Rezoud Problem-la Deswit ek Kontign Res Kamarad!

Anou pran enn lexanp. Fer koumadir to lezo inn kase. Pou ki to geri, to pou bizin al get enn dokter ki pou donn twa bann swin ki bizin. Si to pa pran lezo-la swin deswit, to pou kontign soufer. Anplis, lezo-la kitfwa pa pou rant dan so plas ek lerla zame li pa pou geri.

Parey kouma enn lezo ki’nn kase, si to lamitie avek enn kikenn inn kase, to bizin azir deswit pou fer lape avek li. Si to pa fer sa, to pou soufer parski to nepli pou ena enn bon lamitie avek li. Ek si to gard li dan leker, kitfwa zame to pa pou revinn kamarad ar li. Zezi inn dir: “Pa tarde pou regle bann problem.” (Mat. 5:25) Alor, avek bonte, al koz ar to kamarad ek dir li seki to resanti. Kifer sa kapav difisil? Anou get de rezon.

Premierman, kitfwa to pa anvi fer nanye pou rezoud problem-la parski to per pou koz lor la.b Anou pran lexanp Evodi ek Sintik, de ser ki ti ankoler ar zot kamarad. Kitfwa sa ti fer inpe letan ki zot ti ankoler ar zot kamarad parski mem lapot Pol ki ti lwin dan Rom ti aprann sa. Lerla, li ti ankouraz zot pou fer tou seki zot kapav pou fer lape. (Fil. 4:2) Zot ti pou kapav revinn kamarad si zot ti ena limilite, si zot ti ena enn bon kominikasion, ek si zot ti vremem pardonn zot kamarad.

Deziemman, kitfwa to atann ki dimounn-la aksepte so tor. Selman, li pli inportan ki to regagn enn bon lamitie ar to kamarad olie ki to esey kone kisann-la ena tor ouswa kisann-la ena rezon. Enn dokter ki pe okip enn kikenn ki so lezo inn kase, pou fer tou seki li kapav pou geri lezo-la olie ki li esey konn tou ti detay lor kouma lezo-la inn kase. Dan mem fason, kan to pe koz ar to kamarad, pa esey kone kisann-la ena tor. Olie sa, dir to kamarad ki kantite to kontan li, ek gete ki zot kapav fer pou ki zot regagn enn bon lamitie.

Alor, si to ena enn problem ar enn frer ouswa enn ser, koz ar li azordi mem, ek fer zefor pou regagn enn bon lamitie avek li. Labib dir: “Pa res ankoler ziska ki soley kouse.” (Efe. 4:26) Si to fer sa, to pou ede pou ki ena “lape” ant zot.—Efe. 4:1-3.