA BIBLE ENSEIGNÉ: Kan bann premier dimoune ki pa ti Juif ek ki pa ti circonci ti vinn bann chretien, l’apotre Pierre ti faire sa remark-la: “Bondié pa faire preference, ek dan tou nation dimoune ki ena la crainte ek pratik la justice, Li accepté li.”—Actes 10:34, 35, Segond 21

Jacques ti ecrire bann chretien premier siecle sa bann parole-la: “Mo bann frere, pa faire preference: sa li pa en accord avek la foi dan nou Seigneur Jésus-Christ ki rempli avek la gloire. Supposé ki enn zom ki finn mette enn linge extra joli, ek ena enn bague en or, rente dan zot reunion, ek enn pauvre avek bann linge usé rentré li aussi. Si couma zot trouve sa zom ki finn mette enn joli linge-la, zot degazé entoure li ek dire li: ‘Assize ou la, c’est enn bon place!’ Alors ki avek sa pauvre-la zot dire: ‘Ou, reste deboute ici, ou-soit assize ou en bas cote mo li pié,’ eski zot pa pé faire difference parmi zot ek eski zot pa pé faire bann fausse jugement ki basé lor bann mauvais raison?”—Jacques 2:1-4, Bible du Semeur.

QUESTION: Eski sa religion-la enseigné ki devant lizié Bondié tou dimoune egal ek ki fodé pa so bann membre faire discrimination envers enn kikenn ki enn lot race ou-soit a cause so situation financier?