Respekte Bann Desizion ki Lezot Pran

1-2. Kifer bann desizion ki nou pran parfwa zot diferan ar bann desizion ki lezot frer ek ser pran?

ESKI enn kikenn inn deza ziz twa ouswa kritik twa? Ouswa eski to’nn deza kritik enn kikenn akoz enn desizion ki li’nn pran? Sirman nou tou nou kapav reponn wi pou sa de kestion-la, pa vre!

² Fode pa nou etone kan parfwa bann desizion ki nou pran, zot bien diferan ar bann desizion ki bann lezot frer ek ser pran. Kifer? Parski nou tou nou diferan. Sakenn parmi nou ena so prop fason panse. Nou tou nou pans dan diferan fason akoz nou kiltir, fason ki nou’nn grandi, ek bann lexperyans personel ki nou’nn fer. Selman, mem si nou tou nou pans dan diferan fason, fode zame ki nou les sa gat lamitie ki nou ena ar nou bann frer ek ser.—Efe. 4:3.

3. Kan enn kikenn pran enn desizion ar ki nou pa dakor, parfwa ki nou anvi fer?

³ Kan enn frer ouswa enn ser pran enn desizion ar ki nou pa dakor, kitfwa nou pou anvi dir li ki li bizin sanz so desizion, ouswa nou pou anvi dir lezot ki nou panse li’nn pran enn move desizion. Se parski nou ena bann bon lintansion ek ki nou gagn so traka ki nou anvi fer sa. Nou kontan nou bann frer ek ser, ek nou anvi ki zot ere. (Prov. 17:17) Akoz sa, nou pa anvi ki zot pran enn desizion ki zot regrete apre ouswa ki gat zot lamitie ar Zeova.

4-5. Ki nou bizin fer si enn kikenn pran enn desizion ki diferan ar desizion ki nou nou ti pou pran?

⁴ Si nou pa dakor ar enn desizion ki enn kikenn inn pran, eski nou bizin dir li seki nou panse lor la? Sa depann lor plizir kitsoz. Par exanp, si nou aprann ki li pe pans pou fer enn kitsoz ki Labib kondane, nou pou esey montre li seki Zeova panse lor la. Nou pou fer sa parski nou kontan li. (Prov. 27:5, 6) Me fer koumadir enn kikenn desid pou fer enn kitsoz ki pa kont bann lalwa Zeova. So desizion li zis diferan ar desizion ki nou nou ti pou pran. Ki nou bizin fer dan sa ka-la? Nou bizin swiv verse Labib ki nou text tem pou sa lartik-la, setadir “pa ziz bann ki pena mem lopinion ki [nou].”—Rom. 14:1.

⁵ Selman, nou kapav trouv sa difisil pou respekte so desizion. Dan sa lartik-la, nou pou trouve kifer nou bizin respekte bann desizion ki lezot pran, ek kouma nou kapav fer sa. Me pou koumanse, anou get sertin sitiasion kot nou bann frer ek ser pran bann desizion personel ek seki kapav pous nou pou kritik zot.

BANN DESIZION PERSONEL KI LEZOT PRAN EK SEKI KAPAV POUS NOU POU KRITIK ZOT

6-7. Sit bann lexanp kot nou kapav ziz lezot ouswa kritik zot pou bann desizion ki zot pran.

⁶ Kouma nou ti dir taler-la, akoz nou kiltir, fason ki nou’nn grandi, ouswa bann lexperyans ki nou’nn fer, nou kapav panse ki sertin kitsoz bizin fer dan enn sertenn fason. Ek nou kapav panse osi ki lezot bizin fer parey kouma nou. Selman, sa li pa vre! Anou get sertin lexanp. Lexanp 1: Avan ki li vinn dan laverite, enn frer inn grandi avek enn papa ki ti enn soular. Pandan enn ti fet, frer-la trouv bann lezot frer ek ser bwar lakol. Li bien ankoler ek li dir zot ki seki zot pe fer pa bon. Lexanp 2: Enn ser ki ti gagn enn maladi bien grav inn reisi geri. Plitar, li aprann ki enn lot ser inn gagn mem maladi ki li, ek li anvi ed sa ser-la. Alor, li met presion lor ser-la pou ki li pran mem medsinn ek ki li swiv mem tretman ki li. Lexanp 3: Enn frer ti dan enn lot relizion avan ki li vinn dan laverite. Azordi, li vremem anvi res lwin ar tou seki ena enn lien ar fos relizion. Me kan li aprann ki enn lot frer inn asiste enn lanterman dan enn legliz, li bien ankoler.a

