Ki bann zenfant bizin aprann?
“Tou l’Ecriture li inspiré par Bondié, ek li utile pou enseigné, pou corrigé, pou mette bann kitsoz en ordre, pou discipliné dan la justice.”—2 TIMOTHÉE 3:16.
BIZIN enseigne bann zenfant la verité lor Bondié. Kot-sa zot kapav aprann sa la verité-la? Dan livre sacré ki pli respecté dan le monde, la Bible.
La Bible li couma enn lettre ki sorti kot Bondié. Dan sa lettre-la, Bondié faire nou konn so personnalité ek donne tou so bann zenfant, jeune ek vié toulé-deux, enn direction lor plan moral. Guette certain l’enseignement ki ena dan la Bible ek bann leson ki mem bann ti zenfant kapav aprann ar sa bann l’enseignement-la.
Ki Bondié envie nou koné lor Li?
◼ Seki la Bible enseigné: “Toi, ki appel Jéhovah, to tousel Pli Grand lor la terre entier.”—Psaume 83:18.
Leson: Bondié Li pa zis enn la force mais Li enn Personne réel ki ena enn nom personnel.
◼ Seki la Bible enseigné: “Jéhovah examine tou bann leker ek Li discerne tou tendance bann pensée. Si to rod Li, Li pou laisse toi trouve Li.”—1 Chroniques 28:9.
Leson: Jéhovah interessé ar nou tou, ar bann ti zenfant aussi. (Psaume 10:14; 146:9) Li envie ki nou aprann konn Li.
◼ Seki la Bible enseigné: “Fodé pa zot faire dominere ar okenn . . . zenfant ki pena papa. Si zot faire dominere ar li dan n’importe ki fason, lerla si li appel moi au secours, mo pou vrai-mem tann li criyé.”—Exode 22:22-24.
Leson: Jéhovah ecoute la priere mem bann ti zenfant. Nou kapav koz ar Bondié regulierement ek dire Li nou bann pensée ek nou bann sentiment ki pli profond.
◼ Seki la Bible enseigné: “Plusieurs fois, zot ti testé Bondié, oui, zot ti faire Saint Israël la peine.”—Psaume 78:41.
Leson: Nou bann parole ek nou bann action ena enn l’effet lor bann sentiment Jéhovah, alors nou bizin bien reflechi avant nou kozé ek avant nou faire kitsoz.
Couma nou bizin traite bann dimoune ki different avek nou?
◼ Seki la Bible enseigné: “Bondié pa faire preference, mais dan n’importe ki nation, dimoune ki ena la crainte pou Li ek ki pratik la justice, Bondié accepté li.”—Actes 10:34, 35.
Leson: Si Bondié accepté bann dimoune different l’origine, fodé pa ki nou faire preference ek nou pensé ki zot inferieur ar nou zis parski zot pena mem couleur la peau ek mem trait ki nou.
◼ Seki la Bible enseigné: “[Zot bizin] toujours pré pou defann-zot devant tou dimoune ki demann zot kifer zot ena sa l’esperance-la, mais faire li avek douceur ek enn grand respé.”—1 Pierre 3:15.
Leson: Kan nou pé koz lor la religion, nou bizin dire seki nou pensé avek l’assurance mais sans ki nou offense lezot. Nou bizin aussi montré respé envers bann dimoune ki pena mem croyance religieux ki nou.
Couma nou bizin traite bann membre nou famille?
◼ Seki la Bible enseigné: “Zenfant, obeir zot parent dan tou kitsoz, parski sa faire le Seigneur plaisir.”—Colossiens 3:20.
Leson: Bann zenfant ki obeir pa zis montré ki zot content zot parent mais aussi ki zot envie faire Bondié plaisir.
◼ Seki la Bible enseigné: “Contigne supporte sakenn so camarade, ek si kikenn ena enn kitsoz kont enn lot, li bizin pardonne li avek tou so leker. Pareil couma Jéhovah inn pardonne zot avek tou so leker, faire pareil zot aussi.”—Colossiens 3:13.
Leson: Parfois, nou pou deçu avek bann lezot dimoune, parmi ena bann membre nou famille. Mais si nou envie ki Bondié pardonne nou, nou bizin aprann pou pardonne lezot.—Matthieu 6:14, 15.
Kifer nou bizin honnete ek bon?
◼ Seki la Bible enseigné: “Arrete koz menti, [ek] sakenn parmi zot, dire la verité so prochain.”—Éphésiens 4:25.
Leson: Kan nou dire la verité, nou imite Bondié ek nou faire Li content. Si nou prend l’habitude pou koz menti, nou vinn pareil couma l’ennemi Bondié, Satan le Diable, ki la Bible appel “papa mensonge.”—Jean 8:44; Tite 1:2.
◼ Seki la Bible enseigné: “Traite lezot pareil couma ou envie ki zot traite ou.”—Matthieu 7:12, “Contemporary English Version.”
Leson: Nou bizin prend compte sentiment, pensée, ek besoin bann membre nou famille ek lezot dimoune dan nou l’endroit. Kan nou ’mette-nou dan place’ lezot, zot pou pli kapav traite nou avek bonté.—1 Pierre 3:8; Luc 6:38.
Pareil couma sa bann l’exemple-la montré, bann leson ki ena dan la Bible kapav aide bann zenfant pou ena reconnaissance, respé, ek vinn bann adulte ki comprend lezot. Mais kisannla bizin enseigne sa bann leson-la bann zenfant?