“Montre ki Zot Pare”
1 Dan so profesi remarkab konsernan la fin sa sistem-la, Zezi ti averti nu kont enn danze: se pu les nu absorbe par bann lokipasyon ki nu fer tulezur. (Mat. 24:36-39; Lik 21:34, 35) Nu pa kone ki ler gran tribilasyon kapav deklanse. Akoz sa li byin inportan ki nu pran kont sa lavertisman ki Zezi inn done-la: “Montre ki zot pare, parski se dan enn ler ki zot pa atann ki Fils de l’homme pe vini.” (Mat. 24:44) Ki kapav ed nu pu fer sa?
2 Kuma Lite Kont Bann Traka ek Bann Distraksyon: Enn parmi bann pyez spirityel kont ki nu bizin fer atansyon, se “bann traka pu bann nesesite lavi.” (Lik 21:34, not: moyens d’existence.) Dan sertin peyi, li difisil pu gayn bann nesesite lavi akoz la mizer, somaz ek lavi ki pe vinn pli ser. Dan lezot peyi, akerir bann dibyin materyel, sa li enn kitsoz byin kuran. Si nu tro konsantre lor bann kitsoz materyel, nu riske nepli gard nu latansyon fixe lor bann realite Rwayom Bondye. (Mat. 6:19-24, 31-33) Me, bann reynion pu ed nu dan sa domenn-la. Eski u fer u enn devwar asiste sak reynion?—Ebre 10:24, 25.
3 Zordi lemond ranpli ar enn kantite distraksyon. Sa bann kitsoz-la kapav fasilman fer nu perdi enn letan ki byin presye. Ordinater kapav vinn enn pyez pu enn kikenn ki pas enn kantite letan surfe lor Internet, lir ek anvoy E-mail, uswa zwe games. Nu kapav usi perdi enn kantite letan avek televizyon, sinema, pastan, lektir bann liv profann, ek spor. Lerla nu pa res buku letan ek lenerzi pu bann kitsoz spirityel. Alor ki detant ek distraksyon kapav fer nu dibyin pu inpe letan, letid personel ek familyal fer nu gayn bann byinfe eternel. (1 Tim. 4:7, 8) Eski u truv letan pu medit lor Parol Bondye tulezur?—Efe. 5:15-17.
4 Eski nu pa bizin rekonesan ki lorganizasyon Zeova inn prevwar enn program linstriksyon spirityel pu nu profi? Wi, grasa sa linstriksyon-la, nu pu ‘reysi sape dan tu bann kitsoz ki bizin arive, ek nu pu kapav debut devan Fils de l’homme.’ (Lik 21:36) Donk, anu profit sa program-la otan ki nu kapav ek anu ‘montre ki nu pare’ pu ki par nu lafwa, kapav ena “luanz, la glwar ek loner pandan revelasyon Zezi Kris.”—1 Pyer 1:7.