⁷ Anou get de-trwa lexanp ankor. Lexanp 4: Enn frer inn grandi dan laverite lepok kot li pa ti korek ki bann frer gard labarb ek ki bann ser met bann pantalon klasik pou al renion, predikasion, ek lasanble. Mem si li kone ki finn ena bann sanzman konsernan sa bann kitsoz-la, li kontign dir bann frer ki zot bizin pa gard labarb, ek li dir bann ser ki zot bizin met bann zip ouswa bann rob kan zot fer zot bann laktivite spiritiel. Lexanp 5: Enn ansien ti konn enn frer ki ti al fer plis letid, me ki’nn kit laverite apre. Azordi, ena enn zenn frer dan so lasanble ki pe anvi fer plis letid. Ansien trakase ek li esey konvink frer-la ek so bann paran ki zot inn pran enn move desizion.

8. (a) Ki kitsoz kapav pous enn paran pou kritik bann lezot paran? (b) Si nou kritik ouswa nou ziz nou bann frer ek ser, ki lefe sa pou ena lor lasanble?

⁸ Anou get enn lexanp pou bann paran. Lexanp 6: To fer boukou zefor pou grandi to bann zanfan “dan disiplinn ek dan bann lavertisman Zeova.” (Efe. 6:4) Selman, dan to lasanble, ena bann paran ki les zot zanfan fer sertin kitsoz ki twa to pa dakor. Par exanp, zot les zot zanfan rant pli tar lakaz, ouswa zwe bann video game ki pa violan. Ena lezot paran ki les zot bann zenn zanfan ena enn telefonn portab. Akoz sa, to bann zanfan panse ki to tro strik, ek zot dir twa, “To pa kapav inpe plis kouma mo kamarad so bann paran?” Bann sitiasion koumsa kapav fer twa kritik sa bann lezot paran-la. Kan lezot Kretien pran bann desizion ki diferan ar bann desizion ki twa to pran, li kapav arive ki to ziz zot ouswa ki to ankoler. Par exanp, kitfwa to pou ena enn move lopinion lor fason ki zot depans zot larzan, bann vwayaz ki zot fer, ouswa fason ki zot amize. Selman, fode zame ki nou kritik ouswa ki nou ziz nou bann frer ek ser akoz lopinion ki nou ena lor zot, parski sa kapav gat lape ek linite ki ena dan lasanble.

9. Ki lobzektif nou tou nou ena, ek ki kitsoz fode pa nou fer? (Get zimaz osi.)

⁹ Mem si desizion ki nou pran li diferan ar desizion ki enn lot Kretien pran, sa pa vedir ki enn ena rezon ek ki lot ena tor. (Rom. 14:5) Kan Labib dir ki bann Kretien bizin “kontign ena mem fason panse,” li pe rod dir ki nou tou nou bizin swiv bann lalwa Zeova. Li pa pe rod dir ki nou tou nou bizin pans parey lor tou kitsoz. (2 Kor. 13:11) Nou kapav konpar bann desizion personel ki sakenn pran, ar diferan sime ki al mem destinasion. Sakenn kapav swazir enn sime ki li kontan ek ki pli bon pou li. Dan mem fason, mem si sakenn pran diferan desizion konsern mem kitsoz, nou tou nou ena mem destinasion ek lobzektif: Nou anvi fer Zeova plezir. Alor, fode pa ki nou ziz lezot pou bann desizion personel ki zot pran.—Mat. 7:1; 1 Tes. 4:11.

KIFER NOU BIZIN RESPEKTE BANN DESIZION KI LEZOT PRAN?

