“Mo ler pa ti encore arrivé”

Enn chauffeur ki ti pé conduire enn gros camion saleté ti perdi controle so camion, li ti monte lor trottoir ek li ti tape ar trois dimoune, enn missié ek so madame, toulé-deux ti ena quarante-sept an, ek enn jeune homme vingt-trois an. Dapré enn journal dan New York, sa couple-la finn mort desuite ek jeune homme-la li, li’nn tombe sans connaissance. Kan jeune homme-la finn regagne connaissance ek li’nn comprend seki finn passé, so premier reaction ti: ‘Mo pa’lé croire seki finn arrivé. Ah Bondié, faire ki mo reussi sap ladan.’ Apré li ti dire: “Mo ler pa ti encore arrivé.”

KITFOIS ou aussi ou finn tann bann zistoire coumsa. Kan enn kikenn sap bien pré dan enn malheur, bann dimoune dire ki ‘so ler pa ti encore arrivé,’ mais kan enn dimoune mort dan enn fason ki pa normal, zot dire, ‘so ler ti’nn arrivé’ ou-soit ‘c’est volonté Bondié.’ Mem si zot dire ki seki finn arrivé c’est dapré so destin, so la chance ou-soit c’est Bondié ki’nn envie sa, en realité raisonnement-la li preské pareil. Beaucoup dimoune croire ki bann kitsoz ki arrive zot ek bann direction ki sa prend inn fini ecrire a l’avance ek ki zot pa kapav change nanyin. Sa qualité reaction-la nou pa trouve li zis kan enn dimoune mort ou-soit kan ena enn accident; ek aussi c’est pa enn kitsoz ki nouveau.

Par exemple, dan le passé, bann Babylonien ti croire ki bann zetoile ek zot mouvement ti ena enn l’influence lor la vie bann dimoune. Alors zot ti guette le ciel pou trouve bann signe ek bann prediction pou guide zot. Bann Grec ek bann Romain zot, zot ti adore bann déesse destin ki ti ena pouvoir pou predire si bann dimoune pou ena enn bon ou-soit enn mauvais l’avenir. Parfois, pouvoir sa bann déesse-la ti ena plus l’importance ki volonté Zeus ek Jupiter, ki ti zot bann bondié principal.

Dan l’Asie, bann hindou ek bann bouddhiste croire ki seki arrive enn dimoune asterla c’est consequence bann action ki li’nn faire dan enn la vie passé, ek ki bann action ki li pé faire asterla pou determiné ki pou arrive li dan so prochain la vie. Lezot religion—parmi ena bann l’eglise la chretienté—zot aussi, par zot bann l’enseignement lor predestination, zot accepté sa bann qualité croyance-la.

Zordi, nou pé vive dan enn societé moderne kot soit-disant bann dimoune base zot bann croyance ek zot bann l’opinion lor bann fait bien réel. Mais sa pa etonne nou ki malgré sa beaucoup encore croire ki zot situation la vie, seki arrive zot chaque jour, ek tou seki pou arrivé, li dirigé par enn destin ek ena bien tigit kitsoz zot kapav faire pou change sa. Eski c’est sa ou sentiment lor la vie? Eski bann evenement, bann ti kitsoz ki arrivé, bann reussite, bann la perte—mem naissance ek la mort—vrai-mem inn determiné a l’avance? Eski ou la vie, li dirigé par enn destin? Anou guetté couma la Bible kapav aide nou pou reponn sa bann question-la.

[Remerciement photo lor page 3]

Ken Murray/New York Daily News