Ena enn le temps pou tou kitsoz

La Bible dire: “Pou tou kitsoz ena enn le temps fixé, oui enn le temps pou tou kitsoz ki arrivé lor la terre.” C’est le roi Salomon, ki ti enn kikenn bien sage ki ti ecrire sa bann parole-la. Li ti aussi ajouté ki ena enn le temps pou né ek enn le temps pou mort, enn temps pou construire ek enn le temps pou crasé, enn le temps pou content ek enn le temps pou ena la haine. Ek finalement li ti dire: “Ki l’avantage ena pou sa kikenn ki pé travail dur dan seki li pé faire-la?”—Ecclésiaste 3:1-9.

KAN certain dimoune lire sa verset-la zot tire conclusion ki vrai-mem la Bible enseigné ki tou kitsoz inn fini determiné a l’avance, setadir, zot pensé ki la Bible soutenir croyance dan enn destin. Eski sa li vrai? Eski vrai-mem la Bible soutenir l’idée ki tou kitsoz dan la vie controlé par destin? Parski “tou l’Ecriture finn inspiré par Bondié,” seki nou lire dan enn parti la Bible bizin en harmonie avek seki nou trouvé dan lezot parti la Bible. Asterla, anou guetté ki lezot partie Parole Bondié, la Bible, ena pou dire lor sa sujet-la.—2 Timothée 3:16.

Bann moment ek bann situation ki zot pa attann

Dan livre Ecclésiaste, Salomon finn aussi ecrire: “Mo’nn retourné pou trouvé ki lor la terre, c’est pa bann dimoune ki rapide ki gagne la course, ni bann ki fort ki gagne la guerre, ni bann dimoune sage ki gagne mangé, ni bann dimoune intelligent ki vinn riche, ni mem bann dimoune ki ena connaissance ki gagne faveur.” Kifer? Li ti dire: “Parski zot tou passe par bann moment ek bann situation ki zot pa attann.”—Ecclésiaste 9:11.

Salomon pa ti pé rod dire ki tou kitsoz ki arrivé dan la vie finn decidé a l’avance par enn destin. Li ti plutot montré ki bann dimoune pa kapav predire dan enn fason exact consequence n’importe ki action ki zot faire “parski zot tou passe par bann situation ki zot pa attann.” Souvent, enn kitsoz arrivé dan la vie enn dimoune zis parski li trouve-li dan bon place ek dan bon moment, ou-soit le contraire, setadir li trouve li dan mauvais place ek dan mauvais moment.

Anou prend par exemple, seki Salomon ti dire: “C’est pa bann dimoune ki pli rapide ki gagne la course.” Kitfois ou rappel ou-soit ou’nn deja lire seki ti passé pendant enn la course 3000 metre madame ki ti ena dan bann Jeux olympik dan Los Angeles, Californie en 1984. Parmi ti ena deux madame, enn ti represente l’Angleterre ek enn États-Unis, ek toulé-deux ti pé vise medaille l’or. Mais, lor la moitié la course, zot finn tape avek zot camarade. Enn inn tombé ek li’nn bizin abandonne sa la course-la, ek lot la ti’nn tellement decouragé ki li’nn sorti septieme.

Eski c’est a cause destin ki bann kitsoz finn arrive coumsa? Certain kapav dire oui. Mais li clair ki c’est parski sa deux athlete-la inn tape avek zot camarade—enn accident ki personne pa ti pou kapav koné a l’avance—ki’nn faire toulé-deux perdi sa la course-la. Mais, eski ti fini ecrire ki zot ti pou tape ensam? La aussi, certain kapav dire oui. Mais, bann ki ti pé faire commentaire finn dire ki si finn arrive sa accident-la, c’est parski ti ena enn grand competition entre sa deux grand athlete-la ek zot ti pé galope enn la course bien serré kot sakenn ti pé rod domine lor so camarade. Couma la Bible dire, “zot tou passe par bann moment ek bann situation ki zot pa attann.” Mem si enn dimoune finn bien prepare-li, ena toujours bann kitsoz ki kapav vinn affecté resultat ki ti pé attann, ek sa pena nanyin pou faire avek destin.

Alors, ki la Bible oulé faire nou comprend kan li dire: “Pou tou kitsoz ena enn le temps fixé”? Eski ena kitsoz ki nou kapav faire ki pou affecté nou la vie futur—nou destin?

Meilleur moment pou chaque projet

Sa kikenn ki finn ecrire sa bann verset la Bible-la, pa ti pé koz lor destin chaque dimoune en particulier ou-soit lor fason ki la vie enn dimoune bizin terminé. Plutot, li ti pé koz lor projet Bondié ek couma sa ti pou affecté bann dimoune. Couma nou konn sa? C’est seki contexte-la montré nou. Apré ki Salomon ti mentionne plusieurs kitsoz ki parette ti ena “enn le temps fixé,” li ti dire: “Mo finn trouve travail ki Bondié finn donne bann dimoune pou zot occupé. Tou kitsoz li’nn faire li joli dan so le temps.”—Ecclésiaste 3:10, 11.

