Get Byin Kuma U Pe Servi U Letan!
1. Ki difikilte bann dimunn pe gayne zordi?
1 Malgre ki nu anture ar enn kantite laparey ki fer nu ekonomiz letan ek zefor, li paret ki dimunn ena tuzur plis kitsoz pu fer dan enn tigit letan mem. Eski li difisil pu u gard enn bon program pu bann aktivite spirityel? Eski u ti pu kontan ena plis letan pu la predikasyon? Ki meyer fason nu kapav servi nu letan?—Ps. 90:12; Phil. 1:9-11.
2, 3. Ki danze la technologie informatique kapav reprezante, ek kuma sakenn kapav egzaminn so sityasyon personel?
2 Gete Ki Kitsoz Pe Fer U Perdi Letan: Nu tu detanzantan nu bizin gete kuma nu servi nu letan. La Bib rekomann nu: “Fer byin atansyon ki zot manyer marse pa kuma bann dimunn ki pena sazes me kuma bann dimunn saz, reaste letan favorab, parski bann zur byin move.” (Éph. 5:15, 16) Anu gete kuma la technologie informatique kapav vinn enn danze. Mem si bann computer ek lezot laparey elektronik ena zot litilite, zot kapav vinn enn pyez si nu pa fer atansyon kuma nu servi nu letan.—1 Cor. 7:29, 31.
3 Nu tu bizin poz nu sa bann kestyon-la: ‘Eski tulezur mo pas mo letan lir ek reponn tu ti E-mail ki mo gayne? Eski mo perdi letan lor telefonn uswa mo avoy bann mesaz initil lor mo portab? (1 Tim. 5:13) Eski pu nanyin-pu nanyin mo nek al lor Internet uswa mo sanz-sanz chaîne televizyon? Eski bann jeux elektronik finn kumans pran plas mo letid de la Bib?’ San ki nu rann nu kont, sa bann kitsoz-la kapav rwinn nu la sante spirityel.—Prov. 12:11.
4. Ki sanzman enn zenn finn fer, ek pu ki rezon?
4 Servi U Letan Kuma Bizin: Bann laparey ek gadget elektronik ena tandans pu pran buku nu letan ek nu latansyon. Get seki enn zenn ki ti vinn esklav bann jeux elektronik ti rekonet: “Defwa, kan mo ti zwe game avan al predikasyon uswa reynion, ti byin difisil pu mo konsantre. Suvan mo lespri ti ankor dan zwe, mo ti pe sey panse kuma mo pu sirmont bann obstak dan sa game-la enn fwa ki mo rant lakaz. Mo ti negliz mo lektir de la Bib ek mo letid personel. Mo ti kumans perdi mo lazwa dan servis Bondye.” Kan li’nn realize ki li bizin fer bann sanzman, li’nn efas tu game lor so computer. Li rakonte: “Li pa ti fasil ditu, zame mo ti krwar ki mo ti pu vinn esklav games sa kantite-la. An mem tan, mo’nn resanti kumadir mo’nn fer enn viktwar parski mo ti kone mo’nn fer seki bon pu mwa.”—Mat. 5:29, 30.
5. Kuma nu kapav reaste letan pu bann kitsoz spirityel, ek ki profi nu pu tire?
5 Sirman u’si, u pu bizin fer bann sanzman dan sertin domenn. Eski u kapav reaste 30 minit par zur dan letan ki u pe donn bann laktivite ki mwin inportan? Se apepre sa kantite letan la mem ki bizin par zur, pu lir la Bib antye dan enn lane. Sa pu vremem enn benediksyon spirityel! (Ps. 19:7-11; 119:97-100) Etabli enn ler fix pu lir la Bib, prepar bann reynion, ek al prese. (1 Cor. 15:58) Sa pu permet u vey lor bann kitsoz ki fer u perdi letan ek pu ed u “kontiyn konpran ki vedir volonte Jéhovah.”—Éph. 5:17.