10. Dapre Zak 4:12, ki kitsoz nou pena drwa fer, ek kifer?

¹⁰ Labib donn plizir rezon kifer nou bizin respekte bann desizion personel ki lezot pran. Anou get sertin parmi zot. Dan bann domenn kot Labib pa dir nou seki nou bizin fer, nou pena drwa pou dir lezot seki zot bizin fer ouswa pa fer. (Lir Zak 4:12.) Se Zeova ki met bann lalwa ek se Li ki nou Ziz. Alor, se zis Li tousel ki ena drwa dir nou seki nou bizin fer ouswa pa fer. Kan nou bann frer ek ser pran bann desizion, se ar Zeova ki zot ena bann kont pou rande, pa ar nou. (Rom. 14:10) Kan lezot pran bann desizion ki diferan ar desizion ki nou nou ti pou pran, fode pa ki nou ziz zot ouswa ki nou kritik zot pou sa.b

11. Kouma nou kapav ede pou ki ena linite dan lasanble? (Get zimaz osi.)

¹¹ Zeova anvi ki ena linite parmi so bann serviter, selman sa pa vedir ki nou bizin fer tou kitsoz parey. Zeova bien kontan ki nou tou nou diferan. Se seki nou trouve kan nou get bann kitsoz ki Li’nn kree. Par exanp, mem si ena plizir fey lor enn pie, pena de fey ki parey. Dan mem fason, mem si ena plis ki wit milyar dimounn lor later, pena de dimounn ki parey ek ki ena mem personalite. Zeova inn kree nou tou diferan. Li pa anvi ki nou enn klonn ouswa enn kopi enn lot dimounn. Selman, Li anvi ki ena linite parmi nou. Alor, olie ki nou les nou bann diferans kree divizion parmi nou, nou bizin fer nou maximum pou ki ena lape. Pou nou, seki pli inportan, se pa seki nou nou panse ouswa seki nou nou kontan, me se ki ena linite dan lasanble.—Rom. 14:19.

RESPEKTE LOPINION LEZOT

12-13. Si nou panse ki enn kikenn pe fer enn kitsoz ki Labib kondane, ki nou bizin rapel? (Galat 6:1; get osi lankadre “Kan To Pa Dakor.”)

¹² Kan lezot pran bann desizion konsernan bann kitsoz personel. Demann tomem, ‘Eski li pe fer enn kitsoz ki Labib kondane, ouswa eski sa kitsoz-la li zis diferan ar seki mwa mo ti pou fer?’ Si li pe fer enn kitsoz ki Labib kondane, demann tomem, ‘Eski mo “kalifie lor plan spiritiel” pou ed li? Ouswa eski li pli bon ki enn lot dimounn ed li, kouma par exanp enn ansien?’ Si to “kalifie lor plan spiritiel” pou ed li, alor esey ed li, me fer sa avek “douser.” (Lir Galat 6:1.) Selman, bien souvan, bann desizion ki lezot pran, zot pa move, zot zis diferan ar desizion ki nou nou ti pou pran. Dan sa ka-la, fode pa ki nou ena bann dout lor sa dimounn-la ouswa ki nou kritik so desizion. Nou bizin respekte so drwa pou pran so prop desizion, ek fode pa ki nou ziz li.—Rom. 14:2-4.

¹³ Anou pran enn lexanp pou explik sa. Fer koumadir to al enn restoran ar to kamarad. Eski to pou persiste pou li manz mem manze ki twa? Non. Li ena drwa manz seki li anvi. To dakor ki li ena sa drwa-la, pa vre! Anplis, seki li manze, sa pa konsern twa. Si li ti dan to plas, eski to ti pou dakor ki li persiste ar twa pou to manz mem manze ki li? Non. Dan mem fason, nou montre ki nou ena respe pou lezot kan nou les zot pran zot prop desizion ek ki nou pa esey inpoz nou lopinion lor zot.

