Kisannla bizin enseigne bann zenfant lor Bondié?
“Enn zeleve pa pli grand ki so enseignant, mais n’importe kisannla ki gagne enn l’instruction couma bizin, pou vinn pareil couma so enseignant.”—LUC 6:40.
CERTAIN parent pa senti-zot assez qualifié pou enseigne zot bann zenfant lor Bondié. Kitfois zot pensé ki zot pena assez l’education ou-soit ki zot pa assez konn kitsoz lor la religion pou vinn bann bon enseignant. Alors, zot kapav ena tendance pou laisse sa travail bien important-la ar enn membre la famille ou-soit ar enn chef religieux.
Mais kisannla ki vrai-mem plus qualifié pou enseigne bann zenfant bann verité spirituel ek bann principe moral? Examine seki la Bible dire lor sa sujet-la, ek compare sa avek seki bann ki faire recherche finn decouvert.
Ki role enn papa?
Seki la Bible enseigné: “Zot bann papa, pa pousse zot zenfant pou en colere, mais elevé zot dan l’education ek l’instruction nou Seigneur.”—Éphésiens 6:4, “Holman Christian Standard Bible.”
Seki bann ki faire recherche finn decouvert: Ki bienfait bann papa pou gagné si zot developpe bann croyance religieux bien solide? Lartik Engagement religieux du père et comportement du jeune enfant, publié en 2009, ti dire: “Kan bann zom implik-zot dan enn religion, sa kapav aide zot pou vinn bann pli bon papa. Enn religion kapav aide bann dimoune lor plan social, ek bann l’enseignement ek bann principe ki li donné kapav montré zot couma zot bizin amenn zot la vie.”
La Bible donne beaucoup l’importance lor role ki enn papa ena pou elevé ek forme so bann zenfant. (Proverbes 4:1; Colossiens 3:21; Hébreux 12:9) Eski sa conseil-la li appliké dan nou lepok? En 2009, l’université Floride ti publié enn lartik ki ti examine l’influence ki bann papa ena lor zot zenfant. Bann ki faire recherche ti decouvert ki bann zenfant ki zot papa ti bien impliké dan zot l’education, ti ena plus tendance pou comprend lezot ek ti ena enn pli bon l’opinion lor zot-mem. Bann garson ti ena enn pli bon conduite, ek bann tifi ti ena enn pli bon la santé mental. Oui, conseil ki ena dan la Bible toujours appliké dan nou lepok.
Ki l’importance role enn mama?
Seki la Bible enseigné: “Pa abandonne la loi to mama.”—Proverbes 1:8.
Seki bann ki faire recherche finn decouvert: En 2006, livre Handbook of Child Psychology ti dire: “En moyenne, bann mama passe entre 65 ek 80 pour cent plus le temps ki bann papa pou koz avek sakenn so bann zenfant. Sa chiffre-la pareil dan beaucoup pays.” Grace a sa quantité le temps ki enn mama passé avek so zenfant-la, so bann parole, so bann action ek so l’attitude, ena enn grand l’effet lor developpement so zenfant.
Kan enn mama ek enn papa travail ensam pou enseigne zot zenfant la verité lor Bondié, zot donne zot zenfant au moins deux cadeau ki ena valeur. Premier cadeau, bann zenfant-la gagne l’occasion pou developpe l’amitié avek zot Papa ki dan le ciel, enn l’amitié ki kapav faire zot gagne bann bienfait toute longue zot la vie. Deuxieme cadeau, bann zenfant aprann par l’exemple zot parent couma enn mari ek enn femme bizin cooperé pou reussi realise bann l’objectif important. (Colossiens 3:18-20) Mem si lezot kapav aide enn papa ek enn mama, c’est bann parent ki ena responsabilité pou enseigne zot zenfant lor Bondié ek lor fason ki Bondié envie enn famille vive.
Alors, couma bann parent bizin enseigne zot zenfant? Ki bann methode ki kapav pli efficace?