Bondié finn donne bann dimoune beaucoup travail, ou-soit beaucoup kitsoz pou faire—Salomon ti cite certain sa bann travail-la. Bondié finn aussi donne nou liberté pou choisir seki nou envie faire. Mais pou faire chaque travail, ena enn moment ki pli bon ou-soit ki approprié, parski lerla, li produire bann meilleur resultat. Anou prend par exemple bann parole ki trouve dan Ecclésiaste 3:2, kot Salomon dire “ena enn le temps pou planté ek enn le temps pou rasse seki finn planté.” Bann planteur koné ki pou chaque plante ena enn bon moment pou seme li. Ki pou arrivé si enn planteur pa prend compte sa simple detail-la ek li seme enn plante dan mauvais moment ou-soit mauvais saison? Eski li pou jette tort lor destin si li pa gagne enn bon recolte, mem si li’nn travail dur? Pa ditou! Li simplement pa’nn seme plante-la dan ler ki ti bizin. Planteur-la ti pou gagne bann bon resultat si li ti suive bann kitsoz dan l’ordre naturel ki nou Createur finn etabli.

Alors, seki Bondié finn etabli, c’est pa destin bann dimoune ni resultat chaque situation, mais plutot certain principe ki dirige l’activité bann dimoune en rapport avek so projet. Si bann dimoune envie reussi dan seki zot envie faire, zot bizin bien konn projet Bondié ek so calendrier ek travail en harmonie avek sa. Seki finn decidé a l’avance ek ki pa kapav changé, c’est pa destin enn dimoune, mais plutot seki Bondié ena l’intention pou faire. Par prophete Isaïe, Jéhovah ti dire: “Mo parole aussi, ki sorti dan mo la bouche, li pa pou retourne vers moi sans resultat, mais vrai-mem li pou faire seki’nn faire moi plaisir, ek li pou reussi accompli seki mo’nn envoye li faire.”—Isaïe 55:11.

Alors, ki “parole” ou-soit ki projet ki Bondié inn dire, concernant la terre ek l’avenir bann dimoune, ki “pou reussi accompli”?

Comprend calendrier Bondié

Apré ki Salomon finn dire, “tou kitsoz Li’nn faire li joli dan so le temps,” pou donne enn indication li ti dire: “Mem l’eternité li finn mette dan zot leker, pou ki jamais bann dimoune pa decouvert travail ki vrai Bondié finn faire depuis commencement ziska la fin.” La Bible de Crampon (1905) traduire sa verset-la coumsa: “Li’nn mette aussi l’eternité dan zot leker, mais sans ki bann dimoune kapav comprend travail ki Bondié faire, depuis commencement ziska la fin.”—Ecclésiaste 3:11.

Finn ecrire beaucoup kitsoz lor sa verset-la. Mais seki ressorti dan sa verset-la c’est ki nou tou, enn moment dan nou la vie, dan pli profond nou leker, nou finn demann nou-mem ki but nou la vie ek seki pou arrive nou dan l’avenir. Pendant plusieurs siecle, bann dimoune inn toujours trouve sa difficile pou accepté ki deroulement la vie c’est zis travail dur pou kapav rempli zot bann obligation ek en dernier pou trouve la mort. Nou bann humain, nou unique parmi tou bann creature vivant parski nou pa zis pense lor nou la vie present, mais nou pense aussi lor la fin nou la vie ek plus loin encore. Nou mem souhaité ki nou kapav vive pou touletan, pou l’eternité. Kifer? Parski, couma la Bible expliké, Bondié inn ‘mette l’eternité dan leker bann dimoune.’

Pou satisfaire sa desir-la, bann dimoune inn attache-zot avek l’idée ki ena enn la vie apré la mort. Certain inn tire conclusion ki ena enn kitsoz dan nou ki contigne vive apré ki nou mort. Lezot croire ki nou pou contigne reprend naissance grace a reincarnation. Sinon ena lezot ki pensé ki tou kitsoz dan la vie inn fixé par destin ou-soit inn determiné a l’avance par Bondié ek nou pa kapav faire nanyin pou change sa. Malheureusement, okenn parmi sa bann explication-la pa finn vrai-mem satisfaire bann dimoune. Si sa coumsa, c’est parski couma la Bible dire, avek zot prop zeffort “jamais bann dimoune pa [pou] decouvert travail ki vrai Bondié finn faire depuis commencement ziska la fin.”

Pendant plusieurs siecle, sa grand conflit ki ena entre desir pou konn reponse ek difficulté pou gagne enn reponse, finn troublé bann grand-grand philosophe. Mais, parski c’est Bondié ki finn mette sa desir-la dan nou leker, eski li pa logik ki nou tourne vers Li pou ki Li donne nou seki nou bizin pou satisfaire sa desir-la? Apré tou, la Bible dire concernant Jéhovah: “To ouvert to la main, ek to satisfaire desir tou seki vivant.” (Psaume 145:16) Kan nou etudié Parole Bondié, la Bible, nou kapav trouve bann explication ki satisfaire nou concernant la vie ek la mort ek aussi concernant projet eternel ki Bondié ena pou la terre ek bann dimoune.—Éphésiens 3:11.

[Zimage lor page 5]

“C’est pa bann dimoune ki rapide ki gagne la course.”—Ecclésiaste 9:11

[Zimage lor page 6]

Si enn planteur pa seme dan bon moment, eski li pou jette tort lor destin pou so mauvais recolte?

[Zimage lor page 7]

Nou pense lor la vie ek la mort parski Bondié inn ‘mette l’eternité dan leker bann dimoune’