Couma pou trouve vrai la-lumiere spirituel

NOU le 18 décembre 1810. Pé commence faire noir. Bateau anglais HMS Pallas inn perdi lor enn la-mer demonté en dehors la cote sud-est l’Écosse. Pli allé pé faire pli noir, ek la neige pé tombé. Li pli difficile encore pou bann marin trouve bann signal phare pou zot kapav amenn zot bateau dan enn l’endroit kot zot pou en securité. Maziné ki quantité zot soulagé kan finalement, zot trouve enn la-lumiere, ek zot dirige zot bateau dan direction sa la-lumiere-la! Mais malheureusement, pa la lumiere phare sa. En realité, c’est difé ki bann travailleur inn allumé lor la cote. Bateau Pallas faire naufrage lor bann roche ek onze marin noyé. Enn zistoire bien triste, pa vrai?

Dan cas bateau Pallas, malheur ti arrivé a cause enn erreur. Mais parfois, bann marin ti faire face ar bann pli grand danger ki sa—bann fausse la-lumiere phare. Dapré livre Wrecks, Wreckers and Rescuers, expré bann voleur ti allume sa bann la-lumiere-la pou attire bann bateau lor bann la-cote kot ena roche. Lerla zot ti faire pillage lor sa bann bateau ki ti’nn faire naufrage-la.

‘Bann l’Écriture sacré ki pou faire ou gagne la vie sauve’

Kan ou pé rod la lumiere spirituel, ou trouve-ou devant bann danger ki pareil couma bann danger ki sa bann marin-la ti faire face. Li possible ki ou suive enn fausse l’information, ou-soit ki ou vinn victime bann dimoune ki trompe ou par expré. Toulé-deux chemin kapav amenn malheur. Ki ou kapav faire pou protege ou? Ou bizin sur ki ou source la-lumiere li vrai, ek ki ou kapav ena confiance ladan. Pendant plus ki 125 an, sa magazine-la finn presente Parole Bondié, la Bible, couma source la-lumiere spirituel en ki nou kapav ena plus confiance. Kifer? Parski ladan ena ‘bann l’Écriture sacré ki donne vrai sagesse ek ki faire [ou] gagne la vie sauve.’—2 Timothée 3:15-17, Semeur.

Bien-sur, pou ou kapav ena confiance ki la Bible li enn la-lumiere sur ki kapav guide ou, li logik ki ou verifié si li enn livre ki vrai. (Psaume 119:105; Proverbes 14:15) Pa hesité pou ecrire bann ki publié sa magazine-la pou gagne bann renseignement ki finn convaink bann million dimoune ki la Bible, li vrai-mem inspiré par Bondié. Par exemple, lire brochure Un livre pour tous.a Li presente beaucoup preuve ki montré ki la Bible li enn livre exact, vrai ek inspiré par Bondié.

Bann verité important

Anou guette certain l’enseignement important ki ena dan sa ‘bann l’Écriture sacré-la.’

Ena enn Bondié Tout-Puissant, enn Createur ki’nn faire tou kitsoz. (Genèse 1:1) Si nou existé c’est “parski [Bondié] finn crée tou kitsoz” ek finn donne nou la vie. (Révélation 4:11) C’est a cause sa ki Li tousel merite nou l’adoration. Nou Createur, Li-mem Source principal tou la-lumiere. (Psaume 36:9; Isaïe 30:20, 21; 48:17, 18) Li ena enn nom personnel ki Li envie nou servi. (Exode 3:15) Sa nom-la, ki ecrire dan bann lettre hébreu, ek ki dan nou bann lettre modern ecrire YHWH, apparette apepré 7,000 fois dan la Bible. Pendant bann centaine l’année ki’nn passé, en français, inn servi “Jéhovah.”—Psaume 83:18.

Jéhovah inn faire bann dimoune pou ki zot reste pou touletan dan enn paradi ici-mem lor la terre. Li finn donne bann dimoune bann qualité spirituel ki reflete so bann prop qualité. Li finn donne zot bann talent ek bann capacité ki pou permette zot profite la vie eternel lor la terre. (Genèse 1:26-28) Jéhovah pa ti crée la terre zis couma enn place kot dimoune pou gagne bann l’epreuve, pou testé zot ek guetté si zot merité pou vinn enn l’esprit dan le ciel, coumadir zis dan le ciel ki zot kapav ena enn relation avek Bondié.