14. Kan to pran bann desizion konsernan bann kitsoz personel, kouma to kapav ede pou ki ena lape ek linite dan lasanble? (1 Korintien 8:12, 13)

¹⁴ Kan to pran bann desizion konsernan bann kitsoz personel. Kan to fer zefor pou pa ofans lezot, to ede pou ki ena lape ek linite dan lasanble. (Lir 1 Korintien 8:12, 13.) Ena fwa, kan to ena enn desizion pou pran, to kone ki to “gagn drwa” pran sa desizion-la parski pena nanye demal ladan. Selman, si sa pou ofans to frer, eski li vo lapenn ki to fer sa?c (1 Kor. 10:23, 24) Dan bann sitiasion koumsa, olie ki to dir ar tomem, ‘Mo gagn drwa fer seki mo anvi,’ li pou pli bon ki to pran kont santiman lezot. (Rom. 15:1) Li vre ki dan paragraf avan nou’nn dir ki lezot bizin respekte bann desizion ki nou pran konsernan bann kitsoz personel. Zot bizin respekte nou bann desizion, parey kouma nou nou bizin respekte zot bann desizion. Selman, dan bann sitiasion koumsa, li bon osi ki nou rapel konsey ki trouv dan Romin 12:18, ki dir: “Si posib, otan ki sa depann lor zot, viv anpe avek tou dimounn.” Alor, nou bizin fer tou seki nou kapav pou ki nou anpe ar lezot ek ki nou evit ofans zot.

15. Kouma bann ansien kapav ede pou ki ena lape ek linite dan lasanble? (1 Korintien 4:6)

¹⁵ Bann ansien montre respe kan lezot pran bann desizion. Kan bann frer ek ser ena bann desizion personel pou pran, bann ansien kapav ede pou ki ena lape ek linite dan lasanble. Kouma? Se kan zot pa met bann reg ouswa bann lalwa ki zot bann frer ek ser bizin swiv. Fode pa ki zot “al pli lwin ki seki finn ekrir” dan Labib. (Lir 1 Korintien 4:6.) Savedir osi ki zot bizin pa dir bann kitsoz ki pa an-akor ar bann piblikasion. Kan enn kikenn rod konsey ar bann ansien, bann ansien fer bien atansion pou pa dir seki zot zot panse. Olie sa, bann konsey ki zot done bizin sorti dan Labib.—Iza. 48:17, 18.

16. Kouma enn ansien kapav montre ki li respekte bann desizion ki komite ansien pran?

¹⁶ Enn ansien pou respekte osi bann desizion ki komite ansien pran. Avan ki enn komite ansien pran enn desizion, zot priye Zeova pou gagn so lespri sin ek zot reflesi bien lor seki Labib dir lor la. Ek apre ki zot inn pran zot desizion, sak ansien sa komite-la pou soutenir sa desizion-la, mem si kitfwa sakenn ti ena so prop lopinion lor la. (Efe. 5:17) Bann ansien fer bien atansion pou swiv bien bann instriksion ki Labib ek bann piblikasion done. Si zot ena enn lopinion lor enn kitsoz, zot pa pou esey trouv enn instriksion ki al dan mem direksion ki zot lopinion pou esey montre ki zot ena rezon. Par exanp, enn ansien pa pou tir enn fraz dan enn lartik dan enn piblikasion, pou esey montre ki li ena rezon ek ki bizin swiv so lopinion.

17. Ki benediksion nou gagne kan nou respekte bann desizion ki lezot pran?

¹⁷ Kouma nou’nn trouve dan sa lartik-la, nou tou nou diferan. Sakenn parmi nou ena so prop lopinion ek so prop fason fer bann kitsoz. Avredir, se akoz nou’nn grandi dan diferan fason ek ki nou ena diferan personalite, ki nou santi nou bien kan nou avek nou bann frer ek ser dan lasanble. Alor, olie ki nou les nou bann diferans kree divizion, nou bizin fer zefor pou ki ena lape. Nou bizin fer zefor osi pou pa ofans lezot, ek nou respekte bann desizion ki zot pran konsernan bann kitsoz personel. Kan nou fer sa, Zeova rekonpans nou bann zefor. Nou ere, ek ena lape ek linite dan lasanble.—Ps. 133:1; Mat. 5:9.