Bann dimoune rod vrai la-lumiere spirituel
LAURA FERMI, madame enn grand scientifik, Enrico Fermi, ti dire: “L’ignorance jamais pli bon ki la connaissance.” Certain pa d’accord avek seki li’nn dire, parski dapré zot seki ou pa koné, jamais pa pou faire ou di-tort. Mais, pou la plupart dimoune, seki Laura Fermi ti dire, li vrai, pa zis dan domaine bann recherche scientifik mais aussi dan lezot domaine la vie. Pendant plusieurs siecle beaucoup dimoune inn vive dan l’ignorance dan domaine intellectuel, moral ek spirituel, parski zot pa ti konn la verité.—Éphésiens 4:18.
Ala kifer bann dimoune ki raisonne bien, rod comprend. Zot envie koné kifer nou existé ek ki pou arrive nou dan l’avenir. Zot finn essaye different fason pou zot kapav trouve la verité. Anou guette certain parmi sa bann fason-la.
La religion?
Dapré tradition bann bouddhiste, Siddhârta Gautama, fondateur zot religion, ti bien troublé kan li ti trouve dimoune souffert ek mort. Li ti demann bann enseignant religieux hindou pou aide li trouve “chemin la verité.” Certain ti conseil li faire yoga ek sacrifié tou so bann desir personnel. Finalement, Gautama ti choisir pou faire enn meditation profond.
Pou zot trouve vrai la-lumiere spirituel, lezot dimoune finn servi bann la-drogue ki ena enn l’effet lor zot cerveau. Par exemple, zordi, bann membre Native American Church dire ki peyotl—enn cactus ki ena enn l’effet lor cerveau ek faire gagne bann vision—li “faire konn bann kitsoz ki secret.”
Jean-Jacques Rousseau, enn philosophe français ki ti vive dan 18eme siecle ti croire ki n’importe ki dimoune sincere kapav gagne enn revelation spirituel personnel, si li demann sa Bondié. Rousseau ti dire ki dimoune-la nek ena pou ecoute “seki Bondié dire li dan so leker.” Alors, seki ou ressenti, setadir seki ou bann sentiment ek ou conscience dire ou, pou vinn “enn guide pli sur parmi tou sa different fason pensée ki bann dimoune ena-la.”—Histoire de la philosophie occidentale.
Capacité pou raisonné?
Beaucoup parmi bann ki ti vive mem lepok ki Rousseau pa ti d’accord ditou ki kapav trouve vrai la-lumiere spirituel par la religion. Par exemple Voltaire, enn lot français, ti pensé ki la religion pa finn eclaire bann dimoune. Au contraire, dapré li, religion-mem ki ti pli grand responsable sa l’ignorance, superstition, ek l’esprit fanatik ki ti existé dan l’Europe pendant sa longue period ki certain historien appel lepok tenebre-la.
Voltaire ti forme partie dan ‘philosophie la Lumiere,’ enn mouvement ki existé en Europe ek ki ti encourage bann dimoune pou fié lor zot capacité pou raisonné. Bann ki ti suive sa mouvement-la ti reprend bann ancien l’idée Grec—par exemple, ki raisonnement humain ek recherche scientifik zot deux kitsoz pli important pou kapav trouve la verité. Bernard de Fontenelle, enn lot membre sa mouvement-la, ti pensé ki raisonnement humain par li tousel pou tellement amenn l’humanité dan “enn siecle ki pou eclairé jour apré jour, ki tou [dimoune ki’nn vive dan] bann siecle avant pou passe pou bann dimoune ki pa ti konn nanyin.”— Encyclopædia Britannica.
Ena enn quantité different l’idée ki bann dimoune ena lor bann moyen pou trouve vrai la-lumiere spirituel. Ici nou finn presente zis dé-trois. Mais, eski vrai-mem ena enn ‘guide sur’ vers ki nou kapav tourné pou rod la verité? Prochain lartik pou koz lor la.
[Zimage, page 3]
Gautama (Bouddha), Rousseau, ek Voltaire ti prend different chemin pou trouve la lumiere