Le mal pa ti existé dan bann humain kan Bondié ti crée zot. Sa ti commencé zis kan certain parmi bann creation Bondié—bann humain ek bann ange toulé-deux—ti mal servi liberté ki zot ena pou choisir ek zot ti rebelle kont Bondié. (Deutéronome 32:5) Alors ki zot pa ti ena sa droit-la, nou bann premier parent ti decidé par zot-mem seki bon ek seki mauvais. (Genèse 2:17; 3:1-5) Sa ti amenn la mort pou tou bann humain. (Genèse 3:19; Romains 5:12) Pou reglé bann question ki ti soulevé par la rebellion, Jéhovah ti decide pou laisse le mal existé pou inpé lé-temps. Mais so projet pou la terre ek pou bann dimoune pa finn changé. (Isaïe 45:18) Bann dimoune pou vive pou touletan dan enn paradi lor enn la-terre ki’nn purifié.—Matthieu 6:10; Révélation 21:1-5.

Jésus Christ li pa Bondié Tout-Puissant, mais Garson Bondié. Jésus Christ li-mem ti enseigne so bann disciple pou prié: “Nou Papa ki dan le ciel, ki to nom sanctifié.” (Matthieu 6:9) Jamais li’nn dire ki li egal ar Bondié. Au contraire, li ti dire: “[Mo] Papa pli grand ki moi.”—Jean 14:28.

Jésus joué enn role bien important dan realisation projet Bondié. Bondié ti envoye li couma “enn la-lumiere dan le monde, pou ki tou dimoune ki ena la foi en [li] pa reste dan noirté.” (Jean 12:46) Dapré l’apotre Pierre, “a part li, pena personne par ki nou kapav gagne la vie sauve.” (Actes 4:12) Sa li vrai parski pou nou gagne la vie sauve, sa depann lor di-sang Jésus ki ena enn grand valeur. (1 Pierre 1:18, 19) Jésus Christ ti donne so la-vie couma enn ranson pou delivré bann dimoune ar peché ki nou bann premier parent, Adam et Ève finn amené dan le monde. (Matthieu 20:28; 1 Timothée 2:6) Bondié finn aussi servi Jésus pou faire konn So volonté ek So projet.—Jean 8:12, 32, 46, 47; 14:6; Actes 26:23.

Bondié finn etabli enn Royaume, ou-soit enn gouvernement, dan le ciel kot Jésus Christ ek bann ki finn choisir parmi bann dimoune lor la terre, pou dirigé. Nou retrouve sa theme-la toute longue la Bible. Bondié finn confié sa gouvernement-la enn travail—veillé ki So volonté faire lor la terre pareil couma dan le ciel. (Matthieu 6:10) Au commencement, sa pa ti dan projet Bondié ki ena dimoune lor la terre ki al dan le ciel. Bann dimoune ti pou reste lor la terre. Mais apré ki nou finn tombe dan peché, Bondié ti decide pou faire enn kitsoz nouveau. Li ti prend disposition pou choisir bann dimoune “dan tou tribu, langue, peuple ek nation, . . . pou règne couma bann lé-roi” avek Jésus dan sa gouvernement ki’nn etabli dan le ciel-la. (Révélation 5:9, 10) Bientot, sa Royaume-la pou ‘crase ek pou fini’ tou bann different qualité gouvernement ki bann dimoune inn etabli, ek ki finn amenn sa quantité difficulté ek souffrance-la pou l’humanité.—Daniel 2:44.

Nou nâme pa contigne vive apré la mort. Sa l’enseignement biblik important-la faire nou comprend beaucoup kitsoz lor bann dimoune, ek seki pé attann zot dan l’avenir. Li tire aussi tou bann fausse l’idée ek bann fausse renseignement ki finn mette bann dimoune dan doute lor condition bann dimoune mort.

