Bon religion li encourage pou ena respé pou Parole Bondié

JÉSUS ti aide bann dimoune pou augmente zot respé pou Parole Bondié, la Bible. Nou trouve sa par fason ki li ti reponn kan le Diable ti tente li. (Matthieu 4:4-11) Par exemple, couma eski Jésus ti reagir kan Satan ti defié li pou faire bann roche vinn di-pain? Jésus ti rejette sa tentation-la kan li ti cite bann parole inspiré ki Moïse ti ecrire, ek ki nou kapav lire dan Deutéronome 8:3. Ek kan le Diable ti propose Jésus pouvoir lor tou bann gouvernement sa le monde-la a condition ki li adore li zis enn sel fois, ki Jésus ti reponn li? Li ti refuse sa l’offre-la kan li ti cite enn principe ki ou kapav trouvé dan Deutéronome 6:13.

Mazinn enn coup! Mem si Jésus ti prop garson Bondié, li ti touletan appuye li lor la Bible kan li ti pé enseigné. Ek pena doute ki jamais li ti pou permette ki tradition bann dimoune passe avant Parole Bondié. (Jean 7:16-18) Pourtant, beaucoup bann chef religieux dan lepok Jésus pa ti ena sa mem respé-la pou Parole Bondié. Kifer? Zot ti’nn commence trouve tradition bann zom pli important ki bann l’Ecriture sacré. Jésus, dan enn fason direct ti dire sa bann zom religieux-la: “Zot faire parole Bondié perdi tou so valeur a cause zot bann tradition. Bann hypocrite, Esaïe ti ena raison pou prophetise lor zot, kan li ti dire: ‘Sa peuple-la honore moi avek zot la levre, mais zot leker bien loin ar moi. C’est dan vide ki zot pé donne moi enn l’adoration, zot ki pé enseigne commandement bann dimoune couma bann doctrine.’ ”—Matthieu 15:6-9, Nouvelle Bible Segond.

Beaucoup religion, ki zot chretien ou-soit non, pretann ki zot ena respé pou la Bible. Pourtant, parmi tou sa bann religion-la comié ou koné abandonne tradition bann dimoune kan sa bann tradition-la pa en accord avek bann l’enseignement bien clair ki ena dan Parole Bondié? Anou guette zis deux l’exemple.

SUJET: Bann titre religieux.

SEKI LA BIBLE ENSEIGNÉ: Jésus ti condamne bann chef religieux dan so lepok parski zot ti content pou gagne bann titre ek gagne grandeur. Li ti dire ki sa bann zom la ti content “assize dan place pli important dan bann fête ek dan bann premier place dan bann synagogue, zot content kan bann dimoune salué zot lor bann place publik ek kan zot tann bann dimoune appel zot ‘Rabbi.’ ” Mais Jésus ti dire so bann disciple: “Pa laisse lezot appel zot ‘Rabbi’: parski zot ena enn sel Maitre, ek zot tou zot bann frere. Pa appel personne ‘Père’ lor la terre: parski zot ena enn sel, le Père ki dan le ciel.”—Matthieu 23:1-10, Bible de Jérusalem.

QUESTION: Eski bann chef sa religion-la content ki appel zot par bann titre ki donne zot l’honneur ek zot rod gagne grandeur, ou-soit zot obeir commandement Jésus ek zot evite faire sa?

SUJET: Servi bann zimage dan nou l’adoration

SEKI LA BIBLE ENSEIGNÉ: “Fodé pa to faire okenn zidole, okenn zimage ki ressemblé bann kitsoz ki dan le ciel la-haut, ou-soit enba lor la terre, ou-soit dan de l’eau enba la terre. Fodé pa to prosterne devant sa bann zimage-la pou donne zot l’adoration.”—Exode 20:4, 5, La Bible de la Liturgie.

L’apotre Jean ti ecrire bann chretien: “Reste loin ar bann zidole.”—1 Jean 5:21, Osty.

QUESTION: Eski sa religion-la pé obeir commandement la Bible ki dire dan enn fason clair ki fodé pa servi bann zimage ek bann zidole pou adore Bondié?

Ou kapav trouve bon chemin

Malgré tou sa quantité different religion ki ena azordi-la, ou kapav trouve chemin ou-soit religion ki amenn vers la vie. Ena plusieurs kitsoz ki kapav aide ou pou identifié sa “religion ki pur ek ki pena tache devant lizié Bondié[-la].” (Jacques 1:27, Traduction Œcuménique de la Bible) Bann verset ki finn cité dan sa lartik-la zot couma bann panneau ki lor bann chemin, ki aide ou trouve sa bon religion-la.

Kifer ou pa demann bann Témoins de Jéhovah couma zot ti pou reponn sa bann question ki’nn soulevé dan sa bann lartik-la? A mesure ki ou pense lor seki zot dire, suive bon l’exemple bann Béréen ki ti vive dan premier siecle. Apré ki zot ti ecoute l’apotre Paul, “[zot] ti etudié bann l’Ecriture pou verifié si [so] bann parole ti exact.” (Actes 17:11, Bible en français courant.) Si pareil couma bann Béréen, ou ena respé pou Parole Bondié ek ou etudié li avek serieux, ou pou trouve chemin ki amenn vers la vie. Apré c’est ou ki pou choisir si ou pou marche lor sa chemin-la ou-soit non.