Premier livre la Bible dire nou: “Jéhovah ti forme zom avek la poussiere ki sorti dan la terre ek Li ti soufflé souffle la vie dan so nené, ek zom-la ti vinn enn nâme vivant.” (Genèse 2:7) Eski ou comprend seki sa vedir? Nâme li pa enn kitsoz invisible ki existé dan lekor enn dimoune. Bann dimoune pena enn nâme. Zot-mem zot enn nâme—enn melange bann element ki trouve dan “la poussiere ki sorti dan la terre” plus enn la-force la vie ki sorti kot Bondié. Nâme pa immortel. Kan enn dimoune mort, so nâme mort.—Genèse 3:19; Ecclésiaste 9:5, 10.

Bann ki finn mort kapav regagne la vie grace a la resurrection. Bondié inn laisse la mechanceté existé zis pendant enn lé-temps. Kan sa lé-temps-la fini, “tou bann dimoune ki dan tombe souvenir pou tann so la-voix [la voix Jésus] ek zot pou sorti. Bann dimoune ki finn faire bann bon kitsoz pou ressuscité pou gagne la vie, bann ki finn faire le mal pou ressuscité pou jugement.” (Jean 5:28, 29; Actes 24:15) La resurrection pou faire bann dimoune regagne la vie lor la terre ki pou vinn enn paradi. Zot pou gagne enn la-vie pareil couma seki Bondié ti envie pou bann dimoune dan commencement.

Examine bann l’Écriture en detail toulé-jour

Eski ou trouvé couma enn connaissance lor sa bann l’enseignement important-la kapav aide ou? Dan sa bann lepok critik ek difficile-la, sa qualité connaissance-la kapav protege ou kont ‘enn fausse “connaissance” ’ ki Satan le Diable pé fané partout. Li pretann ki li “enn ange la lumiere,” ek so bann agent faire zot passe pou “bann ministre la justice.” (1 Timothée 6:20, 2 Corinthiens 11:13-15) Dan sa lé-monde-la, ena “bann dimoune sage ek bann intellectuel” ki “finn rejette parole Jéhovah,” ek ki ena zot prop philosophie. Enn connaissance exact lor la Bible kapav protege ou kont sa soi-disant la-lumiere spirituel ki basé lor sa bann philosophie-la.—Matthieu 11:25; Jérémie 8:9.

Parski ti ena tellement beaucoup l’enseignement ek philosophie ki ti kapav trompe dimoune dan so lepok, l’apotre Jean ti donne bann chrétien premier siecle sa l’avertissement-la: “Pa croire tou parole inspiré.” Li ti dire: “Verifié bann parole inspiré pou guetté si vrai-mem zot sorti kot Bondié.” (1 Jean 4:1) Anou prend enn l’exemple. Si ou gagne enn message ki kapav change ou la-vie, eski ou pou accepté sa message-la coumsa, zis parski li parette ki sa sorti kot enn dimoune ki ou kapav faire confiance? Surement pa. Ou pou verifié kot sa message-la vrai-mem sorti ek ou pou analyse li bien avant ou faire seki li demann ou.

Kan Bondié finn faire ecrire enn livre kot ena bann verité important, Li finn donne ou possibilité pou faire sa-mem, setadir verifié si la lumiere ki ou pé suive li enn vrai la-lumiere. (1 Thessaloniciens 5:21) Dan premier siecle, bann dimoune ki ti ena l’esprit ouvert ti gagne felicitation parski zot ti ‘examine bann l’Écriture en detail toulé-jour’ pou zot sur ki seki zot ti pé aprann ti vrai-mem la verité. (Actes 17:11) Ou aussi ou kapav faire pareil. Laisse la Bible guide ou couma enn “la-lampe ki pé brillé dan enn place kot faire noir,” vers enn l’endroit kot ou pou en securité. (2 Pierre 1:19-21) Si ou faire sa, ou “pou trouve connaissance Bondié,” ki pou faire ou trouve vrai la-lumiere spirituel.—Proverbes 2:5.

[Note]

[Zimage, page 4]

Parole Bondié li couma enn la-lampe

[Zimage, page 5]

Couma Bondié appelé?

[Zimage, page 5]

Ki l’avenir ena devant bann dimoune?

[Zimage, page 6]

Eski Jésus li Bondié Tout-Puissant?

[Zimage, page 6]

Kot-sa bann dimoune mort été?

[Zimage, page 7]

La resurrection bann dimoune mort, li enn parmi bann l’enseignement important ki ena dan la Bible